Read Northwest Gbaya TOM 17 Bible Online

TOM 17 - Northwest Gbaya bible

TOM 17

¹O Paul in Silas ɓira yak nɛ̀ Amfipolis in Apolonii, ɓɛɛ wa hɔ Tesalonik fara nɛ̀ ŋma tua-mɔi̧a-a ko o Juif duk sɛnɛ.

²Tɛ̀ ta-oi-mɔ ko Paul, Paul nɛ̀ɛ̀ ye tua-mɔi̧a-a‘i, tɔ̧ nɛ̀ wen zaŋ Yɔramɔ ha̧ wa dam ɗoŋ wese-ɔm-tɛ taar lɛŋ hee mɔ'ɔ n'aa de ɓɔnsɛnɛ ga.

³A̧ wee ɗoŋ mɔ ha̧ wa tɔ̧ nɛnɛ‘e: «Mɛsii tɛ zɔk kànà bɔnɛ, ɓɛɛ zu-a'i, a̧ tɛ kur ŋgɔn tɛ fio. Mɛsii'i nɛ́ Jesu n'am tɔ̧ wen-aa h’ɛ́nɛ́'ɛ.»

⁴O ŋma bíí mgbara o Juif nɛ̀ dɔka-a in o gba gíí Grɛk nɛ̀ gasi Sɔ̧, ká bá nɛ̀ o ŋma tu̧u̧-tɛ okoo mbɛt kpɛka wen ko o Paul in Silas, ɓɛɛ nɛ́ ɗoŋ wa.

⁵See o Juif kura zu wa; nɛ́ mɔ'ɔ nɛ̀ wa nɛ̀ɛ̀ mɔi̧ o kokoɗo-wi nɛ̀ mgbara mɔ nɛnɛ, ɓɛɛ a wen ha̧ o giiwi mɛ dik gɛrɛm, de nɛ̀ foomɔ saaye. Wa nɛ̀ɛ̀ kii o Paul in Silas tɛ̀ ko Jasɔŋ mɛ kai wa nɛnɛ ti giiwi tɛ gasa mɔi̧a-a.

⁶Wa kpa o Paul in Silas sɛn hi̧i̧ na, ɓɛɛ wa ba Jasɔŋ in o ŋma nya-wi nɛ̀ ŋgai, gbur wa yaknɛ sitɛ o gasawi saaye, ɓɛɛ wa tɔ̧ nɛ̀ ŋgaya-a'e: «O wi-sakili-bíí nɛ̀ ha̧ ŋgazu ha̧ o bíí dam fara lɛŋ'ɛ, hɔɔ hɛ̧ɛ̧ kaɗi,

⁷nɛ́ mɔ'ɔ nɛ̀ Jasɔŋ kpɛka wa tɛ kɔ‘i! O wi nɔ‘i lɛŋ gbin nɛ́ heembea ko Sezar, wen wa'e ŋma wannu a̧a̧ sɛnɛ nɛtɛ, nɛ̀‘i sa'e Jesu.»

⁸Wen'i pi̧i̧ kíì tɛ giiwi in o gasawi saaye.

⁹Ɓɛɛ wa tɔ̧ ha̧ Jasɔŋ in o bíí ko Sɔ̧ mɛ yoɓi mɔ nɛti sɛka wa aa wa nù.

¹⁰O nya-wi foo Paul in Silas mɛ zɛ nɛ̀ haya-a yaknɛ si Beree. Wa hɔɔ hi̧i̧, ɓɛɛ wa nɛ́ɛ̀ ye tua-mɔi̧a-a ko o Juif.

¹¹O Juif mɛ́ Beree dee mɔ nɛ̀ de-a gan o wan mɛ́ Tesalonik, wen wa kpɛka wen ko Sɔ̧ nɛ̀ desee; ɓɛɛ dam ɗoŋ wese lɛŋ, wa tɔr nɛ́ o Yɔramɔ, ha̧ wa mɛ iŋ kà mɔ nɛ̀ Paul usi'i nɛ́ nyɛma ŋmaa in o Yɔramɔ nɔ‘i.

¹²O bíí nɛ̀ dɔka-a mgbara o Juif kɔ̧ɔ̧ ɗɔaa, in o tu̧u̧-tɛ okoo Grɛk, ká bá nɛ̀ o wiwii nɛ̀ dɔka-a mbɛt.

¹³O Juif mɛ́ Tesalonik zia'e Paul tɔ̧ nɛ́ wen ko Sɔ̧ sɛn Beree wó, ɓɛɛ wa nɛ́ɛ̀ a wen ha̧ o giiwi saaye'i sakali nɛ̀ wa.

¹⁴O nya-wi foo Paul nɛ̀ haya-a yaknɛ si ká̧ gba-tɔp mɛ, ɓɛɛ o Silas in Timotee ɓɔn kɔ‘i hi̧i̧.

¹⁵O wi nɛ̀ mgbɔɔ Paul nɛ̀ɛ́ in a̧ hɔ Atɛn mɛ, ɓɛɛ Paul e tom nú-wa tɛ sii ɗoŋ kɔ-wa, mɛ tɔ̧ ha̧ o Silas in Timotee'e wa a̧ nɛ́ ɗoŋ wi nɛ̀ haya-a si Atɛn.

¹⁶Tɛ́ ŋgimbi pɛma o Silas in Timotee sɛn Atɛn, Paul duka nɛ̀ ɗaŋsee nyɛmna, wen o géé-sɔ̧ dɔka saaye'i.

¹⁷A̧ duka tɛ tɔ̧ɔ̧ wen in o Juif ká bá nɛ̀ o wi-gasi-sɔ̧ sɛn kɔ̧́ tua-mɔi̧a-a, ɓɛɛ dam ɗoŋ wese lɛŋ a̧ nɛ̀ɛ̀ tɔ̧ wen sɛn bee-gara mɛ, ha̧ kóó o ndé n'aa kpa lɛŋ.

¹⁸O ŋma wi-iŋ-mgbara-mɔ nɛ̀ wa sa'e Epikur in o Stoik tɔ̧ɔ̧ wen in Paul. O ŋma tɔ̧a̧: «Nɛ́ ge a̧ yàá-bur-wen’ɛ kɔ̧ɔ̧ mɛ tɔ̧ ge?» O ŋma tɛ̀ɛ̀ tɔ̧ kɔ‘i'e: «Dúk hee wi’ɛ nɛ́ ŋma wi-tɔ̧-wen ko o ŋma gɔni-sɔ̧ ga.» Tɛ ŋgimbi'i, ɓɛɛ ká Paul tɔ̧ nɛ́ wen ko Jesu in wen kura-ŋgɔn tɛ fio.

¹⁹Nɛ́ mɔ'ɔ nɛ̀ wa baa a̧, mgbɔ a̧ nɛnɛ si gasa fara-mɔi̧-sɛnɛ nɛ̀ wa sa'e Aeropagɛ, ɓɛɛ wa ak a̧‘e: «Ɛ́ɛ́ kɔ̧ɔ̧ mɛ́ iŋ mgbara mbe usamɔ nɛ̀ mɛ ba tɛnɛ'ɛ.

²⁰Wen mɛ́ kpe nɛ́ zer yɛ nɛ̀ o gɔni taamɔ, ɓɛɛ ɛ́ɛ́ kɔ̧ɔ̧ mɛ iŋ mgbara-a nɛ̀ sa̧a̧-a̧.»

²¹(Tom-dee ko o be Atɛn in o be Grɛk nɛ̀ ya mgbara wa so nɛ́ tɔ̧ɔ̧ nyɛrɛ mbe mɔ, zii nɛnɛ ɓɛɛ.)

²²Nɛ́ mɔ'ɔ nɛ̀ Paul kura yor ti o bíí fara'i, ɓɛɛ tɔ̧: «Ɛ́nɛ́ o be Atɛn, mi zɔka ɛ́nɛ́ nɛ́ o bíí nɛ̀ gasi Sɔ̧ nyɛmna tɛ mɔ lɛŋ.

²³Ŋgimbi n'am yara saaye k’ɛ́nɛ́, mi zɔka o mboo-mɔ n’ɛnɛ gasi. Mi hɔɔ ŋma fara-ɗafi-sɔ̧ nɛ̀ yɔramɔ duka sɛnɛ‘e: ‹Ha̧ ŋma sɔ̧ nɛ̀‘i iŋ na.› Ɓɛɛ mɔ n’ɛnɛ gasi n’ɛnɛ iŋ na'i, a̧‘m tɛ̀ɛ̀ mɛ́ tɔ̧ h’ɛ́nɛ́‘i.

²⁴Sɔ̧ nɛ̀ dee yiwese in nù ká bá nɛ̀ o mɔ lɛŋ nɛ̀ ya sɛnɛ, nɛ́ Gasa Wan zu yiwese in nù, ɓɛɛ a̧ ɔ kɔ̧̀ o tua ko sɔ̧ nɛ̀ bíí dee nɛ̀ er na.

²⁵Mɔ ɓan a̧ sɛka bíí de tom nɛ̀ er ha̧ a̧ na, wen nɛ́ a̧ a̧ de ha̧ o bíí lɛŋ mɛ duk kpasa, ha̧ nɛ̀ ɔmi ha̧ wa in o mɔ lɛŋ.

²⁶A̧ dee ha̧ o dukbíí lɛŋ nɛ̀ ya zu nù'ɛ mɛ gbo nɛ̀ tɛ bíí kpɔk, ɓɛɛ a̧ gɔn ŋgimbi-duka-a in mgbara nù ha̧ wa.

²⁷Mɛ̀ nɛ́ wen ha̧ o bíí mɛ kii Sɔ̧, gbak na, wa kpaa a̧ tɛ kia a̧ nɛ̀ nú-tum; wen a̧ duk nyɛi̧ nɛ̀ ɛɛ kpɔk kpɔk na nɛ̀ mbetɛ.

²⁸Wen: ‹Ɛ́ɛ́ dúk kpasa wen a̧; nɛ́ a̧ a̧ ha̧ ŋgai foomɔ in duka-a h’ɛ́ɛ́,› hee mɔ'ɔ nɛ̀ o ŋma wi-bii-gima k’ɛ́nɛ́ tɔ̧ɔ̧ so ga'e: ‹Wen ɛ́ɛ́ nɛ́ o kpar-bíí kɔ̧-a̧.›

²⁹«Ɓɛɛ hee mɔ'ɔ nɛ̀ ɛ́ɛ́ nɛ́ kpar-bíí kɔ̧-a̧ ga, ɛ́ɛ́ beka ta'e ndé Sɔ̧ hɔɔ ŋmaa in lɔr, kóó bu-sede kà bó nɛ̀ ta nɛ̀ o bíí sɛk nɛ̀ er tɛ taamɔ kɔ‘i’ɛ na.

³⁰Sɔ̧ dee so ko ha̧ o bíí ŋgimbi nɛ̀ wa tɛ iŋ mɔ hɔ̧ɔ̧ na, ɓɛɛ kinii a̧ tɔ̧ ha̧ o bíí lɛŋ sɛn fara lɛŋ mɛ kpai duka-a kɔ-wa.

³¹A̧ gɔna wese n'aa tɛ gɔn nɛ̀ kita nɛ̀ yuwar-a zu nù'ɛ; nɛ́ bíí n'aa hoka a̧ tɛ gɔn gɔna kita'i. Sɔ̧ dee ha̧ wi’ɛi mɛ kur ŋgɔn tɛ fio nɛ̀ mɔɔ-sedaako mɛ́ usi ha̧ o bíí lɛŋ‘e, wen'i nɛ́ kpasawen nɛ̀ mbetɛ.»

³²Wa zia wen kura-ŋgɔn tɛ fio, ɓɛɛ wa zɛkɛɗi Paul, mam nɛnɛ, ɓɛɛ o ŋma tɔ̧ kɔ‘i'e: «Ŋma wese mɛ́ tɛ tɔ̧ wen zu mɔ‘i woyo h’ɛ́ɛ́ zíí.»

³³Ɓɛɛ Paul gbo yak e wa duk.

³⁴O ŋma bíí nɛ̀ɛ́ kànà ɗoŋ Paul, ɓɛɛ kɔ̧ ɗɔaa ha̧ Sɔ̧. Denis, gasa wi-duk-zu mɔi̧a-a kɔ̧ Areopage nɛ́ ŋma kpɔk mgbara o wi nɔ‘i, in ŋma okoo nɛ̀ nin-a'e Damaris, ká bá nɛ̀ o ŋma bíí woyo mbɛt.