Read Northwest Gbaya TOM 18 Bible Online

TOM 18 - Northwest Gbaya bible

TOM 18

¹Ɗoŋ nɛ̀ Paul kura Atɛn, a̧ yaka si Kɔrint.

²Ɓɛɛ a̧ kpa ŋma be Juif hi̧i̧, nin-a nɛ́ Akilas, be Pɔnt, nɛ̀ pia nɛ̀ nú Italii in kóò kɔ̧-a̧ Prisila, wen wannu Klod ha̧a̧ so heembea wen ha̧ o Juif mɛ gbo nù Rɔm, ɓɛɛ Paul nɛ si tɛ̀ kɔ-wa.

³Ɓɛɛ hee mɔ'ɔ nɛ̀ tom kɔ-wa kpɔk in o ŋmaa ga, Paul nɛ̀ɛ̀ duk tɛ̀ kɔ-wa de nɛ̀ tom, wen wa duka so nɛ́ o wi-fur-tua-laa.

⁴Paul tɔ̧ɔ̧ wen kɔ̧́ tua-mɔi̧a-a dam ɗoŋ wese-ɔm-tɛ lɛŋ, kii nɛ̀ yuwar ha̧ o Juif in o Grɛk mɛ kpɛk wen ko Sɔ̧.

⁵Ɓɛɛ ŋgimbi nɛ̀ o Silas in Timotee hɔɔ nɛ̀ Masedoan, Paul ha̧a̧ ŋgai-tɛ lɛŋ tɛ tɔ̧ɔ̧ wen ko Sɔ̧, tɔ̧ nɛnɛ ha̧ o Juif'e, Mɛsii nɛ̀‘i tɔ̧ nɛnɛ‘i nɛ́ Jesu.

⁶Wa kɔ̧ mɛ kpɛk wen ko Paul na, ɓɛɛ wa da̧ a̧. Paul ŋmasa laa tɛ ɓɛɛ tɔ̧ ha̧ wa: «Tɔk tɛ‘nɛ́ tɛ si ɗoŋ zu'nɛ́; kɔ‘m, wen bo zu'm na. Ɓɛɛ kinii mi tɛ yak kɔ‘m sitɛ o gɔni-dùk.»

⁷Paul yaka fara'i, ɓɛɛ nɛ́ si tɛ̀ ko ŋma wi-gasi-sɔ̧, nɛ̀ nin-a'e Titus Justus; tua kɔ̧-a̧ duka so mgbák ká̧ tua-mɔi̧a-a.

⁸Krispus, wi-duk-zu tua-mɔi̧a-a kɔ̧ɔ̧ ɗɔaa ha̧ Gasa Wan in o bíí kɔ̧̀ kira kɔ‘i lɛŋ; o dɔka be Kɔrint nɛ̀ zia wen ko Paul kɔ̧ɔ̧ ɗɔaa ha̧ Gasa Wan mbɛt, ɓɛɛ Paul zui wa.

⁹Ŋma wese Gasa Wan hɔɔ zu ha̧ Paul mɛ zɛ, ɓɛɛ tɔ̧: «Ká mɛ́ de kíì na, mɛ̀ tɔ̧́ wen'i siti, ɓɛɛ ká mɛ́ duk nɛ̀ oi nú-mɛ́ na.

¹⁰Mi a̧a̧ ɗoŋ mɛ, ŋma bíí beka tam tɛ-mɛ mɛ usi bɔnɛ ha̧ mɛ na. Wen mi a̧a̧ nɛ̀ o bíí kɔ‘m nɛ̀ dɔka-a saaye’ɛ.»

¹¹Paul duka hi̧i̧ pɛ kpɔk nɛ̀ fio-zɛ mɔɔrɔ-ɗoŋ-kpɔk usi nɛ̀ wen ko Sɔ̧.

¹²Ŋgimbi-wan ko Galiɔŋ tɛ zika-nú Akai, o Juif ee nú in o ŋmaa, sɛn nɛ̀ Paul, ɓɛɛ wa ba a̧ nɛnɛ ti kita.

¹³Ɓɛɛ wa tɔ̧: «Wi’ɛ a nɛ́ wen ha̧ o bíí k’ɛɛ mɛ gasi ŋma gɔni-sɔ̧ nɛ̀ yuwar heembea k’ɛɛ usi na.»

¹⁴Paul dee mɛ tɔ̧ wen, ɓɛɛ Galiɔŋ tɔ̧ ha̧ o Juif: «Ɛ́nɛ́ o Juif, kà Paul a̧ de so ŋma ɗaŋmɔ in ŋma bíí, kóó kà bó so nɛ́ ŋma gasa yɔɔ-kaya, ɓɛɛ mi tɛ̀ɛ́ zii wen k’ɛ́nɛ́.

¹⁵Ɓɛɛ hee mɔ'ɔ nɛ̀ záŋá-wen k’ɛ́nɛ́ duk nɛ́ zu ŋma usamɔ, in o nin, ká bá nɛ̀ o heembea k’ɛ́nɛ́ ga, i̧i̧ zɔk nɛ́ ɛ́nɛ́, mi beka kpɛk mɛ́ gɔn pɛrti kita hegɔ na.»

¹⁶Ɓɛɛ a̧ fo wa gbonɛ fara-kita.

¹⁷Nɛ́ mɔ'ɔ nɛ̀ wa lɛŋ tika zu Sostɛn wi-duk-zu tua-mɔi̧a-a, ɓɛɛ wa gus'a fara kita. Ɓɛɛ Galiɔŋ pi̧ nú tɛ wen'i na.

¹⁸Paul duka Kɔrint siti ɗoŋ-aa nyɛi̧. Nɛ́ mɔ'ɔ n'aa wara o nya-a̧, ɓɛɛ a̧ ye kombon yak si Sirii in Prisila ká bá nɛ̀ Akilas. A̧ kpuia zu-a sɛn Senkree wen ŋma ha̧a̧nú n'aa ha̧a̧ so.

¹⁹Wa hɔɔ Efɛz, nɛ́ mɔ'ɔ nɛ̀ Paul ee o gbama-yari-nɔ̀ kɔ‘i duk, ɓɛɛ yak si kɔ̧́ tua-mɔi̧a-a mɛ tɔ̧ wen ha̧ o Juif.

²⁰Wa tɔ̧ɔ̧ ha̧ Paul mɛ duk in wa ɗoŋ-aa nyɛi̧ benaŋ, ɓɛɛ a̧ bɛ̧.

²¹A̧ wara wa nɛ̀ wen’ɛ: «Kà Sɔ̧ nɛ́ kɔ̧a̧, ɓɛɛ mi tɛ pii ɗoŋ mɛ zɔk'nɛ́ ŋma wese.» A̧ yee kombon sɛn Efɛz

²²yak si Sezaree, ɓɛɛ a̧ daŋ nɛ́ɛ̀ fan zuduk bíí ko Krist sɛn Jerusalɛm, sɛka a̧ bé tɛ̀ɛ́ zir si Antiok.

²³A̧ duka hi̧i̧ ɗoŋ-aa nyɛi̧ tikiɗi, ɓɛɛ a̧ ba war ɓir nɛ̀ Galatii in nú Frigii, ha̧ nɛ̀ nɔɔ-ŋgiɗi ha̧ o ŋgaiwi ko Jesu lɛŋ.

²⁴Ŋma Juif be Alɛkzandrii, nin-a nɛ́ Apolos hɔɔ so Efɛz; a̧ nɛ́ ŋma wi-iŋ-mɔ nɛ̀ iŋa mɔ zaŋ o Yɔramɔ nɛ̀ de-a.

²⁵Wa usa so yuwar ko Gasa Wan ha̧ a̧, ɓɛɛ see-aa duk tɛ tɔ̧ɔ̧ wen ko Sɔ̧, usi nɛ̀ mgbák mɔ nɛ̀ yɔra wen Jesu nɛ̀ sa̧a̧-a̧. Tɛ́ mɔ‘i lɛŋ, a̧ iŋa nɛ́ zuia-bíí ko Jean ɓɛɛ.

²⁶A̧ ku̧u̧ naŋ tɔ̧ɔ̧ wen nɛ̀ nɔɔ-ŋgiɗi sɛn kɔ̧́ tua-mɔi̧a-a. O Prisila in Akilas zia tɔ̧ɔ̧-wen kɔ̧-a̧, ɓɛɛ wa mgbɔ a̧ si tɛ̀ kɔ-wa, wen ha̧ wa mɛ usi mgbák yuwar ko Gasa Wan ha̧ a̧ nɛ̀ sa̧a̧-a̧.

²⁷Hee mɔ'ɔ Apolos kɔ̧ɔ̧ mɛ yak si nú Akai ga, o nya-a̧ ha̧a̧ nɔɔ-ŋgiɗi ha̧ a̧, ɓɛɛ wa yɔr kalata ha̧ o ŋgaiwi ko Jesu mɛ kpɛk a̧ nɛ̀ de-a. Ɗoŋ n'aa hɔɔ hi̧i̧, zaŋ deemɔ nɛ̀ ta-tɛ ko Sɔ̧ ha̧ a̧, a̧ gbaka o wi nɛ̀ kɔ̧ɔ̧ ɗɔaa nyɛmna,

²⁸wen a̧ sii kafɛ in o Juif sɛn yí o bíí lɛŋ, usi nɛnɛ zaŋ o Yɔramɔ‘e, Jesu nɛ́ Mɛsii, ɓɛɛ wa kpa ŋma wen mɛ tɔ̧ na.