Read Northwest Gbaya TOM 2 Bible Online

TOM 2 - Northwest Gbaya bible

TOM 2

¹Wese gbaŋa Pantekot, wa mɔi̧a ŋmaa lɛŋ duk kpɔk fara.

²Kà wa tɛ zii wó, ɓɛɛ ŋma zɔm mɔ tuɓa nɛ̀ yiwese mɛ nɔ̧́í nɛnɛ piinɛ hee wan-wee ga, dun kɔ̧́ tua nɛ̀ wa ya sɛnɛ‘i.

³Ɓɛɛ wa zɔk ŋma mɔ hee leɓe-wee ga, nɛ̀ gɔna duk zu-wa kpɔk kpɔk.

⁴Wa lɛŋ duna nɛ̀ Sa̧a̧ Ɔmi, ɓɛɛ wa ku̧ naŋ tɔ̧ɔ̧ o gɔni-nú nɛtɛ nɛtɛ hee mɔ'ɔ nɛ̀ Sa̧a̧ Ɔmi usa ha̧ wa mɛ tɔ̧ ga.

⁵Ŋgimbi'i, o Juif nɛ̀ yu Sɔ̧ nɛ̀ tɛ̀ɛ̀ so nɛ̀ tɛ o tugun bíí nɛtɛ nɛtɛ zaŋnu yaa so Jerusalɛm.

⁶O giiwi nɛ̀ zia giti mɔ‘i, mɔi̧a nɛnɛ, ɓɛɛ wa sakali lɛŋ, wen kóó o ndé zia wa fara tɔ̧ɔ̧ wen nɛ̀ mgbák nú kɔ‘i.

⁷Kíì dee wa, ɗɛɗɛ-wa gɔna mbɛt, ɓɛɛ wa tɔ̧: «O wi nɔ'ɔ nɛ̀ tɔ̧ wen’ɛ bó nɛ́ o be Galilee lɛŋ na?

⁸Dee héé ge s’ɛɛ zii bɔɔ wa fara tɔ̧ wen nɛ̀ mgbák nú k’ɛɛ kpɔk kpɔk’ɛ ge?

⁹Wen sɛn mgbara yɛ'ɛ, o be Part a̧a̧ sɛnɛ, in o be Mɛd, in o be Elam, o bíí nú Mesopotamii, o be Judee, in o be Kapados, o be Pɔnt, o bíí nú Azii;

¹⁰o be Frigii in o be Pamfilii, o bíí Egiptɛ, in o be Sirɛn nú Libii, ká bá nɛ̀ o gɛnɛ nɛ̀ tɛ̀ɛ́ nɛ̀ Rɔm mbɛt;

¹¹o Juif in o wi-ndak-pata yuwar-ɗafa-sɔ̧ ko o Juif, o be Krɛt in o Arab mbɛt. Ɓɛɛ ɛ́ɛ́ lɛŋ zii nɛ́ wen gasamɔ nɛ̀ Sɔ̧ dea, nɛ̀ wa tɔ̧ nɛ̀ mgbák nú k’ɛɛ.»

¹²Wa sakala lɛŋ duk yelem, ɓɛɛ wa tɔ̧ sitɛ o ŋmaa: «Ɛ̧ɛ̧ mɔ'ɔ nɛ́ gba ge?»

¹³O ŋma zɛkɛɗa kɔ‘i wa'e ndé: «Nɛ́ dɔ̧ɔ̧ a̧ gbɛ wa.»

¹⁴Nɛ́ mɔ'ɔ nɛ̀ Pierre kura yor ŋgɔn in o betom ɓu-zua-kpɔk, ɓɛɛ tɔ̧ wen ha̧ o giiwi nɛ̀ hee-ger'e ndé: «Ɛ́nɛ́ o be Judee in o bíí Jerusalɛm lɛŋ, ɛ̀nɛ̀ yéŋ zer'nɛ́, ha̧‘m tɔ̧ gba̧a̧ mɔ nɛ̀ de’ɛ h’ɛ́nɛ́ zii.

¹⁵Bó nɛ́ dɔ̧ɔ̧ a̧ gbɛ o wi nɔ'ɔ hee ɛ́nɛ́ ta ga na, wen wese daŋa ɗoŋ-aa tɛ nyɛi̧ hɔ̧ɔ̧ na.

¹⁶Ɓɛɛ mɛ̀ nɛ́ wen nɛ̀ wi-tɔ̧-wen oi nú Sɔ̧ Jɔɛl tɔ̧ɔ̧ so a̧ hɔɔ gba̧a̧:

¹⁷‹Wen Sɔ̧ tɔ̧ɔ̧ so'e: Mɔ nɛ̀ tɛ hɔ sɔŋkur ŋgimbi nɛ́ mɔ'ɔ: Mi tɛ́ ha̧ Ɔmi kɔ‘m ha̧ o bíí lɛŋ. O bem k’ɛ́nɛ́ mɛ be-wiwii-a in o be-okoo-a, tɛ́ ya nɛ́ o wi-tɔ̧-wen oi nú Sɔ̧. Mi tɛ́ hɔ zu ha̧ o be-ŋgaiwi k’ɛ́nɛ́, ɓɛɛ o gbɛ́rɛ́ k’ɛ́nɛ́ tɛ ɔ zu.

¹⁸Ŋgimbi'i, mi tɛ́ ha̧ Ɔmi kɔ‘m ha̧ o wiwii in o kó-de-tom kɔ‘m, ɓɛɛ wa tɛ tɔ̧ wen oi nú Sɔ̧.

¹⁹Mi tɛ́ de o mɔɔ-gɔn-ɗɛɗɛ yiwese mɛ, in o mɔɔ-usi-mɔ zaŋnu’ɛ. Bíí tɛ́ zɔk tɔk, wee, in tura-zi-wee.

²⁰Wese tɛ́ ba tum, ɓɛɛ zɛ kifa tɔk, nɛti sɛka wese ko Gasa Wan hɔa. Mɛ̀ nɛ́ gasa wese nɛ̀ ɔ gasa,[1]

²¹ɓɛɛ kóó o ndé nɛ tɛ́ sa nin GASA WAN tɛ kpasi.›

²²«Ɛ́nɛ́ o be Israɛl, ɛ̀nɛ̀ zíí wen’ɛ! Nɛ́ Sɔ̧'ɔ̧ toma Jesu be Nazarɛt tɛnɛ h’ɛ́nɛ́, ɓɛɛ de o mɔɔ-gɔn-ɗɛɗɛ-wi, o mɔɔ-kifi in o mɔɔ-usi-mɔ mbɛt mgbara'nɛ́ nɛ̀ er-a, wen h’ɛ́nɛ́ mɛ iŋ a̧. Ɛ́nɛ́ iŋa mɔ‘i nɛ̀ tɛ‘nɛ́ hegɔ mbɛt.

²³Nɛ́ wi’ɛi ɛ́nɛ́ gbɛa, wen ɛ́nɛ́ ea a̧ er o wi-ɗaŋ ha̧ wa mɛ mgboi a̧ zu te-diŋa nyɛm nɛ̀ ɗoŋ mɔ nɛ̀ Sɔ̧ iŋa in mɔ n'aa ɗafa nɛti.

²⁴Nɛ́ mɔ'ɔ nɛ̀ Sɔ̧ kpasa a̧, gbo nɛ̀ a̧ tɛ bɔnɛ-fio yinɛ, wen ŋgai ko fio nyɛm mɛ dor a̧ ɓɔn kɔ̧́-fio na.

²⁵David tɔ̧ɔ̧ so wen wen-aa'e ndé: ‹Mi zɔk Gasa Wan ti'm ɓɔnsɛnɛ. A̧ duk nɛ̀ war wii-er-am, wen ká tɛ‘m tɛɛ nak.

²⁶Hegɔ mi duk nɛ̀ desee bíí nɛ̀ gima nɛ̀ tortɛ; ɓɛɛ kiitɛ‘m tɛ́ duk nɛ̀ de-a e nɛ̀ ta nɛ̀ ɛ́nɛ́,

²⁷wen ɛ́nɛ́ beka e ha̧‘m mɛ ɓɔn ye ko o fio na. Ɛ́nɛ́ beka e ha̧ sa̧a̧-bíí k’ɛ́nɛ́ mɛ mbɔr na mbɛt.

²⁸Ɛ́nɛ́ usa yuwar duka-kpasa ha̧‘m. Ɓɛɛ ɛ́nɛ́ tɛ́ de ha̧‘m mɛ duk in'nɛ̀ɛ́, ha̧‘m mɛ kpa desee.›

²⁹«O nya'm, ha̧‘m tɔ̧ wen’ɛ h’ɛ́nɛ́ nɛ̀ sa̧a̧-a̧, ɛ̀nɛ̀ zìì: zɔmdáa k’ɛɛ David fea, ɓɛɛ wa gun a̧, pɛsi kɔ̧-a̧ a̧a̧ mgbara yɛ hɔ sɔsɔɔ‘i.

³⁰A̧ duka so nɛ́ wi-tɔ̧-wen oi nú Sɔ̧, ɓɛɛ a̧ iŋ‘e Sɔ̧ ha̧a̧ nú ha'i nɛ̀ kanamɔ‘e ndé, wi tɛ de ha̧ kpɔk mgbara o bezaŋ-aa mɛ duk zu damti oi-aa.

³¹David iŋa so kura-ŋgɔn ko Mɛsii tɛ fio nɛti ɓeemɛ; nɛ́ mɔ‘i ɓɛɛ sa a̧ tɔ̧ nɛ̀ wen'e ndé: A̧ e a̧ ɓɔn fara ko o fio na, in kiitɛ-a mbɔr na mbɛt.

³²Wi’ɛi nɛ́ Jesu nɛ̀ Sɔ̧ kpasa tɛ fio; ɛ́ɛ́ lɛŋ nɛ́ o wi-sedaako-a.

³³Sɔ̧ baa a̧ si ŋgɔn nɛ̀ wii-er, ɓɛɛ Dáà ha̧ Sa̧a̧ Ɔmi ha̧ a̧ nyɛm nɛ̀ ɗoŋ ha̧a̧nú kɔ‘i; nɛ́ mɔ'ɔ n'aa ha̧a̧ Sa̧a̧ Ɔmi'i h’ɛ́ɛ́ mbɛt. Mɛ̀ nɛ́ mɔ‘i ɛ̀nɛ̀ zɔk in n’ɛ̀nɛ̀ zii kinii’ɛ.

³⁴David nɛ̀ tɛ-wi daŋ si yiwese na, ɓɛɛ nɛ́ mɔ'ɔ n'aa tɔ̧a̧‘e ndé: ‹Gasa Wan tɔ̧ɔ̧ ha̧ Gasa Wan kɔ‘m, mɛ̀ dúk nɛ̀ war wii-er-am,

³⁵hɔ ŋgimbi n'am tɛ de ha̧ mɛ mɛ kpa ŋgai zu o wisɛn kɔ-mɛ.›

³⁶«Ɓɛɛ ɛ́nɛ́, dukbíí Israɛl lɛŋ a̧ íŋ nɛ̀ sa̧a̧-a̧‘e ndé, mɛ̀ nɛ́ Jesu n’ɛnɛ mgboia zu te-diŋa a̧ Sɔ̧ ee nɛ̀ Gasa Wan in Mɛsii mbɛt.»

³⁷See-wa ŋmana tɛ wen'i, ɓɛɛ wa tɔ̧ ha̧ Pierre in o betom: «O nya-ɛɛ, ɛ̀ɛ̀ dé hee ge?»

³⁸Pierre kifa nú: «Ɛ̀nɛ̀ kpáí duka-a k’ɛ́nɛ́, ha̧ wa zui'nɛ́ kpɔk kpɔk nɛ̀ nin Jesu Krist, ha̧ Sɔ̧'ɔ̧ é ɗaŋmɔ k’ɛ́nɛ́ h’ɛ́nɛ́, ɓɛɛ a̧ tɛ ha̧ Sa̧a̧ Ɔmi h’ɛ́nɛ́.

³⁹Wen ha̧a̧nú ko Sɔ̧ nɛ́ k’ɛ́nɛ́ in o bezaŋ‘nɛ́ in o wi mɛ nyɛi̧a fara lɛŋ, kóó o ndé nɛ̀ Gasa Wan Sɔ̧ k’ɛ́ɛ́ tɛ́ sa a̧.»

⁴⁰Pierre tɔ̧ɔ̧ ŋma wen woyo nɛ̀ dɔka-a, de nɛ̀ sedaako ha̧ nɛ̀ nɔɔ-ŋgiɗi ha̧ wa'e: «Ɛ̀nɛ̀ zɔ́k tɛ‘nɛ́ wen o ɗaŋ tugun bíí nɔ'ɔ.»

⁴¹O wi nɛ̀ kpɛka wen ko Pierre, kpaa zuia wa. Wese'i o mbe bíí nɛ̀ kɔ̧ɔ̧ ɗɔaa duka hee booro-taar ga a zu o wan mɛ ti.

⁴²Wa mboo zu tɛ usamɔ ko o betom in yaa-a nɛ̀ see kpɔk in o ŋmaa, nyɔŋ nɛ̀ mɔ kpɔk in o ŋmaa,[2] kɔfi nɛ̀ Sɔ̧ ɓɔnsɛnɛ.

⁴³Kíì dee o bíí lɛŋ, wen o dɔka mɔɔ-kifi in o mɔɔ-usi-mɔ nɛ̀ Sɔ̧ dee nɛ̀ er o betom.

⁴⁴O bíí nɛ̀ kɔ̧ɔ̧ ɗɔaa lɛŋ ha̧ Sɔ̧ duka kpɔk in o ŋmaa, ɓɛɛ wa mɔi̧ mɔ kɔ-wa lɛŋ a zu ŋmaa.

⁴⁵Wa ɗɔra o fɔ kɔ-wa in mɔ kɔ-wa, ɓɛɛ wa kɛ̧ sede-a nɛ̀ o ŋmaa dam wa, wen ha̧ kóó o ndé mɛ de nɛ̀ san kɔ‘i.

⁴⁶Wa mɔi̧a in o ŋmaa nɛ̀ see kpɔk kɔ̧́ Tua ko Sɔ̧ dam ɗoŋ wese lɛŋ, ɓɛɛ wa nyɔŋ mɔ nɛ̀ er ŋmaa in o ŋmaa kɔ̧́ tua kɔ-wa nɛ̀ desee in mɔka-see mbɛt.

⁴⁷Wa gasa Sɔ̧; dukbíí lɛŋ zɔna wa, ɓɛɛ dam ɗoŋ wese lɛŋ, Gasa Wan dee ha̧ o mbe bíí nɛ̀ kpaa yuwar-kpasa-a mɛ dɔk a zu wan mɛ ti.