Read Northwest Gbaya TOM 20 Bible Online

TOM 20 - Northwest Gbaya bible

TOM 20

¹Ɗoŋ nɛ̀ wen'i ga̧a̧, Paul mɔi̧a o ŋgaiwi ko Sɔ̧, ha̧ nɛ̀ nɔɔ-ŋgiɗi ha̧ wa, a̧ wara wa; ɓɛɛ a̧ yak si nú Masedoan.

²Ɓɛɛ tɛ ɓira-a kɔ̧-a̧ yak nɛ̀ nù‘i, a̧ tɔ̧ɔ̧ mbɔrɔ ha̧ nɛ̀ nɔɔ-ŋgiɗi ha̧ o nya-a̧ hegɔɔ hɔ nɛnɛ nú Grɛs mɛ.

³A̧ duka hi̧i̧ fio-zɛ taar. Ɓɛɛ ŋgimbi n'aa tɛ̀ɛ́ ye kombon mɛ yak si Sirii, o Juif baa ɗaŋ keta zu a̧, ɓɛɛ a̧ zik tɛ si ɗoŋ nɛ̀ nú Masedoan.

⁴Nin o gbama-yari-nɔ̀ kɔ̧-a̧ nɛ́ mɔ'ɔ: Sopotros bem ko Pirus be Beree; Aristark, in Sekundus o be Tesalonik; Gaius be Dɛrbɛ, in Timotee ká bá nɛ̀ o be nú Azii yiitoo, Tikik in Trofim.

⁵O wi nɔ‘i yaka ti, ɓɛɛ wa zɛm yɛ sɛn Troas.

⁶Ɛ́ɛ́ kura k’ɛ́ɛ́ Filipii nɛ̀ kombon ɗoŋ gbaŋa brɛt nɛ̀ hao bo sɛnɛ na; ɛ́ɛ́ dee zɛ mɔɔrɔ, ɓɛɛ ɛ́ɛ́ kpa ŋmaa in wa sɛn Troas, nɛ́ mɔ'ɔ n’ɛɛ duka hi̧i̧ alat kpɔk.

⁷Wese alat, ɛ́ɛ́ mɔi̧a mɛ́ nyɔŋ nyɔŋmɔ-kɛndao, wen mɔ tɛ sa̧ ɓɛɛ ka Paul yaka kɔ‘i; nɛ́ mɔ'ɔ n'aa duka tɔ̧ nɛ̀ mbɔrɔ ha̧ o nya-a̧ hegɔɔ hɔ nɛnɛ biŋgi-zɛ.

⁸O lamba yaa so kɔ̧́ bɛr-tua-mɛ-ŋgɔn fara n’ɛɛ mɔi̧a sɛnɛ.

⁹Ŋma be-ŋgaiwi, nin-a nɛ Etik, duka so kɔ‘i ká̧ woi-tua zur nɛ ya, ɓɛɛ ká Paul ɓɔna tɛ usa mɔ; nɛ́ mɔ'ɔ nɛ̀ yá baa yí be-ŋgaiwi'i, ɓɛɛ a̧ hɔ̧fi̧ nɛ̀ kɔ̧́ taar bɛr-tua-mɛ-ŋgɔn tik nù. Kà wa be tɛ̀ɛ́ hɔ mɛ ba a̧ e ŋgɔn, a̧ fee so kaɗi.

¹⁰Nɛ́ mɔ'ɔ nɛ̀ Paul maa yì zir nɛ́ɛ̀ ba a̧, ɓɛɛ tɔ̧: «K’ɛ́nɛ́ sakali géè na! A̧ dúk kpàsá!»

¹¹Ɓɛɛ Paul daŋ si ɗoŋ, gbin brɛt kɛndao, nyɔŋ, ɓɛɛ tɔ̧ mbɔrɔ ha̧ wa hegɔɔ mɔ sa̧ bùù, sɛka a̧ yak.

¹²Ɓɛɛ ko be-ŋgaiwi'i, wa mgbɔɔ a̧ si ɗoŋ nɛ̀ kpàsá, ɓɛɛ mɔ‘i ha̧ nɔɔ-ŋgiɗi ha̧ wa nyɛmna.

¹³Ɛ́ɛ́ yaka k’ɛ́ɛ́ ti nɛ̀ kombon si Asos, wen Paul tɔ̧ɔ̧ so'e wi tɛ́ nɛ̀ kɔ‘i nɛ̀ yuwar nɛ̀ naŋ sɛk’ɛ́ɛ́ baa wi hi̧i̧.

¹⁴Ɗoŋ n'aa tɛ̀ɛ̀ kpa yɛ sɛn Asos, ɛ́ɛ́ baa a̧, ɓɛɛ ɛ́ɛ́ yak si Mitilɛn.

¹⁵Ɛ́ɛ́ kura hi̧i̧, ɓɛɛ ɛ́ɛ́ hɔ Kio mɛ́ sa̧a̧mɔ; tɛ yiitoo zɛ ɛ́ɛ́ ɓira hɔ Samos, ɓɛɛ tɛ taar zɛ ɛ́ɛ́ hɔ Milɛt.[10]

¹⁶Paul kɔ̧ mɛ yor Efɛz na, wen ká a̧ tɛɛ ba dɔka ŋgimbi sɛn nú Azii; ɓɛɛ mɔ n'aa taa gan nɛ́ hɔa-a Jerusalɛm nɛ̀ haya-a wen wese gbaŋa Pantekot.

¹⁷Paul toma o bíí nɛ̀ Milɛt mɛ́ nɛ̀ɛ́ sa o kuti-wi mgbara o zuduk bíí ko Krist sɛn Efɛz tɛnɛ ha̧ a̧.

¹⁸Wa hɔɔ kpa a̧, ɓɛɛ a̧ tɔ̧ ha̧ wa: «Ŋgimbi n'am hɔɔ nɛnɛ nú Azii, ɛ́nɛ́ iŋa duka-a kɔ‘m in'nɛ̀ɛ̀ ɓɔnsɛnɛ.

¹⁹Mi dee tom ha̧ Gasa Wan nɛ̀ mɔka-see in nɛ̀ mi̧i̧kɔ̧a̧ mbɛt, in zaŋ ŋgamɔ wen o Juif ee nú in o ŋmaa mɛ́ de ɗaŋmɔ in am.

²⁰Ɛ́nɛ́ iŋa'e mi hu̧si ŋma mɔ nɛ̀ nyɛma mɛ́ gbak'nɛ́ na. Mi tɔ̧ɔ̧ wen ko Sɔ̧, usi nɛ̀ mɔ h’ɛ́nɛ́ nɛ̀ zan mgbara o bíí, kóó sɛn kɔ̧́ tua k’ɛ́nɛ́ mbɛt.

²¹Mi dee sedaako ha̧ o Juif in o Grɛk mɛ́ zik tɛ-wa pii tɛ Sɔ̧, in ha̧ wa mɛ kɔ̧ ɗɔaa ha̧ Gasa Wan k’ɛ́ɛ́ Jesu.

²²Zɔ́k kinii, Sa̧a̧ Ɔmi ir nɛ‘m mɛ́ nɛ̀ Jerusalɛm, ɓɛɛ mi iŋ mɔ nɛ̀ tɛ kpa'm sɛn hi̧i̧ na.

²³Ɓɛɛ mɔ kpɔk, Sa̧a̧ Ɔmi mbaŋa tɛ‘m'e, mɔ nɛ̀ pɛ́m am tɛ ye kpɔk kpɔk nɛ́ nyak-zɔɓɔ in bɔnɛ.

²⁴Wen kɔ‘m, duka-a kɔ‘m zaŋnu bó nɛ́ ŋma gasamɔ na, ɓɛɛ mɔ n'am kii mɛ̀ nɛ́ wen ha̧‘m mɛ ma yì nɛ̀ de-a hɔ nduti-a in ha̧‘m mɛ kaɗi tom nɛ̀ Gasa Wan ha̧a̧ ha̧‘m mɛ de. Tom'i nɛ́ tɔ̧ɔ̧ De Mbe Wen deemɔ nɛ̀ ta-tɛ ko Sɔ̧.

²⁵«Kinii, mi iŋa'e ɛ́nɛ́ lɛŋ n'am yara mgbara'nɛ́, tɔ̧ nɛ̀ wen Wan ko Sɔ̧, beka zɔk yí‘m ɓɔna.

²⁶Wen hegɔ, mi tɔ̧ sɛn ti'nɛ́ lɛŋ sɔsɔɔ‘e tɔk-tɛ‘nɛ bó zu'm na.

²⁷Mɔ nɛ̀ Sɔ̧ taa mɛ de lɛŋ, mi tɔ̧ɔ̧ h’ɛ́nɛ́ lɛŋ, mi e ŋma mɔ duk kpɔk na.

²⁸Ɛ̀nɛ̀ zɔ́k tɛ̀‘nɛ́ nɛ̀ de-a, ɓɛɛ ɛ̀nɛ̀ dáí gíí sami nɛ̀ Sa̧a̧ Ɔmi ee'nɛ́ zu wa nɛ̀ de-a mbɛt: ɛ̀nɛ̀ dáí zuduk bíí ko Sɔ̧ nɛ̀ Sɔ̧ gɔna zu wa nɛ̀ tɔk-tɛ-wi nɛ̀ de-a.

²⁹Mi iŋa'e ŋgimbi n'am bé tɛ̀ɛ́ yak kaɗi, o ɗaŋ gbóò tɛ ye mgbara'nɛ́, ɓɛɛ wa beka dak nú tɛ gíí sami na.

³⁰Kóó sɛn mgbara'nɛ́ mbɛt, o ŋma bíí tɛ tɔ̧ wen ndela mɛ ɔr o ŋgaiwi ko Jesu sitɛ wa.

³¹Wen hegɔ ɛ̀nɛ̀ zɔ́k tɛ̀‘nɛ́, ɓɛɛ tɛ̀‘nɛ́'ɛ mbáŋ ɗoŋ mbɔrɔ n'am tɔ̧ɔ̧ so h’ɛ́nɛ́ kpɔk kpɔk nɛ̀ mi̧i̧kɔ̧a̧, zɛ nɛ wese, tɛ pɛ taar.

³²«Kinii mi ee'nɛ́ er Sɔ̧ in mi ee'nɛ́ tɛ́ wen deemɔ nɛ ta-tɛ kɔ̧-a̧ mbɛt. Nɛ́ a̧ á̧ a̧a̧ nɛ̀ ŋgai mɛ mbo tua,[11] in mɛ ha̧ mɔɔ-oi ha̧ o ndé nɛ̀ war-tɛ ɔ sa̧a̧.

³³Ŋgimbi n'am duka mgbara'nɛ́, mi a see sede, kóó lɔr, kà bó nɛ̀ laa ko ŋma bíí na.

³⁴Wen ɛ́nɛ́ nɛ̀ tɛ̀‘nɛ́ iŋa, mi dee tom kɔ‘m nɛ̀ er-am kpa nɛ̀ mɔ kɔ‘m, gbak nɛ̀ o gbama-yari kɔ‘m mbɛt.

³⁵Mi usa h’ɛ́nɛ́ ɓɔnsɛnɛ‘e bíí tɛ zɔk kànà bɔnɛ, hegɔ sɛka a̧ kpaa mɔ mɛ gbak nɛ̀ o wi-kɔsa. Tɛ̀‘nɛ́'ɛ mbáŋ ɗoŋ wen nɛ̀ Gasa Wan Jesu tɔ̧ɔ̧ so'e: ‹Ha̧a̧ mɔ ha̧ bíí ha̧a̧ desee gan kpaa mɔ er bíí.› »

³⁶Ɗoŋ wen'i, a̧ gbɛɛ zugur nù in wa lɛŋ, ɓɛɛ a̧ kɔfi Sɔ̧.

³⁷Ɓɛɛ wa lɛŋ hi̧i̧ kɔ̧a̧, kɔŋgɔli ger Paul, dui nɛ̀ nú-a.

³⁸See-wa ɗaŋa wen nɛ̀ Paul tɔ̧a̧‘e wa beka zɔk yí-wí ɓɔna, ɓɛɛ wa mgbɔ a̧ nɛnɛ hɔ nú kombon mɛ.