Read Northwest Gbaya TOM 23 Bible Online

TOM 23 - Northwest Gbaya bible

TOM 23

¹Paul mbaɗa o wi-ba-keta, ɓɛɛ tɔ̧: «O nya'm, taamɔ kɔ‘m usa'e ŋma wen tikiɗi bo zu'm tɛ yuwar deemɔ kɔ‘m ti Sɔ̧ hɔ sɔsɔɔ‘i na».

²Ɓɛɛ gasa wan-ɗafi-sɔ̧ Ananias tɔ̧ ha̧ o bíí nɛ̀ duka katɛ Paul mɛ mbɛr nú-a.

³Ɓɛɛ Paul tɔ̧ ha̧ a̧: «Sɔ̧ tɛ mbɛr nú-mɛ́ mbɛt, ɗaŋ mɛ bu ŋgeŋ. Duka-nù kɔ-mɛ hɛ̧ɛ̧ mɛ̀ nɛ́ wen gɔna kita zu'm nyɛm nɛ̀ ɗoŋ heembea, nɛ́ mɔ'ɔ nɛ̀ mɛ e heembea tɛ geemɔ tɔ̧ nɛnɛ ha̧ wa mɛ mbɛr am?»

⁴Nɛ́ mɔ'ɔ nɛ̀ o bíí nɛ̀ yaa katɛ Pauli tɔ̧ɔ̧ ha̧ a̧: «Nɛ́ gasa wan-ɗafi-sɔ̧ a̧ mɛ da̧ hegɔ‘i?»

⁵Paul kifa nú ha̧ wa: «O nya'm, mi iŋ‘e a̧ nɛ́ gasa wan-ɗafi-sɔ̧ na, wen Yɔramɔ tɔ̧a̧‘e: ‹Ká mɛ́ da̧ wi nɛ̀ duk zu dukbíí kɔ-mɛ na.› »

⁶Paul iŋa'e o Saduseɛn in o Fariziɛn a̧a̧ mgbara o wi nɛ̀ mɔi̧a'i, ɓɛɛ a̧ tɔ̧ wen nɛ̀ hee-ger sɛn ti gasa gɔna-kita hee mɔ'ɔ ga: «O nya'm, mi nɛ́ Fariziɛn, mgbák bem ko Fariziɛn. Mɛ̀ nɛ́ wen kura-ŋgɔn ko o bíí tɛ fio n’ɛ̀ɛ̀ e nɛ̀ ta a̧ wa ba'm e ti kita sɔsɔɔ wen-aa’ɛ.»

⁷Ŋgimbi nɛ̀ Paul tɔ̧ɔ̧ wen'i, ŋga kpɛri kura mgbara o Fariziɛn in o Saduseɛn, ɓɛɛ o bíí kɛ̧ tɛ fara yiitoo.

⁸Wen o Saduseɛn tɔ̧‘e kura-ŋgɔn ko o bíí tɛ fio, in o betom mɛ́ yiwese, ká bá nɛ̀ sɔ̧-tɛ mbɛt bo na. Ɓɛɛ o Fariziɛn tɔ̧ kɔ‘i'e o mɔɔ nɔ‘i lɛŋ a̧a̧ sɛnɛ.

⁹Zaŋa-wen dee mgbara wa nɛ̀ ŋgaya-a siti gan. O ŋma wi-usi-heembea ko o Fariziɛn kura ɓɛɛ tɔ̧ wen nɛ̀ ŋgai: «Ɛ́ɛ́ iŋ k’ɛ́ɛ́ ŋma ɗaŋmɔ nɛ̀ wi’ɛ dee na; ŋmafara nɛ́ ŋma sɔ̧, kóó nɛ́ ŋma betom mɛ́ yiwese a̧ tɔ̧ɔ̧ wen ha̧ a̧, ɛ́ɛ́ iŋ k’ɛ́ɛ́ na.»

¹⁰Kpɛri ŋgaia siti. Gasawi ko o wi-biro duka nɛ̀ kíì wen ká wa tɛ́ɛ̀ a̧k Paul nɛ̀ er ŋmaa, ɓɛɛ a̧ tɔ̧ ha̧ o wi-biro mɛ zir si mgbara o bíí wen baa Paul yinɛ mgbara wa piinɛ ɗoŋ kɔ̧̀ ŋgárá.

¹¹Mɛ́ sa̧a̧mɔ nɛ̀ zaŋzɛ, Gasa Wan tɛ̀ɛ́ tɛ Paul, ɓɛɛ tɔ̧ ha̧ a̧: «Mɛ̀ nɔ́ ŋgiɗi; mɛ́ dee sedaako wen am sɛn Jerusalɛm kaɗi, ɓɛɛ mɛ́ tɛ nɛ̀ɛ́ de mbe-a woyo sɛn Rɔm mbɛt.»

¹²Mɔ sa̧a̧, ɓɛɛ o Juif e nú in o ŋmaa ɓɛɛ bé nɛ́ mɔ a tɛ‘e, wi beka nyɔŋ mɔ na, wi beka nɔ mɔ na mbɛt hɔ ŋgimbi nɛ̀‘i tɛ gbɛ Paul sɛ́.

¹³O bíí lɛŋ nɛ̀ bee mɔ a tɛ‘i gana bíí ɓu-naar.

¹⁴Nɛ́ mɔ'ɔ nɛ̀ wa nɛ̀ɛ́ tɛ o gasa wan-ɗafi-sɔ̧ in o gasawi, ɓɛɛ tɔ̧ ha̧ wa'e: «Ɛ́ɛ́ bee mɔ a tɛ-ɛɛ‘e ŋma mɔ beka hɔ nú-ɛ́ɛ́ na hɔ ŋgimbi n’ɛɛ tɛ gbɛ Paul sɛ́.

¹⁵Ɓɛɛ kinii, ɛ́nɛ́ in o wi-ba-keta tɛ̀ gasa gɔna-kita, ɛ̀nɛ̀ tóm nɛnɛ ha̧ gasawi ko o wi-biro'e a̧ a̧ tóm Paul tɛnɛ, h’ɛ́nɛ́ ak mgbara wen kɔ̧-a̧ nɛ̀ sa̧a̧-a̧. Hegɔ ŋgimbi nɛ̀ wa tɛ mgbɔ a̧ tɛnɛ, ɛ́ɛ́ tɛ́ pɛm a̧ yuwar mɛ́ gbɛ a̧.»

¹⁶Be-nɔkɔ ko Paul zia wen'i, ɓɛɛ nɛ́ɛ̀ we ɗoŋ-aa ha̧ a̧ sɛn kɔ̧̀ ŋgárá ko o wi-biro mɛ.

¹⁷Paul saa ŋma wi-duk-zu wi-biro gɔmŋmaa, ɓɛɛ tɔ̧ ha̧ a̧: «Ɛ̀nɛ̀ mgbɔ́ be-ŋgaiwi’ɛ nɛnɛ ha̧ gasawi ko o wi-biro, wen a̧ a̧a̧ nɛ̀ ŋma be wen mɛ́ tɔ̧ ha̧ a̧.»

¹⁸Wi-duk-zu o wi-biro gɔmŋmaa mgbɔɔ be-ŋgaiwi'i sitɛ gasawi ko o wi-biro, ɓɛɛ tɔ̧ ha̧ a̧: «Paul wi-zɔɓɔ'ɛ saa am ɓɛɛ tɔ̧ ha̧‘m mɛ́ mgbɔ be-ŋgaiwi’ɛ tɛnɛ wen a̧ a̧a̧ nɛ̀ ŋma be wen mɛ tɔ̧ h’ɛ́nɛ́.»

¹⁹Gasawi ko o wi-biro kasa er-a, mgbɔ a̧ yaknɛ si mgbɔɔr ɓɛɛ ak a̧: «Nɛ́ ge wen ge á̧ mɛ́ kɔ̧ɔ̧ mɛ́ tɔ̧ ha̧‘m ge?»

²⁰Be-ŋgaiwi'i tɔ̧ɔ̧ ha̧ a̧: «O Juif ee nú in o ŋmaa mɛ́ ak'nɛ́ h’ɛ́nɛ́ mɛ tom Paul mɛ́ mɔɔsa̧ si ti gasa gɔna-kita mɛ; wa tɛ e wen'e wi kɔ̧ɔ̧ mɛ́ ak ndaa wen kɔ̧-a̧ nɛ̀ sa̧a̧-a̧.

²¹K’ɛ́nɛ́ kpɛk wen kɔ-wa na. O wi nɔ‘i lɛŋ gana ɓu-naar nɛ̀ tɛ́ pɛm a̧ yuwar; wa bee mɔ a tɛ‘e wi beka nyɔŋ mɔ na, wi beka nɔ mɔ na mbɛt hɔ ŋgimbi nɛ̀‘i tɛ gbɛ a̧ sɛ́. Kinii wa ɗafa mɔ kaɗi, wa pɛm nɛ́ kifa-nú k’ɛ́nɛ́ ɓɛɛ.»

²²Ɗoŋ wen'i, gasawi ko o wi-biro mboo nú bem’ɛi, ɓɛɛ tɔ̧ ha̧ a̧: «Ká mɛ́ tɔ̧ ha̧ ŋma bíí‘e mɛ́ tɔ̧ɔ̧ wen'i ha̧‘m na!» Ɓɛɛ fo a̧ siɗoŋ.

²³Nɛ́ mɔ'ɔ nɛ̀ gasawi ko o wi-biro saa o bíí yiitoo mgbara o wi-duk-zu o wi-biro gɔmŋmaa tɛnɛ, ɓɛɛ tɔ̧ ha̧ wa: «Ɛ̀nɛ̀ ɗáfí mɔ wen yaka-a si Sezaree tɛ ŋgimbi-tɔŋ-ya mɛ zɛ hɛ̧ɛ̧. Ɛ̀nɛ̀ mɔ́í̧ o wi-biro gɔmŋmaa-yiitoo, o wi-daŋ-nyaŋa ɓu-mɔɔrɔ-ɗoŋ-yiitoo ká bá nɛ̀ o wan-sɛ́ɛ̀ gɔmŋmaa-yiitoo mbɛt.

²⁴Ɛ̀nɛ̀ ɗáfí o ŋma nyaŋa nɛ̀ Paul tɛ́ daŋ wen ha̧ a̧ mɛ́ duk nɛ̀ de-a nɛ́ɛ̀ kpa nɛ̀ wi-duk-zu zika-nù Feliks.»

²⁵Nɛ́ mɔ'ɔ nɛ̀ gasawi ko o wi-biro yɔra kalata; gba̧a̧ kalata'i nɛ́ mɔ'ɔ:

²⁶«Mi Klodius Lizias fana gasa wi-duk-zu zika-nù Feliks.

²⁷O Juif baa so wi n'am tom nɛnɛ si tɛnɛ‘i mɛ́ gbɛ, ɓɛɛ n'am zia'e a̧ nɛ́ be Rɔm, mi kaia o wi-biro kɔ‘m nɛ́ɛ̀ ɓar a̧ er-wa yinɛ.

²⁸Mi kɔ̧ɔ̧ so mɛ́ iŋ gba̧a̧ mɔ nɛ̀ wa wula a̧ wen-aa, ɓɛɛ mi mgbɔ a̧ nɛnɛ ti gasa gɔna-kita kɔ-wa mɛ.

²⁹Mɔ‘i, mi zɔka mɛ̀ nɛ́ wen zu heembea kɔ-wa a̧ wa wula a̧ wen-aa, ɓɛɛ bó nɛ́ a̧ dee nɛ́ ŋma ɗaŋmɔ nɛ̀ nyɛma ha'i mɛ gbɛ a̧, kóó aa nyak-boi tɛ-a na mbɛt.

³⁰Mi zia'e wa baa keta mɛ́ gbɛ a̧ wó, ɓɛɛ sa'm tom a̧ nɛnɛ h’ɛ́nɛ́; mi tɔ̧ɔ̧ ha̧ o wi nɔ‘i mɛ́ nɛ̀ɛ́ wuli wula a̧ ti'nɛ́ mɛ.»

³¹O wi-biro dee mɔ nyɛm nɛ̀ ɗoŋ mɔ nɛ̀ gasawi kɔ-wa tɔ̧a̧; wa mgbɔɔ Paul nɛ̀ zɛ yaknɛ si Antipatris mɛ.

³²Nɛ̀ mɔ sa̧a̧, o wi-daŋ-nyaŋa mgbɔɔ Paul woyo yaknɛ, ɓɛɛ oi o wi-biro si kɔ‘i ɗoŋ kɔ̧̀ ŋgárá kɔ‘i.

³³Ɗoŋ nɛ̀ o wi-daŋ-nyaŋa hɔɔ Sezaree, wa ha̧a̧ kalata ha̧ wi-duk-zu zika-nù Feliks, ɓɛɛ wa e Paul er-a mbɛt.

³⁴A̧ tɔra kalata'i kaɗi, ɓɛɛ a̧ ak Paul: «Mɛ́ nɛ́ be ge nù ge?» Ŋgimbi n'aa zia'e Paul nɛ́ be nú Silisii,

³⁵a̧ tɔ̧ɔ̧ ha̧ Paul: «Ŋgimbi nɛ̀ o wi-wuli-mɛ bé tɛ̀ɛ́ hɔ kaɗi, sɛka'm zia wen kɔ-mɛ.» Ɓɛɛ a̧ tɔ̧ ha̧ o wi-biro mɛ́ pɛm a̧ kɔ̧́ tua ko wannu Herod zɛm nɛ̀ mɔ.