Read Northwest Gbaya TOM 26 Bible Online

TOM 26 - Northwest Gbaya bible

TOM 26

¹Agripa tɔ̧ɔ̧ ha̧ Paul: «Mi ha̧a̧ war ha̧ mɛ́ mɛ́ tɔ̧ wen kɔ-mɛ kinii.» Paul ee er ha̧ o bíí, ɓɛɛ ɓa wen kɔ‘i:

²«Wannu Agripa, tɛ̀ o wen nɔ'ɔ lɛŋ nɛ̀ o Juif ɓir e nú‘m’ɛ, mi duk nɛ̀ desee mɛ́ ɓa wen kɔ‘m ti'nɛ́ sɔsɔɔ.

³Wen ɛ́nɛ́ iŋa o yuwar duka-a ko o Juif in o mɔ nɛ̀ wa si kafɛ zu-a mbɛt. Mɛ̀ nɛ́ mɔ‘i a̧‘m ai nú h’ɛ́nɛ́ mɛ́ zii wen kɔ‘m nɛ̀ ga̧a̧-see.

⁴«O Juif lɛŋ iŋa duka-a kɔ‘m nɛ̀ ŋgaiwi mɛ; wa iŋa hee mɔ'ɔ n'am duka nɛnɛ mgbara dukbíí kɔ‘m sɛn Jerusalɛm ga.

⁵Bó nɛ́ kinii ɓɛɛ á̧ wa iŋa nɛ̀‘m na, ɓɛɛ kà wa kɔ̧ so, wa tɛ̀ɛ́ de sedaako kasa heembea kɔ‘m nɛ̀ ŋgaya-a tɛ yuwar gasa Sɔ̧ k’ɛɛ o Fariziɛn nɛ̀ nú-wa.

⁶Mi yor ti kita sɔsɔɔ wen ee-ta n'am e nɛ̀ ha̧a̧nú nɛ̀ Sɔ̧ ha̧a̧ so ha̧ o zɔmdáa k’ɛ́ɛ́.

⁷Ɓɛɛ o zuduk k’ɛ́ɛ́ ɓu-zua-yiitoo ɗafi Sɔ̧ zɛ nɛ̀ wese, wa ɔm tɛ na, ta nɛnɛ mɛ́ zɔk wese nɛ̀ ha̧a̧nú‘i tɛ hɔ nɛ̀ gba̧a̧. Mɛ̀ nɛ́ wen n'am e ta nɛ̀ mɔ‘i à̧ o Juif wula'm wen-aa’ɛ, Wannu.

⁸Ɛ́nɛ́ o Juif, wen ge s’ɛ́nɛ́ ta'e Sɔ̧ nyɛm mɛ de ha̧ bíí mɛ kur ŋgɔn tɛ fio na ge?

⁹«War kɔ‘m, mi taa so nɛ̀ mbetɛ‘e, tom kɔ‘m nɛ́ dee biro in nin Jesu be Nazarɛt.

¹⁰Mɛ̀ nɛ́ pɛrti yí-tom'i á̧‘m dea sɛn Jerusalɛm. O gasa wan-ɗafi-sɔ̧ ha̧a̧ war ha̧‘m, ɓɛɛ mi kai o sa̧a̧-bíí nɛ̀ dɔka-a a zɔɓɔ, kpɛk nɛ̀ gbɛ́ɛ́ wa nɛ̀ wa gbɛɛ mbɛt.

¹¹Mi kaia o bíí nɛ̀ kɔ̧́ tua-mɔi̧a-a nɛnɛ a zɔɓɔ, usi nɛ̀ bɔnɛ ha̧ wa, gbak na, wa ɗaŋa nin Sɔ̧. See-am nyima zu wa mbɛt nyɛmna, ɓɛɛ mi ndak ɗoŋ wa hɔ gɔni-nù mɛ mbɛt.

¹²«Hegɔ ŋma wese, o gasa wan-ɗafi-sɔ̧ ha̧a̧ ŋgai ha̧ nɛ̀ war ha̧‘m, ɓɛɛ mi kur mɛ́ nɛ̀ Damas.

¹³Wannu, mi a̧a̧ so yuwar, kà wese tɛ hɔ see zu, ɓɛɛ mi zɔk gasa sa̧a̧mɔ, nɛ̀ gana sa̧a̧mɔ ko wese nɛ̀ nyɛk’ɛ zira nɛ̀ yiwese tɛnɛ zik yɛ in o gbama-yari-nɔ̀ kɔ‘m kpa nú ŋmaa.

¹⁴Ɛ́ɛ́ lɛŋ tira a nù, ɓɛɛ mi zii ŋma tiger nɛ̀ tɔ̧ wen nɛ̀ nú hébreu'e: ‹Saul, Saul, wen ge mɛ́ usi bɔnɛ ha̧‘m ge? Nɛ́ ŋgayamɔ ha̧ mɛ́ mɛ́ ŋma nú te nɛ̀ usi war ha̧ mɛ.›

¹⁵Ɓɛɛ mi kifi nú: ‹Ɛ́nɛ́ nɛ́ o, Gasa Wan?› Gasa Wan kifa nú: ‹Nɛ́ mi Jesu, wi nɛ̀ mɛ́ usi bɔnɛ ha̧ a̧'ɛ.

¹⁶Mɛ̀ kúr ŋgɔn, mɛ̀ yór! Mi hoka mɛ́ wen ha̧ mɛ́ mɛ́ duk wi-de-tom kɔ‘m, in ha̧ mɛ́ mɛ́ de sedaako hɔɔ-zu nɛ̀ mɛ́ zɔka nɛ̀‘m'i, in mbe-a nɛ̀ mɛ́ tɛ zɔk siti woyo mbɛt. Gba̧a̧ mɔ n'am hɔɔ zu ha̧ mɛ́ wen-aa nɛ́ mɔ‘i.

¹⁷Mi tɛ́ gbo mɛ́ yinɛ er dukbíí'ɛ in o gɔni-dùk, n'am tom mɛ́ nɛnɛ sitɛ wa'i,

¹⁸wen ha̧ mɛ́ mɛ́ hu̧i̧ yí-wa wen ha̧ wa mɛ́ e tum duk mɛ́ tɛ pii tɛ sa̧a̧mɔ, wen ha̧ wa mɛ́ gbo ɗɔɔ ŋgai ko Wan-ɗaŋmɔ sitɛ Sɔ̧; mi tom mɛ́ wen ha̧ wa mɛ́ kpa ea-ɗaŋmɔ, ká bá nɛ̀ war mɔɔ-oi kɔ-wa in o wi nɛ̀ war-tɛ-wa ɔ sa̧a̧ nɛ̀ ɗoŋ kɔ̧ɔ̧-ɗɔaa ha̧‘m.›

¹⁹«Tɛ ŋgimbi'i, wannu Agripa, mi ŋgai see-am tɛ hɔɔ-zu nɛ̀ tɛ̀ɛ́ nɛ̀ yiwese na.

²⁰Mi tɔ̧ɔ̧ wen'i ha̧ o bíí Damas nɛti, ha̧ o wi Jerusalɛm, in o wi nú Judee, ká bá nɛ̀ o gɔni-dùk mbɛt. Mi tɔ̧ɔ̧ ha̧ wa mɛ kpai duka-a zik nɛ̀ tɛ-wa sitɛ Sɔ̧, ɓɛɛ wa a̧ dé mɔ nyɛm nɛ̀ ɗoŋ kpaia-duka-a'i.

²¹Gba̧a̧ mɔ nɛ o Juif baa nɛ̀‘m kɔ̧́ Tua ko Sɔ̧, ɓɛɛ wa de mɛ́ gbɛ nɛ̀‘m'i nɛ́ mɔ‘i.

²²Nɛ́ Sɔ̧'ɔ̧ gbaka'm hɔ sɔsɔɔ‘i, nɛ́ mɔ'ɔ n'am duk de nɛ̀ sedaako ti o gasawi in o geɗek-wi. Mi usi ŋma wen yak zu mɔ nɛ̀ o wi-tɔ̧-wen oi nú Sɔ̧ in Moisɛ tɔ̧ɔ̧ so'e, tɛ hɔ, na.

²³Wen wa tɔ̧ɔ̧ so'e Mɛsii tɛ zɔk kànà bɔnɛ, a̧ tɛ duk nɛ́ kuti wi nɛ̀ tɛ kur ŋgɔn tɛ fio, ɓɛɛ a̧ usa sa̧a̧mɔ ha̧ o Juif in o gɔni-dùk.»

²⁴Ŋgimbi nɛ̀ Paul biti ɓaa wen'i nɛnɛ, Fɛstus tɔ̧ɔ̧ ha̧ a̧: «Paul, dawa a̧a̧ zu-mɛ; nɛ́ o mɔ nɛ̀ mɛ́ iŋa lɛŋ'ɛ a̧ de mɛ pi̧ dawa zu-mɛ!»

²⁵Ɓɛɛ Paul kifi nú ha̧ a̧: «Dáà Fɛstus, mi bó nɛ́ wi-dawa na, ɓɛɛ mi tɔ̧ nɛ́ kpasawen nɛ̀ yuwar-a h’ɛ́nɛ́.

²⁶O mɔ n'am tɔ̧ wen-aa’ɛ, ɛ́nɛ́ iŋa lɛŋ, ɓɛɛ ŋma mɔ kpɔk yɔ‘nɛ́ na. Nɛ́ mɔ‘i s'am tɔ̧ wen ti'nɛ́ nɛ̀ nɔɔ-ŋgiɗi; wen bó nɛ́ o mɔɔ nɔ‘i dee so tɛ ŋma hu̧sa̧ fara na.

²⁷Ɛ́nɛ́ kɔ̧ɔ̧ ɗɔɔ wen ko o wi-tɔ̧-wen oi nú Sɔ̧ nde, wannu Agripa? Íì, mi iŋa'e ɛ́nɛ́ kɔ̧ɔ̧ ɗɔaa.»

²⁸Ɓɛɛ wannu Agripa kifi nú ha̧ Paul: «Oi-aa tikiɗi, wen kɔ-mɛ‘i tɛ̀ɛ́ de ha̧‘m mɛ́ kifi duk bíí ko Krist ɓɔn.»

²⁹Ɓɛɛ Paul tɔ̧: «Oi-aa tikiɗi, kóó oi-aa ɓɔna siti mbɛt, bó nɛ́ ɛ́nɛ́ kpɔk ɓɛɛ na, ɓɛɛ Sɔ̧'ɔ̧ dé h’ɛ́nɛ́ in o bíí lɛŋ nɛ̀ zii wen kɔ‘m sɔsɔɔ'ɛ mɛ́ duk hee mi ga, ɓɛɛ bó nɛ́ nɛ̀ oi nyak-boi hee kɔ‘m’ɛ ga na.»

³⁰Nɛ́ mɔ'ɔ nɛ̀ wannu kura in wi-duk-zu zika-nù, in Berenis ká bá nɛ̀ o bíí lɛŋ nɛ̀ yaa oi kita'i.

³¹Wa sii ɗoŋ in o ŋmaa tɔ̧ nɛnɛ‘e: «Wi’ɛ de ŋma mɔ nɛ̀ nyɛma ha'i mɛ pi̧ a̧ zɔɓɔ kà bó nɛ̀ gbɛɛ a̧ na.»

³²Ɓɛɛ wannu Agripa tɔ̧ ha̧ Fɛstus: «Wi’ɛ a̧ tɔ̧ so'e wi kɔ̧ɔ̧ mɛ́ nɛ̀ɛ́ ɓa kita kɔ‘i ti wannu Sezar na gáà, ɛ́ɛ́ tɛ̀ɛ́ pi̧ a̧ nù.»