Read Northwest Gbaya TOM 28 Bible Online

TOM 28 - Northwest Gbaya bible

TOM 28

¹Ɗoŋ n’ɛɛ kpasa kaɗi, ɛ́ɛ́ zia'e nin see-kisi'i nɛ́ Malt.

²O be Malt kpɛka yɛ nɛ̀ de-a nyɛmna, wa yee gasa wee h’ɛ́ɛ́ mɛ ɔ wen kórò ku̧u̧ naŋ hɔa-a, ɓɛɛ gɛ̧ɛ̧ de mɔ nyɛmna.

³Paul kaia kora gua nɛ́ɛ̀ a tɛ wee, ɓɛɛ gbɛ̧ŋa-wee'i fo kóró gbonɛ, nyɔŋ er-a ga̧i̧ sɛnɛ.

⁴Ŋgimbi nɛ̀ o be-ye'i zɔka kóró fara ga̧i̧a̧-a̧ te-er Paul, wa tɔ̧ɔ̧ sitɛ o ŋmaa: «Nɛ̀ mbetɛ, wi’ɛ nɛ́ ŋma wi-gbɛ-zu. A̧ nyaŋa nú fio ɗɔɔ yì, ɓɛɛ zu-a'i, deemɔ nɛ̀ yuwar-a ko Sɔ̧ kɔ̧ ha̧ a̧ mɛ kpasi na.»

⁵Paul ŋmasa gɔ́k'i pi̧ yí wee, ɓɛɛ ŋma mɔ de Paul na.

⁶Wa taa kɔ-wa'e tɛ Paul tɛ ha̧, kóó fio tɛ zar a̧ pi̧ nù, ɓɛɛ wa pɛm mɔ hegɔɔ takaɗi, ŋma mɔ de a̧ na. Nɛ́ mɔ'ɔ nɛ̀ wa tɛ̀ɛ̀ kpai nú-wa tɔ̧‘e, Paul nɛ́ ŋma sɔ̧.

⁷Fara ko Publius, gasa wi-duk-zu see-kisi'i nyɛi̧ nɛ̀ hi̧i̧ na; a̧ kpɛka yɛ nɛ̀ de-a, ɓɛɛ ɛ́ɛ́ ɔ tɛ̀ kɔ̧-a̧ zɛ taar.

⁸Ŋgimbi'i, ɓɛɛ ká tɛ dáà ko Publius hai na, tɛ-a ba nɛ́ wee, ɓɛɛ a̧ sɔ̧ sɔ̧ɔ̧ nɛ̀ tɔk mbɛt. Nɛ́ mɔ'ɔ nɛ̀ Paul nɛ̀ɛ̀ kɔfi Sɔ̧ e nɛ̀ er zu-a, ɓɛɛ a̧ kpasi.

⁹Ɗoŋ mɔ‘i, o oi ndaa o wi-zɛɛ see-kisi'i zuɗa ŋmaa tɛnɛ tɛ Paul, ɓɛɛ wa kpasi mbɛt.

¹⁰Hegɔ, wa tu̧u̧ tɛ-ɛɛ zɔk nɛ̀ yɛ nɛ̀ de-a, ɓɛɛ tɛ́ ŋgimbi yaka-a k’ɛ́ɛ́, wa gbaka yɛ nɛ̀ o mɔɔ-yuwar mbɛt.

¹¹Ɗoŋ n’ɛɛ dee fio-zɛ taar hi̧i̧ kaɗi, ɛ́ɛ́ yee ŋma kombon ko o bíí Alɛkzandrii nɛ̀ duka so Malt tɛ́ ŋgimbi ɗaŋ zan ɓar. Wa sɛka so ŋma sɔ̧ nɛ̀ wa saa'e Be-dan e nú kombon'i.

¹²Ɛ́ɛ́ zira sɛn Sirakus, ɓɛɛ ɛ́ɛ́ mbosi hi̧i̧ zɛ taar.

¹³Nɛ́ mɔ'ɔ n’ɛɛ kura hi̧i̧ ba nɛ̀ ká̧ ŋgéré daŋnɛ hɔ Regium. Kà mɔ tɛ́ sa̧, ɓɛɛ búk mɛ́ ká̧-zan-mɛ́-ɗɔɔ ku̧ naŋ yua-a; dee zɛ yiitoo, ɓɛɛ ɛ́ɛ́ hɔ Puteoli.

¹⁴Ɛ́ɛ́ kpaa o ŋma nya-ɛɛ sɛn hi̧i̧, wa zira yɛ, ɓɛɛ wa tɔ̧ h’ɛ́ɛ́ mɛ́ duk in wa tɛ́ alat kpɔk. Nɛ́ hegɔ, ɛ́ɛ́ nɛ̀ɛ́ nɛnɛ hɔ Rɔm mɛ.

¹⁵O nya-ɛɛ sɛn Rɔm zia nyɛrɛ hɔa-a k’ɛ́ɛ́, wa wee ti-ɛɛ, ɓɛɛ ɛ́ɛ́ kpa ŋmaa in wa nú lumɔ ko Apius in ŋma fara nɛ̀ wa sa'e Tua-ɔ-sɛnɛ Taar. Ŋgimbi nɛ̀ Paul zɔka wa, a̧ dee osoko ha̧ Sɔ̧, ɓɛɛ a̧ kpa nɔɔ-ŋgiɗi woyo.

¹⁶Ɗoŋ n’ɛɛ yee saaye Rɔm, wa ee war ha̧ Paul mɛ́ kii fara-ɔɔ kɔ‘i in ŋma wi-biro mɛ́ pɛm a̧.

¹⁷Ɗoŋ zɛ taar, Paul saa o dita-bíí ko o Juif tɛnɛ. Ŋgimbi nɛ̀ wa mɔi̧a kaɗi, a̧ tɔ̧ɔ̧ ha̧ wa: «O nya'm, mi de ŋma ɗaŋmɔ in dukbíí k’ɛ́ɛ́ ká bó nɛ̀ gbina o geŋa ko o zɔmdáa k’ɛ́ɛ́ na mbɛt. Nɛ́ mɔ'ɔ nɛ̀ wa baa'm pi̧ zɔɓɔ sɛn Jerusalɛm, ɓɛɛ wa e'm er o be Rɔm.

¹⁸Ɗoŋ nɛ̀ o be Rɔm zia mgbara wen'i, wa kɔ̧ɔ̧ mɛ́ gbo'm pi̧ nù, wen wa kpa ŋma gba̧a̧-mɔ n'am tɛ́ fe wen-aa na.

¹⁹Ɓɛɛ hee mɔ'ɔ nɛ̀ o Juif kɔ̧ ha̧ wa mɛ́ gbo'm na ga, ŋma mɔ n'am tɛ̀ɛ́ de bo na, ɓɛɛ s'am ak yuwar mɛ́ nɛ̀ɛ́ ɓa wen kɔ‘m ti wannu Sezar, nɛ̀ bó nɛ́ mi taa so mɛ́ wuli dukbíí kɔ‘m na.

²⁰Nɛ́ mɔ‘i a̧‘m kɔ̧ɔ̧ mɛ́ zɔk'nɛ́, mɛ́ tɔ̧ wen in'nɛ̀ɛ́; nyak-boi nɛ̀ duk tɛ‘m’ɛ, mɛ̀ nɛ́ wen zu mɔ nɛ̀ o be Israɛl e nɛ̀ ta.»

²¹Wa kifa nú ha̧ a̧: «Ɛ́ɛ́ kpa k’ɛ́ɛ́ ŋma kalata-wen kɔ-mɛ nɛ̀ Judee na; ŋma nya-ɛɛ nɛ̀ tɛ̀ɛ́ nɛ̀ hi̧i̧ mɛ́ we ɗoŋ ŋma ɗaŋmɔ kɔ-mɛ h’ɛ́ɛ́ bo na mbɛt.

²²Ɓɛɛ ɛ́ɛ́ kɔ̧ɔ̧ ha̧ mɛ́ mɛ́ we ɗoŋ taamɔ kɔ-mɛ nɛ̀ nú-mɛ h’ɛ́ɛ́, wen ɛ́ɛ́ iŋa'e dam fara lɛŋ o bíí si nɛ́ kafɛ zu yuwar-ɗafa-sɔ̧ kɔ-mɛ.»

²³Wa gɔna wese nɛ̀ wa tɛ kpa nɛ̀ ŋmaa in Paul, ɓɛɛ wese'i wa gara nɛnɛ tɛ kɔ̧-a̧ nɛ̀ dɔka-a. Paul dee sedaako tɔ̧ nɛ̀ mgbara Wan ko Sɔ̧ ha̧ wa; mɛ́ tuyɛ hegɔɔ mɔ ga̧ nɛnɛ a̧ kimia ha̧ wa mɛ́ kpɛk Jesu. A̧ tɔ̧ɔ̧ wen ko Jesu ku̧u̧naŋ-a tɛ heembea ko Moisɛ hɔ nɛnɛ tɛ́ wen ko o wi-tɔ̧-wen oi nú Sɔ̧.

²⁴O ŋma bíí kpɛka wen kɔ̧-a̧, ɓɛɛ o ŋma bɛ̧ kɔ̧ɔ̧ ɗɔaa.

²⁵Wa zaŋa wen in o ŋmaa pɛsi nɛnɛ, wen kɔ-wa ye ŋmaa na, ɓɛɛ Paul tɔ̧ ŋma sɔŋkur wen ha̧ wa: «Nɛ́ kpasawen a̧ Sa̧a̧ Ɔmi tɔ̧ɔ̧ so nɛ̀ nú wi-tɔ̧-wen oi nú Sɔ̧ Esaii ha̧ o dáà k’ɛ́nɛ́‘e:

²⁶‹Mɛ̀ nɛ́ɛ̀ kpa dukbíí'ɛ, ɓɛɛ mɛ̀ tɔ̧́ ha̧ wa'e: Ɛ́nɛ́ tɛ́ yeŋ zer'nɛ́, ɓɛɛ ɛ́nɛ́ beka zii gba̧a̧ wen na. Ɛ́nɛ́ tɛ́ kɛ̧i̧ mɔ, ɓɛɛ ɛ́nɛ́ beka zɔk mɔ na.

²⁷Wen see dukbíí'ɛ ɔ ŋgaya, zer-wa mgbee mgbee, wa ɓura yí-wa, wen ká wa tɛɛ zɔk mɔ, wen ká wa tɛɛ zii mɔ, wen ká wa tɛɛ iŋ mgbara mɔ, wen ká wa tɛɛ zik tɛ sitɛ Sɔ̧ ká‘m kpasi wa.›

²⁸«Wen hegɔ, ɛ̀nɛ̀ íŋ‘e Sɔ̧ toma yuwar-kpasa-a ha̧ o gɔni-dùk, ɓɛɛ nɛ́ wa a̧ tɛ zii zia-a!» [

²⁹Ŋgimbi nɛ̀ Paul tɔ̧ɔ̧ wen'i kaɗi, o Juif sii ɗoŋ tɛ̀ kɔ‘i zaŋ nɛ̀ wen in o ŋmaa yaknɛ.]

³⁰Paul duka kɔ̧́ tua n'aa yoɓi'i tɛ́ pɛ yiitoo. A̧ kpɛka o bíí lɛŋ nɛ̀ tɛ̀ɛ̀ tɛ a̧,

³¹we nɛ̀ ɗoŋ Wan ko Sɔ̧, usi nɛ̀ mgbara mɔ ko Gasa Wan Jesu Krist ha̧ wa nɛ̀ nɔɔ-ŋgiɗi; ŋma bíí dor a̧ na mbɛt.