Read Northwest Gbaya TOM 3 Bible Online

TOM 3 - Northwest Gbaya bible

TOM 3

¹Tɛ́ ŋgimbi kɔfa-sɔ̧ mɛ gira-wese, Pierre in Jean daŋa si kɔ̧́ Tua ko Sɔ̧ mɛ kɔfi Sɔ̧.

²Ɓɛɛ ŋma bíí a̧a̧ sɛnɛ nɛ̀ wa koa a̧ nɛ̀ oi kara-a; wa ba so a̧ nɛnɛ dam ɗoŋ wese lɛŋ e ká̧ nú Tua ko Sɔ̧ nɛ̀ wa sa'e Gba De Nú Tua, wen ha̧ a̧ mɛ kɔfi mɔ er o bíí nɛ̀ ye kɔ̧ Tua ko Sɔ̧.

³Ŋgimbi n'aa zɔka o Pierre in Jean fara tɛa-a mɛ ye Tua ko Sɔ̧, a̧ kɔfa mɔ er wa.

⁴Pierre in Jean mbaɗa a̧, ɓɛɛ Pierre tɔ̧: «Mɛ̀ zɔ́k mɔ pii tɛ-ɛɛ.»

⁵Ɓɛɛ a̧ pi̧ yí-a sitɛ wa, wen a̧ taa kɔ̧-a̧‘e wi tɛ kpa nɛ́ ŋma mɔ er wa.

⁶Ɓɛɛ Pierre tɔ̧ ha̧ a̧: «Mí bó nɛ̀ bu-sede kóó lɔr na, ɓɛɛ mɔ n'am a̧a̧ nɛnɛ, mi tɛ ha̧ ha̧ mɛ. Nɛ̀ nin Jesu Krist be Nazarɛt, mɛ̀ nɛ́ nɔ̀.»

⁷Pierre baa a̧ nɛ̀ wii-er, e ŋgɔn katak. Ɓɛɛ tɛ kale ŋgimbi'i o naŋ-a lɛŋ nyafa a yí ŋmaa.

⁸A̧ kpiɗa yor, ɓɛɛ a̧ ye Tua ko Sɔ̧ in wa, nɛ́ nɛ̀ nɔ̀, kpíɗí nɛnɛ, gasi nɛ̀ Sɔ̧.

⁹O bíí lɛŋ zɔka a̧ fara nɛ́ɛ́ nɔ̀, gasi nɛ̀ Sɔ̧.

¹⁰Wa iŋa ti a̧, nɛ́ a̧ a̧ duka so ká̧ Gba De Nú Tua ko Sɔ̧ kɔfi nɛ̀ mɔ er o bíí. Kíì dee wa, ɓɛɛ wa sakali lɛŋ tɛ mɔ nɛ̀ hɔɔ tɛ wi’ɛi.

¹¹Kara-wi nɛ̀ kpasa'i e Pierre in Jean duk na. Ɗɛɗɛ o bíí lɛŋ gɔna, ɓɛɛ wa ma yì sitɛ wa ɗɔɔ zala nɛ̀ wa sa'e Zala ko Salomɔŋ.

¹²Pierre zɔka wa, ɓɛɛ tɔ̧: «Ɛ́nɛ́ o be Israɛl, wen ge sa ɗɛɗɛ‘nɛ́ gɔn tɛ mɔ nɛ̀ hɔa’ɛ ge? Wen ge s’ɛ́nɛ́ zɔk yɛ hee mɛ̀ nɛ́ tɛ́ ŋgai tɛ-ɛɛ in yuu Sɔ̧ k’ɛɛ ɛ́ɛ́ dee nɛnɛ ha̧ wi’ɛ mɛ nɛ̀ nɔ̀ ga ge?

¹³Sɔ̧ ko Abraham, Izak in Jakob, Sɔ̧ ko o zɔmdáa k’ɛ́ɛ́, gasa wi-de-tom kɔ‘i Jesu, wan n’ɛnɛ ee so er o bíí, ɓɛɛ k’ɛ́nɛ́ kaf'a ti Pilat nɛ̀ kɔ̧ɔ̧ so mɛ gbo a̧ yinɛ.

¹⁴A̧ duka so nɛ́ sa̧a̧-wi in wi-de-mɔ nɛ̀ yuwar-a; nɛ́ mɔ'ɔ n’ɛnɛ bɛ̧ɛ̧ a̧, ɓɛɛ ɛ́nɛ́ ak Pilat mɛ́ gbo nɛ́ wi-gbɛ-zu pi̧ nù h’ɛ́nɛ́.

¹⁵Tɛ́ mɔ‘i, ɛ́nɛ́ gbɛɛ Be-wan nɛ̀ de ha'i mɛ duk kpasa, ɓɛɛ Sɔ̧ kpas'a tɛ fio; ɛ́ɛ́ nɛ́ o wi-sedaako-a.

¹⁶Nɛ́ nin Jesu a̧ dee ha̧ wi’ɛ n’ɛnɛ iŋa n’ɛnɛ zɔk’ɛ mɛ kpa ŋgai, wen zu kɔ̧ɔ̧ɗɔɔwen nɛ̀ nin Jesu. Nɛ́ kɔ̧ɔ̧ɗɔɔwen nɛ̀ ɗoŋ Jesu a̧ kpasa wi’ɛ nɛ̀ gbaayí‘nɛ́ lɛŋ.

¹⁷«O nya'm, mi iŋa'e nɛ́ tɛ̀ iŋa-mgbara-mɔ na ɛ́nɛ́ in o gasawi k’ɛ́nɛ́ dee nɛ̀ mɔ‘i.

¹⁸Sɔ̧ nɛ̀ tɛ-wi tɔ̧ɔ̧ so nɛ̀ nú o wi-tɔ̧-wen oi nú-wi lɛŋ‘e ndé, Mɛsii kɔ‘i tɛ zɔk bɔnɛ, ɓɛɛ nɛ́ mɔ'ɔ n'aa dee ha̧ wen'i mɛ hɔ gba̧a̧ tɛ yuwar mɔ‘i nɛ̀ dea'i.

¹⁹Hegɔ, ɛ̀nɛ̀ kpáí duka-a k’ɛ́nɛ́, ɛ̀nɛ̀ píí ɗoŋ tɛ Sɔ̧, ha̧ a̧ mɛ bi ɗaŋmɔ k’ɛ́nɛ́ yinɛ.

²⁰Hegɔ, ŋgimbi ga̧a̧mɔ nɛ̀ Gasa Wan ha̧a̧ h’ɛ́nɛ́‘i tɛ hɔ ŋgimbi n'aa tɛ tom nɛ̀ Mɛsii n'aa hoka so h’ɛ́nɛ́; wi’ɛi nɛ́ Jesu,

²¹ɓɛɛ a̧ tɛ duk ɓɔn yiwese mɛ hɔ ŋgimbi nɛ̀ Sɔ̧ tɛ ɗafi mɔ lɛŋ nɛ̀ mbe-a, hee mɔ'ɔ n'aa tɔ̧ɔ̧ so nɛ̀ nú o wi-tɔ̧-wen oi nú-a ɓeemɛ ga.

²²Moisɛ tɔ̧ɔ̧ so'e: ‹Gasa Wan Sɔ̧ tɛ hok ŋma wi-tɔ̧-wen oi nú-wi hee mi ga mgbara o nya'nɛ́ h’ɛ́nɛ́, ɓɛɛ mɔ n'aa tɛ tɔ̧ h’ɛ́nɛ́ lɛŋ, ɛ́nɛ́ tɛ zii.

²³Ɓɛɛ kóó o ndé nɛ̀ zii wen nú-a na, wi tɛ fo wi’ɛi mgbara dukbíí yinɛ.›

²⁴Ɓɛɛ o wi-tɔ̧-wen oi nú Sɔ̧ lɛŋ, ku̧u̧naŋ-a nɛ̀ Samuɛl mɛ tɛnɛ hɔ nɛnɛ tɛ o wi nɛ̀ tɛ̀ɛ́ nɛ̀ ɗoŋ mbɛt, tɔ̧ɔ̧ nɛ́ kale wen zu ŋgimbi kinii’ɛ.

²⁵Ɛ́nɛ́ nɛ́ o bezaŋ o wi-tɔ̧-wen oi nú Sɔ̧, in ɛ́nɛ́ a̧a̧ ɗɔɔ nɔɔ-tɔk nɛ̀ Sɔ̧ nɔɔ so in o zɔmdáa k’ɛɛ ŋgimbi n'aa tɔ̧ɔ̧ nɛnɛ ha̧ Abraham'e ndé: ‹O tugun bíí zaŋnu lɛŋ tɛ kpa toka-de-yoŋgo nɛ̀ ɗoŋ bezaŋ-mɛ.›

²⁶Sɔ̧ hoka wi-de-tom kɔ‘i tom tɛnɛ wen zu'nɛ́ kaɗi nɛti wen ha̧ a̧ mɛ tok de yoŋgo zu bíí kpɔk kpɔk tɛ mgbɔɔ‘nɛ́ yinɛ tɛ ɗaŋ yuwar deemɔ k’ɛ́nɛ́.»