Read Northwest Gbaya TOM 4 Bible Online

TOM 4 - Northwest Gbaya bible

TOM 4

¹O wi-ɗafi-sɔ̧, gasawi ko o wi-pɛm-tua ko Sɔ̧ in o Saduseɛn hɔɔ kpa o Pierre in Jean fara tɔ̧ɔ̧ wen ha̧ o bíí.

²Ɓɛɛ wa kpa ɗaŋsee zu o betom wen wa usi nɛ́ mɔ ha̧ o bíí tɔ̧ nɛnɛ‘e, Jesu kura ŋgɔn tɛ fio, ɓɛɛ hegɔ o bíí tɛ kur ŋgɔn tɛ fio mbɛt.

³Wa tika zu o betom, kai wa a kɔ̧́ zɔɓɔ ha̧ wa mɛ ya hi̧i̧ hɔ mɔɔsa̧, wen ŋgimbi'i mɔ ga̧a̧ so kaɗi.

⁴Mgbara o wi nɛ̀ zia wen'i, o bíí nɛ̀ dɔka-a kɔ̧ɔ̧ ɗɔaa, ɓɛɛ dɔka wa lɛŋ dee hee booro-mɔɔrɔ ga.

⁵Mɔ sa̧a̧ kaɗi, ɓɛɛ o kuti-wi ko o Juif, o kuti-wi in o wi-usi-heembea nɛ̀ ya Jerusalɛm mɔi̧ ŋmaa.

⁶Wese'i gasa wan-ɗafi-sɔ̧ Ha̧n duka so hi̧i̧, in Kaif, Jean, ká bá nɛ̀ Alɛkzandrɛ, in o pɛ́r-nàm ko o wan-ɗafi-sɔ̧ lɛŋ.

⁷Nɛ́ mɔ'ɔ nɛ̀ wa tɔ̧ɔ̧ ha̧ wa mɛ mgbɔ Pierre in Jean tɛnɛ e ti wa, ɓɛɛ wa ku̧ naŋ aka wa: «Ɛ́nɛ́ dee bɔɔ mɔ'ɔ nɛ̀ ŋgai ko o in nɛ̀ nin o?»

⁸Sa̧a̧ Ɔmi ha̧a̧ ŋgai ha̧ Pierre, ɓɛɛ a̧ tɔ̧ ha̧ wa:

⁹«Ɛ́nɛ́ o wan ko o dukbíí in o gasawi, ɛ́nɛ́ de ŋmaa in yɛɛ sɔsɔɔ wen n’ɛɛ dee demɔ in ŋma kara-wi; ɛ́nɛ́ ak yɛ h’ɛ́ɛ́ mɛ tɔ̧ ndaa mɔ nɛ̀ kpasa wi’ɛ h’ɛ́nɛ́.

¹⁰Ɛ́nɛ́ in o be Israɛl lɛŋ a̧ íŋ‘e, mɛ̀ nɛ́ nin Jesu Krist be Nazarɛt, wi n’ɛnɛ mgboia so zu te-diŋa, ɓɛɛ ká Sɔ̧ kpas'a tɛ fio, mɛ̀ nɛ́ nin-a á̧ kpasa wi’ɛ nɛ̀ yor yi'nɛ́ n’ɛnɛ zɔk’ɛ.

¹¹Jesu nɛ́ ta nɛ̀ ɛ́nɛ́ o wi-mbo-tua pi̧i̧ so taŋ, ɓɛɛ nɛ́ a̧‘i á̧ kifa duk nɛ́ de kina-ta-e mgbii-tua.

¹²Ŋma yuwar-kpasa-a nɛtɛ yak zu a̧ bo na, wen ŋma nin bíí nɛ̀ Sɔ̧ ha̧a̧ zaŋnu’ɛ nɛ̀ nyɛma mɛ́ kpasi yɛ bo na.»

¹³Ɗɛɗɛ o wi-ba-keta gɔna tɛ́ tɔ̧ɔ̧-wen ko Pierre in Jean nɛ nɔɔ-ŋgiɗi, wen wa iŋa wa nɛ̀ o géé bíí nɛ̀ bó nɛ̀ kpasa iŋamɔ na, ɓɛɛ wa iŋ‘e wa duka so nɛ́ o gbama-yari ko Jesu.

¹⁴Ŋgimbi'i, ká kara-wi nɛ̀ kpasa so'i a̧ yor katɛ wa mbɛt'i, ɓɛɛ o wi-ba-keta kpa ŋma wen mɛ tɔ̧ siti ɓɔna.

¹⁵Wa tɔ̧ɔ̧ ha̧ wa mɛ fo Pierre in Jean gbonɛ ti gasa gɔna-kita, ɓɛɛ wa ku̧ naŋ aka o ŋmaa:

¹⁶«Ge mɔ ge ɛ̀ɛ̀ tɛ́ de nɛ̀ o wi nɔ'ɔ ge? Wen ɛ́ɛ́ nyɛm mɛ si kafɛ mɔɔ-kifi nɛ̀ wa dea ɓɔn gbaayí o bíí Jerusalɛm’ɛ pi̧ nù na.

¹⁷Ɓɛɛ wen ká wa tɛ́ɛ̀ usi mɔ nɛ̀ nin Jesu'i sɛn mgbara o bíí siti, ɛ̀ɛ̀ dé ŋmaa in wa wen ká wa tɛ́ɛ̀ sa nin'i ti ŋma bíí kóó kpɔk ɓɔna.»

¹⁸Nɛ́ mɔ'ɔ nɛ̀ wa tɔ̧ɔ̧ ha̧ wa mɛ sa o betom pii ɗoŋ, ɓɛɛ tɔ̧ ha̧ wa'e, ká wa sa nin Jesu, usi nɛ́ mɔ nɛ̀ nin-a ɓɔna.

¹⁹Ɓɛɛ Pierre in Jean kifi nú ha̧ wa: «Mɔ nɛ̀ duk nɛ̀ yuwar-a ti Sɔ̧ nɛ́ mboo-zu h’ɛ́nɛ́ náà, kóó nɛ́ mboo-zu ha̧ Sɔ̧? Ɛ̀nɛ̀ kɛ̧́ mgbara-a h’ɛ́ɛ́ zii.

²⁰War k’ɛ́ɛ́, ɛ́ɛ́ beka e dee sedaako zu mɔ n’ɛ́ɛ́ zɔka, in mɔ n’ɛ́ɛ́ zia duk na.»

²¹O wi-ba-keta dee ŋmaa in wa woyo, mbo nú-wa, ɓɛɛ gbo wa a nù. Wa kpa so yuwar mɛ de ha̧ kita mɛ tik wa na, wen dukbíí nɛ̀ oi-aa lɛŋ nɛ̀ mɔi̧a gasa Sɔ̧ wen mɔɔ-kifi nɛ̀ dea'i.

²²Pɛ wi nɛ̀ kpasa tɛ mɔɔ-kifi'i gana pɛ ɓu-naar.

²³Ɓɛɛ nɛ̀ wa gboo o Pierre in Jean a nù kaɗi, Pierre in Jean sii ɗoŋ sitɛ o gbama-yari kɔ‘i, ɓɛɛ we ɗoŋ mɔ nɛ̀ o gasa wan-ɗafi-sɔ̧ in o kuti-wi tɔ̧ɔ̧ lɛŋ ha̧ wa.

²⁴Ɗoŋ wee ɗoŋ wen'i, wa lɛŋ kɔfa Sɔ̧ in o ŋmaa hee mɔ'ɔ ga: «Gasa Wan, nɛ́ ɛ́nɛ́'ɛ dee yiwese, nù in yì, ká bá nɛ̀ o mɔ lɛŋ nɛ ya sɛnɛ.

²⁵Nɛ́ ɛ́nɛ́ a̧ ee wen nɛ̀ ŋgai ko Sa̧a̧ Ɔmi nú wi-de-tom k’ɛ́nɛ́, dáà k’ɛɛ David mɛ tɔ̧‘e: ‹O dukbíí dik gɛrɛm wen ge? O bíí e see tɛ géé tum-mɔ wen ge?

²⁶O wannu nɛka yor naŋ biro, ɓɛɛ o be-wan mɔi̧ ŋmaa duk kpɔk mɛ bi Gasa Wan in wi n'aa tɛna nɔ̧́ a zu-a.›

²⁷«O wannu Herod in Pɔns Pilat, ká bá nɛ̀ o be Juif in o gɔni-dùk mɔi̧a ŋmaa tɛ ye’ɛ mɛ bi sa̧a̧ wi-de-tom k’ɛ́nɛ́ Jesu, wi n’ɛnɛ tɛna so nɔ̧́ a zu-a.

²⁸Wa dee mɔ‘i wen ha̧ mɔ n’ɛnɛ ɗafa so tɛ ŋgai k’ɛ́nɛ́, nyɛm nɛ̀ ɗoŋ mɔ n’ɛnɛ kɔ̧a̧, mɛ hɔ gba̧a̧.

²⁹Kinii, Gasa Wan, ɛ̀nɛ̀ zɔ́k dee ŋmaa nɛ̀ wa de in yɛɛ‘i, ɓɛɛ ɛ̀nɛ̀ há̧ ŋgai ha̧ o wi-de-tom k’ɛ́nɛ́ mɛ́ tɔ̧ wen k’ɛ́nɛ́ nɛnɛ nɛ̀ nɔɔ-ŋgiɗi.

³⁰Ɛ̀nɛ̀ nyɛ́í̧ er'nɛ́, ɛ̀nɛ̀ kpásí o wi-zɛɛ, ɓɛɛ ɛ̀nɛ̀ dé o mɔɔ-usi-mɔ in o mɔɔ-gɔn-ɗɛɗɛ nɛ̀ nin Jesu, sa̧a̧ wi-de-tom k’ɛ́nɛ́.»

³¹Wa kɔfa Sɔ̧ kaɗi, ɓɛɛ fara nɛ̀ wa mɔi̧a sɛnɛ nak ɗirr; wa lɛŋ duna nɛ̀ Sa̧a̧ Ɔmi, ɓɛɛ wa tɔ̧ wen ko Sɔ̧ yaknɛ nɛ̀ nɔɔ-ŋgiɗi.

³²Gba giiwi nɛ̀ kɔ̧ɔ̧ ɗɔaa ha̧ Sɔ̧ duka nɛ̀ see kpɔk in taamɔ kpɔk mbɛt; ŋma bíí mɛ tɔ̧‘e mɔ nɛ‘i a̧a̧ nɛnɛ nɛ́ kɔ‘i ɛ̀nɛ̀-wi wó, bo na; wa lɛŋ aa mɔ kɔ-wa zu ŋmaa.

³³O betom ko Jesu dee sedaako kura-ŋgɔn ko Gasa Wan Jesu tɛ fio nɛnɛ nɛ̀ ŋgai ko Sɔ̧, ɓɛɛ a̧ de gasa demɔ nɛ̀ ta-tɛ ha̧ wa lɛŋ.

³⁴Mgbara o wi nɛ̀ kɔ̧ɔ̧ ɗɔaa ha̧ Jesu lɛŋ, wi nɛ̀ mɔ ɓan a̧ bo na; wen wi nɛ̀ a̧a̧ so nɛ̀ fɔ, kóó tua, nɛ̀ɛ̀ ɗɔr, ɓɛɛ baa mbɔi-a

³⁵nɛnɛ e ti o betom, ɓɛɛ wa kɛ̧ɛ̧ mbɔi-a nɛ̀ ŋmaa, wen ha̧ kóó o ndé mɛ kpa mɔɔ-de-san kɔ‘i.

³⁶Jozɛf ŋma be Siprɛ, bezaŋ o wi-ɗafi-sɔ̧, ŋma nin nɛ̀ o betom aa ha̧ a̧ nɛ́ Barnabas, mɛ̀ nɛ́ wen nɛ̀ tɔ̧‘e: «wi-ha̧-nɔɔ-ŋgiɗi»; a̧ duka so nɛ̀ ŋma fɔ;

³⁷nɛ́ mɔ'ɔ n'aa ɗɔra ɓɛɛ a̧ ba mbɔi-a nɛnɛ e ti o betom.