Read Northwest Gbaya RƆMƐN 1 Bible Online

RƆMƐN 1 - Northwest Gbaya bible

RƆMƐN 1

¹Nɛ́ mi Paul, wi-de-tom ko Jesu Krist, wi nɛ̀ Sɔ̧ hoka e nɛtɛ mɛ duk betom wen zu tɔ̧ɔ̧ De Mbe Wen kɔ‘i.

²Sɔ̧ ha̧a̧ so nú wen De Mbe Wen'i nɛ̀ nú o wi-tɔ̧-wen oi nú Sɔ̧ zaŋ sa̧a̧ Yɔramɔ kɔ‘i.

³De Mbe Wen'i nɛ́ wen zu Bem kɔ̧-a̧ nɛ̀ duka nɛ́ bezaŋ David, nɛ̀ war ko bíí,

⁴ɓɛɛ nɛ̀ war ko Sa̧a̧ Ɔmi, kura-a kɔ̧-a̧ tɛ fio usa'e, a̧ nɛ́ Bem ko Sɔ̧ nɛ a̧a̧ nɛ ŋgai; wi’ɛi nɛ́ Jesu Krist, Gasa Wan k’ɛɛ.

⁵Sɔ̧ dee mɔ nɛ̀ ta-tɛ h’ɛ́ɛ́ nɛ̀ ɗoŋ Jesu Krist, wen h’ɛ́ɛ́ mɛ duk tɛ tom ko o betom kɔ̧-a̧. A̧ dee hegɔ wen h’ɛ́ɛ́ mɛ de ha̧ o gɔni-dùk zaŋnu lɛŋ mɛ kɔ̧ ɗɔaa ha̧ a̧, in mɛ mbo zu ha̧ a̧ wen ha̧ nin-a mɛ hur.

⁶Ɛ́nɛ́ mbɛt, Sɔ̧ saa'nɛ́ mɛ ya o bíí ko Jesu Krist mgbara o wi nɔ‘i.

⁷Mi yɔr mɔ'ɔ h’ɛ́nɛ́ o bíí lɛŋ nɛ̀ Sɔ̧ kɔ̧ɔ̧ nɛ̀ a̧a̧ Rɔm, o wan nɛ̀ Sɔ̧ saa mɛ ya o sa̧a̧-bíí. Deemɔ nɛ ta-tɛ in ga̧a̧mɔ ko Sɔ̧, Dáà k’ɛɛ, in ko Gasa Wan Jesu Krist a̧ dúk in'nɛ̀ɛ́.

⁸Kuti-a, mi de osoko ha̧ Sɔ̧ kɔ‘m nɛ̀ nin Jesu Krist wen zu'nɛ́ lɛŋ, wen wa tɔ̧ɔ̧ nyɛrɛ kɔ̧ɔ̧ɗɔɔwen k’ɛ́nɛ́ dam zaŋnu lɛŋ.

⁹Mi gasi Sɔ̧ nɛ̀ kɔ̧ see-am, tɔ̧ nɛ̀ De Mbe Wen ko Bem kɔ̧-a̧ nɛnɛ. A̧ nɛ́ wi-sedaako wen n'am tɔ̧‘i. Tɛ‘m bi ɗoŋ‘nɛ́ tɛ kɔfa-sɔ̧ kɔ‘m na ɓɔnsɛnɛ.

¹⁰Mi kɔfi a̧ ɓɔnsɛnɛ‘e, kà a̧ nɛ́ kɔ̧a̧, a̧ a̧ hú̧í̧ war ha̧‘m mɛ nɛ tɛ‘nɛ́.

¹¹Mi kɔ̧ɔ̧ nyɛmna mɛ́ nɛ̀ɛ́ zɔk'nɛ́, wen ha̧‘m mɛ ba ŋma ha̧a̧mɔ ko Sa̧a̧ Ɔmi nɛnɛ h’ɛ́nɛ́, mɛ ha̧ ŋgai h’ɛ́nɛ́.

¹²Ɓɛɛ mɔ nɛ̀ gana zu mɔ‘i, mi kɔ̧ɔ̧ mɛ hɔ tɛ‘nɛ́ wen h’ɛ́ɛ́ mɛ ha̧ nɔɔ-ŋgiɗi ha̧ ŋmaa in o ŋmaa tɛ kɔ̧ɔ̧ɗɔɔwen k’ɛɛ kpɔk in o ŋmaa.

¹³O nya'm, mi kɔ̧ɔ̧ mɛ mbaŋ tɛ‘nɛ́, mi ɗafa so mɔ war géè ndé mɛ nɛ tɛ‘nɛ́, wen mi kɔ̧ɔ̧ so ha̧ tom kɔ‘m mɛ wai mgbara'nɛ́, hee mɔ'ɔ nɛ̀ dee mgbara o ŋma gɔni-dùk ga; ɓɛɛ hɔ kinii o mɔ biti dor am.

¹⁴Wen tom kɔ‘m mɛ̀ nɛ́ wen ha̧‘m mɛ́ nɛ̀ɛ́ tɔ̧ De Mbe Wen ha̧ o be Grɛk in o bíí nɛ̀ bó nɛ́ Grɛk na mbɛt, ha̧ o wi-iŋ-mɔ in o wi nɛ̀ iŋ mɔ na mbɛt.

¹⁵Nɛ́ hegɔ, ɓɛɛ s'am kɔ̧ɔ̧ mɛ nɛ̀ɛ́ tɔ̧ De Mbe Wen ko Sɔ̧ h’ɛ́nɛ́, o bíí nɛ̀ ya Rɔm mbɛt.

¹⁶Foe De Mbe Wen beka de'm na, wen wen'i nɛ́ ŋgai ko Sɔ̧ nɛ̀ tɛ kpasi kóó o ndé nɛ̀ kɔ̧ɔ̧ ɗɔaa ha̧ Sɔ̧, o be Juif nɛti, ɓɛɛ hɔ-ɗoŋ-aa o be Grɛk.

¹⁷Nɛ́ De Mbe Wen ko Sɔ̧‘i a̧ usi yuwar ɗafamɔ nɛ̀ Sɔ̧ ɗafi wen ha̧ bíí mɛ́ duk nɛ́ wi-de-mɔ nɛ̀ yuwar-a ti a̧ wen zu kɔ̧ɔ̧ɗɔɔwen nɛ̀ ɗoŋ kɔ̧ɔ̧ɗɔɔwen nyɛm nɛ̀ ɗoŋ mɔ nɛ̀ yɔra so'e: «Wi-de-mɔ nɛ̀ yuwar-a tɛ kpasi wen zu kɔ̧ɔ̧ɗɔɔwen kɔ‘i.»

¹⁸Nyimsea ko Sɔ̧ kur yiwese ŋgɔn mɛ zu ɗaŋmɔ in gɔɔmɔ lɛŋ nɛ̀ o bíí de, wen deemɔ nɛ̀ yuwar-a na kɔ-wa dor nɛ́ kpasawen mɛ de tom kɔ‘i.

¹⁹Mɔ ko Sɔ̧ nɛ̀ bíí tɛ̀ɛ́ iŋ, o wi nɔ‘i iŋa so kaɗi, wen Sɔ̧ nɛ̀ tɛ-wi usa so mɔ‘i ha̧ wa.

²⁰Nɛ̀ Sɔ̧ dee nɛ̀ nù in yiwese, o ŋma mɔ tɛ duka-a kɔ̧-a̧ a̧a̧ sɛnɛ nɛ̀ bíí nyɛm mɛ zɔk na; mɛ̀ nɛ́ ŋgayamɔ kɔ̧-a̧ nɛ̀ duk kpoo nɛ kpoo in duka Sɔ̧ kɔ̧-a̧. O mɔɔ nɔ‘i wi nyɛma mɛ iŋ kànà tɛ o mɔ n'aa dea. Hegɔ, o wi nɔ‘i bó nɛ̀ wen mɛ tɔ̧ na,

²¹wen wa iŋa Sɔ̧, ɓɛɛ wa gasi a̧ nyɛm sɛnɛ na, wa de osoko ha̧ a̧ na mbɛt. Wa baa kɔ-wa iŋamɔ e tɛ mgbelemɔ, ɓɛɛ taamɔ kɔ-wa kifi géé tumui̧ mɔ.

²²Wa ta kɔ-wa'e wi nɛ́ o wi-iŋ-mgbara-mɔ wó, ɓɛɛ wa nɛ́ o mgbelewi sɔɔ géè.

²³Wa ee zɔna gasamɔ ko Sɔ̧ nɛ̀ duk kpoo nɛ kpoo duk, ɓɛɛ wa zik tɛ gasi nɛ́ o mboo-mɔ nɛ hɔɔ ŋmaa in bíí nɛ̀ fe fee’ɛ, in o nɔ̧́í̧, o saɗi, ká bá nɛ̀ o saɗi-gbur-zaŋ nɛ̀ nù.

²⁴Nɛ́ mɔ‘i a̧ dee ha̧ Sɔ̧ mɛ e wa mɛ de ndiŋmɔ nyɛm nɛ̀ ɗoŋ wɔ-mɔ mɛ kɔ̧ see-wa, ɓɛɛ wa pi̧ tɛ-wa tɛ dee ndiŋmɔ in o ŋmaa.

²⁵Wa ee kpasawen ko Sɔ̧ duk mɛ́ nɛ̀ ɗoŋ ndela, gasi nɛ̀ o mɔ nɛ̀ Sɔ̧ dea, de nɛ̀ tom ha̧ o mɔɔ nɔ‘i mbɛt, ɓɛɛ wa e zɔna Sɔ̧, Wan-de-mɔ lɛŋ nɛ̀ tóká-de-yoŋgo duk zu-a kpoo nɛ kpoo’ɛ dúk! Aamɛn.

²⁶Mɛ̀ nɛ́ wen hegɔ, Sɔ̧ siŋa wa pi̧ tɛ dee mɔɔ-búù kɔ-wa; nɛ́ mɔ'ɔ nɛ̀ o okoo kɔ-wa ee duka-a in o wiwii duk, ɓɛɛ zik tɛ mɛ ɔ ɔa-a in o ŋmaa woyo.

²⁷O wiwii mbɛt tɛɛ e yuwar duka-a in o okoo duk, ɓɛɛ zik tɛ mɛ de wɔ ŋmaa in o ŋmaa, de nɛ mɔɔ-búù sitɛ ŋmaa in o ŋmaa, ɓɛɛ wa kpa kànà mɔɔ-oi yɔɔ-kaya kɔ-wa mbɛt.

²⁸Ɓɛɛ hee mɔ'ɔ nɛ̀ wa bɛ̧ɛ̧ iŋa Sɔ̧ ga, a̧ ee wa tɛ géé tum taamɔ kɔ-wa; ha̧ wa mɛ de mɔ nɛ̀ wa nyɛm so mɛ de na.

²⁹O deemɔ nɛ yuwar-a na nɛtɛ nɛtɛ lɛŋ mɔi̧a duk tɛ-wa: dee ɗutukui-mɔ, ndiŋmɔ, ɗaŋ, aa-see-mɔ, gbɛɛ-zu, kia-wen, gɔn-ta, sɛnmɔ in baa-nin-bíí.

³⁰Wa nɛ́ o wi-tɔ̧-ɗaŋ-wen, o wi-sɛn-sɔ̧, o wi-kii-wen, o wi-ŋmaŋ-tɛ, o wi-gɔ-tɛ, o wi-iŋ-yuwar dee ɗaŋmɔ in o wi-de-ŋgazu in o dáà in nàà kɔ-wa.

³¹Zu-wa bo na, kpasawen bo kɔ̧ nú-wa na mbɛt; wa nɛ́ o wi-saka-yí nɛ̀ kó bo yí-wa na.

³²Kóó nɛ̀ wa iŋa'e Sɔ̧ tɛ gɔn kita-fio zu o wi-de-pɛrti mɔ hegɔ lɛŋ wó‘i, kɔ-wa kana nɛ́ ee see tɛ deemɔ kɔ-wa nɔ‘i siti; ɓɛɛ zu-a'i, wa zɔn nɛ́ o wi-de-kalemɔ‘i mbɛt.