Read Northwest Gbaya RƆMƐN 10 Bible Online

RƆMƐN 10 - Northwest Gbaya bible

RƆMƐN 10

¹O nya'm, mɔ n'am kɔ̧a̧ nɛ̀ see-am in kɔfa-sɔ̧ kɔ‘m wen wa, mɛ̀ nɛ́ wen ha̧ wa mɛ kpasi.

²Mi nɛ́ wi-sedaako'e see-wa duk tɛ mɔ ko Sɔ̧ nyɛmna, ɓɛɛ bó nɛ́ tɛ kpasa iŋamɔ sɛnɛ na.

³Wa kpɛk deemɔ nɛ̀ yuwar-a nɛ̀ tɛ́ nɛ̀ tɛ́ Sɔ̧ na; wa kii mɛ́ de nɛ́ war kɔ-wa nɛ̀ zu-wa, ɓɛɛ wa kɔ̧ mɛ́ mbo zu tɛ deemɔ ko Sɔ̧ nɛ̀ yuwar-a na.

⁴Wen sɔŋkur mɔ ko heembea nɛ́ Krist, wen ha̧ o ndé nɛ̀ kɔ̧ɔ̧ ɗɔaa mɛ́ duk wi-de-mɔ nɛ̀ yuwar-a.

⁵Moisɛ nɛ̀ tɛ-wi yɔra mɔ zu deemɔ nɛ̀ yuwar-a nɛ̀ tɛ́ nɛ̀ tɛ̀ heembea'e: «Wi nɛ̀ mbo zu tɛ heembea nɛ̀ oi-aa lɛŋ tɛ kpasi nɛ̀ ɗoŋ heembea.»

⁶Ɓɛɛ deemɔ nɛ̀ yuwar-a nɛ̀ tɛ́ nɛ̀ tɛ̀ kɔ̧ɔ̧ɗɔɔwen tɔ̧a̧‘e: «Ká mɛ́ tɔ̧ nɛ̀ kɔ̧ see-mɛ‘e: ‹Nɛ́ o'o tɛ daŋ si yiwese o nde?› na. (I̧i̧ nɛ́ baa Krist zir nɛ piiɗoŋ.)

⁷Kóó ká mɛ́ tɔ̧‘e: ‹Nɛ́ o'o tɛ zir si kɔ̧ ɗuka-fara mɛ o nde?› na.» (I̧i̧ nɛ́ baa Krist gbonɛ mgbara o fio.)

⁸Yɔramɔ tɔ̧a̧‘e: «Wen ko Sɔ̧ duk mgbák katɛ mɛ, sɛn kɔ̧ nú-mɛ in sɛn kɔ̧ see-mɛ mbɛt.» Wen'i nɛ́ wen zu kɔ̧ɔ̧ɗɔɔwen n’ɛɛ tɔ̧'ɛ.

⁹Wen kà mɛ nɛ́ gbara nɛ̀ nú-mɛ‘e, Jesu nɛ́ Gasa Wan, in kà mɛ nɛ́ kɔ̧ɔ̧ ɗɔaa kɔ̧ see-mɛ‘e, Sɔ̧ kpasa a̧ tɛ fio, ɓɛɛ mɛ́ tɛ kpasi.

¹⁰Mɛ̀ nɛ́ wen nɛ tɔ̧: kɔ̧ɔ̧ ɗɔaa nɛ̀ see-wi de ha̧ Sɔ̧ mɛ zɔk wi hee wi-de-mɔ nɛ̀ yuwar-a ga, ɓɛɛ gbara-a tɔ̧ nɛnɛ nɛ̀ nú-wi dee ha̧‘i mɛ kpasi.

¹¹Wen Yɔramɔ tɔ̧a̧‘e: «Foe beka de kóó o ndé nɛ̀ kɔ̧ ɗɔaa ha̧ Sɔ̧ na.»

¹²Hegɔ kɛ̧ɛ̧-mgbara-mɔ bo mgbara Juif in Grɛk na. Wa lɛŋ a̧a̧ nɛ̀ kpɔk Gasa Wan nɛ̀ de mɔ nɛ̀ dɔka-a ha̧ o wi nɛ̀ sa nin-a.

¹³Wen, «kóó o ndé nɛ̀ sa nin Gasa Wan tɛ kpasi.»

¹⁴Kà o bíí kɔ̧́ ɗɔaa ha̧ a̧ na, wa tɛ sa nin-a hee ge? Ɓɛɛ kà wa nɛ́ zia wen kɔ̧-a̧ na, wa tɛ kɔ̧ ɗɔaa ha̧ a̧ hee ge? Ɓɛɛ kà ŋma bíí tɔ̧́ ha̧ wa na, wa tɛ zii hee ge?

¹⁵Kà‘i nɛ́ toma bíí na, nɛ́ o'o tɛ tɔ̧ tɔ̧a̧-a̧ o? Wen Yɔramɔ tɔ̧a̧‘e: «Oee de naŋ o yaa-ba de mbe wen tɛnɛ wa!»

¹⁶Ɓɛɛ wa lɛŋ mbo zu tɛ De Mbe Wen'i na. Wen Esaii tɔ̧ɔ̧ so'e: «Gasa Wan, nɛ́ o'o kpɛka wen k’ɛ́nɛ́ n’ɛɛ tɔ̧ɔ̧ so'i o?»

¹⁷Hegɔ wi kɔ̧́ ɗɔaa ha̧ Sɔ̧ wen zu zia wen, ɓɛɛ mɔ nɛ̀‘i zii'i nɛ́ wen ko Krist.

¹⁸Mi kɔ̧ɔ̧ mɛ ak mɔ‘e: O be Israɛl zii so wen'i na nde? Wa zia! Wen o bíí zia tiger o wi-tɔ̧-wen'i dam zu nù lɛŋ, wen kɔ-wa nɛ̀ɛ́ hɔ nduti nù mɛ mbɛt.

¹⁹Ɓɛɛ mi kɔ̧ɔ̧ mɛ ak mɔ woyo'e nde: Israɛl zii so wen'i na nde? Wen Moisɛ tɔ̧ɔ̧ so'e: «Mi tɛ de ha̧ see'nɛ́ mɛ duk tɛ o bíí nɛ̀ bó nɛ́ kpasa zuduk bíí na. Mi tɛ de ha̧ nyimsea k’ɛ́nɛ́ mɛ kur zu o zuduk bíí nɛ̀ bó nɛ̀ iŋa-mgbara-mɔ na.»

²⁰Wen Esaii tɔ̧ɔ̧ so mbɛt'e: «O wi nɛ̀ kii so'm na, kpaa'm, ɓɛɛ mi de ha̧ o wi nɛ̀ ak so'm na mɛ zɔk am mbɛt.»

²¹Ɓɛɛ a̧ tɔ̧ wen zu Israɛl mbɛt'e: «Mi nyɛi̧a er-am sitɛ o wi-ŋgazu in o wi-si-kafɛ.»