Read Northwest Gbaya RƆMƐN 12 Bible Online

RƆMƐN 12 - Northwest Gbaya bible

RƆMƐN 12

¹Mi ai nú h’ɛ́nɛ́ o nya'm, wen zu deako ko Sɔ̧, ɛ̀nɛ̀ há̧ tɛ‘nɛ́ ha̧ Sɔ̧ nɛ̀ mɔɔ-ɗafi-sɔ̧ nɛ̀ duk kpasa, nɛ̀ duk nɛ̀ sa̧a̧-a̧ in nɛ̀ dee tɛ-a mbɛt; mɔ‘i tɛ duk nɛ́ kpasa ɗafa-sɔ̧ k’ɛ́nɛ́ ha̧ a̧.

²K’ɛ́nɛ́ de mɔ hee o bíí zaŋnu kinii’ɛ ga na, ɓɛɛ ɛ̀nɛ̀ kpá mbe ta ha̧ yuwar deemɔ k’ɛ́nɛ́ mɛ́ kpai; hegɔ‘i, ɛ́nɛ́ tɛ iŋ kɛ̧ɛ̧ mgbara mɔ nɛ̀ Sɔ̧ kɔ̧a̧: mɔ nɛ̀ ɔ dee, mɔ nɛ̀ dee tɛ-a in mɔ nɛ̀ nyɛma sɛnɛ mbɛt.

³Mi tɔ̧ wen’ɛ ha̧ o ndé kpɔk kpɔk nyɛm nɛ̀ ɗoŋ deemɔ nɛ̀ ta-tɛ ko Sɔ̧ ha̧‘m: k’ɛ́nɛ́ ŋmaŋ tɛ‘nɛ́ gan mɔ nɛ̀‘i nyɛma mɛ de na, ɓɛɛ ɛ̀nɛ̀ tá mɔ nɛ̀ de-a nyɛm nɛ̀ ɗoŋ kɔ̧ɔ̧ɗɔɔwen nɛ̀ Sɔ̧ ha̧a̧ h’ɛ́nɛ́ kpɔk kpɔk, k’ɛ́nɛ́ tɛɛ ŋmaŋ tɛ‘nɛ́.

⁴Kiitɛ-ɛɛ nɛ́ kpɔk, ɓɛɛ o dokoɗo-tɛ-ɛɛ ɔ dɔka nɛ̀ a̧a̧ nɛ̀ tom kɔ-wa nɛtɛ nɛtɛ.

⁵Hegɔ mbɛt, gíí yɛ duk nɛ́ kiitɛ kpɔk tɛ Krist, ɓɛɛ ɛ́ɛ́ duk nɛ́ dokoɗo-tɛ ŋmaa in o ŋmaa.

⁶Ɓɛɛ Sɔ̧ ha̧a̧ mɔ nɛ̀ ta-tɛ h’ɛ́ɛ́ nɛtɛ nɛtɛ hee a̧ kɔ̧ɔ̧ ga. Wi nɛ̀ kpaa ha̧a̧mɔ wen tɔ̧ɔ̧-wen oi nú Sɔ̧, ɓɛɛ wi’ɛi a̧ tɔ̧́ wen'i nyɛm nɛ̀ ɗoŋ kɔ̧ɔ̧ɗɔɔwen kɔ‘i.

⁷Ŋma bíí nɛ́ kpaa ha̧a̧mɔ wen dee tom, ɓɛɛ nɛ̀ a̧ a̧ dé tom. Ɓɛɛ kà ŋma bíí nɛ́ kpaa nɛ́ ha̧a̧mɔ wen usamɔ, n'aa úsí mɔ.

⁸Kà ŋma bíí nɛ́ kpaa ha̧a̧mɔ wen tɔ̧ɔ̧-mbɔrɔ, ɓɛɛ n'aa tɔ̧́ mbɔrɔ; ɓɛɛ wi-ha̧-mɔ, a̧ há̧ nɛ́ mɔ, ká a̧ tɔr na. Wi nɛ̀ duk zu bíí, a̧ dúk zu wa nɛ̀ de-a; wi-de-ko mbɛt, a̧ dé ko nɛ̀ desee.

⁹Kɔ̧ɔ̧mɔ k’ɛ́nɛ́ a̧ dúk nɛ̀ see kpɔk. Ɛ̀nɛ̀ yú ɗaŋmɔ nɛ̀ kpasa-a, ɓɛɛ ɛ̀nɛ̀ ndáɗí tɛ‘nɛ́ nɛ̀ demɔ.

¹⁰Kɔ̧ɔ̧mɔ ko nya-wi a̧ ndáɗí‘nɛ́ tɛ ŋmaa h’ɛ́nɛ́ mɛ́ duk nɛ̀ kpɔk kɔ̧ɔ̧mɔ; ɛ̀nɛ̀ tú̧ tɛ ŋmaa in o ŋmaa.

¹¹K’ɛ́nɛ́ de tom nɛ̀ tɛɛri na, see'nɛ́ lɛŋ a̧ dúk tɛ dee tom ha̧ Gasa Wan.

¹²Zaŋ ee ta k’ɛ́nɛ́, ɛ̀nɛ̀ yá nɛ̀ desee, ɛ̀nɛ̀ nɔ́ ŋgiɗi tɛ bɔnɛ, ɛ̀nɛ̀ é see'nɛ́ tɛ kɔfa-sɔ̧.

¹³Ɛ̀nɛ̀ gbák o sa̧a̧-bíí tɛ mɔ nɛ̀ ɓan wa, ɓɛɛ ɛ̀nɛ̀ kpɛ́k o gɛnɛ nɛ̀ de-a.

¹⁴Ɛ̀nɛ̀ tók de yoŋgo zu o bíí nɛ̀ usi bɔnɛ h’ɛ́nɛ́, ɛ̀nɛ̀ tók nɛ́ de yoŋgo zu-wa, ɓɛɛ k’ɛ́nɛ́ fom wa na.

¹⁵Ɛ̀nɛ̀ dé nyɛŋɛ in o wi nɛ̀ ya nɛ̀ desee, ɓɛɛ ɛ̀nɛ̀ hí̧í̧ kɔ̧a̧ in o wi nɛ hi̧i̧ kɔ̧a̧.

¹⁶Ɛ̀nɛ̀ yá nɛ̀ kale taamɔ in o ŋmaa; k’ɛ́nɛ́ de wɔ gasamɔ na, ɓɛɛ ɛ̀nɛ̀ kíí mɛ́ duk nɛ̀ mɔka-see. K’ɛ́nɛ́ e tɛ‘nɛ́ hee o wi-iŋ-mgbara-mɔ ga na mbɛt.

¹⁷K’ɛ́nɛ́ kifi er ɗaŋmɔ ha̧ ŋma bíí na; ɛ̀nɛ̀ é see'nɛ́ mɛ́ de nɛ́ demɔ ti o bíí lɛŋ.

¹⁸Kà yuwar nɛ́ boa, ɓɛɛ ɛ̀nɛ̀ kíí ha̧ ga̧a̧mɔ mɛ́ duk mgbara'nɛ́ in o bíí lɛŋ.

¹⁹O wi n'am kɔ̧ɔ̧ nyɛmna, k’ɛ́nɛ́ kifi er ɗaŋmɔ nɛ̀ tɛ‘nɛ́ na, ɓɛɛ ɛ̀nɛ̀ é ha̧ nyimsea ko Sɔ̧ mɛ́ de tom kɔ‘i, wen Yɔramɔ tɔ̧a̧‘e: «Kifa-er nɛ́ kɔ‘m; Gasa Wan'e, nɛ́ mi'i tɛ kifi er.

²⁰Kà wɔ gbɛ wisɛn kɔ-mɛ, mɛ̀ há̧ nyɔŋmɔ ha̧ a̧; kà wɔ-yì gbɛ a̧, mɛ̀ há̧ yì ha̧ a̧ nɔ, wen tɛ dea-a hegɔ‘i, nɛ́ kɛ̧i̧-wee a̧ mɛ a zu-a.»

²¹Ká mɛ́ e ha̧ ɗaŋmɔ mɛ́ kpa ŋgai zu-mɛ na, mɛ̀ dé nɛ́ demɔ gan zu ɗaŋmɔ.