Read Northwest Gbaya RƆMƐN 13 Bible Online

RƆMƐN 13 - Northwest Gbaya bible

RƆMƐN 13

¹Bíí lɛŋ a̧ mbó zu ha̧ o gasawi nɛ̀ ɔ wan zu wa, ɔɔ-wan lɛŋ tɛ́ nɛ̀ tɛ́ Sɔ̧, ɓɛɛ o gasawi nɛ̀ a̧a̧ zaŋnu’ɛ lɛŋ, nɛ́ a̧ a̧ ee wa.

²Hegɔ, wi nɛ̀ mbo zu ha̧ o gasawi na, de nɛ́ ŋgazu tɛ ɗafamɔ ko Sɔ̧, ɓɛɛ o wi-ŋgazu tɛ dak kita ko Sɔ̧ pi̧ zu wa nɛ̀ tɛ-wa.

³Kà mɛ dé demɔ, ɓɛɛ kíì gasawi beka de mɛ́ na; a̧ kà mɛ dé nɛ́ ɗaŋmɔ, ɓɛɛ kíì wa dee mɛ́. Kà mɛ kɔ̧́ ha̧ kíì gasawi mɛ́ de mɛ́ na, mɛ̀ dé nɛ́ demɔ, ɓɛɛ wa tɛ zɔn mɛ́.

⁴Wa de nɛ́ tom ko Sɔ̧ ir nɛ̀ mɛ́ ha̧ mɛ́ mɛ́ de demɔ; ɓɛɛ kà mɛ nɛ́ dee nɛ́ ɗaŋmɔ, nɛ̀ kíì a̧ dé mɛ́ ŋgaɓo. Wen bó nɛ́ gba-paa duk er wa géè na. Wa de nɛ́ tom ko Sɔ̧ tɛ usa bɔnɛ ha̧ o wi nɛ̀ de mɔ de na; mɔ‘i usi nɛ́ nyimsea ko Sɔ̧ zu o wi nɔ‘i.

⁵Bíí tɛ mbo kànà zu, bó nɛ́ wen yuu nyimsea ko Sɔ̧ ɓɛɛ na, mɛ̀ nɛ́ wen ha̧ see-mɛ mɛ́ duk keɗeŋ mbɛt.

⁶Gba̧a̧-mɔ n’ɛnɛ gbo garama wen-aa'i nɛ́ mɔ‘i, wen nɛ́ Sɔ̧'ɔ̧ ee o wi-ba-garama tɛ tom'i.

⁷Ɛ̀nɛ̀ dé mɔ ha̧ o ndé nyɛm ɗoŋ-aa: ɛ̀nɛ̀ gbó garama ha̧ o wi-ba-garama, ɛ̀nɛ̀ há̧ zu-lumɔ ha̧ o wi-ndɛm-zu-lumɔ, ɛ̀nɛ̀ yú o wi nɛ̀‘i nyɛma mɛ́ yu, ɛ̀nɛ̀ tú̧ tɛ o wi nɛ̀‘i nyɛma mɛ́ tu̧ tɛ-wa, o ndé lɛŋ nyɛm nɛ̀ ɗoŋ mɔ nɛ̀‘i tɛ de sitɛ wa.

⁸Ká nyamandoi ko bíí duk zu'nɛ́ na ndó-ndó-ndó, ɓɛɛ nyamandoi'i a̧ dúk nɛ́ kɔ̧ɔ̧ ŋmaa in o ŋmaa, wen wi nɛ̀ kɔ̧ ŋmà-wi kasa heembea nɛ̀ oi-aa.

⁹Hegɔ, o heembea nɛ̀ tɔ̧‘e: «Ká mɛ́ de dàlà na, ká mɛ́ gbɛ zu na, ká mɛ́ zu̧ mɔ na, ká mɛ́ a see mɔ na,» in oi o dɔka-a lɛŋ tɔ̧ nɛ́ wen zu̧ wen’ɛ: «Mɛ̀ kɔ̧́ ŋmà-mɛ hee mɛ́ kɔ̧ɔ̧ tɛ-mɛ ga.»

¹⁰Kɔ̧ɔ̧mɔ de ɗaŋmɔ in ŋma-wi na kóó tikiɗi, wen kɔ̧ɔ̧mɔ usi'e heembea hɔɔ gba̧a̧ lɛŋ kaɗi.[1]

¹¹Ɛ́nɛ́ iŋa ŋgimbi n’ɛ̀ɛ̀ ya sɛnɛ kinii; mɛ̀ nɛ́ ŋgimbi h’ɛ́nɛ́ mɛ́ tun tɛ ya. Ɛ́ɛ́ hɛɗa mɛ́ kpasi kaɗi; ɗoŋ ŋgimbi nyɛi̧ hee kuti ŋgimbi n’ɛ̀ɛ̀ kɔ̧ɔ̧ so nɛ̀ ɗɔaa ha̧ Sɔ̧ ga ɓɔna.

¹²Zɛ ɗuka ɓɛɛ mɔ hɛɗa sa̧a̧-a̧ kaɗi; hegɔ, ɛ̀ɛ̀ síŋ o tom ko tum a taŋ, ɓɛɛ ɛ̀ɛ̀ á o boi-biro ko sa̧a̧mɔ tɛ-ɛɛ hee laa ga.

¹³Ɛ̀ɛ̀ dé mɔ nyɛm sɛnɛ hee mɛ wese ga. K’ɛ́ɛ́ de saa, gbɛ́ nɛ̀ dɔ̧ɔ̧ na, k’ɛ́ɛ́ de ndiŋmɔ, de nɛ̀ dàlà na, k’ɛ́ɛ́ kii wen, a nɛ̀ see mɔ na mbɛt.

¹⁴Ɛ̀nɛ̀ pí̧ Gasa Wan Jesu Krist tɛ‘nɛ́ hee laa ga, ɓɛɛ k’ɛ́nɛ́ ha̧ tɛ‘nɛ́ tɛ deemɔ nɛ̀ mur-tɛ kɔ̧a̧ na.