Read Northwest Gbaya RƆMƐN 14 Bible Online

RƆMƐN 14 - Northwest Gbaya bible

RƆMƐN 14

¹Ɛ̀nɛ̀ kpɛ́k bíí nɛ̀ bó nɛ̀ ŋgai tɛ kɔ̧ɔ̧ɗɔɔwen kɔ̧-a̧ na, ɓɛɛ k’ɛ́nɛ́ si kafɛ zu o taamɔ kɔ̧-a̧ na mbɛt.

²Bíí nɛ̀ a̧a̧ nɛ̀ ŋgai tɛ kɔ̧ɔ̧ɗɔɔwen nyɛma mɛ nyɔŋ kɔ‘i mɔ lɛŋ; ɓɛɛ wi nɛ̀ bó nɛ̀ ŋgai tɛ kɔ̧ɔ̧ɗɔɔwen na, nyɔŋ kɔ‘i nɛ́ wa̧a̧-kpoo ɓɛɛ.

³Ká wi nɛ̀ nyɔŋ mɔ lɛŋ zɔk wi nɛ̀ zim o ŋma mɔ, hee geemɔ ga na; ɓɛɛ ká wi nɛ̀ zim o ŋma mɔ tɔ̧ wen zu wi nɛ̀ nyɔŋ mɔ lɛŋ na, wen Sɔ̧ kpɛka wi’ɛi mbɛt.

⁴Mɛ́ nɛ́ o mɛ́ tɔ̧ wen zu wi-de-tom ko wan-aa o? Kóó wi’ɛi de tom nɛ̀ de-a, kóó a̧ de tom de na mbɛt, i̧i̧ nɛ́ wen ko wan kɔ̧-a̧. Gasa Wan a̧a̧ nɛ̀ ŋgai mɛ́ yor ɗoŋ wi’ɛi, ɓɛɛ a̧ tɛ de tom nɛ̀ de-a.

⁵Ŋma bíí tɔ̧ kɔ‘i'e wese bo hee ŋmaa ga na, ɓɛɛ ŋma bíí tɛ̀ɛ́ tɔ̧ kɔ‘i'e wese hee ŋmaa ga. Ɓɛɛ kóó o ndé a̧ yór zu kpasa taamɔ kɔ‘i.

⁶O wi nɛ̀ tɔ̧‘e o ŋma wese gana o ŋma, tɔ̧ mɔ‘i zɔn nɛ̀ Gasa Wan; ɓɛɛ wi nɛ̀ nyɔŋ mɔ lɛŋ, de mɔ‘i zɔn nɛ̀ Gasa Wan mbɛt, wen wa de nɛ́ osoko ha̧ Sɔ̧. Ɓɛɛ wi nɛ̀ nyɔŋ mɔ lɛŋ na, zim mɔ‘i wen zu Gasa Wan, ɓɛɛ a̧ de nɛ́ osoko ha̧ Sɔ̧ mbɛt.

⁷Wen ŋma bíí mgbara yɛ nɛ̀ duk kpasa wen tɛ-wi nɛ̀ tɛ-wi, bó na; kóó ŋma bíí mɛ fe wen tɛ-wi, bo na mbɛt.

⁸Wen k’ɛ̀ɛ̀ duk kpasa, ɛ́ɛ́ duk kpasa wen Gasa Wan; ɓɛɛ k’ɛ̀ɛ̀ fe, ɛ́ɛ́ fe wen Gasa Wan mbɛt; hegɔ, kóó ɛ̀ɛ̀ duk kpasa, kóó ɛ̀ɛ̀ fe mbɛt, ɛ́ɛ́ nɛ́ bíí ko Gasa Wan.

⁹Mɛ̀ nɛ́ wen ha̧ a̧ mɛ́ duk nɛ́ Gasa Wan ko o wi nɛ̀ fe in wi nɛ̀ ya kpasa, a̧ Krist fee nɛnɛ, ɓɛɛ kpasi.

¹⁰Ɓɛɛ nɛ̀ kɔ-mɛ, wen ge mɛ́ ba wen zu nya-mɛ ge? Mɛ́ e nya-mɛ tɛ geemɔ wen ge? Wen ɛ́ɛ́ lɛŋ tɛ hɔ ti kita ko Sɔ̧.

¹¹Wen Yɔramɔ tɔ̧a̧‘e: «Nɛ̀ mbetɛ, hee mi duk kpasa ga, o bíí lɛŋ tɛ gbɛ zugur nù ti'm, ɓɛɛ ndàrá-nú[2] bíí lɛŋ tɛ gasi Sɔ̧. Nɛ́ mi Gasa Wan a̧ tɔ̧ wen’ɛ.»

¹²Hegɔ, kóó o ndé kpɔk kpɔk mgbara yɛ tɛ we ɗoŋ mɔ kɔ‘i ha̧ Sɔ̧ nɛ̀ nú-a.

¹³Ɛ̀ɛ̀ é baa wen zu o ŋmaa duk. Ɓɛɛ ɛ̀ɛ̀ íŋ‘e bó nɛ́ ɔ dee ha̧ deemɔ k’ɛ́ɛ́ mɛ́ de ha̧ taamɔ ko o nya-ɛɛ mɛ́ ɗaŋ na, kóó ha̧ wa mɛ tik na.

¹⁴Mi iŋa, Gasa Wan Jesu dee ha̧‘m mɛ́ iŋ nɛ̀ mbetɛ‘e, ŋma mɔ nɛ̀ duk nɛ́ ndiŋmɔ nɛ̀ tɛ-wi bó na, ɓɛɛ kà bíí á̧ taa'e ŋma mɔ nɛ́ ndiŋmɔ wó, ɓɛɛ mɔ‘i duk nɛ́ ndiŋmɔ yí wi’ɛi ɛ̧.

¹⁵Kà bó nɛ́ wen nyɔŋmɔ a̧ mɛ ha̧ nɛ́ tu̧u̧-see ha̧ nya-mɛ, ɓɛɛ mɛ́ nɛ́ nɔ tɛ kɔ̧ɔ̧mɔ ɓɔna. Mɛ̀ zɔ́k tɛ-mɛ nɛ̀ de-a wen ká mɛ́ tɛ́ɛ̀ de ha̧ wi nɛ̀ Krist fea gɔn zu a̧ mɛ yɔ wen zu mɔ nɛ̀ mɛ nyɔŋ.

¹⁶Bó nɛ́ ɔ dee ha̧ o bíí mɛ kpa ŋma ɗaŋ wen mɛ́ tɔ̧ zu mɔ nɛ̀ duk nɛ́ demɔ wen'nɛ́ na.

¹⁷Wen Wan ko Sɔ̧, bó nɛ́ nyɔŋa mɔ in nɔɔ dɔ̧ɔ̧ na; ɓɛɛ nɛ́ deemɔ nɛ̀ yuwar-a, ga̧a̧mɔ, in desee nɛ̀‘i kpa tɛ Sa̧a̧ Ɔmi.

¹⁸Nɛ́ dee tom ha̧ Krist hee mɔ‘i ga, a̧ dé ha'i mɛ de tɛ Sɔ̧, in ha̧ o bíí mɛ kpɛk mɔ nɛ̀‘i de mbɛt.

¹⁹Ɛ̀ɛ̀ kíí nɛ́ mɔ nɛ̀ tɛ de ha̧ ga̧a̧mɔ mɛ duk mgbara yɛ, in mɔ nɛ̀ tɛ ha̧ ŋgai h’ɛ́ɛ́ in o ŋmaa.

²⁰K’ɛ́ɛ́ ɗaŋ yuwar tom ko Sɔ̧ wen zu nyɔŋmɔ na. War-tɛ mɔ lɛŋ ɔ sa̧a̧, ɓɛɛ nyɔŋa ŋma mɔ nɛ̀ tɛ de ha̧ bíí mɛ́ tik de na.

²¹Mɔ nɛ̀ duk nɛ̀ de-a nɛ́ mɔ'ɔ: ká mɛ́ nyɔŋ kpoo na, ká mɛ́ nɔ dɔ̧ɔ̧ na mbɛt, ká mɛ́ de ŋma mɔ nɛ̀ tɛ de ha̧ nya-mɛ mɛ́ tik na.

²²Mɔ nɛ̀ mɛ́ iŋa nɛ̀ sa̧a̧-a̧ wen zu kɔ̧ɔ̧ɗɔɔwen kɔ-mɛ, mɛ̀ é ha̧ ɓɔn mgbara mɛ in Sɔ̧; wen desee a̧a̧ zu bíí nɛ̀ kɛ̧ mgbara mɔ, ɓɛɛ dee mɔ‘i nɛ̀ fee-see!

²³Ɓɛɛ wi nɛ̀ nyɔŋ mɔ nɛ̀ fee-see na, wen a̧a̧ zu-a; wen deemɔ kɔ̧-a̧ nyɛm ŋmaa in yuwar kɔ̧ɔ̧ɗɔɔwen kɔ̧-a̧ na. Wen mɔ lɛŋ nɛ̀‘i de nɛ̀ bo tɛ yuwar kɔ̧ɔ̧ɗɔɔwen na, nɛ́ ɗaŋmɔ.