Read Northwest Gbaya RƆMƐN 2 Bible Online

RƆMƐN 2 - Northwest Gbaya bible

RƆMƐN 2

¹Kɔ-mɛ nɛ̀ mɛ gɔn kita zu ŋmà-mɛ'ɛ, kóó mɛ́‘i so nɛ́ o, wen a̧a̧ zu mɛ́ mbɛt. Gɔna kita nɛ̀ mɛ gɔn zu ŋmà-mɛ‘i, mɛ́ gɔn zu mɛ́ nɛ tɛ-mɛ, wen mɔ nɛ ŋmà-mɛ de'i, nɛ́ kale mɔ‘i a̧ mɛ de.

²Ɓɛɛ ɛ́ɛ́ iŋa'e Sɔ̧ gɔn kɔ‘i kita zu o wi nɛ̀ de pɛrti mɔɔ nɔ‘i nyɛm nɛ̀ ɗoŋ kpasawen.

³Mɛ́ wi-gɔn-kita zu o wi-de-mɔɔ nɔ‘i, ɓɛɛ nɛ́ mɔ'ɔ nɛ̀ mɛ duk tɛ dee kale kpɔk mɔ‘i mbɛt’ɛ, mɛ́ ta kɔ-mɛ‘e kita ko Sɔ̧ tɛ yaŋ zu-mɛ nde?

⁴Kóó mɛ ee gasa demɔ in nɔɔ-ŋgiɗi in deako ko Sɔ̧ tɛ geemɔ nde? Mɛ́ iŋ‘e Sɔ̧ de demɔ‘i ha̧ mɛ mɛ kpai duka-a kɔ-mɛ na nde?

⁵Ɓɛɛ kɔ-mɛ, mɛ́ ŋgai nɛ́ see-mɛ, mɛ́ kɔ̧ mɛ kpai duka-a kɔ-mɛ na; tɛ mɔ‘i nɛ̀ mɛ de'i, mɛ́ ndɛm nɛ́ nyimsea a zu-mɛ, pɛm nɛ̀ wese nɛ̀ Sɔ̧ tɛ usi nɛ̀ nyimsea kɔ‘i gɔn nɛ̀ kita nɛ̀ yuwar-a.

⁶A̧ tɛ ha̧ mɔ ha̧ bíí, kóó o ndé nyɛm nɛ̀ ɗoŋ tom kɔ‘i.

⁷O bíí nɛ̀ e see tɛ dee demɔ kii nɛ̀ gasamɔ, zɔnamɔ, in duka-a ɓɔnsɛnɛ, Sɔ̧ tɛ de ha̧ o wi nɔ‘i mɛ duk kpasa kpoo nɛ kpoo.

⁸Ɓɛɛ nyimsea in ɗaŋsee kɔ̧-a̧ tɛ tik zu o wi-ŋgazu nɛ̀ bɛ̧ kpasawen, ɓɛɛ nɛ̀ e tɛ tɛ dee ɗaŋmɔ nɛnɛ.

⁹Bɔnɛ in dita-see tɛ tik zu o bíí lɛŋ nɛ̀ de ɗaŋmɔ, o be Juif nɛti, ɓɛɛ hɔ-ɗoŋ-aa o be Grɛk mbɛt.

¹⁰Ɓɛɛ gasamɔ, zɔnamɔ in ga̧a̧mɔ tɛ duk zu o ndé nɛ̀ de demɔ, o be Juif nɛti, hɔ-ɗoŋ-aa o be Grɛk mbɛt,

¹¹wen Sɔ̧ kɛ̧ mgbara bíí na.

¹²Bíí lɛŋ nɛ̀ dé ɗaŋmɔ, nɛ̀ iŋ heembea ko Moisɛ na, tɛ fe, ɓɛɛ bó nɛ́ wen zu heembea'i na; ɓɛɛ o bíí nɛ̀ iŋa heembea'i, ɓɛɛ yak zu-a nɛ́ɛ̀ de ɗaŋmɔ, nɛ́ heembea'i a̧ tɛ gɔn kita zu wa,

¹³wen bó nɛ́ o wi nɛ̀ zii heembea nɛ̀ ɗoŋ zer géè a̧ duk wi-de-mɔ nɛ̀ yuwar-a ti Sɔ̧ na, ɓɛɛ nɛ́ o wi nɛ̀ kasi heembea á̧ Sɔ̧ tɛ de wa mɛ ya nɛ́ o wi-de-mɔ nɛ̀ yuwar-a.

¹⁴Kà o gɔni-dùk nɛ̀ iŋ heembea ko Moisɛ na, dé mɔ nɛ̀ see zu nyɛm nɛ̀ ɗoŋ heembea'i, wa nɛ́ heembea wen tɛ-wa woyo, kóó nɛ̀ wa bo so nɛ̀ heembea ko Moisɛ na'i.

¹⁵Mɔ‘i usa'e mɔ nɛ̀ heembea tɔ̧a̧ ha̧ bíí mɛ de, yɔra kɔ̧ see-wa kaɗi; taamɔ kɔ-wa usi hegɔ mbɛt. Kà wa dé ɗaŋmɔ, ɓɛɛ see-wa gɔna; a̧ kà wa dé demɔ, ɓɛɛ see-wa dea.

¹⁶De Mbe Wen ko Sɔ̧ n'am tɔ̧‘i, usi'e, nɛ́ mɔ‘i a̧ tɛ de wese nɛ̀ Sɔ̧ tɛ gɔn nɛ̀ kita nɛ̀ ɗoŋ Jesu Krist zu hu̧sa̧mɔ ko o bíí.

¹⁷Ɓɛɛ kɔ-mɛ nɛ̀ mɛ sa nin mɛ‘e Juif’ɛ, mɛ́ e ta-mɛ nɛ̀ heembea, ɓɛɛ mɛ́ duka tɛ-mɛ nɛ̀ Sɔ̧ kɔ-mɛ.

¹⁸Mɛ́ iŋa mɔ nɛ̀ Sɔ̧ kɔ̧a̧, mɛ́ iŋa kɛ̧ɛ̧-mgbara-mɔ, wen war kɔ-mɛ, mɛ iŋa heembea.

¹⁹Mɛ́ ta kɔ-mɛ‘e mɛ́ nɛ́ wi-mgbɔ o wi-boma-yí, mɛ́ nɛ́ sa̧a̧mɔ ko o bíí nɛ̀ ya zaŋ tum.

²⁰Mɛ́ nɛ́ wan-usi-mɔ ha̧ o wi nɛ̀ iŋ mɔ na, mɛ́ nɛ́ wi-usi-mɔ ha̧ o wi nɛ̀ taamɔ ɗuk na, wen kɔ-mɛ, mɛ́ kpaa mgbák iŋamɔ in kpasawen zaŋ heembea.

²¹Mɛ́ usi mɔ ha̧ o ŋma bíí, ɓɛɛ mɛ́ usi mɔ ha̧ tɛ-mɛ nɛ̀ tɛ-mɛ na! Mɛ́ nɛ̀ usi'e, ká‘i zu̧ mɔ na, ɓɛɛ nɛ́ mɔ'ɔ nɛ̀ mɛ zu̧ nɛ́ mɔ'ɛ!

²²Mɛ́ nɛ̀ tɔ̧‘e, ká‘i de dàlà na, nɛ́ mɔ'ɔ nɛ̀ mɛ de nɛ́ dàlà'ɛ! Mɔ ko o géé-sɔ̧ duk nɛ́ mɔɔ-nyɛr tɛ-mɛ, ɓɛɛ mɛ zu̧ nɛ́ mɔ kɔ̧ tua kɔ-wa!

²³Mɛ́ duk tɛ-mɛ nɛ̀ heembea, ɓɛɛ mɛ́ tɛ̀ɛ́ gbin heembea'i ɗaŋ nɛ̀ nin Sɔ̧,

²⁴hee mɔ'ɔ nɛ Yɔramɔ tɔ̧ɔ̧ so ga: «Nin Sɔ̧ ɗaŋa mgbara o gɔni-dùk wen zu'nɛ́.»

²⁵Nɛ̀ mbetɛ, kà mɛ́ nɛ́ kasa heembea e ɗoŋ gɔna-bɔr, ɓɛɛ gɔna-bɔr'i nɛ́ demɔ, ɓɛɛ kà mɛ́ nɛ́ gbina heembea nɛ̀ oi gɔna-bɔr kɔ-mɛ‘i, mɛ yak ŋmaa in wi-mbii na.

²⁶Mɛ̀ nɛ́ hegɔ, kà ŋma wi-mbii kásí mɔ nɛ̀ yɔra zaŋ heembea, bó nɛ́ wi tɛ zɔk wi-mbii'i hee wi nɛ̀ gɔna mbɔr ga, na nde?

²⁷Wi-mbii nɛ̀ kasi heembea, tɛ gɔn kita zu mɛ nɛ̀ oi heembea in gɔna-bɔr kɔ-mɛ‘i mbɛt, wen nɛ̀ mɛ kasi heembea'i na.

²⁸Bó nɛ́ mɔ mɛ tɛ-wi nɛ̀‘i zɔk a̧ de ha'i mɛ duk kpasa be Juif na; bó nɛ́ gɔna mur-tɛ-wi a̧ duk nɛ́ kpasa gɔna-bɔr na mbɛt.

²⁹Ɓɛɛ nɛ́ mɔ mɛ́ kɔ̧ see-wi a̧ de ha'i mɛ duk nɛ́ kpasa be Juif. Kpasa gɔna-bɔr nɛ́ wan mɛ kɔ̧ see-wi nyɛm nɛ̀ ɗoŋ usamɔ ko Sa̧a̧ Ɔmi, nɛ̀ bó nɛ́ tɛ géé yɔramɔ ɓɛɛ na. Pɛrti bíí hegɔ‘i tɛ kpa zɔnamɔ ko Sɔ̧, nɛ̀ bó nɛ́ zɔnamɔ ko bíí na.