Read Northwest Gbaya RƆMƐN 3 Bible Online

RƆMƐN 3 - Northwest Gbaya bible

RƆMƐN 3

¹Juif gana o dɔka bíí nɛ ge? Gba̧a̧-mɔ tɛ gɔna-bɔr nɛ́ ge nde?

²Tɛ ge mɔ ge ndé lɛŋ, o mɔɔ nɔ‘i yiitoo'i nɛ́ gasamɔ, wen Sɔ̧ ee wen kɔ‘i er o be Juif.

³Ɓɛɛ kà o ŋma bíí mgbara wa nɛ́ mboo zu na, ɓɛɛ wi tɛ tɔ̧ hee ge? Sɔ̧ tɛ e yora ɗoŋ wen kɔ‘i duk wen zu deemɔ kɔ-wa nde? Weyaa,

⁴bo hegɔ na. O bíí lɛŋ tɛ iŋ‘e, Sɔ̧ nɛ́ wi-tɔ̧-kpasawen, ɓɛɛ bíí lɛŋ nɛ́ wi-ndela, nyɛm nɛ̀ ɗoŋ mɔ nɛ̀ yɔra'e: «O bíí tɛ iŋ kànà‘e mɔ nɛ̀ mɛ tɔ̧ duk nɛ̀ yuwar-a; in kita beka ba mɛ ŋgimbi gɔna kita zu mɛ na.»

⁵Ɓɛɛ kà deemɔ k’ɛɛ nɛ̀ yuwar-a na nɛ́ dee ha'i mɛ zɔk deemɔ ko Sɔ̧ nɛ̀ yuwar-a, ɓɛɛ a'i tɔ̧ hee ge? Kà Sɔ̧ nɛ́ gusa yɛ, ɓɛɛ mɔ‘i usi'e a̧ bó nɛ́ wi-de-mɔ nɛ̀ yuwar-a na nde? (Mi tɔ̧ ɛ̧ɛ̧ wen’ɛ hee yuwar tɔ̧ɔ̧-wen ko bíí ga.)

⁶Weyaa, yuwar-a bo a̧‘i na! Wen kà Sɔ̧ bó so nɛ́ wi-de-mɔ nɛ̀ yuwar-a na, Sɔ̧ tɛ̀ɛ́ gɔn so kita zu nù hee ge?

⁷Ɓɛɛ kà ndela kɔ‘m úsí gba̧a̧ kpasawen ko Sɔ̧ mɛ gbo zan nɛ̀ sa̧a̧-a̧, wen ha̧ o bíí mɛ gas'a, ɓɛɛ kita tɛ ba'm hee ɗaŋwi ga wen ge?

⁸Ɓɛɛ ɛ́ɛ́ de bɔɔ ɗaŋmɔ ha̧ demɔ mɛ́ gbo oi-aa na wen ge? Bó nɛ́ o ŋma bíí ɓir wen e nú yɛ tɔ̧ nɛnɛ‘e, mɔ n’ɛɛ usi nɛ́ mɔ‘i na? Kita nɛ̀ tɛ ba o wi nɔ‘i nyɛma wen wa.

⁹Ɓɛɛ bɔɔ nɛ́ ge? Ɛ́ɛ́ o be Juif gana so o dɔka bíí? Bo a̧‘i na kóó tikiɗi! Wen ɛ́ɛ́ baa usi so kaɗi'e ndé, kóó so nɛ́ be Juif, kóó be Grɛk, bíí lɛŋ ya ɗɔɔ ŋgai ko ɗaŋmɔ,

¹⁰nyɛm nɛ̀ ɗoŋ Yɔramɔ nɛ̀ tɔ̧a̧‘e: «Ŋma wi-de-mɔ nɛ̀ yuwar-a bo na, kóó kpɔk;

¹¹ŋma wi-ta-mɔ bo na, ŋma wi-kii-sɔ̧ bo na mbɛt.

¹²Wa lɛŋ a̧ra̧ yambali, ŋma wi-de-demɔ bo gee boa-a kpɔk na.

¹³Kɔ̧ war-ger-wa nɛ́ nú pɛsi, leɓe-wa sɛ nɛ́ ɔrmɔ, ndàrá-nú-wa nɛ́ ma̧a̧da̧-kóró.

¹⁴Kɔ̧ nú-wa duna nɛ̀ fom in wen-tu̧-see;

¹⁵naŋ-wa nik tɛ gbɛ́ɛ́ bíí na.

¹⁶Ɗaŋamɔ in bɔnɛ a̧a̧ yuwar kɔ-wa;

¹⁷ɓɛɛ yuwar ha̧a̧ ga̧a̧mɔ, wa iŋ kɔ-wa na,

¹⁸Yuu-kíí Sɔ̧ bo sɛn tɛ-wa na!»

¹⁹Ɛ́ɛ́ iŋa'e ndé, wen nɛ̀ heembea usi lɛŋ, usi ha̧ o wi nɛ̀ ya ɗɔɔ heembea, wen ha̧ nú bíí lɛŋ mɛ́ kpe, ɓɛɛ ha̧ o bíí zu nù lɛŋ mɛ́ iŋ‘e wi nɛ́ ɗaŋwi ti Sɔ̧.

²⁰Mɛ̀ nɛ́ wen hegɔ, kasa heembea beka de ha̧ bíí mɛ duk wi-de-mɔ nɛ̀ yuwar-a ti Sɔ̧ wen zu deemɔ nyɛm nɛ̀ ɗoŋ heembea na, wen heembea usi kɔ‘i mɔ ha̧ bíí mɛ iŋ‘e wi dee ɗaŋmɔ.

²¹Ɓɛɛ kinii, bíí zɔka hee mɔ'ɔ nɛ̀ Sɔ̧ dee ha̧ bíí mɛ duk wi-de-mɔ nɛ̀ yuwar-a ga; nɛ̀ bó nɛ́ heembea a̧ dee dea-a na; ɓɛɛ heembea in o wi-tɔ̧-wen oi nú Sɔ̧ de nɛ́ sedaako zu mɔ‘i.

²²Sɔ̧ de ha̧ o bíí lɛŋ nɛ̀ kɔ̧ɔ̧ ɗɔaa ha̧ Jesu Krist mɛ ya o wi-de-mɔ nɛ̀ yuwar-a wen zu kɔ̧ɔ̧ɗɔɔwen kɔ-wa, wen Sɔ̧ kɛ̧ mgbara bíí na.

²³Wen bíí lɛŋ dee ɗaŋmɔ, ɓɛɛ gasamɔ ko Sɔ̧ yɔ er-wa.

²⁴Ɓɛɛ Sɔ̧ de ha̧ wa mɛ ya o wi-de-mɔ nɛ̀ yuwar-a tɛ deemɔ nɛ̀ ta-tɛ kɔ̧-a̧ ha̧ wa géè nɛ̀ ɗoŋ kpasa wa nɛ̀ Jesu Krist kpasa.

²⁵Nɛ́ a̧ a̧ Sɔ̧ hoka wen ha̧ tɔk tɛ-a mɛ a nù gɔn nɛ̀ zu ɗaŋmɔ ko bíí, nyɛm nɛ̀ ɗoŋ kɔ̧ɔ̧ɗɔɔwen kɔ-wa. A̧ dee hegɔ mɛ usi deemɔ kɔ̧-a̧ nɛ yuwar-a, wen tɛ ŋgimbi nɔɔ-ŋgiɗi kɔ̧-a̧, a̧ ndak ɗoŋ ɗaŋmɔ nɛ̀ o bíí dee so ɓeemɛ na.

²⁶Ɓɛɛ tɛ ɛ̧ɛ̧ ŋgimbi kinii’ɛ, a̧ usa deemɔ kɔ̧-a̧ nɛ̀ yuwar-a, de nɛnɛ ha̧ wi nɛ̀ kɔ̧ɔ̧ ɗɔaa ha̧ Jesu mɛ duk wi-de-mɔ nɛ̀ yuwar-a mbɛt.

²⁷Tɛ mɔ‘i, ŋma mɔɔ-maŋ-tɛ a̧a̧ sɛnɛ? Kóó tikiɗi bo na! A'i ŋmaŋ tɛ zu ge mɔ ge? Zu tom nɛ̀‘i de’ɛ nde? Weyaa! A'i dúk tɛ̀ nɛ̀ kɔ̧ɔ̧ɗɔɔwen ɛ̧.

²⁸Wen taamɔ k’ɛ́ɛ́ usi'e Sɔ̧ zɔk bíí hee wi-de-mɔ nɛ yuwar-a ga nɛ ɗoŋ kɔ̧ɔ̧ɗɔɔwen, nɛ̀ bó nɛ́ wen kasa heembea na.

²⁹Kóó Sɔ̧ nɛ́ Sɔ̧ ko o be Juif ɓɛɛ nde? Bo nɛ a̧ nɛ́ Sɔ̧ ko o gɔni-dùk mbɛt na nde? Nɛ̀ mbetɛ, a̧ nɛ́ Sɔ̧ ko o gɔni-dùk mbɛt.

³⁰Hee mɔ'ɔ nɛ̀ Sɔ̧ kpɔk ɓɛɛ ga, a̧ tɛ de ha̧ o wi-gɔn-bɔr in o wi-mbii mbɛt mɛ ya o wi-de-mɔ nɛ̀ yuwar-a nɛ̀ ɗoŋ kɔ̧ɔ̧ɗɔɔwen.

³¹Mɔ‘i kɔ̧ɔ̧ mɛ tɔ̧‘e kɔ̧ɔ̧ɗɔɔwen k’ɛɛ baa kpasamɔ yinɛ tɛ heembea nde? Weyaa, bo hegɔ na; nɛ́ kpasamɔ nɛ̀ a̧a̧ tɛ heembea ɛ̀ɛ̀ ba e ŋgɔn ɛ̧.