Read Northwest Gbaya RƆMƐN 4 Bible Online

RƆMƐN 4 - Northwest Gbaya bible

RƆMƐN 4

¹Nɛ́ ge ɛ̀ɛ̀ tɛ tɔ̧ zu zɔmdáa k’ɛɛ Abraham ge? Nɛ́ ge a̧ a̧ kpaa nɛ̀ war ko bíí ge?

²Kà bó so'e Sɔ̧ dee ha̧ Abraham mɛ́ duk wi-de-mɔ nɛ̀ yuwar-a wen zu tom gáà, a̧ tɛ̀ɛ́ kpa so mɔ mɛ́ ŋmaŋ tɛ zu-a, ɓɛɛ bó nɛ́ ŋmaŋa-tɛ ti Sɔ̧ na.

³Mɔ nɛ̀ Yɔramɔ tɔ̧ɔ̧ nɛ́ ge? Yɔramɔ tɔ̧ɔ̧‘e Abraham kɔ̧ɔ̧ ɗɔaa ha̧ Sɔ̧, ɓɛɛ Sɔ̧ zɔk a̧ hee wi-de-mɔ nɛ̀ yuwar-a ga wen zu mɔ‘i.

⁴Bíí nɛ̀ dee tom, beka'i zɔk mɔ n'aa kpa oi-aa hee ha̧a̧mɔ géè ga na, ɓɛɛ nɛ mɔɔ-ɔi-tom kɔ̧-a̧.

⁵Ɓɛɛ war ko wi nɛ̀ de tom na, nɛ́ mɔ'ɔ n'aa kɔ̧ɔ̧ ɗɔaa ha̧ Sɔ̧, wi nɛ de ha̧ ɗaŋwi mɛ duk wi-de-mɔ nɛ̀ yuwar-a, Sɔ̧ tɛ zɔk wi’ɛi hee wi-de-mɔ nɛ̀ yuwar-a ga, wen zu kɔ̧ɔ̧ɗɔɔwen kɔ̧-a̧.

⁶Mɛ̀ nɛ́ hegɔ a̧ David wee nɛ̀ ɗoŋ desee ko bíí nɛ̀ Sɔ̧ zɔk hee wi-de-mɔ nɛ̀ yuwar-a ga, nɛ̀ bó nɛ́ wen zu tom ko wi’ɛi na:

⁷«O wi nɛ̀ Sɔ̧ ee ɗaŋmɔ in yɔɔ-kaya kɔ-wa ha̧ wa ya nɛ̀ desee!

⁸Wi nɛ̀ Gasa Wan ɓa ɗoŋ ɗaŋmɔ kɔ̧-a̧ na duk nɛ̀ desee!»

⁹De wen desee’ɛ nɛ́ wen o wi-gɔn-bɔr ɓɛɛ náà, kóó o wi-mbii a̧a̧ zaŋ-aa mbɛt nde? Ɛ́ɛ́ tɔ̧a̧‘e Sɔ̧ zɔka Abraham hee wi-de-mɔ nɛ̀ yuwar-a ga wen zu kɔ̧ɔ̧ɗɔɔwen kɔ̧-a̧.

¹⁰Yuwar mɔ‘i dee dea-a hee ge? Sɛn ɗoŋ gɔna-bɔr náà, kóó nɛti nde? Mɔ‘i dee nɛti, nɛ̀ bó nɛ́ nɛ̀ ɗoŋ na.

¹¹Ɓɛɛ nɛ̀ ɗoŋ, Sɔ̧ ha̧a̧ yuwar gɔna-bɔr ha̧ Abraham mɛ́ usi'e, a̧ zɔka Abraham hee wi-de-mɔ nɛ̀ yuwar-a ga, wen zu kɔ̧ɔ̧ɗɔɔwen kɔ̧-a̧ ŋgimbi n'aa tɛ gɔn so bɔr hɔ̧ɔ̧ na; hegɔ Abraham kifa duk nɛ́ dáà ko o wi-mbii lɛŋ nɛ̀ kɔ̧ ɗɔaa ha̧ Sɔ̧, wen ha̧ Sɔ̧ mɛ zɔk wa hee o wi-de-mɔ nɛ̀ yuwar-a ga.

¹²Ɓɛɛ a̧ nɛ́ dáà ko o wi-gɔn-bɔr mbɛt, nɛ̀ bɔ́ nɛ́ wa gɔna nɛ́ bɔr ɓɛɛ na, ɓɛɛ wa kɔ̧ɔ̧ ɗɔaa ha̧ Sɔ̧ hee mɔ'ɔ nɛ dáà k’ɛ́ɛ́ Abraham duka so mɛ de nɛti sɛka a̧ biti gɔn bɔr ga.

¹³Sɔ̧ ha̧a̧ nú ha̧ Abraham n'aa tɛ ha̧ nù nɛ̀ oi-aa ha̧ a̧ in o be zaŋ-aa wen zu kɔ̧ɔ̧ɗɔɔwen kɔ̧-a̧, nɛ̀ bó nɛ́ wen zu heembea na. Ɓɛɛ nɛ́ kɔ̧ɔ̧ɗɔɔwen kɔ̧-a̧‘i a̧ dee ha̧ Sɔ̧ mɛ zɔk a̧ hee wi-de-mɔ nɛ̀ yuwar-a ga.

¹⁴Kà yuwar kpaa mɔɔ-oi'i á̧ duka nɛ̀ ɗoŋ heembea, ɓɛɛ gba̧a̧ kɔ̧ɔ̧ɗɔɔwen bo na, ɓɛɛ ha̧a̧nú mbɛt dee geemɔ.

¹⁵Wen nɛ́ heembea a̧ a̧ŋ nyimsea ko Sɔ̧ a ŋgɔn, ɓɛɛ fara nɛ̀ heembea bo na, gbina-heembea bo na mbɛt.

¹⁶Hegɔ, mɛ̀ nɛ́ nɛ̀ ɗoŋ kɔ̧ɔ̧ɗɔɔwen a̧ Sɔ̧ ha̧ nɛ̀ mɔɔ-oi ha̧ bíí, wen ha̧ mɔ‘i mɛ duk nɛ́ deemɔ nɛ ta-tɛ ko Sɔ̧, in ha̧ ha̧a̧nú‘i mɛ hɔ gba̧a̧ ha̧ o bezaŋ Abraham lɛŋ, bó nɛ́ o wi-kasi-heembea ɛ̀nɛ̀-wi ɓɛɛ na, ɓɛɛ ha̧ o wi-kɔ̧-ɗɔaa ha̧ Sɔ̧ mbɛt, hee mɔ'ɔ nɛ̀ Abraham nɛ̀ duk nɛ́ dáà k’ɛ́ɛ́ lɛŋ dee so ga.

¹⁷Hee mɔ'ɔ nɛ Yɔramɔ tɔ̧ɔ̧ ga: «Mi dee ha̧ mɛ mɛ duk nɛ́ dáà ko dɔka dukbíí.» Abraham nɛ́ dáà k’ɛ́ɛ́ ti wi n'aa kɔ̧ɔ̧ ɗɔaa ha̧ a̧, wi nɛ̀ de ha̧ o fio mɛ́ duk kpasa in nɛ̀ de ha̧ mɔ nɛ̀ bo na mɛ́ duk.

¹⁸Abraham ee ta ŋgimbi nɛ̀ mɔɔ-e-nɛ ta bo so na, kɔ̧ nɛ̀ ɗɔaa ha̧ Sɔ̧ ɓɛɛ kifi duk nɛ́ dáà ko dɔka dukbíí nyɛm nɛ̀ ɗoŋ mɔ nɛ̀ yɔra so'e: «O bezaŋ-mɛ tɛ dɔk hegɔ.»

¹⁹Pɛ Abraham hɛɗa mɛ de pɛ gɔmŋmaa in pɛ Sara yaka zu ŋgimbi kóó bem mbɛt kaɗi, ɓɛɛ zu mɔ‘i nɛ̀ wa hɛɗa fio kaɗi'i, Abraham mbɔi tɛ kɔ̧ɔ̧ ɗɔaa ha̧ Sɔ̧ na.

²⁰Hee mɔ'ɔ nɛ̀ Sɔ̧ ha̧a̧ so nú ha̧ a̧ ga, a̧ si káfɛ́ zu ha̧a̧nú‘i na, ɓɛɛ kɔ̧ɔ̧ɗɔɔwen ha̧a̧ nɔɔ-ŋgiɗi ha̧ a̧ ɓɛɛ a̧ gasi Sɔ̧.

²¹Wen a̧ iŋa nɛ̀ mbetɛ‘e, Sɔ̧ a̧a̧ nɛ̀ ŋgai mɛ de ha̧ mɔ n'aa ha̧a̧ nú sɛnɛ mɛ hɔ gba̧a̧.

²²Mɛ̀ nɛ́ wen hegɔ sa Sɔ̧ zɔk a̧ hee wi-de-mɔ nɛ̀ yuwar-a ga.

²³Bó nɛ́ wen a̧ ɛ̀nɛ́-a ɓɛɛ á̧ wen’ɛ tɔ̧ nɛnɛ‘e: «Sɔ̧ zɔka a̧ hee wi-de-mɔ nɛ̀ yuwar-a ga» na;

²⁴wen'i tɔ̧ɔ̧ wen ɛ́ɛ́ mbɛt, ɛ́ɛ́ o wi-kɔ̧-ɗɔaa ha̧ Sɔ̧, Wi nɛ̀ kpasa Gasa Wan k’ɛɛ Jesu tɛ fio.

²⁵Nɛ́ a̧‘i a̧ wa gbɛɛ so wen ɗaŋmɔ k’ɛ́ɛ́, ɓɛɛ Sɔ̧ kpas'a tɛ fio wen h’ɛ́ɛ́ mɛ ya o wi-de-mɔ nɛ̀ yuwar-a.