Read Northwest Gbaya RƆMƐN 5 Bible Online

RƆMƐN 5 - Northwest Gbaya bible

RƆMƐN 5

¹Nɛ́ kɔ̧ɔ̧ɗɔɔwen a̧ de h’ɛ́ɛ́ mɛ ya o wi-de-mɔ nɛ yuwar-a; hegɔ mɔ ga̧a̧ mgbara yɛ in Sɔ̧ nɛ̀ ɗoŋ Gasa Wan k’ɛ́ɛ́ Jesu Krist;

²ɛ́ɛ́ kpaa deemɔ nɛ̀ ta-tɛ ko Sɔ̧ n’ɛɛ ya zaŋ-aa kinii’ɛ nɛ̀ ɗoŋ Jesu Krist, wen zu kɔ̧ɔ̧ɗɔɔwen. Ɓɛɛ ɛ́ɛ́ duk tɛ-ɛɛ nɛ̀ gasamɔ ko Sɔ̧ n’ɛɛ e nɛ̀ ta.

³Gan mbɛt, ɛ́ɛ́ duk tɛ-ɛɛ nɛ̀ bɔnɛ k’ɛ́ɛ́, wen ɛ́ɛ́ iŋa'e, nɛ́ bɔnɛ a̧ de ha'i mɛ duk nɛ̀ nɔɔ-ŋgiɗi.

⁴Nɔɔ-ŋgiɗi de ha'i mɛ yor nɛ̀ nɔa-a tɛ weamɔ, ɓɛɛ yora-a nɛ̀ nɔa-a de ha'i mɛ e ta nɛ̀ Sɔ̧;

⁵ɓɛɛ ee-ta nɛ̀ Sɔ̧ ɔr mɔ na, wen Sa̧a̧ Ɔmi nɛ̀ Sɔ̧ ha̧a̧ h’ɛ́ɛ́ ee kɔ̧ɔ̧mɔ ko Sɔ̧ kɔ̧ see yɛ.

⁶Nɛ̀ mbetɛ, ŋgimbi n’ɛɛ bo so nɛ̀ ŋgai na, Krist fee wen o ɗaŋwi tɛ ŋgimbi nɛ̀ Sɔ̧ gɔna.

⁷Wen ɔ ŋgaya ha̧ ŋma bíí mɛ fe oi nú ŋma wi-de-mɔ nɛ̀ yuwar-a; ŋmafara ŋma bíí nyɛma mɛ nɔ ŋgiɗi mɛ fe oi nú ŋma wi-de-demɔ,

⁸ɓɛɛ Sɔ̧ usa kɔ̧ɔ̧mɔ kɔ‘i h’ɛ́ɛ́ tɛ mɔ'ɔ: ŋgimbi n’ɛɛ biti so nɛ́ o ɗaŋwi, Krist fee wen zu yɛ.

⁹Ɓɛɛ hee mɔ'ɔ nɛ̀ tɔk tɛ-a dee h’ɛ́ɛ́ mɛ́ duk o wi-de-mɔ nɛ̀ yuwar-a ga, bó nɛ́ a̧ tɛ kpasi yɛ tɛ nyimsea ko Sɔ̧ mbɛt na nde?

¹⁰Nɛti ɛ́ɛ́ so nɛ́ wi-sɛn-sɔ̧, nɛ́ mɔ'ɔ n'aa ɗafa mɔ mgbara yɛ in a̧ nɛ̀ ɗoŋ fio ko Bem kɔ̧-a̧; ɓɛɛ hee mɔ'ɔ n'aa ɗafa mgbara yɛ in a̧ kaɗi ga, hegɔ, a̧ tɛ kpasi yɛ mbɛt, wen nɛ̀ Bem kɔ̧-a̧ duk kpasa.

¹¹Bó nɛ́ wen mɔ‘i ɓɛɛ na, ɓɛɛ ɛ́ɛ́ duk tɛ nɛ̀ Sɔ̧ mbɛt nɛ̀ ɗoŋ Gasa Wan k’ɛ́ɛ́ Jesu Krist nɛ̀ ɗafa mɔ mgbara yɛ in Sɔ̧ kinii’ɛ.

¹²Ɗaŋmɔ hɔɔ zaŋnu wen zu bíí kpɔk, ɓɛɛ nɛ́ mɔ'ɔ nɛ̀ fio hɔɔ wen zu ɗaŋmɔ; mɛ̀ nɛ́ hegɔ, fio dama zu bíí, wen bíí lɛŋ dee ɗaŋmɔ.

¹³Wen ɗaŋmɔ duka so zaŋnu nɛti sɛka Sɔ̧ biti ha̧ heembea ha̧ Moisɛ, ɓɛɛ bó nɛ́ Sɔ̧ gɔna so kita zu ɗaŋmɔ na, wen bó nɛ́ heembea a̧a̧ so sɛnɛ na.

¹⁴Ɓɛɛ zu-a'i, tɛ ŋgimbi ko Adam hɔ nɛnɛ tɛ Moisɛ, kóó o bíí de so kpɔk ɗaŋmɔ nɛ̀ Adam dea'i na, wa a̧ fe kana'i. Adam'i usi nɛ́ bíí nɛ̀ tɛ̀ɛ́ tɛ‘i.

¹⁵Ɓɛɛ deemɔ nɛ̀ ta-tɛ ko Sɔ̧ gana yɔɔ-kaya ko Adam, wen kà yɔɔ-kaya ko bíí kpɔk nɛ́ dee ha̧ zɔm giiwi mɛ fe, ɓɛɛ deemɔ nɛ̀ ta-tɛ ko Sɔ̧ nɛ̀ ɗoŋ bíí kpɔk tɛ kpasi gba giiwi mbɛt; wi’ɛi nɛ́ Jesu Krist nɛ̀ dee ha̧ dɔka deemɔ nɛ ta-tɛ ko Sɔ̧ mɛ duk zu zɔm giiwi.

¹⁶Ha̧a̧mɔ nɛ ta-tɛ ko Sɔ̧ gana mɔɔ-oi-ɗaŋmɔ nɛ bíí kpɔk dea, wen kita baa bíí lɛŋ wen zu dee ɗaŋmɔ ko bíí kpɔk. Ɓɛɛ ɗoŋ dɔka yɔɔ-kaya, deemɔ nɛ ta-tɛ ko Sɔ̧ dee h’ɛ́ɛ́ mɛ́ duk o wi-de-mɔ nɛ̀ yuwar-a.

¹⁷Wen kà bó nɛ́ yɔɔ-kaya ko bíí kpɔk ɓɛɛ a̧ dee ha̧ o bíí mɛ fe, ɓɛɛ gan i̧i̧, mɛ̀ nɛ́ wen zu Jesu Krist kpɔk a̧ o wi nɛ̀ Sɔ̧ ha̧a̧ mɔ nɛ̀ ta-tɛ ha̧ wa nɛ dɔka-a in nɛ̀ Sɔ̧ dee ha̧ wa mɛ duk wi-de-mɔ nɛ̀ yuwar-a, tɛ kpasi nɛnɛ mɛ ɔ wan.

¹⁸Ɓɛɛ hee mɔ'ɔ nɛ̀ yɔɔ-kaya ko bíí kpɔk dee ha̧ bíí lɛŋ mɛ fe ga, deemɔ nɛ̀ yuwar-a ko bíí kpɔk tɛ de ha̧ o bíí lɛŋ mɛ duk o wi-de-mɔ nɛ̀ yuwar-a mbɛt wen ha̧ wa mɛ kpasi.

¹⁹Wen hee mɔ'ɔ nɛ̀ dee ŋgazu ko bíí kpɔk dee ha̧ zɔm giiwi mɛ kifi ɗaŋwi ga, kale-a mbɛt, mboozu ko bíí kpɔk tɛ de ha̧ zɔm giiwi mɛ duk wi-de-mɔ nɛ̀ yuwar-a.

²⁰Heembea hɔɔ wen ha̧ yɔɔ-kaya mɛ dɔk, ɓɛɛ fara nɛ̀ ɗaŋmɔ dɔka, deemɔ nɛ̀ ta-tɛ ko Sɔ̧ tɛɛ dɔk gan gan mbɛt.

²¹Hegɔ, hee mɔ'ɔ nɛ̀ ɗaŋmɔ dee ha̧ fio mɛ́ hɔ ga, kale-a mbɛt, deemɔ nɛ̀ ta-tɛ ko Sɔ̧ hɔɔ nɛ̀ ɗoŋ deemɔ nɛ̀ yuwar-a, h’ɛ́ɛ́ mɛ́ kpa duka-kpasa kpoo nɛ kpoo nɛ̀ ɗoŋ Jesu Krist Gasa Wan k’ɛ́ɛ́.