Read Northwest Gbaya RƆMƐN 6 Bible Online

RƆMƐN 6 - Northwest Gbaya bible

RƆMƐN 6

¹Nɛ́ ge a'i tɛ tɔ̧ ge? A'i dúk tɛ dee ɗaŋmɔ siti wen ha̧ deemɔ nɛ̀ ta-tɛ ko Sɔ̧ mɛ dɔk nde?

²Weyaa! Wen ɛ́ɛ́ fee so ti ɗaŋmɔ, ɓɛɛ héé ge ɛ́ɛ́ tɛ duk tɛ dee ɗaŋmɔ siti woyo ge nde?

³Kóó ɛ́nɛ́ iŋ‘e ɛ́ɛ́ lɛŋ nɛ̀ wa zuia yɛ nɛ̀ nin Jesu Krist, ɛ́ɛ́ fee in a̧ tɛ zuia yɛ‘i mbɛt na nde?

⁴Tɛ zuia yɛ, mɔ‘i usi'e ɛ́ɛ́ fee in a̧, ɓɛɛ wa gun yɛ in a̧, wen h’ɛ́ɛ́ mɛ́ kpa mbe duka-kpasa, hee mɔ'ɔ nɛ̀ Krist kura nɛ̀ ŋgɔn tɛ fio nɛ̀ ɗoŋ gasamɔ ko Dáà ga.

⁵Ɓɛɛ k’ɛ̀ɛ̀ nɛ́ fee hee kɔ̧-a̧ ga, mɔ‘i ndaɗa yɛ in a̧; hegɔ, kura ŋgɔn k’ɛɛ hee kɔ̧-a̧ ga tɛ fio tɛ ndaɗi yɛ in a̧ mbɛt.

⁶Ɛ̀ɛ̀ zíí mgbara mɔ'ɔ nɛ̀ de-a: gba̧‘a̧ duka-a k’ɛ́ɛ́ fee in a̧ zu te-diŋa, ha̧ mur-tɛ-ɛɛ nɛ̀ de ɗaŋmɔ'ɛ mɛ ɗaŋ, hegɔ, ɛ́ɛ́ beka duk nɛ́ bara ko ɗaŋmɔ ɓɔna.

⁷Wen wi nɛ̀ fea gboo ɗɔɔ ŋgai ko ɗaŋmɔ kaɗi.

⁸Ɓɛɛ k’ɛ̀ɛ̀ nɛ́ fee in Krist, ɛ́ɛ́ iŋa'e ɛ́ɛ́ tɛ duk kpasa in a̧ mbɛt.

⁹Ɛ́ɛ́ iŋa'e hee mɔ'ɔ nɛ̀ Krist kura ŋgɔn tɛ fio ga, a̧ beka fe ɓɔna, fio bó nɛ̀ ŋgai zu a̧ ɓɔna mbɛt.

¹⁰Wen fio n'aa fea'i, a̧ fee war kpɔk ti ɗaŋmɔ, ɓɛɛ duka-kpasa n'aa duk'i, a̧ duk wen Sɔ̧.

¹¹Ɛ́nɛ́ mbɛt, ɛ̀nɛ̀ íŋ‘e ɛ́nɛ́ fee ti ɗaŋmɔ kaɗi, ɓɛɛ ɛ́nɛ́ duk kpasa wen Sɔ̧ nɛ̀ ɗoŋ Jesu Krist.

¹²Ɓɛɛ k’ɛ́nɛ́ e ha̧ ɗaŋmɔ mɛ ɔ wan zu mur-tɛ‘nɛ́ nɛ̀ fe’ɛ ɓɔna, wen k’ɛ́nɛ́ tɛɛ mbo zu tɛ o wɔ-mɔ ko mur-tɛ siti.

¹³K’ɛ́nɛ́ e ha̧ o dokoɗo-tɛ‘nɛ́ mɛ de tom ha̧ ɗaŋmɔ hee boi-de-tom nɛ yuwar-a na, ga na, ɓɛɛ ɛ̀nɛ̀ há̧ tɛ‘nɛ́ ha̧ Sɔ̧ hee o wi nɛ̀ kpasa tɛ fio kaɗi ga: ɛ̀nɛ̀ é ha̧ o dokoɗo-tɛ‘nɛ́ mɛ duk hee o boi-de-tom nɛ̀ yuwar-a ga.

¹⁴Wen ɗaŋmɔ beka bó nɛ̀ ŋgai zu'nɛ́ na, wen ɛ́nɛ́ bó ɗɔɔ heembea ɓɔna, ɓɛɛ ɛ́nɛ́ a̧a̧ ɗɔɔ deemɔ nɛ̀ ta-tɛ ko Sɔ̧.

¹⁵Mɔ‘i kɔ̧ɔ̧ mɛ tɔ̧ hee ge? Ɛ́ɛ́ tɛ duk tɛ dee ɗaŋmɔ wen n’ɛ̀ɛ̀ bo ɗɔɔ heembea na, ɓɛɛ ɛ́ɛ́ a̧a̧ ɗɔɔ deemɔ nɛ̀ ta-tɛ ko Sɔ̧ nde? Weyaa, bo a̧‘i na!

¹⁶Ɛ́nɛ́ iŋa'e, k’ɛ̀nɛ̀ dé tom ha̧ ŋma bíí, mbo nɛ̀ zu ha̧ a̧ hee bara ga, ɓɛɛ ɛ́nɛ́ nɛ́ bara ko wi n’ɛnɛ mbo zu ha̧ a̧‘i, kóó bara ko ɗaŋmɔ nɛ̀ de ha'i mɛ́ fe, kóó bara ko mboozu nɛ̀ de ha'i mɛ́ de mɔ nɛ̀ yuwar-a.

¹⁷Ɛ̀ɛ̀ dé osoko ha̧ Sɔ̧, wen nɛti ɛ́nɛ́ yaa so nɛ́ bara ko ɗaŋmɔ, nɛ́ mɔ'ɔ n’ɛnɛ mboo zu nɛ̀ see kpɔk tɛ yuwar usamɔ nɛ̀ wa usa h’ɛ́nɛ́‘i.

¹⁸Hegɔ, ɛ́nɛ́ gboo tɛ ɗaŋmɔ kaɗi, ɓɛɛ ɛ́nɛ́ kifi duk nɛ́ bara ko deemɔ nɛ̀ yuwar-a.

¹⁹Mi tɔ̧ wen’ɛ hee mɔ'ɔ nɛ̀ bíí tɔ̧ nɛ̀ wen ga, nyɛm nɛ̀ ɗoŋ ɓɔsi k’ɛ́nɛ́. Ɛ́nɛ́ duka so e o dokoɗo-tɛ‘nɛ́ hee bara ga tɛ dee ndiŋmɔ in tɛ deemɔ nɛ̀ nú-tum, nɛ̀ dé ha'i mɛ de ŋgazu in Sɔ̧; ɓɛɛ kinii, ɛ̀nɛ̀ é ha̧ o dokoɗo-tɛ‘nɛ mɛ́ duk hee bara ga tɛ tom deemɔ nɛ̀ yuwar-a nɛ̀ de ha̧ war-tɛ-wi mɛ sa̧.

²⁰Ŋgimbi n’ɛnɛ yaa so nɛ́ bara ko ɗaŋmɔ, ɛ́nɛ́ bo so ɗɔɔ ŋgai ko deemɔ nɛ̀ yuwar-a na.

²¹Mɔ n’ɛnɛ kpaa oi mɔ‘i nɛ́ ge? Foe de nɛ́ ɛ́nɛ́ sɔsɔɔ zu mɔ‘i, wen sɔŋkur-aa nɛ́ fio.

²²Kinii ɛ́nɛ́ gboo tɛ ɗaŋmɔ, ɓɛɛ ɛ́nɛ́ ya nɛ́ o bara ko Sɔ̧; nɛ́ tom k’ɛ́nɛ́ a̧ de ha̧ war-tɛ‘nɛ́ mɛ sa̧, ɓɛɛ sɔŋkur-aa nɛ́ duka-kpasa kpoo nɛ kpoo.

²³Wen mɔɔ-oi-ɗaŋmɔ nɛ́ fio, ɓɛɛ mɔ nɛ̀ Sɔ̧ ha̧ géè, nɛ́ duka-kpasa kpoo nɛ kpoo nɛ̀ ɗoŋ Jesu Krist, Gasa Wan k’ɛɛ.