Read Northwest Gbaya RƆMƐN 7 Bible Online

RƆMƐN 7 - Northwest Gbaya bible

RƆMƐN 7

¹Mi tɔ̧ wen’ɛ ha̧ o wi nɛ̀ iŋa heembea. O nya'm, bó nɛ́ ɛ́nɛ́ iŋa'e heembea a̧a̧ nɛ̀ ŋgai zu bíí, ŋgimbi n'aa biti duk kpasa ɓɛɛ na nde?

²Hegɔ ko-wan-wíì duk ɗɔɔ heembea-baa-ŋmaa ŋgimbi nɛ̀ wíì biti nɛ̀ yí. Ɓɛɛ kà wíì fé kaɗi, kóò‘i bo ɗɔɔ heembea-baa-ŋmaa ɓɔna.

³Ɓɛɛ kà wíì kɔ̧-a̧ biti nɛ yí, nɛ́ mɔ'ɔ n'aa nɛ̀ɛ́ ba mbe wíì, wi tɛ tɔ̧‘e a̧ de nɛ́ dàlà; ɓɛɛ kà wii kɔ̧-a̧ nɛ́ fea, ŋma heembea mɛ dor a̧ tɛ baa mbe wíì bo na; kà a̧ nɛ́ baa mbe wíì, wi beka tɔ̧‘e a̧ de nɛ́ dàlà na.

⁴O nya'm, tɛ mɔ nɛ̀ zɔk nɛ́ heembea, ɛ́nɛ́ fee sɛnɛ mbɛt nɛ̀ ɗoŋ Krist kaɗi, h’ɛ́nɛ́ mɛ́ duk nɛ́ ko ŋma bíí; wi’ɛi nɛ́ wi nɛ̀ kura ŋgɔn tɛ fio, wen ha̧ waya-mɔ nɛ a̧a̧ tɛ tom k’ɛ́ɛ́ mɛ́ duk wen Sɔ̧.

⁵Ŋgimbi n’ɛ̀ɛ̀ duka so tɛ dee mɔ nɛ̀ mur-tɛ kɔ̧a̧, wɔ ɗaŋmɔ baa so heembea de nɛ̀ tom tɛ dokoɗo tɛ-ɛɛ, wen ha̧ mɔɔ-oi-tom k’ɛ́ɛ́ mɛ́ duk nɛ́ fio.

⁶Ɓɛɛ kinii, ɛ́ɛ́ fee ti mɔ nɛ̀ dee so ɛ́ɛ́ nɛ bara, ɛ́ɛ́ gboo ɗɔɔ heembea, ɓɛɛ ɛ́ɛ́ de nɛ́ tom ɗɔɔ mbe ŋgai ko Sa̧a̧ Ɔmi, nɛ̀ bó nɛ́ ɗɔɔ gba̧‘a̧ ŋgai ko yɔramɔ ɓɔna.

⁷Nɛ́ ge a'i tɛ tɔ̧ ge? Heembea nɛ́ ɗaŋmɔ nde? Weyaa! Nɛ́ heembea a̧ dee ha̧‘m mɛ iŋ ɗaŋmɔ. Hegɔ, kà heembea tɔ̧́ so'e: «Ká mɛ́ a see mɔ na» na gáà, mi beka iŋ so mɔ nɛ̀ tɔ̧‘e aa-see-mɔ na.

⁸Nɛ́ mɔ'ɔ nɛ̀ ɗaŋmɔ kpaa war nɛ̀ ɗoŋ heembea, e nɛ̀ o wɔ-mɔ nɛtɛ nɛtɛ kɔ̧ see-am, wen kà heembea bó só na, ɗaŋmɔ tɛ̀ɛ́ duk nɛ́ fio-mɔ mbɛt.

⁹Wen ŋgimbi nɛ̀ heembea bo so na, mi duka so kpasa. Ɓɛɛ ŋgimbi nɛ̀ heembea hɔa, ɗaŋmɔ kpasa,

¹⁰ɓɛɛ mi fe kɔ‘m: hegɔ heembea nɛ̀ tɛ̀ɛ́ duk so nɛ́ mɔɔ-kpas'am'i tɛ̀ɛ́ kifi nɛ́ mɔɔ-gbɛ‘m.

¹¹Wen ɗaŋmɔ kpaa war mɛ ɔr am nɛ̀ tɛ heembea, ɓɛɛ de ha̧‘m mɛ fe nɛ̀ ɗoŋ kpɔk heembea'i.

¹²Hegɔ, heembea ɔ sa̧a̧ in geŋa ɔ sa̧a̧, ɔ dee, ɓɛɛ duk nɛ̀ yuwar-a mbɛt.

¹³Hegɔ, mɔ nɛ̀ duk nɛ́ demɔ kifa nɛ́ mɔɔ-gbɛ‘m nde? Weyaa! Ɗaŋmɔ baa nɛ́ demɔ gbɛ nɛ‘m, wen ha'i mɛ iŋ ɗaŋmɔ in ha̧ ndaa ɗaŋmɔ mɛ gbo zan nɛ̀ ɗoŋ heembea.

¹⁴Ɛ́ɛ́ iŋa nɛ̀ de-a'e heembea nɛ́ mɔ ko Sɔ̧; ɓɛɛ kɔ‘m, mi nɛ́ mur-tɛ nɛ‘i ɗɔra mɛ́ duk bara ko ɗaŋmɔ.

¹⁵Nɛ mbetɛ, mi iŋ zu mɔ n'am de na. Mɔ n'am kɔ̧a̧, mi de na, ɓɛɛ nɛ mɔ n'am sɛn, a̧‘m dé.

¹⁶Ɓɛɛ kà bó nɛ́ mɔ n'am sɛn a̧‘m dé, mɛ̀ nɛ́ mɔ nɛ̀ tɔ̧‘e mi kpɛka mɔ nɛ̀ heembea tɔ̧a̧, in mi iŋa'e heembea ɔ dee.

¹⁷Wen bó nɛ́ mi'i de mɔ‘i na, ɓɛɛ nɛ́ ɗaŋmɔ nɛ̀ duk tɛ‘m a̧ de mɔ‘i.

¹⁸Wen mi iŋa'e ŋma demɔ bo tɛ‘m na, mɛ̀ nɛ́ wen nɛ̀ tɔ̧‘e bo tɛ mur-tɛ‘m na. Mi kɔ̧ɔ̧ nyɛmna mɛ́ de demɔ, ɓɛɛ mi kpa ŋgai dea-a na.

¹⁹Demɔ n'am kɔ̧a̧, mi de na, ɓɛɛ nɛ́ ɗaŋmɔ n'am kɔ̧ na, a̧‘m dé.

²⁰Ɓɛɛ kà bó nɛ́ mɔ n'am kɔ̧ na a̧‘m dé, ɓɛɛ bó nɛ́ mi'i de na, nɛ́ ɗaŋmɔ nɛ̀ duk tɛ‘m a̧ dé mɔ‘i.

²¹Ɓɛɛ mɔ nɛ̀ a̧a̧ tɛ mɔ‘i nɛ́ mɔ'ɔ: ŋgimbi n'am kii mɛ́ de demɔ, ɓɛɛ nɛ́ ɗaŋmɔ a̧‘m kpa ŋgai dea-a.

²²Heembea ko Sɔ̧ ha̧ desee ha̧‘m nɛ̀ kɔ̧ see-am mɛ nyɛmna,

²³ɓɛɛ mi zɔka'e ŋma heembea nɛtɛ a̧a̧ sɛnɛ tɛ o dokoɗo-tɛ‘m nɛ̀ sakali wan n'am kpaa tɛ taamɔ kɔ‘m, ɓɛɛ nɛ́ mɔ‘i a̧ de'm nɛ̀ wi-zɔɓɔ-heembea ko ɗaŋmɔ nɛ̀ duk tɛ o dokoɗo-tɛ‘m.

²⁴Oee bɔnɛ kɔ‘m wa! Nɛ́ o a̧ tɛ kpas'am tɛ kiitɛ nɛ̀ duk ɗɔɔ ŋgai ko fio’ɛ o?

²⁵Osoko ha̧ Sɔ̧ nɛ̀ ɗoŋ Jesu Krist Gasa Wan k’ɛ́ɛ́! Hegɔ, mi a̧a̧ ɗɔɔ heembea yiitoo: taamɔ kɔ‘m a̧a̧ ɗɔɔ heembea ko Sɔ̧, ɓɛɛ mur-tɛ‘m a̧a̧ ɗɔɔ heembea ko ɗaŋmɔ.