Read Northwest Gbaya RƆMƐN 8 Bible Online

RƆMƐN 8 - Northwest Gbaya bible

RƆMƐN 8

¹Kinii kita bo zu o bíí nɛ̀ duk tɛ Jesu Krist ɓɔna.

²Wen heembea ko Sa̧a̧ Ɔmi nɛ̀ kpasi bíí mɛ duk tɛ Jesu Krist gboa'm ɗɔɔ heembea ko ɗaŋmɔ in fio mbɛt.

³Mɔ nɛ̀ heembea nyɛm so mɛ de na, wen mur-tɛ baa ŋgai kɔ̧-a̧ yinɛ, nɛ́ mɔ‘i a̧ Sɔ̧ dea tɛ toma mgbák Bem kɔ‘i tɛnɛ tɛ mur-tɛ hee war k’ɛɛ nɛ̀ ɗaŋmɔ duk sɛnɛ'ɛ ga; a̧ nɛ́ mɔɔ-ɗafi-sɔ̧ nɛ̀ baa ɗaŋmɔ tɛ mur-tɛ yɛ yinɛ,

⁴wen ha̧ deemɔ nɛ̀ yuwar-a nɛ̀ heembea ak'i, mɛ hɔ gba̧a̧ tɛ-ɛɛ; bó nɛ́ ɛ́ɛ́ duk ɗɔɔ ŋgai ko mur-tɛ ɓɔna, ɓɛɛ ɛ́ɛ́ duk ɗɔɔ ŋgai ko Sa̧a̧ Ɔmi.

⁵Tɛ mɔ‘i, o wi nɛ̀ duk ɗɔɔ ŋgai ko mur-tɛ, kii nɛ́ mɔ nɛ̀ mur-tɛ kɔ̧a̧, ɓɛɛ o wi nɛ̀ duk ɗɔɔ ŋgai ko Sa̧a̧ Ɔmi, kii nɛ́ mɔ nɛ̀ Sa̧a̧ Ɔmi kɔ̧a̧.

⁶Wen nɛ́ mur-tɛ a̧ de ha'i mɛ fe, ɓɛɛ Sa̧a̧ Ɔmi dee ha'i mɛ duk kpasa tɛ ga̧a̧mɔ mbɛt.

⁷Wen ta-oi-mɔ ko mur-tɛ nɛ́ dee ŋgazu in Sɔ̧; a̧ mbo zu tɛ heembea ko Sɔ̧ na, ɓɛɛ a̧ nyɛm géé nyɛma-a mɛ mbo zu na mbɛt.

⁸O wi nɛ̀ duk ɗɔɔ ŋgai ko mur-tɛ nyɛm mɛ de mɔ nɛ̀ tɛ́ dè tɛ́ Sɔ̧ na.

⁹K’ɛ́nɛ́, ɛ́nɛ́ bo ɗɔɔ ŋgai ko mur-tɛ na, ɓɛɛ ɛ́nɛ́ a̧a̧ ɗɔɔ ŋgai ko Ɔmi, wen Ɔmi ko Sɔ̧ duk tɛ‘nɛ́. Wi nɛ̀ bó nɛ̀ Ɔmi ko Krist na, wi’ɛi bó nɛ́ bíí kɔ̧-a̧ na mbɛt.

¹⁰Nɛ̀ mbetɛ, kà Krist nɛ́ duka tɛ‘nɛ́, mur-tɛ‘nɛ́ tɛ fe kànà wen zu ɗaŋmɔ, ɓɛɛ Sa̧a̧ Ɔmi tɛ de h’ɛ́nɛ́ mɛ́ duk kpasa, wen Sɔ̧ zɔk'nɛ́ hee wi-de-mɔ nɛ̀ yuwar-a ga.

¹¹Ɓɛɛ kà Sa̧a̧ Ɔmi ko wi nɛ̀ kpasa Jesu tɛ fio dúk tɛ‘nɛ́, wi nɛ̀ kpasa Jesu Krist tɛ fio tɛ kpasi mur-tɛ‘nɛ́ nɛ̀ fe’ɛ, nɛ̀ ɗoŋ Sa̧a̧ Ɔmi kɔ̧-a̧ nɛ̀ duk tɛ‘nɛ́‘i.

¹²Hegɔ o nya'm, nyamandoi a̧a̧ zu yɛ, ɓɛɛ nyamandoi'i bó nɛ́ ko mur-tɛ h’ɛ́ɛ́ mɛ́ duk tɛ dee mɔ nɛ̀ mur-tɛ kɔ̧a̧ siti na.

¹³Wen k’ɛ̀nɛ̀ nɛ́ duka tɛ dee mɔ nɛ̀ mur-tɛ kɔ̧a̧, ɛ́nɛ́ tɛ fe, ɓɛɛ k’ɛ̀nɛ̀ nɛ́ dee ha̧ tom nɛ̀ mur-tɛ kɔ̧a̧ mɛ fe nɛ̀ ŋgai ko Sa̧a̧ Ɔmi, ɛ́nɛ́ tɛ duk kpasa.

¹⁴Wen o wi nɛ̀ Ɔmi ko Sɔ̧ mgbɔ wa nɛ́ o bem ko Sɔ̧.

¹⁵Ɔmi nɛ̀ Sɔ̧ ha̧a̧ h’ɛ́nɛ́‘i, bó nɛ́ wan nɛ̀ tɛ de'nɛ́ nɛ̀ bara, pi̧ nɛ̀ kíì tɛ‘nɛ́ woyo na, ɓɛɛ nɛ́ wan nɛ̀ de ha̧ Sɔ̧ mɛ ba yɛ e nɛ̀ o bem kɔ̧-a̧; hegɔ ɛ́ɛ́ nyɛma mɛ sa a̧ nɛ̀ ŋgai ko Sa̧a̧ Ɔmi'e «Aba»! (Mɛ̀ nɛ́ wen nɛ̀ tɔ̧‘e: Dáà!)

¹⁶Sa̧a̧ Ɔmi nɛ̀ tɛ-wi tɔ̧ nɛ́ wen tɛ taamɔ k’ɛ́ɛ́‘e, ɛ́ɛ́ nɛ́ o bem ko Sɔ̧.

¹⁷Hee ɛ́ɛ́ nɛ́ o bem ko Sɔ̧ ga, ɛ́ɛ́ tɛ kpa mɔɔ-oi er Sɔ̧, ɛ́ɛ́ tɛ kpa mɔɔ-oi kpɔk in Krist; hee mɔ'ɔ n’ɛɛ zɔka bɔnɛ in a̧ ga, ɛ́ɛ́ tɛ ye tɛ gasamɔ in a̧ mbɛt.

¹⁸Mi taa gasamɔ nɛ̀ Sɔ̧ tɛ usi tɛ yɛ gana bɔnɛ n’ɛɛ zɔk tɛ ŋgimbi kinii.

¹⁹Wen mɔ nɛ̀ Sɔ̧ dee lɛŋ pɛm nɛ́ mɔ lɛk-lɛk mɛ zɔk o bem ko Sɔ̧.

²⁰Ɓɛɛ mɔɔ nɔ‘i kifa nɛ́ fio-mɔ; bó nɛ́ mɔɔ nɔ‘i a̧ kɔ̧ɔ̧ mɛ duk hegɔ na, ɓɛɛ nɛ́ Sɔ̧ a̧ dee hegɔ in wa. Ɓɛɛ wa duk kànà tɛ ee ta nɛ̀ Sɔ̧,

²¹wen wa tɛ gbo tɛ bara ko mbɔramɔ wen kpaa-a in wen yea-a zaŋ gasamɔ ko o bem ko Sɔ̧ mbɛt.

²²Wen ɛɛ iŋa'e, mɔ nɛ̀ Sɔ̧ dee lɛŋ gɔfi nɛ́ mɔ kinii nɛ̀ nyimmɔ, hee okoo nɛ̀ zaŋ nyim mɛ ko bem ga.

²³Bó nɛ́ mɔɔ nɔ‘i ɓɛɛ na, ɓɛɛ ɛ́ɛ́, o wi nɛ̀ kpaa so Sa̧a̧ Ɔmi nɛ̀ kuti ha̧a̧mɔ, gɔfi nɛ́ mɔ kɔ̧ see yɛ, pɛm nɛ̀ ŋgimbi nɛ̀ Sɔ̧ tɛ ba yɛ nɛ̀ bem kɔ‘i, ha̧ kiitɛ yɛ mɛ gbo tɛ bara.

²⁴Wen ɛ́ɛ́ nɛ́ o wi nɛ̀ kpasa kaɗi wen zu ee ta n’ɛɛ e pɛm nɛ̀ mɔ; mɔ nɛ̀‘i zɔka kaɗi, wi beka zɛm na. Wi tɛ zɛm mɔ nɛ̀‘i zɔka kaɗi hee ge?

²⁵Ɓɛɛ kà‘i é ta nɛ̀ mɔ nɛ̀‘i zɔk na, wi beka de zɛŋ nɛ̀ pɛma-mɔ na.

²⁶Hegɔ mbɛt, Sa̧a̧ Ɔmi gbak nɛ́ ɛ́ɛ́ tɛ ɓɔsi k’ɛ́ɛ́ wen ɛ́ɛ́ iŋ kɔfa Sɔ̧ nɛ̀ yuwar-a na; ɓɛɛ Sa̧a̧ Ɔmi nɛ̀ tɛ-wi kɔfi nɛ́ Sɔ̧ oi nú yɛ nɛ̀ gɔfamɔ nɛ̀‘i nyɛm mɛ tɔ̧ na.

²⁷Ɓɛɛ wi nɛ̀ zɔk mɔ mɛ kɔ̧ see-wi, iŋa mɔ nɛ̀ Sa̧a̧ Ɔmi kɔ̧ɔ̧ mɛ kɔfi'i mbɛt; wen mɔ n'aa kɔfi oi nú o sa̧a̧-bíí nɛ́ mɔ nɛ̀ Sɔ̧ kɔ̧a̧.

²⁸Ɛ́ɛ́ iŋa'e Sɔ̧ de tom tɛ mɔ lɛŋ ha̧ mɔ ko o bíí nɛ̀ kɔ̧ɔ̧ a̧ mɛ duk nɛ̀ de-a; o wi nɔ‘i nɛ́ o bíí n'aa saa nyɛm nɛ̀ ɗoŋ mɔ n'aa ɗafa.

²⁹Wen o wi n'aa iŋa so nɛti, a̧ dee ha̧ wa mɛ hɔ ŋmaa in Bem kɔ̧-a̧, wen ha̧ Bem’ɛi mɛ duk kaya-wi zu gba gíí o nya-a̧.

³⁰Ɓɛɛ nɛ́ o wi n'aa hoka nɛti e, a̧ a̧ saa mbɛt; o wi n'aa saa, a̧ dee ha̧ wa mɛ duk o wi-de-mɔ nɛ̀ yuwar-a, ɓɛɛ o wi n'aa dee ha̧ wa mɛ duk o wi-de-mɔ nɛ̀ yuwar-a'i, a̧ ha̧a̧ gasamɔ ha̧ wa mbɛt.

³¹Nɛ́ ge wen ge a'i tɛ tɔ̧ gan zu ɛ̧ɛ̧ ge? Kà Sɔ̧ nɛ́ yora ɗoŋ yɛ, nɛ́ o'o tɛ ba zu dúk nɛ̀ yɛ o?

³²Hee mɔ'ɔ n'aa dor mgbák Bem kɔ̧-a̧ mɛ fe wen zu yɛ ga na, bó nɛ́ a̧ tɛ ha̧ mɔ lɛŋ h’ɛ́ɛ́, hee mɔ'ɔ n'aa ha̧a̧ nɛ̀ Bem’ɛi ga na nde?

³³Nɛ́ o'o tɛ ba wen zu o bíí nɛ̀ Sɔ̧ hoka o? Wen nɛ́ Sɔ̧'ɔ̧ de ha̧ wa mɛ duk wi-de-mɔ nɛ̀ yuwar-a.

³⁴Nɛ́ o'o tɛ gɔn kita zu wa o nde? Jesu Krist fea, zu-a'i a̧ kpasa mbɛt, ɓɛɛ a̧ duk nɛ̀ war wii-er Sɔ̧ kɔfi nɛ̀ Sɔ̧ oi nú yɛ.

³⁵Nɛ́ o'o tɛ kɛ̧ yɛ nɛ̀ ŋmaa in kɔ̧ɔ̧mɔ ko Krist o? Nɛ́ bɔnɛ náà, kóó dita-see nde? Nɛ́ usa bɔnɛ h’ɛ́ɛ́ náà, kóó wɔ nde? Nɛ́ kɔsa, kóó ŋgamɔ náà, kóó kíí fio-gba-paa nde?

³⁶Wen Yɔramɔ tɔ̧a̧‘e: «Mɛ̀ nɛ́ fio zu'nɛ́ ɛ̀ɛ̀ fe zɛ de nɛnɛ; o bíí zɔk yɛ hee saɗi-gɔn-gɔn ga.»;

³⁷Ɓɛɛ tɛ mɔ‘i lɛŋ, ɛ́ɛ́ gan nɛ́ zu mɔ siti nɛ̀ ɗoŋ wi nɛ̀ kɔ̧ɔ̧ ɛ́ɛ́.

³⁸Kinii mi iŋa nɛ̀ mbetɛ‘e, kóó nɛ́ fio, kóó nɛ́ duka-kpasa, kóó nɛ́ o betom mɛ yiwese, kóó nɛ́ o wi-ɔ-wan, kóó nɛ́ mɔ mɛ kinii, kóó nɛ́ mɔ mɛ siti, kóó nɛ́ ŋgayamɔ,

³⁹kóó nɛ́ o ŋgayamɔ mɛ kusa fara, kóó nɛ́ o wan mɛ kɔ̧ ɗuka fara, kóó nɛ́ ŋma mɔ nɛ̀ Sɔ̧ dea, ŋma mɔ nɛ̀ tɛ kɛ̧ mgbara yɛ nɛ̀ ŋmaa in kɔ̧ɔ̧mɔ nɛ̀ Sɔ̧ usa h’ɛ́ɛ́ tɛ Jesu Krist, Gasa Wan k’ɛɛ, bo na.