Read Northwest Gbaya RƆMƐN 9 Bible Online

RƆMƐN 9 - Northwest Gbaya bible

RƆMƐN 9

¹Nɛ̀ war ko Krist, mi tɔ̧ nɛ́ kpasawen, mi de ndela na; Sa̧a̧ Ɔmi a̧ duk tɛ taamɔ kɔ‘m tɔ̧ nɛnɛ ha̧‘m'e wen n'am tɔ̧‘i nɛ́ kpasawen mbɛt.

²Mi duk nɛ̀ tu̧u̧-see, ɓɛɛ nyimmɔ kɔ̧ see-am'i kaɗi na.

³Mi tɛ̀ɛ́ kɔ̧ so mɛ duk ɗɔɔ fom ha̧‘m mɛ duk nyɛi̧ nɛ̀ Krist wen o nya'm, wan mɛ dùk kɔ‘m tɛ tɔk-tɛ.

⁴Wa nɛ́ o be Israɛl nɛ̀ Sɔ̧ baa e nɛ̀ bem kɔ‘i; a̧ ha̧a̧ gasamɔ ha̧ wa; a̧ nɔɔ tɔk in wa, ha̧ nɛ̀ heembea ha̧ wa, ɓɛɛ a̧ ha̧ yuwar-gasa-sɔ̧ ha̧ wa in o ha̧a̧nú,

⁵ká bá nɛ̀ o zɔmdáa nɛ̀ Krist duk nɛ́ bezaŋ-wa nɛ̀ war ko mur-tɛ, ɓɛɛ nɛ́ a̧ a̧ duk zu mɔ lɛŋ, a̧ nɛ̀ Sɔ̧ nɛ̀ toka de yoŋgo dúk zu-a kpoo nɛ kpoo. Aamɛn!

⁶Bó nɛ́ mi kɔ̧ɔ̧ mɛ tɔ̧‘e ha̧a̧nú ko Sɔ̧ hɔ gba̧a̧ na, na; wen bó nɛ́ o bezaŋ Israɛl lɛŋ nɛ́ mgbák dukbíí ko Sɔ̧ na.

⁷Kale-a mbɛt, bó nɛ́ o bezaŋ Abraham lɛŋ a̧ duk nɛ́ mgbák bem kɔ̧-a̧ na, wen Sɔ̧ tɔ̧ɔ̧ so ha̧ Abraham: «Nɛ́ o bezaŋ Izak a'i tɛ sa'e o bezaŋ-mɛ.»

⁸Mɛ̀ nɛ́ wen nɛ tɔ̧: bó nɛ́ o bíí nɛ war ko mur-tɛ a̧ ya nɛ́ o bem ko Sɔ̧ na; nɛ́ o bezaŋ ha̧a̧nú a̧ duk nɛ́ o bem ko Sɔ̧ ɛ̧.

⁹Wen wen’ɛ nɛ́ ha̧a̧nú: «Mi tɛ pii ɗoŋ tɛ ŋgimbi hee mɔ'ɔ ga, ɓɛɛ Sara tɛ ko be-wiwii.»

¹⁰Ɓɛɛ bó nɛ́ mɔ‘i kpɔk ɓɛɛ na; Rebeka a̧a̧ so sɛnɛ mbɛt, ɓɛɛ nɛ́ dáà k’ɛ́ɛ́ Izak kpɔk, a̧ ee so zaŋ tɛ-a.

¹¹Wa tɛ ko so o bem hɔ̧ɔ̧ na, kà o bem nɔ‘i dé nɛ̀ ɗaŋmɔ kà bó nɛ̀ demɔ na mbɛt; ɓɛɛ Sɔ̧ hoka so kɔ‘i mɔ kaɗi mgbara wa'i wen ha̧ ee-zu-mɔ kɔ̧-a̧ mɛ hɔ gba̧a̧.

¹²Hoka-mɔ‘i duk tɛ saa sara n'aa saa nɛ̀ wa, nɛ̀ bó nɛ́ tɛ tom kɔ-wa na, wen Sɔ̧ tɔ̧ɔ̧ so ha̧ Rebeka'e: «Kaya-wi tɛ duk wi-de-tom ko be-ɗoŋ»,

¹³nyɛm nɛ̀ ɗoŋ mɔ nɛ̀ yɔra'e nde: «Mi kɔ̧ɔ̧ Jakob ɓɛɛ mi sɛn Esau.»

¹⁴A'i tɔ̧́ bɔɔ hee ge? Sɔ̧ bó nɛ́ wi-de-mɔ nɛ̀ yuwar-a na nde? Weyaa, bó hegɔ na.

¹⁵Wen a̧ tɔ̧ɔ̧ ha̧ Moisɛ‘e: «Mi tɛ de ko ha̧ wi n'am kɔ̧ɔ̧ mɛ de ko ha̧ a̧, ɓɛɛ wi n'am kɔ̧ɔ̧ mɛ zɔk nɛ̀ ko mbɛt, mi tɛ zɔk wi’ɛi nɛ̀ ko.»

¹⁶Mɔ‘i beka de nyɛm nɛ̀ ɗoŋ mɔ nɛ̀ bíí kɔ̧a̧, kóó deemɔ ko bíí na mbɛt, ɓɛɛ nɛ́ tɛ deako ko Sɔ̧.

¹⁷Sɔ̧ tɔ̧ɔ̧ zaŋ Yɔramɔ ha̧ wannu Faraɔŋ‘e: «Mi ee mɛ tɛ wan wen ha̧‘m mɛ usi ŋgai kɔ‘m zu mɛ́, wen ha̧ nin-am mɛ hur dam zu nù lɛŋ.»

¹⁸Hegɔ, a̧ de ko ha̧ wi n'aa kɔ̧ɔ̧ mɛ de ko ha̧ a̧, ɓɛɛ a̧ ŋgaia see wi n'aa kɔ̧ɔ̧ mɛ ŋgai see-aa.

¹⁹Ŋmafara mɛ tɛ tɔ̧‘e: «Kà nɛ́ boo hegɔ, nɛ́ ge a̧ Sɔ̧ kpa ɗaŋsee sɛnɛ in bíí ge? Wen nɛ́ o'o nyɛma mɛ dor mɔ n'aa kɔ̧ɔ̧ mɛ de o?»

²⁰Mɛ́ bíí, mɛ́ so nɛ́ o mɛ́ si kafɛ in Sɔ̧ o? Kpánà nyɛma so mɛ tɔ̧ ha̧ wi-ɓu-a'e: «Mɛ́ ɓua'm hegɔ wen ge?»

²¹Bó nɛ́ wi-ɓu-kpánà nyɛma mɛ́ de mɔ nɛ̀ gìì hee see-aa kɔ̧ɔ̧ ga na nde? Bó nɛ́ tɛ kpɔk gìì‘i, a̧ wi-ɓu-kpánà nyɛma mɛ́ ɓu kpánà-ɗáŋ in géé pɛsa-kpánà mbɛt na nde?

²²Tɛ mɔ‘i Sɔ̧ kɔ̧ɔ̧ so mɛ́ usi nyimsea kɔ‘i, wen ha̧ bíí mɛ́ iŋ ŋgayamɔ kɔ̧-a̧ mbɛt. Ɓɛɛ a̧ nɔ ŋgiɗi nɛ̀ dɔka-a zu o wi nɛ̀ nyimsea kɔ̧-a̧ a̧a̧ zu wa, nɛ̀ duk so dɔ̧́ɔ̧́ wen ɗaŋa-a yinɛ.

²³A̧ dee mɔ‘i wen ha̧ bíí mɛ́ iŋ zɔm mɔ nɛ̀ a̧a̧ tɛ gasamɔ kɔ̧-a̧ wen o wi nɛ̀ duk ɗɔɔ deako, n'aa ɗafa so wa e nɛti mɛ ye tɛ gasamɔ kɔ̧-a̧.

²⁴Ɓɛɛ o wi nɔ‘i nɛ́ ɛ́ɛ́ n'aa saa, bó nɛ́ mgbara o Juif ɓɛɛ na, ɓɛɛ mgbara o gɔni-dùk mbɛt.

²⁵Nɛ́ wen'i a̧ Sɔ̧ tɔ̧ɔ̧ zaŋ kalata ko Osee'e: «Dukbíí nɛ̀ bó só nɛ́ dukbíí kɔ‘m na, mi tɛ sa a̧‘e dukbíí kɔ‘m. Ɓɛɛ tugun bíí n'am kɔ̧ so na, mi tɛ sa a̧‘e wi n'am kɔ̧ɔ̧ nyɛmna.

²⁶Ɓɛɛ fara nɛ̀ wa tɔ̧ɔ̧ so'e: ‹Ɛ́nɛ́ bó nɛ́ dukbíí kɔ‘m na,› nɛ́ mgbák bɛɗɛ fara'i a̧ wa tɛ sa'nɛ́ sɛnɛ‘e, o bem ko Sɔ̧ nɛ duk kpasa.»

²⁷Esaii mbɛt tɔ̧ɔ̧ wen zu Israɛl‘e nde: «Kóó o be Israɛl dɔka so hee nyɛmɛ ká̧ zaŋ gba-tɔp ga, nɛ́ oi bíí tikiɗi ɓɛɛ a̧ tɛ kpasi.

²⁸Wen Gasa Wan tɛ de ha̧ wen kɔ‘i mɛ hɔ gba̧a̧ nɛ̀ haya-a in nɛ̀ yuwar-a mbɛt zaŋnu’ɛ.»

²⁹Nɛ́ wen'i a̧ Esaii tɔ̧ɔ̧ so'e: «Kà Gasa Wan ko o wi-biro a̧ é so o bezaŋ h’ɛ́ɛ́ na, ɓɛɛ ɛ́ɛ́ tɛ̀ɛ́ ya hee Sɔdɔm ga, ɛ́ɛ́ tɛ̀ɛ́ hɔ ŋmaa in Gɔmɔr.»

³⁰A'i tɔ̧́ nɛ̀ sɔŋkur-aa hee ge? O gɔni-dùk nɛ kii so mɛ ya o wi-de-mɔ nɛ̀ yuwar-a na kpaa deemɔ nɛ̀ yuwar-a nɛ̀ ɗoŋ kɔ̧ɔ̧ɗɔɔwen.

³¹Ɓɛɛ Israɛl nɛ̀ kia so kɔ‘i nɛ́ heembea nɛ̀ tɛ de ha̧ wa mɛ duk wi-de-mɔ nɛ̀ yuwar-a tika nɛ̀ ká̧ a̧.

³²Wen ge? Wen deemɔ nɛ̀ yuwar-a'i wa kii so nɛ̀ ɗoŋ kɔ̧ɔ̧ɗɔɔwen na. Wa taa so'e wi tɛ kpa deemɔ nɛ̀ yuwar-a tɛ tom kɔ‘i, ɓɛɛ nɛ́ mɔ‘i sa wa to naŋ-wa nɛ̀ ta

³³nyɛm nɛ ɗoŋ mɔ nɛ yɔra so'e: «Mi ee ta-kɔ̧-naŋ Siɔŋ mɛ; ta'i, bíí tɛ yo nù zu a̧, ɓɛɛ foe beka de wi nɛ̀ tɛ kɔ̧ ɗɔaa ha̧ ta'i na.»