Read Northwest Gbaya 1 KƆRINTIƐN 10 Bible Online

1 KƆRINTIƐN 10 - Northwest Gbaya bible

1 KƆRINTIƐN 10

¹O nya'm, mi kɔ̧ɔ̧ mɛ́ mbaŋ tɛ‘nɛ́ ndé, o zɔmdáa k’ɛ́ɛ́ duka so ɗɔɔ tura-zan, wa lɛŋ kuu gba-tɔp,

²ɓɛɛ duka-a ɗɔɔ tura-zan in kuu gba-tɔp'i nɛ́ mɔ nɛ̀ tɔ̧, mɛ̀ nɛ́ zuia wa lɛŋ nɛ̀ ɗoŋ Moisɛ.

³Wa lɛŋ nyɔŋa nɛ́ nyɔŋmɔ ko Sɔ̧,

⁴wa nɔɔ yì ko Sɔ̧ mbɛt; wa nɔɔ so nɛ́ yì kɔ̧ ta ko Sɔ̧ nɛ̀ ndaka so ɗoŋ wa; ɓɛɛ ta'i nɛ́ Krist.

⁵Ɓɛɛ bó nɛ́ dɔka bíí mgbara wa dee tɛ Sɔ̧ na, wen wɔr-wa gbisi so nɛ̀ ŋga-gbárà sinɛ.

⁶O mɔɔ nɔ‘i dee hegɔ wen usa mɔ h’ɛ́ɛ́, k’ɛ́ɛ́ tɛ̀ɛ́ de wɔ ɗaŋmɔ hee wa ga na.

⁷K’ɛ́nɛ́ gasi o géé-sɔ̧ hee o ŋma bíí mgbara wa ga na, wen Yɔramɔ tɔ̧a̧‘e: «Dukbíí yaa nù mɛ́ nyɔŋ mɔ, nɔ nɛ̀ mɔ, ɓɛɛ wa kur mɛ́ de saa.»

⁸K’ɛ́ɛ́ de wɔ dee dàlà hee kɔ-wa ga na, wen o ŋma bíí mgbara wa dee so hegɔ ɓɛɛ o bíí booro-ɓu-yiitoo-zua-taar kum kpɔk kale wese.

⁹K’ɛ́ɛ́ we Gasa Wan hee o ŋma bíí mgbara wa dee so ga na: wen o gɔ́k gɔma so wa gbɛ a nù.

¹⁰K’ɛ́nɛ́ ku̧i̧ mɔ na mbɛt, wen o ŋma bíí mgbara wa ku̧i̧a̧ so mɔ ɓɛɛ ká Betom-ɗaŋ-mɔ ko Sɔ̧ tɛ́ɛ̀ gbɛ wa yinɛ.

¹¹O mɔɔ nɔ‘i hɔɔ zu wa hee mɔɔ-usi-mɔ ga, ɓɛɛ wa yɔra wen mbaŋa tɛ yɛ o wi nɛ̀ hɛɗa in sɔŋkur ŋgimbi’ɛ.

¹²Hegɔ bíí nɛ̀ ta'e wi yor nɛ́ ŋgɔn a̧ zɔk tɛ ká a̧ yo nù.

¹³Bó nɛ́ o mɔ nɛ̀ wee so'nɛ́ gana ŋgai ko bíí na: ɓɛɛ Sɔ̧ nɛ́ wi nɛ̀ yor ɗoŋ wen kɔ‘i; a̧ beka e ha̧ mɔ mɛ́ we'nɛ́ gan ŋgai k’ɛ́nɛ́ na. Ɓɛɛ kà weamɔ nɛ́ hɔa, a̧ tɛ usi yuwar n’ɛ̀nɛ̀ tɛ gbo nɛnɛ sɛnɛ, in hee mɔ'ɔ n’ɛ̀nɛ̀ tɛ nɔ nɛ̀ ŋgiɗi sɛnɛ ga.

¹⁴Mɛ̀ nɛ́ wen hegɔ, o wi n'am kɔ̧ɔ̧ nyɛmna, k’ɛ́nɛ́ ɗafi o géé-sɔ̧ na.

¹⁵Mi tɔ̧ wen'i h’ɛ́nɛ́ hee ha̧ o wi-zii-mɔ ga, ɛ̀nɛ̀ tá mɔ zu wen n'am tɔ̧‘i.

¹⁶Be-ɗele toka-de-yoŋgo n’ɛ̀ɛ̀ de osoko zu-a’ɛ, bó nɛ́ duka-a kpɔk in tɔk tɛ Krist na? Ɓɛɛ brɛt n’ɛ̀ɛ̀ gbin nyɔŋ'ɛ, bó nɛ́ duka-a kpɔk in kiitɛ Krist na?

¹⁷Kale-a hegɔ mbɛt, hee brɛt nɛ́ kpɔk ga, ɛ́ɛ́ lɛŋ duk nɛ́ kiitɛ kpɔk, wen ɛ́ɛ́ lɛŋ nyɔŋ nɛ́ kpɔk brɛt'i.

¹⁸Ɛ̀nɛ̀ zɔ̀k, o be Israɛl, bó nɛ́ o wi nɛ̀ nyɔŋ kpoo-ɗafi-sɔ̧ duk kpɔk in fara-dɔ-kpoo-sɔ̧ na nde?

¹⁹Wen n'am kɔ̧ɔ̧ mɛ́ tɔ̧‘i nɛ́ ge wen ge? Mi kɔ̧ɔ̧ mɛ́ tɔ̧‘e, kpoo nɛ‘i ɗafa ha̧ o géé-sɔ̧, kóó o géé-sɔ̧ nɛ̀ tɛ-wa nɛ̀ ŋma kpasamɔ nde?

²⁰Weyaa! Wen kpoo'i wa ha̧a̧ ha̧ o ɗaŋ-sɔ̧ ɓɛɛ bó nɛ́ ha̧ Sɔ̧ na, wen mi kɔ̧ h’ɛ́nɛ́ mɛ́ duk kpɔk in o ɗaŋ-sɔ̧ na.

²¹Ɛ́nɛ́ beka nɔ mɔ kɔ̧ be-ɗele ko Gasa Wan in ko o ɗaŋ-sɔ̧ kpɔk na. Ɛ́nɛ́ beka nyɔŋ mɔ ko Gasa Wan in ko o ɗaŋ-sɔ̧ mbɛt na.

²²Kóó ɛ́ɛ́ kɔ̧ɔ̧ mɛ́ aŋ nɛ́ gɔya ko Gasa Wan a̧ ŋgɔn nde? Ɛ́ɛ́ ŋgaia gan a̧ nde?

²³Ɛ́ɛ́ nyɛma dee mɔ lɛŋ, ɓɛɛ bó nɛ́ mɔ lɛŋ ɔ dee h’ɛ́ɛ́ mɛ́ de na. Ɛ́ɛ́ nyɛma dee mɔ lɛŋ, ɓɛɛ bó nɛ́ mɔ lɛŋ a̧ gbak wi na.

²⁴Ká ŋma bíí kii mɔ wen tɛ-wi na, ɓɛɛ a̧ a̧ kíí mɔ wen gbaka ŋmá-a ɛ̧.

²⁵Mɔ nɛ̀ wa ɗɔr lumɔ lɛŋ, ɛ̀nɛ̀ hí̧fí̧ nyɔ́ŋ, ɓɛɛ ká taamɔ k’ɛ́nɛ́ sakali tɛ mɔ‘i na.

²⁶Wen Yɔramɔ tɔ̧a̧‘e: «Nù in o mɔ nɛ̀ ya zaŋ-aa lɛŋ nɛ́ ko Gasa Wan.»

²⁷Kà ŋma bíí nɛ̀ kɔ̧ ɗɔaa na sa'nɛ́ mɛ́ nyɔŋ mɔ, k’ɛ̀nɛ̀ nɛ́ nɛa, n’ɛ̀nɛ̀ nyɔŋ mɔ n'aa ha̧ h’ɛ́nɛ́ lɛŋ, ɓɛɛ ká taamɔ k’ɛ́nɛ́ sakali tɛ mɔ‘i na.

²⁸Ɓɛɛ kà ŋma bíí tɔ̧ h’ɛ́nɛ́‘e, kpoo nɛ̀‘i gia'i nɛ́ ko o géé-sɔ̧ wó, k’ɛ́nɛ́ nyɔŋ na, wen ká wi’ɛi nɛ̀ mbaŋa tɛ‘nɛ́‘i tɛɛ sakali.

²⁹Bó nɛ́ mi tɔ̧ wen'i wen taamɔ k’ɛ́nɛ́ na, ɓɛɛ nɛ́ wen taamɔ kɔ̧-a̧ ɛ̧. Héé ge taamɔ ko ŋma bíí tɛ ɓa kita zu mɔ n'am nyɛma mɛ́ de ge?

³⁰Kà‘m nɛ́ dee osoko ha̧ Sɔ̧ sɛka'm nyɔŋa ŋma mɔ, ɓɛɛ wa tɛ tɔ̧ wen zu'm tɛ mɔ‘i hee ge?

³¹Kóó ɛ́nɛ́ nyɔŋa mɔ, kóó ɛ́nɛ́ nɔɔ mɔ, kóó ɛ́nɛ́ dee o mɔ lɛŋ, ɛ̀nɛ̀ dé o mɔɔ nɔ‘i ha̧ gasamɔ mɛ́ duk nɛ́ ko Sɔ̧.

³²K’ɛ́nɛ́ de mɔ nɛ̀ tɛ de ha̧ ŋma bíí mɛ́ tik na, kóó nɛ́ Juif, kóó nɛ́ o be Grɛk, kóó zuduk bíí ko Sɔ̧ na mbɛt.

³³Mɛ̀ nɛ́ hegɔ nɛ̀ mi nɛ̀ tɛ‘m kii mɛ́ de mɔ nɛ̀ tɛ ha̧ desee ha̧ bíí lɛŋ tɛ mɔ lɛŋ; bó nɛ́ mi kii nɛ́ ŋma mɔ kɔ‘m nɛ̀ tɛ‘m na: mi kii nɛ́ ko o dɔka bíí, wen ha̧ wa mɛ́ kpasi.