Read Northwest Gbaya 1 KƆRINTIƐN 14 Bible Online

1 KƆRINTIƐN 14 - Northwest Gbaya bible

1 KƆRINTIƐN 14

¹Ɛ̀nɛ̀ yá nɛ̀ kɔ̧ɔ̧mɔ; ɛ̀nɛ̀ kíí mɛ́ kpa nɛ́ o ha̧a̧mɔ ko Sa̧a̧ Ɔmi, gan gan tɔ̧ɔ̧-wen oi nú Sɔ̧.

²Wen bíí nɛ̀ tɔ̧ wen nɛ̀ gɔni nú tɔ̧ wen'i ha̧ bíí na, ɓɛɛ a̧ tɔ̧ ha̧ Sɔ̧. Ŋma bíí zii gba̧a̧-a̧ na, wen taamɔ ko wi’ɛi tɔ̧ nɛ́ o ɗukamɔ.

³Ɓɛɛ bíí nɛ̀ tɔ̧ wen oi nú Sɔ̧ tɔ̧ wen'i wen gbaka o bíí; a̧ tɔ̧ nɛ́ mbɔrɔ, ha̧ nɛ̀ nɔɔ-ŋgiɗi ha̧ wa.

⁴Bíí nɛ̀ tɔ̧ wen nɛ̀ gɔni nú tɔ̧ nɛ́ wen-gbak-tɛ, ɓɛɛ bíí nɛ̀ tɔ̧ wen oi nú Sɔ̧, tɔ̧́ nɛ́ wen-gbak o bíí nɛ̀ mɔi̧a.

⁵Mi kɔ̧ɔ̧ h’ɛ́nɛ́ lɛŋ mɛ́ tɔ̧ wen nɛ̀ gɔni nú, ɓɛɛ mi kɔ̧ɔ̧ gan h’ɛ́nɛ́ mɛ́ tɔ̧ wen oi nú Sɔ̧. Wen kà wi nɛ̀ tɔ̧ wen nɛ̀ gɔni nú nyɛm mɛ́ we ɗoŋ-aa ha̧ bíí nɛ̀ mɔi̧a wen gbaka wa sɛnɛ na, ɓɛɛ wi nɛ̀ tɔ̧ wen oi nú Sɔ̧ gana wi nɛ̀ tɔ̧ wen nɛ̀ gɔni nú‘i.

⁶O nya'm, tɔ̧ so'e mi nɛ̀ɛ́ tɛ‘nɛ́ kinii, tɔ̧ nɛ̀ wen h’ɛ́nɛ́ nɛ̀ gɔni nú, ɓɛɛ kà wen kɔ‘m'i ba ŋma mbe mɔ nɛnɛ h’ɛ́nɛ́ na, mi ba ŋma mbe iŋamɔ nɛnɛ h’ɛ́nɛ́ na, mi tɔ̧ wen oi nú Sɔ̧ h’ɛ́nɛ́ kà‘m usi nɛ̀ mɔ na mbɛt, ɓɛɛ tɔ̧ɔ̧-wen kɔ‘m nɛ̀ gɔni nú‘i tɛ gbak'nɛ́ hee ge?

⁷Kale-a mbɛt, o mɔ nɛ̀‘i dɔm in mɔ nɛ̀‘i mbɛr hee fol in koloŋ ga, kà wór nɛ̀ de-a na, ɓɛɛ wi tɛ iŋ tiger gima-a hee ge?

⁸Ɓɛɛ kà kuŋge-biro wor nɛ̀ ŋgaya-a na, nɛ́ o'o tɛ ɗafi mɔ wen biro o?

⁹Ɛ́nɛ́ mbɛt, k’ɛ̀nɛ̀ tɔ̧́ wen nɛ̀ sa̧a̧-a̧ na, wi tɛ zii gba̧a̧-a̧ hee ge? I̧i̧ nɛ́ tɔ̧ɔ̧-wen wen ha̧ búk.

¹⁰O nú a̧a̧ zaŋnu’ɛ nɛ̀ dɔka-a nyɛmna, ɓɛɛ wa lɛŋ tɔ̧ nɛ́ gba̧a̧ wen.

¹¹Ɓɛɛ kà‘m zíí nú ko ŋma bíí na, wi’ɛi nɛ́ gɔni bíí sɛn yí‘m, ɓɛɛ mi mbɛt nɛ́ gɔni bíí sɛn yí-a.

¹²Ɛ́nɛ́ mbɛt, hee mɔ'ɔ n’ɛnɛ kɔ̧ɔ̧ nyɛmna mɛ́ kpa ha̧a̧mɔ ko Sa̧a̧ Ɔmi ga, ɛ̀nɛ̀ kíí mɛ́ kpá nɛ́ ha̧a̧mɔ nɛ̀ tɛ́ gbak o bíí nɛ̀ mɔi̧a.

¹³Hegɔ, bíí nɛ̀ tɔ̧ wen nɛ̀ gɔni nú a̧ kɔ́fí Sɔ̧ ha̧ a̧ mɛ́ iŋ wee ɗoŋ-aa mbɛt.

¹⁴Kà‘m kɔ́fí Sɔ̧ nɛ̀ gɔni nú, nɛ́ taamɔ kɔ‘m a̧ kɔfi Sɔ̧, ɓɛɛ iŋamɔ kɔ‘m bó tɛ mɔ‘i na.

¹⁵A̧‘m dé hee ge? Mi tɛ́ kɔfi Sɔ̧ nɛ̀ taamɔ in iŋamɔ kɔ‘m mbɛt. Mi tɛ́ bìì gima nɛ̀ taamɔ in iŋamɔ kɔ‘m mbɛt.

¹⁶Wen kà bó nɛ́ taamɔ kɔ-mɛ kpɔk a̧ de tom ŋgimbi nɛ̀ mɛ́ de nɛ̀ osoko ha̧ Sɔ̧, ɓɛɛ o géé bíí nɛ̀ zii wen'i tɛ tɔ̧ «Aamɛn» nɛ̀ wa zii gba̧a̧-a̧ na'i, hee ge?

¹⁷Dee osoko kɔ-mɛ‘i nɛ́ kpasamɔ, ɓɛɛ gbak ŋma bíí na.

¹⁸Mi dee osoko ha̧ Sɔ̧ wen mi tɔ̧ wen nɛ̀ gɔni nú gan ɛ́nɛ́ lɛŋ,

¹⁹ɓɛɛ sɛn tɛ mɔi̧a-a ko bíí, mi kɔ̧ɔ̧ mɛ́ tɔ̧ nɛ́ be dɔ̧ wen tikiɗi nɛ̀ o bíí tɛ zii gba̧a̧-a̧ mɛ́ gbak wa, gan bura zɔm wen nɛ̀ gɔni nú nɛ̀ bíí zii na.

²⁰O nya'm, k’ɛ́nɛ́ kɛ̧ mgbara wen hee obem ga na; ɛ̀nɛ̀ dúk hee obem ga tɛ mɔ ko ɗaŋmɔ, ɓɛɛ ɛ̀nɛ̀ kɛ̧́ mgbara wen hee o gasawi ga.

²¹Wen Yɔramɔ tɔ̧ɔ̧ zaŋ Heembea'e: «Mi tɛ tɔ̧ wen ha̧ dukbíí'ɛ nɛ̀ nú ko o ŋma bíí nɛtɛ, mi tɛ tɔ̧ wen ha̧ wa nɛ̀ ndàrá-nú gɔni-dùk, ɓɛɛ kóó hegɔ mbɛt, wa beka zii wen kɔ‘m na. Nɛ́ Gasa Wan a̧ tɔ̧ wen’ɛ.»

²²Hegɔ gɔni-nú duk nɛ́ mɔɔ-usi-mɔ ha̧ o wi nɛ̀ kɔ̧ ɗɔaa na, nɛ̀ bó nɛ́ ha̧ o wi nɛ̀ kɔ̧ɔ̧ ɗɔaa kaɗi na. Ɓɛɛ tɔ̧ɔ̧-wen oi nú Sɔ̧ nɛ́ mɔɔ-usi-mɔ ha̧ o wi nɛ̀ kɔ̧ɔ̧ ɗɔaa kaɗi, nɛ̀ bó nɛ́ ha̧ o wi nɛ̀ kɔ̧ ɗɔaa na, na.

²³Kà o zuduk bíí ko Krist lɛŋ mɔi̧, tɔ̧ nɛ̀ o nú nɛtɛ nɛtɛ, bó nɛ́ o géé bíí nɛ̀ zii wen'i, kóó o wi nɛ̀ kɔ̧ ɗɔaa na tɛ zɔk wa hee o wi-dawa ga na?

²⁴Tɔ̧́ só‘e ɛ́nɛ́ lɛŋ nɛ́ o wi-tɔ̧-wen oi nú Sɔ̧, ɓɛɛ nɛ́ mɔ'ɔ nɛ̀ ŋma bíí nɛ̀ kɔ̧ ɗɔaa na, kóó ŋma géé bíí mbɛt mɔi̧a in'nɛ̀ɛ́ wó, wen'i tɛ gɔn ɗɛɗɛ-a wen ɗaŋmɔ kɔ̧-a̧, ɓɛɛ gɔna kita zu a̧ mbɛt.

²⁵Hu̧sa̧mɔ nɛ̀ duk kɔ̧ see-aa tɛ gbo; a̧ tɛ gu sɔnti-a nù gasi Sɔ̧ tɔ̧ nɛnɛ‘e, Sɔ̧ a̧a̧ mgbara'nɛ́ nɛ̀ mbetɛ.

²⁶O nya'm, a'i dé bɔɔ hee ge? K’ɛ̀nɛ̀ mɔ́í̧ ŋmaa, ɓɛɛ kóó o ndé nyɛma mɛ́ bìì gima gasi nɛ̀ Sɔ̧, usi nɛ̀ mɔ, kóó we nɛ̀ ɗoŋ mɔ nɛ̀ Sɔ̧ usa ha̧ a̧; a̧ nyɛma mɛ́ tɔ̧ wen nɛ̀ gɔni-nú, kóó wee ɗoŋ-aa mbɛt; ɓɛɛ deemɔ k’ɛ́nɛ́ lɛŋ a̧ dúk nɛ́ mɔɔ-gbak'nɛ́.

²⁷Kà bó nɛ́ tɔ̧ɔ̧-wen nɛ̀ gɔni-nú, ɓɛɛ nɛ́ bíí yiitoo kóó taar a̧ tɛ tɔ̧ wen ɗoŋ ŋmaa, ɓɛɛ ŋma bíí wee ɗoŋ-aa.

²⁸Kà ŋma wi-we-ɗoŋ-aa bo na, ɓɛɛ ká o wi nɔ‘i tɔ̧ wen mgbara bíí na, wa a̧ tɔ̧́ nɛ́ wen mgbara wa in Sɔ̧ ɓɛɛ.

²⁹Ɓɛɛ nɛ̀ war ko o wi-tɔ̧-wen oi nú Sɔ̧, bíí yiitoo kóó taar a̧ tɔ̧́, ɓɛɛ o oi bíí kɛ̧ɛ̧ mgbara-a.

³⁰Kà Sɔ̧ nɛ́ usa mbe mɔ ha̧ ŋma bíí poo'nɛ́, ɓɛɛ bíí nɛ̀ a̧a̧ tɛ tɔ̧ɔ̧-wen a̧ dúk nɛ̀ oi nú kaŋ.

³¹Ɛ́nɛ́ lɛŋ nyɛma mɛ́ tɔ̧ wen oi nú Sɔ̧, ɓɛɛ kóó o ndé a̧ tɔ̧́ tɛ ŋgimbi kɔ‘i, wen ha̧ o bíí lɛŋ mɛ́ iŋ mɔ kpa nɛ̀ nɔɔ-ŋgiɗi.

³²Nɛ́ wi-tɔ̧-wen oi nú Sɔ̧ a̧ ɔ wan zu ɔmi-tɔ̧-wen oi nú Sɔ̧ nɛ̀ a̧a̧ tɛ-a.

³³Sɔ̧ bó nɛ́ Sɔ̧ ko tɔ̧ɔ̧-wen nɛ̀ yuwar-a na, na, ɓɛɛ a̧ nɛ́ Sɔ̧ wan-ha̧-ga̧a̧mɔ.

³⁴Okoo a̧ dúk nɛ̀ oi nú tɛ o gasa mɔi̧a-a hee mɔ'ɔ nɛ̀ de mgbara o zuduk sa̧a̧-bíí lɛŋ ga; wa bó nɛ̀ yuwar mɛ́ tɔ̧ wen na. Wa a̧ mbó zu hee mɔ'ɔ nɛ̀ heembea tɔ̧ ga.

³⁵Kà wa nɛ́ kɔ̧ɔ̧ mɛ́ iŋ ŋma mɔ, ɓɛɛ nɛ̀ wa a̧ ák wíì kɔ-wa sɛn kɔ̧ tua. Bó nɛ́ ɔ dee ha̧ okoo mɛ́ tɔ̧ wen tɛ mɔi̧a-a na.

³⁶Wen ko Sɔ̧ ku̧u̧ naŋ nɛ̀ tɛ k’ɛ́nɛ́ nde? Kóó nɛ́ ɛ́nɛ́'ɛ kpaa wen ko Sɔ̧ ɓɛɛ nde?

³⁷Kà ŋma bíí nɛ́ tɔ̧a̧‘e wi nɛ́ wi-tɔ̧-wen oi nú Sɔ̧, kóó wi a̧a̧ nɛ̀ Sa̧a̧ Ɔmi wó, ɓɛɛ n'aa íŋ‘e, mɔ n'am yɔr h’ɛ́nɛ́‘i nɛ́ heembea ko Gasa Wan.

³⁸Kà wi’ɛi nɛ́ iŋa hegɔ na, ɓɛɛ Sɔ̧ iŋ wi’ɛi na mbɛt.

³⁹Hegɔ o nya'm, ɛ̀nɛ̀ kíí mɛ́ duk nɛ́ wi-tɔ̧-wen oi nú Sɔ̧, ɓɛɛ k’ɛ́nɛ́ dor ŋma bíí mɛ́ tɔ̧ wen nɛ̀ gɔni-nú na,

⁴⁰ɓɛɛ ɛ̀nɛ̀ dé ha̧ mɔ lɛŋ mɛ́ nɛ̀ nɔ̀ nɛ̀ de-a, nɛ̀ yuwar-a mbɛt.