Read Northwest Gbaya 1 KƆRINTIƐN 16 Bible Online

1 KƆRINTIƐN 16 - Northwest Gbaya bible

1 KƆRINTIƐN 16

¹Kà bó nɛ́ ndɛma sede ha̧ o zuduk bíí ko Sɔ̧ sɛn Jerusalɛm, ɓɛɛ ɛ́nɛ́ mbɛt tɛ́ ndak nɛ́ ɗoŋ yuwar deemɔ n'am tɔ̧ɔ̧ so ha̧ o zuduk bíí ko Sɔ̧ mɛ́ Galatii.

²Tɛ kuti wese alat lɛŋ, bíí kpɔk kpɔk a̧ bá mɔ zaŋ mɔ n'aa kpaa e nɛtɛ nyɛm nɛ ŋgai kɔ̧-a̧, wen ká‘m tɛ́ɛ̀ hɔ kaɗi sɛka'i ndɛma mɔ.

³Ɛ̀nɛ̀ hók o bíí, ɓɛɛ ŋgimbi n'am tɛ hɔ, mi tɛ ha̧ kalata ha̧ wa mɛ́ ba ha̧a̧mɔ k’ɛ́nɛ́ nɛnɛ Jerusalɛm.

⁴Kà ŋma mɔ nɛ́ bòò ha̧‘m mɛ́ nɛ̀ wen-aa, ɓɛɛ mi nɛ̀ɛ́ in wa mbɛt.

⁵Mi tɛ ba nɛ́ yuwar Masedoan ɓir nɛnɛ si tɛ‘nɛ́.

⁶Ŋmafara mi tɛ ɓɔn benaŋ in'nɛ̀ɛ́ hegɔɔ kóó hɔ nú bɛɛ mbɛt, gbakna ɛ́nɛ́ ha̧a̧ be mɔɔ-yuwar siti ha̧‘m.

⁷Ɛ̧ɛ̧ mi beka ɓir ɓir yak na; kà Gasa Wan nɛ́ kɔ̧a̧, mi tɛ́ ɔ benaŋ in'nɛ̀ɛ́ sɛ.

⁸Ɓɛɛ mi tɛ́ duk sɛn Efɛz hɔ ŋgimbi gbaŋa Pantekot,

⁹wen yuwar hu̧i̧a̧ ha̧‘m mɛ́ de gasa tom sɛn hi̧i̧, ɓɛɛ o wi-sɛn-am ɔ dɔka mbɛt.

¹⁰Kà Timotee nɛ́ hɔɔ tɛ‘nɛ́, ɓɛɛ k’ɛ́nɛ́ de ha̧ a̧ mɛ́ duk in'nɛ̀ɛ́ nɛ̀ kíì na, wen a̧ de nɛ́ tom ko Gasa Wan hee mi ga.

¹¹Ká ŋma bíi e a̧ tɛ geemɔ na. Ɛ̀nɛ̀ gbák a̧ mɛ́ pii ɗoŋ nɛ̀ de-a pii tɛ‘m, wen ɛ́ɛ́ pɛm nɛ́ a̧ in o nya-wi.

¹²Mi aia nú ha̧ nya-ɛɛ Apolos mɛ́ nɛ̀ɛ́ zɔk'nɛ́ in o nya-wi, ɓɛɛ a̧ kpɛk nɛa-a kinii na; a̧ tɛ kpa ŋgimbi sɛka a̧ nɛa.

¹³Ɛ̀nɛ̀ pɛ́m mɔ, ɛ̀nɛ̀ dúk nɛ̀ nɔa-a tɛ kɔ̧ɔ̧ɗɔɔwen; ɛ̀nɛ̀ dé mɔɔ-wiwii, ɛ̀nɛ̀ ŋgáí gba̧a̧-tɛ‘nɛ́;

¹⁴ɛ̀nɛ̀ dé mɔ lɛŋ nɛ̀ kɔ̧ɔ̧mɔ.

¹⁵O nya'm, ɛ̧ɛ̧ nɛ́ ŋma mbe mbɔrɔ woyo. Ɛ́nɛ́ iŋa'e Stefana in o bíí kɔ̧ kira kɔ̧-a̧ nɛ́ kuti bíí sɛn nú Akai nɛ̀ kpɛka wen ko Sɔ̧; wa ha̧a̧ ŋgai-tɛ-wa wen gbaka o sa̧a̧-bíí.

¹⁶Mi kɔfa'nɛ́ mɛ́ zii wen nú o pɛrti bíí hegɔ, in o bíí nɛ̀ de tom zɔk nɛ̀ bɔnɛ in wa.

¹⁷Mi duk nɛ̀ desee zu Stefanas in Fortunatus ká bá nɛ̀ Akaikus nɛ̀ duk in am de nɛ̀ tom oi nú‘nɛ́,

¹⁸wen wa ha̧a̧ ga̧a̧-see ha̧‘m in'nɛ̀ɛ́ mbɛt. Ɔ dee h’ɛ́nɛ́ mɛ́ zɔn o pɛrti bíí hegɔ.

¹⁹O zuduk bíí ko Krist sɛn nú Azii fana'nɛ́. Akilas in Priska ká bá nɛ̀ zuduk bíí ko Krist nɛ̀ mɔi̧ tɛ kɔ-wa fana'nɛ́ nɛ̀ nin Gasa Wan.

²⁰O nya-wi lɛŋ fana'nɛ́. Ɛ̀nɛ̀ fán ŋmaa in o ŋmaa nɛ̀ fanamɔ ko o bíí ko Sɔ̧.

²¹Nɛ́ mi Paul nɛ̀ tɛ‘m a̧ yɔr fanamɔ'ɛ.

²²Kà ŋma bíí kɔ̧ Gasa Wan na, ɓɛɛ nɛ̀ fom a̧ bá wi’ɛi. Marana ta! (Nɛ́ wen nɛ̀ tɔ̧: «Gasa Wan k’ɛ́ɛ́, ɛ̀nɛ̀ tɛ!»)

²³Deemɔ mɔ nɛ̀ ta-tɛ ko Gasa Wan Jesu a̧ duk in'nɛ̀ɛ́ lɛŋ.

²⁴Mi kɔ̧ɔ̧‘nɛ́ lɛŋ nɛ̀ ɗoŋ Jesu Krist.