Read Northwest Gbaya 1 KƆRINTIƐN 3 Bible Online

1 KƆRINTIƐN 3 - Northwest Gbaya bible

1 KƆRINTIƐN 3

¹O nya'm, bó nɛ́ mi nyɛma so mɛ́ tɔ̧ wen h’ɛ́nɛ́ hee wi tɔ̧ ha̧ bíí nɛ̀ a̧a̧ nɛ̀ Sa̧a̧ Ɔmi ga na, ɓɛɛ mi tɔ̧ hee ha̧ o bíí ko mur-tɛ ga; mi tɔ̧ wen h’ɛ́nɛ́ hee ha̧ o geɗek bem ga sɛn tɛ kɔ̧ɔ̧ɗɔɔwen k’ɛ́nɛ́ ha̧ Krist.

²Mi ha̧a̧ nɛ́ yibere h’ɛ́nɛ́ nɔ, bó nɛ́ kpasa nyɔŋmɔ na; wen kà‘m há̧ so nɛ́ kpasa nyɔŋmɔ h’ɛ́nɛ́, ɛ́nɛ́ nyɛm so nyɔŋa-a na. Hɔ sɔsɔɔ‘i mbɛt, ɛ́nɛ́ nyɛm mɛ́ nyɔŋ na.

³Ɛ́nɛ́ ɓɔna kànà nɛ́ o bíí ko mur-tɛ, wen aa-see-mɔ in kpɛri a̧a̧ mgbara'nɛ́. Tɛ mɔ‘i, bó nɛ́ ɛ́nɛ́ biti tɛ deemɔ ko mur-tɛ na? Duka-a k’ɛ́nɛ́ yaka so ŋmaa in ko bíí zaŋnu?

⁴Kà ŋma bíí tɔ̧‘e, wi nɛ́ bíí ko Paul, ɓɛɛ o ŋma tɔ̧ɔ̧ woyo'e, wi nɛ́ bíí ko Apolos, ɓɛɛ pɛrti deemɔ‘i bó nɛ́ ko o bíí zaŋnu na?

⁵Apolos nɛ́ o? Ɓɛɛ Paul mbɛt nɛ́ o? Wa nɛ́ o wi-de-tom nɛ̀ dee h’ɛ́nɛ́ mɛ́ kɔ̧ ɗɔaa ha̧ Sɔ̧, kóó o ndé mgbara wa yiitoo'i dee tom kɔ‘i, nyɛm nɛ̀ ɗoŋ mɔ nɛ̀ Gasa Wan ha̧a̧ ha̧ a̧.

⁶Mi guna kɔ‘m nɛ́ mɔ; nɛ́ mɔ'ɔ nɛ̀ Apolos aa yì sɛnɛ, ɓɛɛ nɛ́ Sɔ̧'ɔ̧ dee ha̧ mɔ‘i mɛ hɔ.

⁷Hegɔ wi nɛ̀ gun mɔ in wi nɛ̀ a yì sɛnɛ mbɛt nɛ́ geemɔ, ɓɛɛ nɛ́ Sɔ̧ kpɔk nɛ̀ de ha̧ mɔ mɛ́ hɔ‘i, a̧ duk nɛ́ kpasamɔ.

⁸Wi nɛ̀ gun mɔ in wi nɛ̀ a yì sɛnɛ nyɛma ŋmaa, ɓɛɛ kóó o ndé mgbara wa tɛ kpa mɔɔ-oi-tom nyɛm nɛ̀ ɗoŋ tom kɔ‘i.

⁹Wen ɛ́ɛ́ in o ŋmaa lɛŋ nɛ́ o wi-de-tom ko Sɔ̧, ɓɛɛ ɛ́nɛ́ dúk nɛ́ fɔ ko Sɔ̧, ɛ́nɛ́ nɛ́ tua kɔ̧-a̧.

¹⁰Mi ee naŋ-tua hee kpasa wi-mbo-tua ga, nyɛm nɛ̀ ɗoŋ deemɔ ko Sɔ̧ nɛ ta-tɛ in am, ɓɛɛ ŋma bíí mbo kɔ‘i nɛ́ tua'i; hegɔ, o ndé a̧ mbó ta tɛ yuwar mboo tua kɔ‘i.

¹¹Jesu Krist nɛ́ naŋ-tua, ɓɛɛ ŋma bíí beka e ŋma naŋ-tua nɛtɛ yak zu a̧ na.

¹²Kóó kà‘i nɛ́ dee tua zu naŋ-a'i nɛ̀ lɔr, kóó nɛ̀ bu-mbɔi, kóó nɛ̀ o de ta, kóó nɛ̀ te, kóó nɛ̀ yuɗu, kóó nɛ̀ kora-zɔ̧,

¹³ŋgimbi wee tom ko bíí kpɔk kpɔk tɛ hɔ; wese kita, wèè tɛ kɛ̧ mgbara tom ko o ndé lɛŋ.

¹⁴Wi nɛ̀ tua kɔ̧-a̧ beka bíí wèè na tɛ kpa mɔɔ-oi-aa,

¹⁵ɓɛɛ wi nɛ̀ tua kɔ̧-a̧ tɛ bíí wèè beka kpa ŋma mɔ na; wi’ɛi tɛ kpasi nɛ̀ mbetɛ, ɓɛɛ kpasa-a kɔ̧-a̧‘i duk hee gɔma-a nɛ̀ yí-wèè ga.

¹⁶Ɛ́nɛ́ iŋ‘e, ɛ́nɛ́ nɛ́ tua ko Sɔ̧, ɓɛɛ Sa̧a̧ Ɔmi ko Sɔ̧ duk tɛ‘nɛ́ na nde?

¹⁷Kà ŋma bíí ɗaŋ tua ko Sɔ̧, Sɔ̧ tɛ ɗaŋ wi’ɛi yinɛ mbɛt, wen tua ko Sɔ̧ duk nɛ̀ sa̧a̧-a̧, ɓɛɛ tua'i nɛ́ ɛ́nɛ́.

¹⁸Ká ŋma bíí ɔr tɛ na; bíí nɛ̀ tɔ̧‘e wi nɛ́ wi-iŋ-mgbara-mɔ nɛ̀ war ko bíí zaŋnu, wi’ɛi a̧ kífí mgbelewi, wen ha̧ a̧ mɛ́ kifi kpasa wi-iŋ-mgbara-mɔ.

¹⁹Wen iŋa-mgbara-mɔ wan mɛ́ zaŋnu’ɛ duk nɛ́ mgbelemɔ yí Sɔ̧, wen Yɔramɔ tɔ̧ɔ̧ so'e: «A̧ baa o wi-iŋ-mgbara-mɔ nɛ̀ oi mɔɔ-gɔn-zaŋ kɔ-wa;»

²⁰in tɔ̧ɔ̧ woyo'e: «Gasa Wan iŋa taamɔ ko o wi-iŋ-mgbara-mɔ; a̧ iŋa taamɔ kɔ-wa nɛ́ geemɔ.»

²¹Hegɔ, ká ŋma bíí ŋmaŋ tɛ wen zu bíí na, wen mɔ lɛŋ nɛ́ k’ɛ́nɛ́;

²²kóó nɛ́ Paul, kóó nɛ́ Apolos, kóó Sefas, kóó zaŋnu, koo nɛ́ duka-kpasa, kóó nɛ́ fio, mɔ nɛ̀ a̧a̧ sɛnɛ kinii in mɔ mɛ́ siti lɛŋ nɛ́ k’ɛ́nɛ́;

²³ɛ́nɛ́ nɛ́ ko Krist ɓɛɛ Krist nɛ́ ko Sɔ̧.