Read Northwest Gbaya 1 KƆRINTIƐN 4 Bible Online

1 KƆRINTIƐN 4 - Northwest Gbaya bible

1 KƆRINTIƐN 4

¹Ɔ dee ha̧ o bíí mɛ́ zɔk ɛ́ɛ́ hee o wi-de-tom ko Krist in wi-pɛm o ɗukamɔ ko Sɔ̧ ga.

²Ɓɛɛ mɔ nɛ̀‘i ak in o wi nɛ̀‘i e mɔ er wa, mɛ̀ nɛ́ wen ha̧ wa mɛ́ mbo zu tɛ tom kɔ-wa.

³Kóó ɛ̀nɛ̀ gɔn kita zu'm, kóó nɛ́ kita wan mɛ́ zaŋnu, de ŋma mɔ tɛ‘m na. Mi beka gɔn kita zu'm nɛ̀ tɛ‘m na mbɛt.

⁴Nɛ̀ mbetɛ, taamɔ kɔ‘m ɗaŋ wen zu ŋma mɔ na, ɓɛɛ bó nɛ́ mɔ‘i a̧ usi'e, mi nɛ́ wi-de-mɔ nɛ̀ yuwar-a na; wi-gɔn-kita zu'm nɛ́ Gasa Wan kpɔk ɓɛɛ.

⁵Hegɔ, k’ɛ́nɛ́ gɔn kita nɛti ha̧ ŋgimbi-a na. Ɛ̀nɛ̀ pɛ́m tɛa-a ko Gasa Wan, wen nɛ́ a̧ a̧ tɛ ba o mɔ nɛ̀ duk nɛ̀ hu̧sa̧-a̧ ti tum gbonɛ pii tɛ sa̧a̧mɔ, ɓɛɛ a̧ baa ee-zu-mɔ nɛ̀ duk kɔ̧ see bíí mbɛt e zan; wese'i Sɔ̧ tɛ zɔn o ndé nyɛm nɛ ɗoŋ tom ko wi’ɛi.

⁶O nya'm, mi wee so mɔ‘i nɛ̀ ɛ́ɛ́ in Apolos nɛti, wen h’ɛ́nɛ́ mɛ́ zɔk ɗoŋ-aa. Mi kɔ̧ɔ̧ so h’ɛ́nɛ́ mɛ́ zɔk ɗoŋ deemɔ k’ɛ́ɛ́ wen h’ɛ́nɛ́ mɛ́ iŋ gba̧a̧ tua-wen nɛ̀ tɔ̧‘e: «Ká‘i yak zu mɔ nɛ̀ yɔra na.» K’ɛ́nɛ́ ŋmaŋ tɛ‘nɛ́ zii nɛ̀ wen ko ŋma bíí gan ko ɓii wi na.

⁷Nɛ́ o'o tɔ̧ɔ̧‘e mɛ́ gana o ŋma bíí o? Mɔ nɛ̀ mɛ́ a̧a̧ nɛnɛ lɛŋ bó nɛ́ Sɔ̧'ɔ̧ ha̧a̧ mɛ́ na? Ɓɛɛ sa mɛ́ ŋmaŋ tɛ-mɛ hee bó nɛ́ Sɔ̧'ɔ̧ ha̧a̧ mɛ́ na ga wen ge?

⁸Zaŋ‘nɛ́ sura, ɛ́nɛ́ kpaa mɔ nyɛm'nɛ́ kaɗi! Ɛ́nɛ́ ɔɔ wan nɛ̀ bó nɛ́ ɛ́ɛ́ á̧ pi̧i̧‘nɛ́ tɛ́ wan'i ná![1] Ɛ̀nɛ̀ ɔ́ wan h’ɛ́ɛ́ nyɔŋ mɔ-a in'nɛ̀ɛ́ wa!

⁹Tɛ taamɔ kɔ‘m, Sɔ̧ ee yɛ o betom tɛ sɔŋkur fara sɛn zaŋnu’ɛ hee o bíí nɛ kita-fio tika wa ga. Ɛ́ɛ́ duk yí o betom mɛ yiwese in o bíí lɛŋ hee mɔɔ-zɛŋ ga.

¹⁰Ɛ́ɛ́ nɛ́ o mgbelewi wen zu Krist, ɓɛɛ war k’ɛ́nɛ́, ɛ́nɛ́ nɛ́ o wi-iŋ-mgbara-mɔ nɛ̀ ɗoŋ Krist; ɛ́ɛ́ nɛ́ o ziɓa-wi, ɓɛɛ k’ɛ́nɛ́, ɛ́nɛ́ nɛ́ o ŋga bíí; ɛ́nɛ́ nɛ́ o tu̧u̧-tɛ bíí, ɓɛɛ ɛ́ɛ́ nɛ́ o fɛŋa bíí.

¹¹Kinii, wɔ gbɛ nɛ́ yɛ, wɔ-yì gbɛ nɛ́ yɛ mbɛt, ɛ́ɛ́ duk nɛ̀ géé tɛ, wa de nɛ́ bɔnɛ in yɛɛ, ɛ́ɛ́ nɛ́ o yambala bíí,

¹²ɛ́ɛ́ de tom nɛ̀ er zɔk nɛ̀ bɔnɛ. Kà wa bé mɔ a zu yɛ, ɓɛɛ ɛ́ɛ́ toka de yoŋgo zu wa, kà wa úsí bɔnɛ h’ɛ́ɛ́, ɓɛɛ ɛ́ɛ́ nɔɔ ŋgiɗi.

¹³Kà wa dá̧ yɛ, ɛ́ɛ́ tɔ̧ nɛ́ de wen zu wa. Hɔ kinii mbɛt, ɛ́ɛ́ duk hee yɔsɛ ga, ɛ́ɛ́ duk hee ndiŋmɔ ga sɛn zaŋnu.

¹⁴Bó nɛ́ mi yɔr kalata’ɛ mɛ́ pi̧ foe zu'nɛ́ na, ɓɛɛ mɛ̀ nɛ́ wen tɔ̧ɔ̧ mbɔrɔ h’ɛ́nɛ́ hee o bem n'am kɔ̧ɔ̧ nyɛmna ga.

¹⁵Kóó o wi-dai'nɛ́ nɛ̀ wen ko Krist dɔka hee booro-ɓu ga, bó nɛ́ ɛ́nɛ́ a̧a̧ nɛ̀ dɔka dáà na. Nɛ́ mi'i usa De Mbe Wen h’ɛ́nɛ́, kó nɛ̀ ɛ́nɛ́ nɛ̀ ɗoŋ Jesu Krist.

¹⁶Hegɔ mi ai nú h’ɛ́nɛ́, ɛ̀nɛ̀ zɔ́k nɛ́ ɗoŋ tom kɔ‘m.

¹⁷Mɛ̀ nɛ́ mɔ‘i a̧‘m toma nɛ̀ Timotee nɛnɛ tɛ‘nɛ́; a̧ nɛ́ bem kɔ‘m n'am kɔ̧ɔ̧ nyɛmna, nɛ̀ mbo zu ha̧‘m tɛ Gasa Wan; a̧ tɛ usi yuwar duka-a kɔ‘m tɛ Krist h’ɛ́nɛ́, hee mɔ'ɔ n'am tɔ̧ dam fara lɛŋ mgbara o zuduk bíí ko Krist ga.

¹⁸Taamɔ k’ɛ́nɛ́‘e, mi beka si ɗoŋ tɛ‘nɛ́ ɓɔna, nɛ́ mɔ'ɔ nɛ̀ o ŋma bíí ŋmaŋ kɔ‘i nɛ́ tɛ.

¹⁹Ɓɛɛ kà Gasa Wan á̧ kɔ̧a̧, mi tɛ nɛ̀ tɛ‘nɛ́, ɓɛɛ nɛ́ ŋgimbi'i a̧‘m tɛ iŋ nɛ̀ tom ko o wi-ŋmaŋ-tɛ nɔ‘i, nɛ̀ bó nɛ́ géé tɔ̧ɔ̧-wen kɔ-wa ɓɛɛ na.

²⁰Wen Wan ko Sɔ̧ bó nɛ́ tɔ̧ɔ̧-wen na, ɓɛɛ nɛ́ tom ɛ̧.

²¹Ɛ́nɛ́ kɔ̧ɔ̧ a̧‘m nɛ́ nɛ̀ nyasi náà, kóó a̧‘m nɛ́ nɛ̀ kɔ̧ɔ̧mɔ in ga̧a̧-see nde?