Read Northwest Gbaya 1 KƆRINTIƐN 7 Bible Online

1 KƆRINTIƐN 7 - Northwest Gbaya bible

1 KƆRINTIƐN 7

¹Kinii mi kɔ̧ɔ̧ mɛ́ kifi nú tɛ akamɔ n’ɛ̀nɛ̀ toma ha̧‘m. Dee so ha̧ wiwii mɛ́ duk nɛ̀ sayo, ba kóò na.

²Ɓɛɛ ɔ kànà dee ha̧ wiwii mɛ́ ba kóò, ɓɛɛ okoo baa wíì, wen ká duka-a kɔ-wa tɛɛ sakali.

³Wíì a̧ há̧ tɛ ha̧ kóò kɔ‘i, ɓɛɛ kóò ha̧a̧ tɛ ha̧ wíì kɔ‘i mbɛt.

⁴Wen bó nɛ́ okoo duk wen tɛ-wi nɛ̀ tɛ-wi na; nɛ́ wii kɔ̧-a̧ a̧ duk zu a̧, ɓɛɛ bó nɛ́ wiwii mbɛt duk wen tɛ-wi nɛ̀ tɛ-wi na, nɛ́ kóò a̧ duk zu a̧.

⁵K’ɛ́nɛ́ dor tɛ‘nɛ́ nɛ̀ ŋmaa na; ɓɛɛ k’ɛ̀nɛ̀ kpɛk mɛ́ dor tɛ‘nɛ́ nɛ̀ ŋmaa tɛ ŋma ŋgimbi wen kɔfa-sɔ̧, ɓɛɛ i̧i̧ ɔ dee; ɗoŋ n’ɛ̀nɛ̀ kɔfa Sɔ̧ kaɗi, n’ɛ̀nɛ̀ pii ɗoŋ tɛ duka-a in ŋmaa woyo, wen ɛ́nɛ́ bó nɛ̀ ŋgai mɛ́ duk siti hegɔ yaknɛ na, ká Satan tɛɛ ɔr'nɛ́.

⁶Mɔ‘i nɛ́ ŋma yuwar a̧‘m e h’ɛ́nɛ́, bó nɛ́ ŋma heembea na.

⁷Mi kɔ̧ɔ̧ so kɔ‘m ha̧ o wiwii lɛŋ mɛ duk hee mi ga, ɓɛɛ Sɔ̧ ha̧a̧ mɔ nɛtɛ nɛtɛ dam yɛ; a̧ ha̧a̧ ko o ŋma bíí nɛ́ i̧i̧, ɓɛɛ ko ŋma nɛ́ ɛ̧ɛ̧.

⁸Mi tɔ̧ wen’ɛ ha̧ o wi-sayo in o ko-gera: ɔ dee ha̧ wa mɛ́ duk hee mi ga.

⁹Ɓɛɛ kà wa bó nɛ̀ ŋgai mɛ́ zim tɛ-wa na, ɓɛɛ wa a̧ bá ŋmaa, wen baa-ŋmaa dee gan nyɔŋa nin zu dee wɔ-tɛ-ŋmaa.

¹⁰War ko o wi nɛ̀ baa ŋmaa kaɗi, mi'e ndé, bó nɛ́ mi'i tɔ̧ɔ̧ na, nɛ́ Gasa Wan a̧ tɔ̧‘e: ká okoo gbii wíì kɔ‘i na,

¹¹ɓɛɛ kà a̧ nɛ́ gbia, ká a̧ ba mbe wii ɓɔna, kóó a̧ a̧ sí nɛ́ ɗoŋ tɛ wii kɔ̧-a̧‘i ɛ̧. Ɓɛɛ ká wiwii mbɛt ndak kóò kɔ‘i na.

¹²Nɛ́ mi'i tɔ̧ wen’ɛ, nɛ̀ bó nɛ́ Gasa Wan na. War ko oi bíí, kà ŋma nya-wi nɛ́ bòó nɛ̀ kóò nɛ̀ kɔ̧ ɗɔaa na, kà kóò‘i nɛ́ kpɛka mɛ́ duk in nya-wi'i siti mbɛt, ɓɛɛ ká wi’ɛi ndak a̧ na.

¹³Ɓɛɛ kà bó nɛ́ okoo a̧ a̧a̧ nɛ̀ wíì nɛ̀ kɔ̧ ɗɔaa na, kà wíì‘i nɛ́ kpɛka mɛ́ duk in kóò‘i siti mbɛt, ɓɛɛ ká a̧ gbii wíì‘i na.

¹⁴Wen war-tɛ wiwii nɛ̀ kɔ̧ ɗɔaa na nyɛma mɛ́ sa̧ wen zu kóò kɔ‘i; ko okoo mbɛt nyɛma mɛ́ sa̧ wen zu wíì kɔ‘i. Kà bó só hegɔ na wó, bo nɛ war-tɛ o bem k’ɛ́nɛ́ tɛ̀ɛ́ sa̧ so na, ɓɛɛ zu-a'i, war-tɛ-wa sa̧a̧.

¹⁵Kà ŋma bíí nɛ̀ kɔ̧ ɗɔaa na kɔ̧́ mɛ́ e kóò kɔ‘i duk, a̧ nyɛma mɛ́ e a̧ duk, wen Sɔ̧ saa'nɛ́ h’ɛ́nɛ́ mɛ́ duk tɛ ga̧a̧mɔ, ɓɛɛ bó nɛ́ wi hɛra nya-ɛɛ in boko-nya-ɛɛ‘i hɛr tɛ ŋmaa na.

¹⁶Wen okoo’ɛ, mɛ́ iŋa'e mɛ́ tɛ kpasi wíì kɔ-mɛ nde, kóó mɛ́ wiwii’ɛ, mɛ́ iŋa'e mɛ́ tɛ kpasi kóò kɔ-mɛ nde?

¹⁷Hegɔ kóó o ndé a̧ dúk kànà tɛ yuwar-duka-a nɛ̀ GASA WAN ee so a̧ sɛnɛ, ɓɛɛ a̧ a̧ dúk hee mɔ'ɔ n'aa duka so ŋgimbi nɛ̀ Sɔ̧ saa nɛ̀ a̧ ga. Mɔ‘i nɛ́ ŋma heembea n'am yɔr ha̧ zuduk bíí ko Krist lɛŋ.

¹⁸Kóó wa gɔna so bɔr ŋma bíí nɛti sɛka Sɔ̧ sa wi’ɛi ndé, ká wi’ɛi hu̧si na. Ɓɛɛ kà ŋma bíí nɛ́ gɔna so kɔ‘i na, ká̧ a̧ gɔn ɓɔna mbɛt.

¹⁹Kóó wi gɔna bɔr, kóó wi gɔn na mbɛt, bó nɛ́ ŋma mɔ na; ɓɛɛ mɔ nɛ̀ gana lɛŋ nɛ́ kasa o heembea ko Sɔ̧.

²⁰Ɔ dee ha̧ bíí kpɔk kpɔk mɛ́ duk hee mɔ'ɔ n'aa duka so ŋgimbi nɛ̀ Sɔ̧ saa so nɛ̀ a̧ ga.

²¹Kóó mɛ́ duka so nɛ́ bara nɛti ŋgimbi nɛ̀ Sɔ̧ saa nɛ̀ mɛ́ ndé, ká mɛ́ kpa ɗaŋsee na. Ɓɛɛ kà mɛ nɛ́ nyɛ̀má mɛ́ kpà zù, ɓɛɛ mɛ̀ kpɛ́k[2].

²²Wen bara nɛ̀ Sɔ̧ saa nɛ̀ ɗoŋ Gasa Wan, Gasa Wan gboo wa kaɗi; ɓɛɛ bíí nɛ̀ duk nɛ̀ gboa-a nɛ̀ Sɔ̧ saa, dúk nɛ́ bara ko Krist.

²³Ŋma bíí gɔna zu'nɛ́ kaɗi; ɓɛɛ k’ɛ́nɛ́ kifi duk nɛ́ bara ko o bíí ɓɔna.

²⁴O nya'm, ɔ dee h’ɛ́nɛ́ mɛ́ duk ti Sɔ̧ hee mɔ'ɔ n’ɛnɛ duka so nɛnɛ ŋgimbi n'aa saa so nɛ̀ ɛ́nɛ́ ga.

²⁵Gasa Wan gɔn ŋma geŋa ha̧‘m mɛ́ tɔ̧ zu o zɔŋa in o ŋgaiwi na; hee mɔ'ɔ nɛ̀ Gasa Wan dee ko ha̧‘m ga, mi tɛ tɔ̧ kànà taamɔ kɔ‘m, ɓɛɛ taamɔ kɔ‘m'i nyɛma kànà h’ɛ́nɛ́ mɛ́ kpɛk mbɛt.

²⁶Mi taa ɔ dee ha̧ bíí nɛ̀ ba kóò na mɛ́ duk nɛ̀ sayo, wen dita-see ɔ dɔka kinii nyɛmna; nɛ̀ mbetɛ, tɛ taamɔ kɔ‘m duka-a hegɔ‘i ɔ dee.

²⁷Kà ŋma bíí nɛ́ baa kóò kaɗi, ɓɛɛ ká a̧ ndak kóò‘i ɓɔna; ɓɛɛ bíí nɛ̀ tɛ́ ba kóò hɔ̧ɔ̧ na, ká a̧ kii mɛ́ ba na mbɛt.

²⁸Bó nɛ́ be-wiwii nɛ̀ baa kóò dee ɗaŋmɔ na, ɓɛɛ be-zɔŋa nɛ̀ ba wíì mbɛt de ɗaŋmɔ na; mɔ kpɔk, nɛ́ bɔnɛ ko o wan-kóò in wan-wíì a̧‘m kɔ̧ ha̧ mɛ́ tik zu'nɛ́ na.

²⁹O nya'm, ɛ̀nɛ̀ zíí wen n'am tɔ̧'ɛ: oi ŋgimbi dɔk ɓɔna. Kinii dee so gan ha̧ o wan-kóò mɛ́ duk hee wi-sayo ga,

³⁰ɓɛɛ o wí nɛ̀ hi̧i̧ kɔ̧a̧, a̧ dúk hee wa hi̧i̧ kɔ̧a̧ na ga; o wí nɛ̀ dúk nɛ̀ desee, a̧ dúk hee wa bó nɛ̀ desee na ga, o wi-hi̧fi̧-mɔ a̧ dúk hee wa kpa mɔ na ga,

³¹ɓɛɛ o wi nɛ̀ kpa yí-mɔ zaŋnu’ɛ a̧ dúk hee o wisan ga, wen mɔɔ-zaŋnu yak yak.

³²Mi kɔ̧ h’ɛ́nɛ́ mɛ́ duk tɛ taamɔ na, wen bíí nɛ̀ ba kóò na ta nɛ́ mɔ wen tom ko Gasa Wan. A̧ kii nɛ́ mɔɔ-ha̧-desee ha̧ Gasa Wan.

³³Ɓɛɛ bíí nɛ̀ baa kóò e nɛ́ see tɛ kia mɔɔ-zaŋnu wen ha̧ kóò kɔ̧-a̧ mɛ kpa desee.

³⁴Taamɔ kɔ̧-a̧ kɛ̧ɛ̧ tɛ fara yiitoo. Ɓɛɛ ŋma okoo, kóó ŋma be-zɔŋa nɛ̀ ba wii na, e nɛ́ see tɛ tom ko Gasa Wan, wen ha̧ kiitɛ-a in taamɔ kɔ̧-a̧ lɛŋ mɛ́ duk nɛ̀ sa̧a̧-a̧. Okoo nɛ̀ baa wíì e nɛ́ see tɛ kia mɔɔ-zaŋnu wen ha̧ wii kɔ̧-a̧ mɛ́ kpa desee.

³⁵Mi tɔ̧ mɔ‘i wen gbaka'nɛ́, bó nɛ́ mi tui nɛ́ pɛ́r h’ɛ́nɛ́ na; ɓɛɛ mɛ̀ nɛ́ wen h’ɛ́nɛ́ mɛ́ de mɔ nɛ̀ ɔ dee gan, in h’ɛ́nɛ́ mɛ́ ndaɗi in Gasa Wan, wen ká see'nɛ́ duk tɛ ŋma mɔ nɛtɛ.

³⁶Kà o ŋma bíí nɛ́ ee nú mɛ́ ba ŋmaa, ɓɛɛ kà wa tɔ̧́‘e wa beka ba ŋmaa ɓɔna; nɛ́ mɔ'ɔ nɛ̀ wíì-a zɔka'e mɔ n'aa dea in kóò-a nyɛm sɛnɛ na, ɓɛɛ wɔ kóò-a gbɛ nɛ́ a̧ nyɛmna ha̧ a̧ mɛ́ ba a̧, gana so wa a̧ bá ŋmaa hee mɔ'ɔ n'aa kɔ̧a̧‘i ga; mɔ‘i bó nɛ́ ɗaŋmɔ na.

³⁷Ɓɛɛ kà wi’ɛi á̧ taa nɛ̀ kɔ̧ see'e wi beka ba kóò na, nɛ̀ bó nɛ́ bíí dee nɛ́ a̧ nɛ̀ doole na, kà a̧ nɛ́ nyɛma mɛ́ kasi zu iŋ nɛnɛ hee mɔ'ɔ n'aa tɛ de ga, ɓɛɛ nɛ́ demɔ a̧ a̧ de tɛ baa kóò na.

³⁸Hegɔ, wi nɛ̀ hara kóò, ɓɛɛ ba, dee nɛ́ demɔ, ɓɛɛ nɛ́ wi nɛ̀ ba na a̧ dee demɔ gan.

³⁹Ŋgimbi nɛ̀ wíì biti nɛ̀ yí, duka-a ko okoo hɛra ndaɗi ŋmaa in wíì kɔ̧-a̧. Ɓɛɛ kà wíì nɛ́ fea, kóò‘i nyɛma mɛ́ ba mbe wíì n'aa tɛ hok nɛ̀ tɛ duk nɛ́ bíí ko Krist.

⁴⁰Ɓɛɛ tɛ taamɔ kɔ‘m, kà a̧ ɓɔ́n nɛ́ ko-gera, a̧ tɛ kpa desee gan. Mi taa mi a̧a̧ nɛ̀ Sa̧a̧ Ɔmi ko Sɔ̧ mbɛt.