Read Northwest Gbaya 1 KƆRINTIƐN 8 Bible Online

1 KƆRINTIƐN 8 - Northwest Gbaya bible

1 KƆRINTIƐN 8

¹War ko kpoo nɛ̀‘i ɗafa nɛ̀ o géé-sɔ̧, ɛ́ɛ́ lɛŋ nɛ́ o bíí nɛ̀ iŋa mɔ. Nɛ́ iŋamɔ a̧ de ha'i mɛ́ ŋmaŋ tɛ, ɓɛɛ nɛ́ kɔ̧ɔ̧mɔ a̧ ba bíí e ŋgɔn.

²Kà ŋma bíí ta'e, wi iŋa ŋma mɔ wó, ɓɛɛ a̧ tɛ iŋ hee mɔ'ɔ nɛ̀‘i tɛ̀ɛ́ iŋ so nɛ̀ mɔ ga hɔ̧ɔ̧ na.

³Kà ŋma bíí kɔ̧́ Sɔ̧, ɓɛɛ Sɔ̧ iŋa wi’ɛi mbɛt.

⁴Hegɔ, bíí nyɛma mɛ́ nyɔŋ kpoo nɛ̀‘i ɗafa nɛ̀ o géé-sɔ̧ nde? Ɛ́ɛ́ iŋa'e géé-sɔ̧ zaŋnu’ɛ bó nɛ́ kpasamɔ na; ɓaa Sɔ̧ kpɔk ɓɛɛ.

⁵Mɔ nɛ̀‘i sa'e o sɔ̧ nɛtɛ nɛtɛ a̧a̧ yiwese in zaŋnu, o gba gíí sɔ̧ in o gasa wan a̧a̧ sɛnɛ nɛ̀ mbetɛ,[3]

⁶ɓɛɛ war k’ɛ́ɛ́, Sɔ̧ k’ɛ́ɛ́ kpɔk ɓɛɛ. A̧ nɛ́ Dáà nɛ̀ mɔ lɛŋ gboo nɛ̀ tɛ-a, ɓɛɛ ɛ́ɛ́ mbɛt nɛ́ sitɛ a̧; ɓɛɛ Gasa Wan k’ɛ́ɛ́ kpɔk, nɛ́ Jesu Krist, mɔ lɛŋ duk nɛ̀ ɗoŋ-aa, ɛ́ɛ́ mbɛt duk nɛ̀ ɗoŋ-aa.

⁷Ɓɛɛ bó nɛ́ o bíí lɛŋ a̧ a̧a̧ nɛ̀ iŋamɔ na. Ɗoŋ-aa tɛ nyɛi̧ na nɛ̀ o ŋma bíí duka so ndak nɛ̀ ɗoŋ mɔ ko o géé-sɔ̧; ɓɛɛ kà wa nyɔŋ kpoo-sɔ̧‘i, duk hee mɔ ko o géé-sɔ̧ a̧ wa nyɔŋ ga. Taamɔ kɔ-wa ɗuk na, ɓɛɛ wa ta kɔ-wa'e nyɔŋmɔ‘i ee ndiŋ tɛ-wa.

⁸Bó nɛ́ ŋma nyɔŋmɔ a̧ tɛ ɗɔŋ yɛ si katɛ Sɔ̧ na. K’ɛ̀ɛ̀ nɛ́ nyɔŋa mɔ na, ɛ́ɛ́ ɓɔn ɗoŋ na; k’ɛ̀ɛ̀ nɛ́ nyɔŋa, ɛ́ɛ́ nɛ́ siti na mbɛt.

⁹Ɓɛɛ mɔ kpɔk, ɛ̀nɛ̀ mbó ta nɛ̀ yuwar iŋamɔ k’ɛ́nɛ́, wen ká ŋma bíí nɛ̀ kpa ŋgai tɛ kɔ̧ɔ̧ɗɔɔwen na tɛɛ tik wen zu deemɔ k’ɛ́nɛ́.

¹⁰Wen kà o bíí nɛ̀ kpa ŋgai tɛ kɔ̧ɔ̧ɗɔɔwen na zɔ́k mɛ́ nɛ̀ a̧a̧ nɛ̀ iŋamɔ, fara nyɔŋa mɔ kɔ̧ tua-ɗafi o géé-sɔ̧, bó nɛ́ zɔka mɔ‘i tɛ́ de ha̧ wa mɛ́ nyɔŋ kɔ-wa mbɛt na nde?

¹¹Ɓɛɛ nɛ́ iŋamɔ kɔ-mɛ a̧ dee ha̧ ɓɔsa-wi mɛ́ tik; wi’ɛi nɛ́ nya-mɛ nɛ̀ Krist fee wen zu a̧ mbɛt.

¹²Ɗaŋmɔ n’ɛ̀nɛ̀ de in o nya'nɛ́ sakali nɛ̀ taamɔ kɔ-wa nɛ̀ ɗuk na'i, ɛ́nɛ́ de dea-a ha̧ Krist nɛ̀ tɛ-wi.

¹³Mɛ̀ nɛ́ hegɔ, kà ŋma nyɔŋmɔ nɛ́ tɛ̀ɛ́ de ha̧ nya'm mɛ́ tik, mi beka nyɔŋ mɔ‘i na ndó-ndó-ndó, wen ká‘m tɛɛ de ha̧ nya'm mɛ́ tik.