Read Northwest Gbaya 1 KƆRINTIƐN 9 Bible Online

1 KƆRINTIƐN 9 - Northwest Gbaya bible

1 KƆRINTIƐN 9

¹Nɛ́ ŋma bíí a̧ zii nɛ̀‘m? Mi bó nɛ́ betom ko Jesu na? Bó nɛ́ mi zɔka Gasa Wan k’ɛ́ɛ́ Jesu nɛ̀ yí‘m na? Yí mɔɔ-oi-tom kɔ‘m ha̧ Gasa Wan bó nɛ́ ɛ́nɛ́ na?

²Kà o ŋma bíí tɔ̧‘e mi bó nɛ́ betom ko Jesu na, ɓɛɛ war k’ɛ́nɛ́, ɛ́nɛ́ iŋa k’ɛ́nɛ́‘e mi nɛ́ betom nɛ̀ mbetɛ, wen tumbal to- betom'i nɛ́ ɛ́nɛ́ nɛ̀ ya tɛ Gasa Wan'i.

³Wen n'am tɛ kifi ha̧ o bíí nɛ̀ tɔ̧ wen zu'm nɛ́ mɔ'ɔ:

⁴ɛ́ɛ́ bó nɛ̀ yuwar mɛ́ nyɔŋ mɔ, kóó mɛ́ nɔ mɔ oi tom k’ɛ́ɛ́ na nde?

⁵Ɛ́ɛ́ bó nɛ̀ yuwar mɛ́ mgbɔ ŋma okoo nɛ̀ duk nɛ́ bíí ko Krist nɛnɛ in yɛɛ tɛ naŋanɔ, hee mɔ'ɔ nɛ̀ oi o betom ko Jesu in o nya ko Gasa Wan in Sefas de'i ga na?

⁶Nɛ́ mi in Barnabas a̧ beka kaɗi dee tom nɛ̀ er yɛ na ɓɛɛ nde?

⁷Nɛ́ ge wi-biro ge a̧ ɗaŋ mɔ kɔ‘i tɛ dee tom-biro ge? Nɛ́ ge bíí ge a̧ wa fɔ-nyak-dɔ̧ɔ̧ ɓɛɛ ká nyɔŋ waya-a na ge? Bó nɛ́ wi-dai-mɔ ɓar nɛ́ yibere mɔ-dai n'aa dai na nde?

⁸Mɔ‘i nɛ́ yuwar deemɔ ko o bíí, ɓɛɛ bó nɛ́ heembea tɔ̧ɔ̧ kpɔk wen'i mbɛt na?

⁹Wen heembea ko Moisɛ tɔ̧ɔ̧ so'e: «Mɛ́ beka hɛr nú ndai ŋgimbi n'aa duk tɛ ŋmáá gba̧a̧-nyɔnɔ na,» ɓɛɛ mɔ‘i, nɛ́ ndai a̧ Sɔ̧ taa tɔ̧ nɛ̀ wen'i nde?

¹⁰Bó nɛ́ Sɔ̧ tɔ̧ɔ̧ wen'i wen zu yɛ na? Nɛ̀ mbetɛ, mɔ‘i yɔra wen zu yɛ. Ɔ dee ha̧ wi-wa-fɔ in wi-to-gba̧a̧-nyɔnɔ mɛ́ e ta'e, wi tɛ kpa kànà mɔɔ-oi-tom kɔ‘i.

¹¹K’ɛ̀ɛ̀ nɛ́ guna nyɔnɔ ko Sa̧a̧ Ɔmi tɛ‘nɛ́, ɓɛɛ bó nɛ́ ɔ dee h’ɛ́ɛ́ mɛ́ kpa kànà be mɔɔ-gbak-yɛ er'nɛ́ mbɛt na nde?

¹²O ŋma bíí nɛ̀ kpa mɔ er'nɛ́'ɛ, kà bó nɛ̀ ɛ́ɛ́? Kóó hegɔ, bó nɛ́ ɛ́ɛ́ yora zu mɔ nɛ̀ duk nɛ́ k’ɛ́ɛ́‘i na. Ɛ́ɛ́ nɔ nɛ́ ŋgiɗi zu mɔ lɛŋ wen ká pɛrti mɔ‘i tɛɛ ɗaŋ De Mbe Wen ko Krist.

¹³O wi nɛ̀ de tom kɔ̧ tua ko Sɔ̧ nyɔ́ŋ nɛ́ mɔ nɛ̀ a̧a̧ kɔ̧ tua ko Sɔ̧, ɓɛɛ o wi nɛ̀ de tom zu fara-dɔ kpoo-sɔ̧ nyɔŋ nɛ́ mɔ nɛ̀ duk fara'i. Bó nɛ́ ɛ́nɛ́ iŋa hegɔ na?

¹⁴Kale-a mbɛt, Gasa Wan ha̧a̧ nú ha̧ o wi tɔ̧ De Mbe Wen mɛ́ nyɔŋ mɔ tɛ tɔ̧ɔ̧ De Mbe Wen nɛ̀ wa tɔ̧‘i.

¹⁵Ɓɛɛ war kɔ‘m, mi yor zu o mɔ nɛ̀ duk nɛ́ kɔ‘m tɛ yuwar nɔ‘i na, in bó nɛ́ mi yɔr mɔ'ɔ wen aka-a na mbɛt. Gana a̧‘m fé, bá nɛ̀‘e ŋma bíí a̧ ɓar mɔ n'am duk nɛ̀ tɛ‘m'i yinɛ er-am!

¹⁶Wen tɔ̧ɔ̧ De Mbe Wen n'am tɔ̧‘i bó nɛ́ ŋma mɔɔ-ŋmaŋ tɛ‘m sɛnɛ na, ɓɛɛ nɛ́ ŋma tom n'am tɛ de kànà. Kà‘m tɔ̧ De Mbe Wen na, bɔnɛ a̧ tík zu'm!

¹⁷Kà‘m tɔ̧ so nɛ̀ ta-tɛ‘m gáà, mi tɛ̀ɛ́ kpa mɔɔ-oi-aa; ɓɛɛ tom'i nɛ́ tui a̧ wa ha̧a̧ ha̧‘m, n'am tɛ de kànà.

¹⁸Mɔ n'am kpa oi-aa nɛ́ ge mɔ ge nde? Mɔ n'am kpa oi-aa nɛ́ tɔ̧ɔ̧ De Mbe Wen n'am tɔ̧ ha̧ o bíí nɛnɛ géè‘i, ɓɛɛ mi yor zu mɔ nɛ̀ De Mbe ha̧ ha̧‘m n'am tɛ̀ɛ́ kpa so'i na mbɛt.

¹⁹Mi bó nɛ́ bara ko ŋma bíí na, ɓɛɛ mi e tɛ‘m hee bara ko o bíí lɛŋ ga, wen ha̧‘m mɛ́ de ha̧ o bíí nɛ̀ dɔka-a mɛ́ kpasi.

²⁰Mi duka hee Juif ga mgbara o Juif, mɛ́ de ha̧ o Juif mɛ́ kpasi; sɛn mgbara o wi nɛ̀ a̧a̧ ɗɔɔ heembea, mi duka hee wa ga mbɛt, mɛ́ de ha̧ wa mɛ́ kpasi, ɓɛɛ bó nɛ́ mi duk ɗɔɔ heembea na.

²¹Sɛn mgbara o wi nɛ̀ bó nɛ̀ heembea na, mi duka hee mi bó nɛ̀ heembea ga na, zu-a'i mi a̧a̧ nɛ̀ heembea ko Sɔ̧ wen Krist nɛ́ heembea kɔ‘m; mɛ̀ nɛ́ wen ha̧‘m mɛ́ de ha̧ o wi nɛ̀ bó nɛ̀ heembea na mɛ́ kpasi.

²²Sɛn mgbara o ziɓa-wi nɛ̀ bó nɛ̀ ŋgai tɛ kɔ̧ɔ̧ɗɔɔwen na, mi duka hee ziɓa-wi ga, mɛ́ de ha̧ wa mɛ́ kpasi. Mi ee tɛ‘m hee o bíí lɛŋ ga mɛ́ de kànà ha̧ o ŋma mɛ́ kpasi.

²³Ɓɛɛ mi de mɔɔ nɔ‘i lɛŋ ha̧‘m mɛ́ kpa war mɔ kɔ‘m zaŋ De Mbe Wen'i.

²⁴Bó nɛ́ ɛ́nɛ́ iŋa'e o bíí nɛ̀ dɔka-a a yaa-gan-ŋmaa, ɓɛɛ nɛ́ ŋma bíí kpɔk a̧ kpa mɔɔ-oi-aa ɓɛɛ na nde? Ɛ̀nɛ̀ má yì nɛ̀ ŋgaya-a ŋgaɓo wen h’ɛ́nɛ́ mɛ́ kpa mɔɔ-oi-aa.

²⁵O wi-yambi yuwar-dee-saa tɛ mbo zu nɛ̀ ŋgaya-a tɛ yuwar-a, ɓɛɛ mɔɔ-oi-aa nɛ̀ wa tɛ kpa'i tɛ ɗaŋ ɗaŋ; nɛ̀ k’ɛ́ɛ́, war mɔɔ-oi-aa n’ɛ̀ɛ̀ tɛ kpa beka ɗaŋ na.

²⁶Mi ma kɔ‘m yì nɛ̀ yuwar-a, mi ma yì nɛ̀ nú-tum na; mi de biro nɛ̀ yuwar-a, bó nɛ́ mi sɔm nɛ́ búk na.

²⁷Ɓɛɛ mi zim tɛ‘m e nɛ̀ tɛ‘m tɛ bɔnɛ, ká wa tɛ̀ɛ́ fo'm yinɛ ɗoŋ n'am tɔ̧ɔ̧ De Mbe Wen ha̧ o ŋma bíí kaɗi.