Read Northwest Gbaya 2 KƆRINTIƐN 10 Bible Online

2 KƆRINTIƐN 10 - Northwest Gbaya bible

2 KƆRINTIƐN 10

¹Mi Paul nɛ̀ o bíí tɔ̧‘e, kà‘m dúk in'nɛ̀ɛ́ ɓɛɛ mi nɛ́ wi-mɔka-see, ɓɛɛ kà‘m dúk nyɛi̧ nɛ̀ ɛ́nɛ́, ɓɛɛ mi tɔ̧ɔ̧ ŋga-wen a zu'nɛ́ wó‘i, mi kɔ̧ɔ̧ mɛ́ ak'nɛ́ tɛ ga̧a̧-see in dee demɔ ko Krist,

²in mi ai nɛ́ nú h’ɛ́nɛ́, k’ɛ́nɛ́ dé ha̧‘m mɛ́ tɔ̧ ŋga-wen ŋgimbi n'am tɛ́ hɔ tɛ‘nɛ́ na, wen mi iŋa'e ndé, mi tɛ́ tɔ̧ wen nɛ̀ ŋgai in o wi nɛ̀ tɔ̧‘e deemɔ k’ɛ́ɛ́ duk nɛ́ war deemɔ ko bíí ɓɛɛ wó‘i.

³Ɛ́ɛ́ nɛ́ bíí nɛ̀ mbetɛ, ɓɛɛ bó nɛ́ ɛ́ɛ́ de biro hee war ko bíí ga na.

⁴O boi-biro k’ɛ́ɛ́ bó nɛ́ ko bíí na; ɓɛɛ o ŋgai-a tɛ́ nɛ̀ tɛ́ Sɔ̧ wen gbina o ŋgárá a nù. Ɛ́ɛ́ yai nɛ́ o taamɔ-ŋmaŋa-tɛ,

⁵in o wen-gasi-zu nɛ̀ kpe yuwar iŋa Sɔ̧ yinɛ, ɓɛɛ ɛ́ɛ́ dee ha̧ ge taamɔ ge ndé mɛ́ mbo zu ha̧ Krist.

⁶Ɓɛɛ ɛ́ɛ́ ya dɔ̧́ɔ̧́ mɛ́ usi bɔnɛ oi ŋgazu lɛŋ; k’ɛ̀ɛ̀ nɛ́ zɔka'e, mboozu k’ɛ́nɛ́ nyɛma sɛnɛ kaɗi.

⁷Ɛ̀nɛ̀ zɔ́k mgbák mɔ nɛ̀ duk’ɛ. Kà ŋma bíí tá nɛ̀ mbetɛ‘e wi nɛ́ bíí ko Krist wó, ɓɛɛ n'aa íŋ nɛ̀ sa̧a̧-a̧‘e, a̧ nɛ́ bòò nɛ́ bíí ko Krist, ɓɛɛ ɛ́ɛ́ mbɛt;

⁸ɓɛɛ kóó mi duka be tɛ̀‘m tikiɗi wen ŋgai nɛ̀ Gasa Wan ha̧a̧ h’ɛ́ɛ́ wen gbaka'nɛ́, bó nɛ́ wen ɗáŋá‘nɛ́ na, foe beka de'm na.

⁹Taamɔ kɔ‘m bó h’ɛ́nɛ́ mɛ́ ta'e, mi pi̧ nɛ́ kíì tɛ‘nɛ́ nɛ̀ o kalata kɔ‘m na.

¹⁰Wen o bíí‘e, o kalata kɔ‘m tɔ̧ nɛ́ ŋga wen in ɔ dita mbɛt; ɓɛɛ kà‘m hɔ́ mgbara'nɛ́ kaɗi, wa'e mi nɛ́ ɓɔsa bíí nɛ̀ iŋ tɔ̧ɔ̧ wen na.

¹¹Ɓɛɛ wa a̧ iŋ nɛ̀ sa̧a̧-a̧‘e: nɛ́ kpɔk kalemɔ n’ɛ̀ɛ̀ yɔr zaŋ kalata tom h’ɛ́nɛ́ ŋgimbi n’ɛ̀ɛ̀ duk nyɛi̧ nɛ̀ ɛ́nɛ́, ɛ̀ɛ̀ tɛ́ de ŋgimbi n’ɛ̀ɛ̀ tɛ́ hɔ mgbara'nɛ́.

¹²Wen ɛ́ɛ́ nyɛm mɛ́ tɔ̧‘e ɛ́ɛ́ hɔɔ ŋmaa in o bíí nɛ̀ de sedaako zu wa nɛ̀ tɛ-wa na, kóó wee zu yɛ nɛ̀ wa na mbɛt. Wa iŋ mɔ na! Wa e tɛ-wa nɛ̀ ta-tɛ-wa nɛ̀ mɔɔ-we-mɔ, we nɛ̀ ŋmaa in o ŋmaa.

¹³Ɓɛɛ nɛ̀ k’ɛ́ɛ́, ɛ́ɛ́ beka dúk tɛ̀ yɛ yak zale na; ɛ́ɛ́ tɛ́ ba nɛ́ mɔɔ-we-mɔ nɛ̀ Sɔ̧ ee h’ɛ́ɛ́, de nɛnɛ h’ɛ́ɛ́ mɛ́ nɛ̀ɛ́ hɔ tɛ‘nɛ́ mbɛt.

¹⁴Ɛ́ɛ́ beka yak zu mɔ nɛ̀ Sɔ̧ gɔna h’ɛ́ɛ́ na, wen k’ɛ̀ɛ̀ yak so zu mɔ nɛ̀ Sɔ̧ gɔna'i, bó nɛ́ ɛ́ɛ́ tɛ̀ɛ́ nɛ̀ so hɔ tɛ‘nɛ́ na; wen nɛ́ ɛ́ɛ́ a̧ baa De Mbe Wen ko Krist nɛnɛ tɛ‘nɛ́ nɛti.

¹⁵Ɛ́ɛ́ duk tɛ̀ yɛ yak zale na, ɛ́ɛ́ zɔn tɛ-ɛɛ zu tom ko o ŋma bíí na mbɛt, wen ɛ́ɛ́ taa'e, kɔ̧ɔ̧ɗɔɔwen k’ɛ́nɛ́ tɛ́ gasi, ɓɛɛ tom k’ɛ́ɛ́ sɛn mgbara'nɛ́ tɛ́ gasi gasi siti ɓɔnsɛnɛ nyɛm nɛ̀ ɗoŋ mɔ nɛ̀ Sɔ̧ gɔna h’ɛ́ɛ́.

¹⁶Hegɔ, ɛ́ɛ́ tɛ tɔ̧ De Mbe Wen hɔ tɛ̀ o zika-nù nɛ̀ a̧a̧ nɛ̀ ɗoŋ‘nɛ́ mbɛt, ɓɛɛ ɛ́ɛ́ beka zɔn tɛ yɛ zu tom nɛ̀ ŋma bíí dee kaɗi na.

¹⁷Hee mɔ'ɔ nɛ̀ Yɔramɔ tɔ̧ɔ̧ ga: «Wi nɛ̀ zɔn tɛ, a̧ zɔ́n tɛ nɛ̀ ɗoŋ Gasa Wan.»

¹⁸Hegɔ wi nɛ̀ dúk nɛ́ kpasa bíí bó nɛ́ wi nɛ̀ de sedaako zu wi nɛ̀ tɛ-wi na, ɓɛɛ nɛ́ wi nɛ̀ Gasa Wan tɔ̧ de wen tɛ-a ɛ̧.