Read Northwest Gbaya 2 KƆRINTIƐN 11 Bible Online

2 KƆRINTIƐN 11 - Northwest Gbaya bible

2 KƆRINTIƐN 11

¹Kinii ɛ̀nɛ̀ nɔ́ ŋgiɗi, ɓɛɛ ɛ̀nɛ̀ zíí be mgbélé wen kɔ‘m tikiɗi.

²Mi de gɔya zu'nɛ́, hee mɔ'ɔ nɛ̀ Sɔ̧ de ga; wen ɛ́nɛ́ dúk hee ŋma be-okoo nɛ̀ war-tɛ ɔ sa̧a̧ n'am ha̧a̧ nú zu a̧ mɛ mgbɔ ha̧ kpɔk wíì ga: wíì‘i nɛ́ Krist.

³Ɓɛɛ kíì de'm dee wen ká ŋma taamɔ ɔr'nɛ́, sakali nɛ̀ ɛ́nɛ́, ɓɛɛ k’ɛ́nɛ́ e mboo zu ha̧ Krist dúk, de nɛ̀ mɔ nɛ̀ war-a in a̧ na, hee mɔ'ɔ nɛ̀ gɔ́k dee so nɛ̀ gɔn-ta ɔr nɛ̀ Ɛvɛ ga.

⁴Kà ŋma bíí nɛtɛ tɔ̧ wen ko ŋma Jesu h’ɛ́nɛ́, nɛ̀ bó nɛ́ wan n’ɛ̀ɛ̀ usa h’ɛ́nɛ́ na, kóó k’ɛ̀nɛ̀ kpa ŋma ɔmi nɛ̀ bó nɛ́ Sa̧a̧ Ɔmi n’ɛnɛ kpaa so na, kóó k’ɛ̀nɛ̀ zii ŋma De Mbe Wen nɛ̀ bó nɛ́ wan n’ɛnɛ kpɛka so nɛti na, ɓan na ɛ́nɛ́ kpɛka mɔ‘i kaɗi.

⁵Ɓɛɛ mi taa ŋma mɔ nɛ̀ o zɔm betom nɔ‘i gana nɛ‘m bó na;

⁶ŋmafara mi iŋ yuwar-tɔ̧ɔ̧-wen nɛ̀ de-a na, ɓɛɛ bó nɛ́ war ko iŋamɔ na! War ko i̧i̧ ɛ́ɛ́ usa h’ɛ́nɛ́ tɛ mɔ lɛŋ tɛ yuwar nɛtɛ nɛtɛ.

⁷Ɓɛɛ mɔ‘i nɛ́ yɔɔ kaya a̧‘m yɔɔ tɛ duka-a si ɗɔɔ wen h’ɛ́nɛ́ mɛ́ gasi, tɛ usa De Mbe Wen ko Sɔ̧ n'am usa so h’ɛ́nɛ́ géè‘i nde?

⁸Mi kpɛka gbaka-mɔ ko o ŋma zuduk bíí ko Krist, hegɔ duk hee mi kaia nɛ́ mɔ kɔ-wa mɛ́ gbak am wen dee tom h’ɛ́nɛ́ ga.

⁹Ɓɛɛ tɛ́ ŋgimbi n'am duka so in'nɛ̀ɛ́, kóó mɔ ɓana'm, mi ba mɔ er ŋma bíí kpɔk na; wen o nya-wi nɛ̀ tɛ̀ɛ́ nɛ̀ Masedoan baa mɔɔ-gbak-am tɛnɛ; sɛn tɛ mɔ lɛŋ, mi kɔ̧ so mɛ́ duk nɛ́ ŋma tui see zu'nɛ́ na, ɓɛɛ mi tɛ́ duk kànà hegɔ siti mbɛt.

¹⁰Sɛn tɛ́ kpasawen ko Krist nɛ̀ a̧a̧ tɛ‘m'i, mi'e ŋma bíí nɛ̀ tɛ́ bi zu duka-tɛ kɔ‘m sɛn nú Akai bo na.

¹¹Bɔɔ wen ge? Wen mi kɔ̧‘nɛ́ na nde? Weyaa, mi kɔ̧ɔ̧‘nɛ́, Sɔ̧ iŋa hegɔ!

¹²Ɓɛɛ mɔ n'am de'i, mi tɛ́ de kànà siti wen ká o wi nɛ̀ kɔ̧ɔ̧ mɛ́ ŋmaŋ tɛ tɔ̧ nɛnɛ‘e, tom kɔ‘i nyɛma ŋmaa in war k’ɛ́ɛ́ wó‘i tɛɛ kpa yuwar-a.

¹³O wi nɔ‘i bó nɛ́ o mgbák betom na; wa ɔr nɛ́ bíí tɛ́ tom kɔ-wa, dúk nɛnɛ hee o betom ko Krist ga sɔɔ géè.

¹⁴Ɓɛɛ mɔ‘i bó nɛ́ ŋma mɔɔ-gɔn-ɗɛɗɛ-wi na, wen Satan nɛ̀ tɛ-wi kpai tɛ̀ hee betom ko sa̧a̧mɔ ga mbɛt.

¹⁵Mɛ̀ nɛ́ hegɔ, bó nɛ́ ŋgayamɔ ha̧ o betom kɔ̧-a̧ mɛ́ kpai tɛ̀ mɛ́ duk hee o wi-de-tom dee-mɔ nɛ̀ yuwar-a ga na; sɔŋkur mɔ kɔ-wa tɛ nyɛm ŋmaa in tom kɔ-wa.

¹⁶Mi tɔ̧ h’ɛ́nɛ́ woyo'e ndé, ká bíí zɔk am hee mgbelewi ga na; kóó k’ɛ̀nɛ̀ nɛ́ kɔ̧a̧, ɛ̀nɛ̀ zɔ́k am hee mgbelewi ga mbɛt, ha̧‘m ŋmaŋ be tɛ‘m tikiɗi.

¹⁷Wen n'am tɔ̧ kinii, bó nɛ́ war ko Gasa Wan na, ɓɛɛ mi tɔ̧ wen'i hee ŋma mgbelewi ga; tɛ́ mɔ‘i mi iŋa'e mi a̧a̧ nɛ̀ mɔ mɛ́ ŋmaŋ tɛ‘m zu-a.

¹⁸Hee mɔ'ɔ nɛ̀ dɔka bíí ŋmaŋ nɛ̀ tɛ̀ zu mɔ ko duka-a ko bíí ga, mi tɛ́ ŋmaŋ kànà tɛ‘m mbɛt.

¹⁹Ɛ́nɛ́ nɛ̀ dúk nɛ́ o wi-iŋ-mgbara-mɔ, nɛ́ mɔ'ɔ n’ɛ̀nɛ̀ kɔ̧ nɛ́ ɗɔɔ wen ko o wi-iŋ-mgbara-mɔ na nɛ̀ desee’ɛ!

²⁰Ɛ́nɛ́ e nɛ́ tɛ‘nɛ́ ha̧ o bíí mɛ́ de'nɛ́ nɛ̀ bara, nyɔŋ nɛ̀ mɔ k’ɛ́nɛ́, kai nɛ̀ mɔ k’ɛ́nɛ́, ŋmaŋ nɛ̀ tɛ zu'nɛ́, mbɛr nɛ̀ ká̧ yí‘nɛ́ mbɛt.

²¹Foe wen'i n'am tɔ̧‘i de nɛ́‘m, wen duk hee ɛ́ɛ́ so nɛ́ o ɓɔsa-wi ga; wen kà ŋma bíí nɛ́ tɔ̧ɔ̧ wen-ŋmaŋ-tɛ, mi tɛ́ tɔ̧ kànà wen ŋmaŋ nɛ̀ tɛ‘m mbɛt; mi tɔ̧ i̧i̧ wen'i hee mgbelewi ga.

²²Kà wa bó nɛ́ o be hébreu, mi mbɛt; ɓɛɛ kà wa bó nɛ́ o be Israɛl, mi mbɛt; kà wa nɛ́ bòò nɛ́ o bezaŋ Abraham, ɓɛɛ mi kànà mbɛt.

²³Ɓɛɛ kà wa nɛ́ bòò nɛ́ o wi-de-tom ko Krist, mi gana wa lɛŋ! I̧i̧ wen'i mi tɔ̧ hee gbaazaŋ mgbelewi ga! Mi mbɔia tɛ́ tom gan wa, mi yee zɔɓɔ gan wa, wa gusa'm gan wa batɛ, mi tɛ̀ɛ́ fe mbɛt war ɔ dɔka!

²⁴O Juif gusa'm nɛ̀ nyasi ɓu-taar-zua-mɔɔrɔ-ɗoŋ-naar war mɔɔrɔ,

²⁵o bíí gusa'm nɛ̀ ndoe war taar, wa yoa'm nɛ̀ ta war zɛ kpɔk, kombon mbaŋa nɛ̀ oi-am war taar, mi duka zɛ kpɔk hɔ mɔ sa̧ ɗɔɔ gba-tɔp.

²⁶Mi yara nɛ̀ dɔka-a nɛ̀ naŋ, o nana-yì tɛ̀ɛ́ gbɛ‘m, o kpɔ̧i̧-gba̧a̧-nin tɛ̀ɛ́ gbɛ‘m, o nya'm zuduk kɔ‘m tɛ̀ɛ́ gbɛ‘m, o gɔni-dùk tɛ̀ɛ́ gbɛ‘m; mi tɛ̀ɛ́ fe sɛn gasa ye, sɛn ŋga-gbárà, in ɗɔɔ gba-tɔp; o wi nɛ̀ bó nɛ́ kpasa nya-wi na mbɛt tɛ̀ɛ́ gbɛ‘m!

²⁷Mi dee tom nɛ̀ dɔka-a mbɔi, zɔk nɛ̀ bɔnɛ nyɛmna, mi ɔ ya na, wɔ in wɔ-yì gbɛa'm, mi zima yi ɓɔnsɛnɛ, mi bó só nɛ̀ laa na, ɓɛɛ gɛ̧ɛ̧ baa tɛ‘m mbɛt;

²⁸mi beka tɔr o oi-mɔ na, ɓɛɛ tɛ́ wese lɛŋ, mi ta nɛ́ mɔ batɛ wen o zuduk bíí ko Krist lɛŋ.

²⁹Wi nɛ̀ duk nɛ̀ ɓɔsa-a, ɓɛɛ ká‘m duk nɛ̀ ɓɔsa-a in a̧ na, nɛ́ o? Wi nɛ̀ tik, ɓɛɛ ká bá tɛ‘m na, nɛ́ o?

³⁰Kà bó ha̧‘m mɛ́ ŋmaŋ tɛ‘m wó, mi tɛ́ ŋmaŋ tɛ‘m zu ɓɔsi kɔ‘m.

³¹Ɓɛɛ Sɔ̧, Dáà ko Gasa Wan k’ɛ́ɛ́ Jesu, iŋa'e mi de ndela na; toka de yoŋgo dúk zu-a kpoo nɛ kpoo.

³²Ŋgimbi n'am a̧a̧ so saaye Damas, gasawi ko wannu Aretas aa o wi-pɛm-mɔ sɛn nú garo ye wen ha̧ wa mɛ́ ba'm;

³³nɛ́ mɔ'ɔ nɛ̀ o bíí baa'm pi̧ kɔ̧ gɛsɛ, ɓɛɛ zir am nɛ̀ woi-garo ye'i e nù zan, sɛka'm kpasi er a̧.