Read Northwest Gbaya 2 KƆRINTIƐN 13 Bible Online

2 KƆRINTIƐN 13 - Northwest Gbaya bible

2 KƆRINTIƐN 13

¹War taar nɛa-a ha̧‘m mɛ́ nɛ̀ tɛ‘nɛ́ nɛ́ mɔ'ɔ; ɓɛɛ wen ba wi, ɗoŋ sedaako ko bíí yiitoo, kóó taar.

²Mi tɔ̧ɔ̧ so wen’ɛ h’ɛ́nɛ́ tɛ yiitoo nɔ̀ kɔ‘m tɛ‘nɛ́ kaɗi, ɓɛɛ hee mɔ'ɔ n'am bo in'nɛ̀ɛ́ kinii ga na, mi tɛ́ tɔ̧ wen-aa woyo ha̧ o wi nɛ̀ dee so ɗaŋmɔ nɛti in ha̧ o dɔka bíí mbɛt: kà‘m nɛ́ sii ɗoŋ tɛ‘nɛ́, mi beka de ko ha̧ ŋma bíí na,

³wen ɛ́nɛ́ kɔ̧ɔ̧ mɛ́ iŋ nɛ̀ sa̧a̧-a̧‘e, Krist tɔ̧ wen nɛ̀ nú‘m. A̧ de ɓɔsamɔ mgbara'nɛ́ na, ɓɛɛ a̧ usa nɛ́ ŋgayamɔ kɔ̧-a̧ mgbara'nɛ́.

⁴Nɛ̀ mbetɛ, wa mgboia a̧ zu te-diŋa nɛ̀ ɓɔsa-a, ɓɛɛ a̧ dúk kpasa nɛ̀ ŋgai ko Sɔ̧. Ɛ́ɛ́ nɛ́ o ɓɔsa-wi mbɛt tɛ́ a̧, ɓɛɛ ɛ́ɛ́ tɛ́ duk kpasa in a̧ mbɛt tɛ́ ŋgai ko Sɔ̧ nyɛm nɛ̀ ɗoŋ duka-a k’ɛ́ɛ́ in'nɛ̀ɛ́.

⁵Ɛ̀nɛ̀ wé duka-a k’ɛ́nɛ́ nɛ̀ tɛ‘nɛ́, ɛ̀nɛ̀ zɔk: ɛ́nɛ́ a̧a̧ tɛ kɔ̧ɔ̧ɗɔɔwen nde? Ɛ́nɛ́ iŋ‘e Jesu Krist duk tɛ‘nɛ́ na nde? Kóó tɛ wéé duka-a k’ɛ́nɛ́‘i, ɛ́nɛ́ tɛ́ tik nde?

⁶Ɓɛɛ war k’ɛ́ɛ́, mi taa, ɛ́nɛ́ iŋa'e, tom k’ɛ́ɛ́ nyɛma sɛnɛ.

⁷Ɛ́ɛ́ kɔfi nɛ́ Sɔ̧ wen k’ɛ́nɛ́ tɛɛ de ɗaŋmɔ; ɓɛɛ tɛ́ mɔ‘i, bó nɛ́ ɛ́ɛ́ kɔ̧ɔ̧ mɛ́ usi'e tom k’ɛ́ɛ́ nyɛma sɛnɛ na. Kóó kà war mɔ k’ɛ́ɛ́ nɛ́ duka hee nyɛm sɛnɛ na ga mbɛt, ɛ́ɛ́ kɔ̧ɔ̧ kànà h’ɛ́nɛ́ mɛ́ de nɛ́ demɔ;

⁸wen ɛ́ɛ́ bó nɛ̀ ŋgai mɛ́ ba zu dúk nɛ̀ kpasawen na; ŋgai k’ɛ́ɛ́ nɛ́ yora ɗoŋ kpasawen ɓɛɛ.

⁹Nyɛŋɛ k’ɛ́ɛ́ nɛ́ ŋgimbi lɛŋ n’ɛ̀ɛ̀ dúk nɛ̀ ɓɔsa-a, ɓɛɛ ɛ́nɛ́ kpa k’ɛ́nɛ́ nɛ́ ŋgai; mɛ̀ nɛ́ hegɔ sɛn tɛ kɔfa-sɔ̧ k’ɛ́ɛ́ ɓɔnsɛnɛ, ɛ́ɛ́ ak wen ha̧ deemɔ k’ɛ́nɛ́ mɛ nyɛm sɛnɛ.

¹⁰Hegɔ, mi yɔr mɔ‘i h’ɛ́nɛ́ wen n'am ɔ nyɛi̧a nɛ̀ ɛ́nɛ́, wen ŋgimbi n'am tɛ́ hɔ tɛ‘nɛ́ kaɗi, ká‘m de mɔ in'nɛ̀ɛ́ nɛ̀ ŋgai; wen Gasa Wan ha̧a̧ ŋgai ha̧‘m mɛ́ gbak'nɛ́ h’ɛ́nɛ́ mɛ́ kpa ŋgai, ɓɛɛ bó nɛ́ wen ɗaŋa'nɛ́ na.

¹¹O nya'm, kinii ɛ̀nɛ̀ yá nɛ̀ desee, ɛ̀nɛ̀ dé tom ha̧ yuwar deemɔ k’ɛ́nɛ́ mɛ́ nyɛm sɛnɛ; ɛ̀nɛ̀ há̧ nɔɔ-ŋgiɗi ha̧ o ŋmaa, ɓɛɛ taamɔ k’ɛ́nɛ́ a̧ yé ŋmaa; ɛ̀nɛ̀ yá nɛ̀ de-a in o ŋmaa, ɓɛɛ Sɔ̧ Wan-kɔ̧ɔ̧mɔ in ga̧a̧mɔ tɛ́ duk in'nɛ̀ɛ́.

¹²Ɛ̀nɛ̀ fán o ŋmaa nɛ̀ fanamɔ ko o bíí ko Sɔ̧. O sa̧a̧-bíí ko Sɔ̧ lɛŋ fana'nɛ́.

¹³Deemɔ nɛ̀ ta-tɛ ko Gasa Wan Jesu Krist, kɔ̧ɔ̧mɔ ko Sɔ̧ in yaa-a nɛ̀ see kpɔk nɛ̀ ɗoŋ Sa̧a̧ Ɔmi a̧ dúk in'nɛ̀ɛ́ lɛŋ.