Read Northwest Gbaya 2 KƆRINTIƐN 4 Bible Online

2 KƆRINTIƐN 4 - Northwest Gbaya bible

2 KƆRINTIƐN 4

¹Mɛ̀ nɛ́ wen nɛ̀ Sɔ̧ dee ko h’ɛ́ɛ́ ɓɛɛ e tom'i er yɛ, sa nɔɔ-ŋgiɗi k’ɛ́ɛ́ kaɗi tɛ́ tom-aa na.

²Ɛ́ɛ́ bɛ̧ɛ̧ dee o hu̧sa̧ mɔ nɛ̀ dúk nɛ́ mɔɔ-foe; ɛ́ɛ́ ɔr bíí na, ɛ́ɛ́ kpai ŋma mɔ tɛ́ wen ko Sɔ̧ na, ɓɛɛ nɛ́ tɛ́ kpasawen n’ɛ̀ɛ̀ usi'i ɛ̀ɛ̀ kii nɛnɛ ha̧ bíí lɛŋ mɛ́ e ta nɛ̀ ɛ́ɛ́ ti Sɔ̧.

³Kà laa nɛ́ kpee De Mbe Wen k’ɛ́ɛ́, mɛ̀ nɛ́ wen nɛ́ tɔ̧‘e, laa'i kpee De Mbe Wen wen o wi nɛ̀ tɛ́ yɔ.

⁴Wa nɛ́ o wi nɛ̀ kɔ̧ ɗɔaa ha̧ Sɔ̧ na, nɛ̀ sɔ̧ zaŋnu’ɛ kpee zu iŋamɔ kɔ-wa, wen ká wa tɛɛ zɔk sa̧a̧mɔ ko De Mbe Wen nɛ̀ usi nɛ́ gasamɔ ko Krist, nɛ̀ duk nɛ́ gi̧ɔ̧-tɛ Sɔ̧.

⁵Bó nɛ́ ɛ́ɛ́ tɔ̧ nɛ́ wen k’ɛɛ mɛ́ tɛ yɛ na, ɓɛɛ nɛ́ Gasa Wan Jesu Krist, ɛ̀ɛ̀ tɔ̧́ wen kɔ̧-a̧ nɛnɛ. War k’ɛ́ɛ́ nɛ̀ tɛ yɛ, ɛ́ɛ́‘e ɛ́ɛ́ nɛ́ o wi-de-tom k’ɛ́nɛ́, wen zu Jesu.

⁶Wen Sɔ̧ nɛ̀ tɔ̧a̧‘e «Sa̧a̧mɔ a̧ tók ti tum» wo'i, nyɛka nɛ̀ tɛ-wi kɔ̧ see yɛ, ɓɛɛ de h’ɛ́ɛ́ mɛ́ iŋ gasamɔ kɔ̧-a̧ nɛ̀ tok sɔnti Krist.

⁷Ɛ́ɛ́ ya hee kpáná-gìì nɛ̀ kpasa mbɔi dúk kɔ̧ a̧ ga, wen ha̧ o bíí mɛ iŋ‘e, gasa ŋgai'i dúk nɛ́ ko Sɔ̧, ɓɛɛ bó nɛ́ k’ɛ́ɛ́ na.

⁸O bíí nasi yɛ nɛ̀ fara lɛŋ, ɓɛɛ wa mbɔli yɛ na; wa kpe yuwar h’ɛ́ɛ́, ɓɛɛ ɛ́ɛ́ ɓira yak.

⁹Wa ndak yɛ, ɓɛɛ wa kpa yɛ na; wa tui yɛ pi̧ nù, ɓɛɛ wa gbɛ yɛ na.

¹⁰Fio ko Jesu duk tɛ yɛ ɓɔnsɛnɛ wen ha̧ o bíí mɛ́ zɔk duka-kpasa ko Jesu tɛ yɛ mbɛt.

¹¹Hegɔ tɛ duka-a k’ɛ́ɛ́ ɓɔnsɛnɛ, wa nasi nɛ́ yɛ mɛ́ gbɛ wen zu Jesu, wen ha̧ o bíí mɛ́ zɔk duka-kpasa ko Krist tɛ duka-a k’ɛ́ɛ́ n’ɛ̀ɛ̀ tɛ́ fe fee’ɛ.

¹²Hegɔ, fio de nɛ́ tom tɛ yɛ, ɓɛɛ duka-kpasa de nɛ́ tom tɛ‘nɛ́.

¹³Yɔramɔ tɔ̧ɔ̧ wen zu pɛrti kɔ̧ɔ̧ɗɔɔwen hegɔ‘i ndé: «Mi kɔ̧ɔ̧ ɗɔaa ha̧ Sɔ̧ s'am tɔ̧ wen.» Kale-a mbɛt, ɛ́ɛ́ a̧a̧ nɛ̀ pɛrti taamɔ‘i: ɛ́ɛ́ kɔ̧ɔ̧ ɗɔaa ha̧ Sɔ̧ s’ɛ́ɛ́ tɔ̧ wen.

¹⁴Wen ɛ́ɛ́ iŋa'e nde, wi nɛ̀ dee ha̧ Gasa Wan Jesu mɛ́ kur ŋgɔn tɛ́ fio, tɛ́ de h’ɛ́ɛ́ mɛ́ kur ŋgɔn mbɛt in Jesu, ɓɛɛ a̧ tɛ́ e yɛ in'nɛ̀ɛ́ katɛ a̧.

¹⁵Mɔ‘i nɛ̀ de hegɔ‘i lɛŋ, de wen'nɛ́; hegɔ deemɔ nɛ̀ ta-tɛ ko Sɔ̧ tɛ́ duk zu o bíí nɛ̀ dɔka-a siti, nɛ̀ tɛ́ de ha̧ wa mɛ kɔfi Sɔ̧ de nɛ̀ osoko ha̧ a̧ gan kuti-a, ha̧ ga̧a̧mɔ mɛ́ duk nɛ́ kɔ̧-a̧.

¹⁶Nɛ́ hegɔ sa nɔɔ-ŋgiɗi k’ɛ́ɛ́ kaɗi na; kóó kiitɛ yɛ mɛ́ zan mbɔia, wan mɛ́ kɔ̧ a̧ kpa kɔ‘i nɛ́ ŋgai wese kpɔk kpɔk siti.

¹⁷Wen be bɔnɛ n’ɛ́ɛ́ zɔk tɛ be ŋgimbi tikiɗi’ɛ ɗafi nɛ́ zɔm gasamɔ nyɛmna e h’ɛ́ɛ́ nɛ̀ tɛ́ duk kpoo nɛ kpoo.

¹⁸Bó nɛ́ mɔ nɛ̀‘i zɔk ɛ̀ɛ̀ kii na, ɓɛɛ nɛ́ mɔ nɛ̀‘i zɔk na, ɛ̀ɛ̀ kii; wen mɔ nɛ̀‘i zɔk, yak yak, ɓɛɛ mɔ nɛ̀‘i zɔk na tɛ́ duk kpoo nɛ kpoo.