Read Northwest Gbaya 2 KƆRINTIƐN 5 Bible Online

2 KƆRINTIƐN 5 - Northwest Gbaya bible

2 KƆRINTIƐN 5

¹Wen ɛ́ɛ́ iŋa'e, kà kiitɛ yɛ mɛ́ zaŋnu’ɛ nɛ̀ dúk hee géé tua-laa ga’ɛ nɛ́ ɗaŋa, ɓɛɛ ɛ́ɛ́ a̧a̧ nɛ̀ ŋma tua nɛ̀ tɛ́ duk kpoo nɛ kpoo sɛn yiwese mɛ; nɛ́ Sɔ̧ a̧ dee dee tua'i, nɛ̀ bó nɛ́ bíí a̧ dea na.

²Ɓɛɛ kinii ɛ́ɛ́ gɔfi nɛ́ mɔ; mɔ n’ɛɛ kɔ̧ɔ̧ batɛ, mɛ̀ nɛ́ wen h’ɛ́ɛ́ mɛ́ gu tua mɛ́ yiwese zu wan mɛ́ zaŋnu’ɛ;

³ɓɛɛ mɔ kpɔk, ɛ́ɛ́ kɔ̧ɔ̧ ha̧ bíí mɛ́ kpa yɛ nɛ̀ laa tɛ yɛ, nɛ̀ bó nɛ́ géé tɛ na,

⁴wen duka-a n’ɛ̀ɛ̀ duk kɔ̧ tua-laa mɛ́ zaŋnu’ɛ, mɔ ba nɛ́ tɛ yɛ, ɓɛɛ ɛ́ɛ́ gɔfi nɛ́ mɔ; bó nɛ́ ɛ́ɛ́ kɔ̧ɔ̧ mɛ́ kpɔ̧i̧ gba̧‘a̧ laa yinɛ tɛ yɛ na, ɓɛɛ ɛ́ɛ́ kɔ̧ɔ̧ mɛ́ pi̧ nɛ́ mbe-a zu-a wen ha̧ duka-kpasa mɛ́ gur mɔ nɛ̀ tɛ́ fe fee.

⁵Wi nɛ̀ dee ɛ́ɛ́, wen h’ɛ́ɛ́ mɛ́ kpa mɔ nɛ̀ tɛ́ hɔ‘i, nɛ́ Sɔ̧; ɓɛɛ a̧ pi̧ káná yɛ nɛ̀ Sa̧a̧ Ɔmi kɔ̧-a̧ wen o demɔ n'aa e pɛm nɛ̀ yɛ‘i.

⁶Hegɔ, ɛ́ɛ́ a̧a̧ nɛ̀ nɔɔ-ŋgiɗi ɓɔnsɛnɛ, wen ɛ́ɛ́ iŋa'e ŋgimbi n’ɛ̀ɛ̀ ɓɔna tɛ́ kiitɛ yɛ, ɛ́ɛ́ ɓɔna nɛ̀ zan, ɛ́ɛ́ duk in Gasa Wan na.

⁷Wen ɛ́ɛ́ nɛ́ nɔ̀ tɛ kɔ̧ɔ̧ɗɔɔwen, ɓɛɛ bó nɛ́ tɛ́ mɔ nɛ̀ yí-ɛɛ zɔk na.

⁸Nɛ̀ mbetɛ ɛ́ɛ́ a̧a̧ nɛ̀ nɔɔ-ŋgiɗi, hegɔ ɛ́ɛ́ kɔ̧ɔ̧ nyɛmna mɛ́ e tua wan mɛ́ kiitɛ-ɛɛ hɛ̧ɛ̧ duk, h’ɛ́ɛ́ mɛ́ nɛ̀ɛ́ duk katɛ Gasa Wan.

⁹Hegɔ, k’ɛ̀ɛ̀ gbo kɔ̧ tua’ɛ, kóó ɛ́ɛ́ ɓɔna kɔ̧ a̧ mbɛt, mɔ n’ɛ̀ɛ̀ kii, mɛ̀ nɛ́ wen h’ɛ́ɛ́ mɛ́ de mɔ nɛ̀ dee tɛ Gasa Wan,

¹⁰wen ɛ́ɛ́ lɛŋ tɛ yor ti kita ko Krist, ha̧ kóó o ndé mɛ́ kpa mɔɔ-oi-tom n'aa dee so ŋgimbi duka-a kɔ̧-a̧ tɛ mur-tɛ, kóó so nɛ́ demɔ, kóó ɗaŋmɔ.

¹¹Ɛ́ɛ́ iŋa yuu kíí Gasa Wan, ɓɛɛ ɛ́ɛ́ kimii nɛ́ o bíí; Sɔ̧ iŋa ɛ́ɛ́ lɛŋ ɓɛɛ mi kɔ̧ɔ̧ h’ɛ́nɛ́ mɛ́ iŋ am mbɛt.

¹²Bó nɛ́ ɛ́ɛ́ de nɛ́ sedaako zu ɛ́ɛ́ nɛ̀ tɛ yɛ woyo na, ɓɛɛ ɛ́ɛ́ kɔ̧ɔ̧ h’ɛ́nɛ́ mɛ́ duk tɛ‘nɛ́ nɛ̀ ɛ́ɛ́, h’ɛ́nɛ́ mɛ́ kpa yuwar wen kifa nú ha̧ o wi nɛ̀ ŋmaŋ tɛ wen geɗek mɔ mɛ́ zan, nɛ̀ bó nɛ́ mɔ mɛ́ kɔ̧ see na.

¹³K’ɛ̀ɛ̀ tɔ̧ wen hee wi-dawa ga, ɓɛɛ mɛ̀ nɛ́ wen zu Sɔ̧, ɓɛɛ k’ɛ̀ɛ̀ nɛ́ tɔ̧ɔ̧ wen nɛ̀ yuwar-a, mɛ̀ nɛ́ wen zu'nɛ́.

¹⁴Nɛ́ kɔ̧ɔ̧mɔ ko Krist a̧ ir yɛ mɛ́ de hegɔ, wen ɛ́ɛ́ iŋa'e bíí kpɔk fee oi nú bíí lɛŋ, ɓɛɛ tɛ mɔ‘i, bíí lɛŋ fea.

¹⁵A̧ fee wen zu bíí lɛŋ, wen ká o bíí nɛ̀ duk kpasa tɛ́ɛ̀ duk wen tɛ-wa ɓɔna, ɓɛɛ nɛ́ ha̧ wa mɛ́ duk wen wi nɛ̀ fea, ɓɛɛ kur ŋgɔn wen zu wa.

¹⁶Hegɔ, bó nɛ́ ɛ́ɛ́ iŋa bíí hee mɔ'ɔ nɛ̀ o bíí iŋ nɛ̀ ŋmaa’ɛ ga ɓɔna; kóó, k’ɛ̀ɛ̀ nɛ́ iŋa so Krist nɛti hee mɔ'ɔ nɛ̀ o bíí iŋ nɛ̀ ŋmaa’ɛ ga, ɓɛɛ kinii bo hee mɔ‘i ga ɓɔna.

¹⁷Hegɔ, kà ŋma bíí dúk tɛ Krist, wi’ɛi nɛ́ mbe bíí; gba̧‘a̧ duka-a yaka kaɗi, ɓɛɛ nɛ́ mbe mɔ a̧ baa fara.

¹⁸Mɔ lɛŋ tɛ́ nɛ̀ tɛ́ Sɔ̧ nɛ̀ ɗafa mgbara yɛ in a̧ nɛ̀ ɗoŋ Jesu Krist, ɓɛɛ a̧ e tom ɗafa-mgbara-ŋmaa er yɛ wen ɗafa mgbara o bíí in a̧.

¹⁹Tɛ mɔ‘i, nɛ́ Sɔ̧ nɛ̀ tɛ-wi a̧ ɗafa mgbara o bíí zaŋnu in a̧ nɛ̀ ɗoŋ Krist; a̧ ɓa ɗoŋ ɗaŋmɔ kɔ-wa na, ɓɛɛ a̧ e tom-tɔ̧ɔ̧-wen ɗafa-mgbara bíí in a̧ er yɛ.

²⁰Ɛ́ɛ́ nɛ́ o betom nɛ̀ nin Krist, ɓɛɛ Sɔ̧ toma ɛ́ɛ́ sa nɛ̀ ɛ́nɛ́ nɛ̀ ta-tɛ-a. Hegɔ ɛ́ɛ́ ai nú h’ɛ́nɛ́ nɛ̀ nin Krist, ɛ̀nɛ̀ é ha̧ Sɔ̧ mɛ́ ɗafi mgbara'nɛ́ in a̧.

²¹Krist nɛ̀ iŋ so ɗaŋmɔ na, Sɔ̧ baa a̧ e tɛ ɗaŋmɔ wen zu yɛ, wen h’ɛ́ɛ́ mɛ́ duk wi-de-mɔ nɛ̀ yuwar-a ti Sɔ̧ nɛ̀ ɗoŋ-aa.