Read Northwest Gbaya 2 KƆRINTIƐN 7 Bible Online

2 KƆRINTIƐN 7 - Northwest Gbaya bible

2 KƆRINTIƐN 7

¹O wi n'am kɔ̧ɔ̧ nyɛmna, hee mɔ'ɔ n’ɛ̀ɛ̀ a̧a̧ nɛ̀ o pɛrti ha̧a̧nú hegɔ ga, ɛ̀ɛ̀ fɔ́r ndiŋmɔ wan mɛ́ mur-tɛ in tɛ taamɔ k’ɛ́ɛ́, ɛ́ɛ́ nɛ̀ tɛ yɛ yinɛ. Ɛ̀ɛ̀ kíí ha̧ war-tɛ yɛ mɛ́ sa̧ tɛ yuu kíí Gasa Wan.

²Ɛ̀nɛ̀ hú̧í̧ see'nɛ́ h’ɛ́ɛ́. Ɛ́ɛ́ de ɗaŋmɔ in ŋma bíí na, ɛ́ɛ́ ɗaŋ mɔ ko ŋma bíí in nyɔŋ yí ŋma bíí na mbɛt.

³Bó nɛ́ mi ba nɛ́ wen zu'nɛ́ tɛ́ wen n'am tɔ̧‘i na, wen mi tɔ̧ɔ̧ so h’ɛ́nɛ́ kaɗi'e ndé: kóó ɛ́ɛ́ duka kpasa, kóó ɛ́ɛ́ fea mbɛt, wɔ‘nɛ́ beka kaɗi kɔ̧ see yɛ na.

⁴Mi e ta'm nɛ̀ ɛ́nɛ́, mi dúk tɛ‘m nɛ̀ ɛ́nɛ́, mi kpa nɛ́ nɔɔ-ŋgiɗi, mi dúk nɛ̀ desee nyɛmna mbɛt tɛ́ bɔnɛ k’ɛ́ɛ́ lɛŋ.

⁵Tɛ̀ hɔa-a k’ɛ́ɛ́ Masedoan, ɛ́ɛ́ ɔm tɛ yɛ na, ɛ́ɛ́ zɔk nɛ́ o bɔnɛ nɛtɛ nɛtɛ; kiitɛ yɛ mɛ́ zan de nɛ́ biro, ɓɛɛ wan mɛ́ kɔ̧ a̧ de nɛ́ kíì.

⁶Ɓɛɛ Sɔ̧ nɛ̀ ha̧ nɔɔ-ŋgiɗi ha̧ o wi dita-see ha̧a̧ nɔɔ-ŋgiɗi h’ɛ́ɛ́ tɛ hɔa-a ko Titɛ;

⁷bó nɛ́ wen hɔa-a kɔ̧-a̧ ɓɛɛ na, ɓɛɛ mɛ̀ nɛ́ wen nɔɔ-ŋgiɗi n’ɛnɛ ha̧a̧ ha̧ a̧. A̧ tɔ̧ɔ̧ wen zɔka'm n’ɛnɛ kɔ̧ɔ̧ so nyɛmna mɛ́ zɔk, in hi̧a̧ kɔ̧a̧‘m n’ɛ̀nɛ̀ hí̧í̧, in gasa wɔ‘m nɛ̀ gbɛ‘nɛ́, ɓɛɛ mi kpa desee nyɛmna gan kuti-a.

⁸Kà kalata n'am toma h’ɛ́nɛ́ nɛ́ ha̧a̧ ɗaŋsee h’ɛ́nɛ́, kɔ‘m de ŋma mɔ tɛ‘m kinii na; ɓɛɛ kà‘m nɛ́ nyima tɛ‘m, mɛ̀ nɛ́ wen nɛ̀ kalata'i ha̧a̧ kànà ɗaŋsee h’ɛ́nɛ́ tɛ́ ŋma be ŋgimbi tikiɗi.

⁹Kinii mi dúk nɛ́ desee, bó nɛ́ wen ɗaŋsee n’ɛnɛ kpaa'i na, ɓɛɛ mɛ̀ nɛ́ wen nɛ̀ ɗaŋsee'i dee h’ɛ́nɛ́ mɛ́ kpai duka-a k’ɛ́nɛ́, ɓɛɛ ɗaŋsee k’ɛ́nɛ́‘i nɛ́ Sɔ̧'ɔ̧ kɔ̧ɔ̧ hegɔ. Tɛ́ mɔ‘i, mi de ŋma ɗaŋmɔ in'nɛ̀ɛ́ tɛ yɔra kalata'i na.

¹⁰Wen ɗaŋsee nɛ̀ Sɔ̧ kɔ̧a̧ nɛ́ wan nɛ̀ de ha̧ bíí mɛ́ kpai duka-a wen ha̧ wi’ɛi mɛ́ kpasi, ɓɛɛ pɛrti ɗaŋsee'i nyim tɛ-wi na. Ɓɛɛ ɗaŋsee wan mɛ́ zaŋnu’ɛ de dee ha̧ bíí mɛ́ fe.

¹¹Ɛ̀nɛ̀ zɔ́k o mɔ nɛ̀ ɗaŋsee wan nɛ̀ Sɔ̧ kɔ̧a̧ dee mgbara'nɛ́ nɛ́ mɔɔ nɔ'ɔ: ɛ́nɛ́ a̧a̧ nɛ̀ see, ɛ́nɛ́ kɔ̧ ha̧ o ŋma wen mɛ́ duk zu'nɛ́ na, ɛ́nɛ́ kɔ̧ ɗaŋmɔ na, ɛ́nɛ́ yu kíí Sɔ̧ yuu, wɔ zɔka'm gbɛ‘nɛ́ gbɛɛ, wɔ-mɔ ko Sɔ̧ gbɛ‘nɛ́ nyɛmna, ɓan na, ɛ́nɛ́ gɔna kita zu wi-de-ɗaŋmɔ kaɗi! Sɛn tɛ mɔ lɛŋ ɛ́nɛ́ usa'e, ŋma wen bó zu'nɛ́ tɛ mɔ nɛ̀ yaka'i na.

¹²Ɓɛɛ kà‘m nɛ́ yɔra mɔ h’ɛ́nɛ́, bó nɛ́ wen zu wi-de-ɗaŋmɔ, kóó wi nɛ̀ wa dee ɗaŋmɔ in a̧ na, ɓɛɛ mɛ̀ nɛ́ wen h’ɛ́nɛ́ mɛ́ zɔk kɔ̧ɔ̧mɔ n’ɛ̀nɛ̀ kɔ̧ɔ̧ nɛ̀ ɛ́ɛ́ sɛn yí Sɔ̧ mbɛt.

¹³Mɔ nɛ̀ ha̧a̧ nɔɔ-ŋgiɗi h’ɛ́ɛ́ nɛ́ mɔ‘i. War k’ɛ́ɛ́, bó nɛ́ nɔɔ-ŋgiɗi ɛ̀ɛ̀ kpa ɓɛɛ na, ɓɛɛ ɛ́ɛ́ dee tortɛ mbɛt zu desee ko Titɛ, wen ŋgai n’ɛnɛ ha̧a̧ ha̧ a̧.

¹⁴Mi duka be tɛ‘m nɛ̀ ɛ́nɛ́ sɛn yí-a, ɓɛɛ ɛ́nɛ́ e foe yí‘m na. Ɓɛɛ hee mɔ'ɔ n’ɛ̀ɛ̀ tɔ̧ so nɛ́ kpasawen h’ɛ́nɛ́ ɓɔnsɛnɛ ga, zɔna'nɛ́ n’ɛ̀ɛ̀ zɔna yí Titɛ nyɛma sɛnɛ.

¹⁵Ŋgimbi nɛ̀ tɛ-a mbaŋ ɗoŋ mboozu k’ɛ́nɛ́ ha̧ bíí lɛŋ, in kpɛka a̧ n’ɛnɛ kpɛka nɛ̀ naka-tɛ in nɛ̀ kíì, kɔ̧ɔ̧mɔ kɔ̧-a̧ zu'nɛ́ ɔ gasa gan kutia-a.

¹⁶Mi de nɛ́ nyɛŋɛ wen mi e ta'm nɛ̀ ɛ́nɛ́ tɛ mɔ lɛŋ.