Read Northwest Gbaya GALATII 5 Bible Online

GALATII 5 - Northwest Gbaya bible

GALATII 5

¹Mɛ̀ nɛ́ wen h’ɛ́ɛ́ mɛ́ kpa zu nɛ̀ mbetɛ a̧ Krist gboo nɛ̀ yɛ tɛ́ bara; ɓɛɛ ɛ̀nɛ̀ yór nɛ̀ nɔa-a, k’ɛ́nɛ́ si ɗoŋ mɛ̀ duk bara woyo ɓɔna.

²Nɛ́ mi Paul a̧ tɔ̧ wen’ɛ h’ɛ́nɛ́: k’ɛ̀nɛ̀ nɛ́ gɔna bɔr, ɓɛɛ gba̧a̧ mɔ nɛ̀ Krist dee wen'nɛ́ bo ɓɔna.

³Ɓɛɛ mi tɔ̧ woyo ha̧ kóó o ndé nɛ̀ gɔna bɔr, doole wa tɛ́ kasi heembea lɛŋ nɛ̀ dama-a.

⁴K’ɛ̀nɛ̀ kíí mɛ́ duk wi-de-mɔ nɛ̀ yuwar-a nɛ̀ ɗoŋ heembea, ɓɛɛ mgbara'nɛ́ in Krist gɔna; ɓɛɛ ɛ́nɛ́ bó k’ɛ́nɛ́ zaŋ deemɔ nɛ̀ ta-tɛ kó Sɔ̧ ɓɔna.

⁵War k’ɛ́ɛ́, ɛ́ɛ́ pɛm nɛ́ mɔ nɛ̀ nɔɔ-ŋgiɗi nɛ̀ ŋgai ko Sa̧a̧ Ɔmi ha̧ Sɔ̧ mɛ́ de h’ɛ́ɛ́ mɛ́ duk o wi-de-mɔ nɛ̀ yuwar-a, wen zu kɔ̧ɔ̧ɗɔɔwen; k’ɛ́ɛ́, mɔ n’ɛ̀ɛ̀ e nɛ̀ ta'i nɛ́ mɔ‘i.

⁶Wen war ko bíí nɛ̀ ndaɗa tɛ́ Krist Jesu, kóó a̧ gɔna bɔr, kóó a̧ gɔn na mbɛt, de ŋma mɔ na; gasamɔ gan nɛ́ kɔ̧ɔ̧ɗɔɔwen nɛ̀ de tom kɔ‘i nɛ̀ kɔ̧ɔ̧mɔ.

⁷Nɛti ɛ́nɛ́ maa so yì nɛ̀ de-a, ɓɛɛ nɛ́ o'o kpee yuwar h’ɛ́nɛ́, dor nɛ̀ ɛ́nɛ́ mɛ́ mbo zu tɛ kpasawen o nde?

⁸Mɔ‘i bó nɛ́ taamɔ ko wi nɛ̀ saa'nɛ́‘i na;

⁹wen mɛ̀ nɛ́ be hao tikiɗi a̧ de ha̧ mbɔɗa-fuu mɛ́ kur.

¹⁰War kɔ‘m, nɛ̀ ɗoŋ Gasa Wan, mi e ta nɛ̀ ɛ́nɛ́‘e, ɛ́nɛ́ beka kpa ŋma mbe yuwar nɛtɛ na; ɓɛɛ wi nɛ̀ sakali'nɛ́ tɛ́ kpa mɔɔ-oi-aa, kóó wi’ɛi so nɛ́ o.

¹¹O nya'm, war kɔ‘m, kà‘m usi só‘e o bíí a̧ gɔn bɔr wó, ɓɛɛ o bíí tɛ̀ɛ́ usi bɔnɛ ha̧‘m wen ge? Kà bó so hegɔ, ɓɛɛ usamɔ wen zu mgboia Krist zu te-diŋa n'am usi'i beka sakali so bíí na.

¹²O wi nɔ‘i nɛ̀ sakali'nɛ́‘i a̧ ɓir ti-wa yinɛ pi̧ nù ha̧ wa kifi kpàná ɓɛɛ na nde?

¹³Ɛ́nɛ́ o nya'm, Sɔ̧ saa'nɛ́ h’ɛ́nɛ́ mɛ́ kpa zu nɛ̀ mbetɛ, ɓɛɛ k’ɛ́nɛ́ tɔ̧‘e ɛ́nɛ́ gboo tɛ́ bara kaɗi mɛ́ de mɔ lɛŋ n’ɛnɛ kɔ̧ɔ̧ na; ɓɛɛ ɛ̀nɛ̀ dé tom ha̧ ŋmaa in o ŋmaa nɛ̀ kɔ̧ɔ̧mɔ.

¹⁴Wen o heembea nɛ̀ oi-aa lɛŋ hɔɔ gba̧a̧ tɛ kpɔk wen’ɛ: «Mɛ̀ kɔ̧́ ŋmà-mɛ́ hee kiitɛ-mɛ́ ga.»

¹⁵Ɓɛɛ k’ɛ́nɛ́ e da̧i̧ tɛ́ ŋmaa usi nɛ̀ bɔnɛ ha̧ ŋmaa na; ɛ̀nɛ̀ bá zu'nɛ́ k’ɛ́nɛ́ tɛ̀ɛ́ kum ŋmaa kaɗi.

¹⁶Mi'e ndé, k’ɛ̀nɛ̀ é ha̧ Sa̧a̧ Ɔmi mɛ́ yak ti h’ɛ́nɛ́, ɓɛɛ ɛ́nɛ́ beka de mɔ nɛ̀ mur-tɛ kɔ̧a̧ ɓɔna.

¹⁷Wen o wɔ-mɔ ko mur-tɛ in o wɔ-mɔ ko Sa̧a̧ Ɔmi bó hee ŋmaa ga na; wa ɔ nu ha̧ ŋmaa na, mɛ̀ nɛ́ hegɔ ɛ́nɛ́ nyɛm mɛ́ de mɔ hee ɛ́nɛ́ kɔ̧ɔ̧ ga na.

¹⁸Ɓɛɛ kà bó nɛ́ Sa̧a̧ Ɔmi a̧ yak ti h’ɛ́nɛ́, ɛ́nɛ́ bo ɗɔɔ ŋgai ko heembea ɓɔna.

¹⁹O tom ko mur-tɛ, ɛ́ɛ́ iŋa: nɛ́ deemɔ lɛŋ nɛ̀ see-wi kɔ̧a̧, dee ndiŋmɔ, dee dàlà,

²⁰gasa géé-sɔ̧, yɔ́ɔ́-gbánà, dúká-a nɛ̀ kiri in ŋmaa, ɗaŋa-mgbara-ŋmaa, dee gɔya, nyimsea-dawa, wee-zu-nɛ-ŋmaa, kia-wen, sii-kafɛ,

²¹aa-see-mɔ, dúká-bara-dɔ̧ɔ̧, nyɔŋmɔ-gɔ̧, in o ŋma mɔ nɛ̀ ndaka ɗoŋ o mɔɔ nɔ‘i; nɛ́ kpasawen a̧‘m tɔ̧ h’ɛ́nɛ́, pɛrti o wi-de-mɔ hegɔ beka kpa Wan ko Sɔ̧ nɛ̀ mɔɔ-oi na, hee mi tɔ̧ɔ̧ h’ɛ́nɛ́ kaɗi ga.

²²Ɓɛɛ waya-mɔ ko Sa̧a̧ Ɔmi nɛ́ mɔ'ɔ: kɔ̧ɔ̧mɔ, desee, ga̧a̧mɔ, munyal, dee demɔ, gbaka-ŋmaa, mboozu,

²³ga̧a̧-see in kasa-zu; ŋma heembea nɛ̀ dora o mɔɔ nɔ‘i bó na.

²⁴Wi nɛ̀ dúk nɛ́ ko Krist mgboia mur-tɛ-wi zu te-diŋa in o wɔ-mɔ kɔ̧-a̧ ká bá nɛ̀ mɔ n'aa kɔ̧ɔ̧ mɛ́ de lɛŋ.

²⁵Kà bó nɛ́ Sa̧a̧ Ɔmi a̧ dee h’ɛ́ɛ́ mɛ́ duk kpasa, ɓɛɛ ɛ̀ɛ̀ dé kànà tom nɛ̀ ŋgai kɔ̧-a̧.

²⁶K’ɛ́ɛ́ ŋmaŋ tɛ̀ zu ŋmaa na, k’ɛ́ɛ́ kíí nú ŋmaa na, k’ɛ́ɛ́ a see mɔ ko ŋmaa na mbɛt.