Read Northwest Gbaya EFƐZIƐN 1 Bible Online

EFƐZIƐN 1 - Northwest Gbaya bible

EFƐZIƐN 1

¹Nɛ́ mi Paul, nɛ̀ dúk nɛ́ betom ko Jesu Krist nyɛm nɛ̀ ɗoŋ mɔ nɛ̀ Sɔ̧ kɔ̧a̧, a̧ tom kalata’ɛ h’ɛ́nɛ́, o sa̧a̧-bíí nɛ̀ mbo zu ha̧ a̧ in nɛ̀ dúk kpɔk in Jesu Krist.

²Deemɔ nɛ̀ ta-tɛ in ga̧a̧mɔ ko Sɔ̧ Dáà k’ɛ́ɛ́ in ko Gasa Wan k’ɛ́ɛ́ Jesu Krist a̧ dúk in'nɛ̀ɛ́.

³Toka-de-yoŋgo a̧ dúk zu Sɔ̧, Dáà ko Gasa Wan k’ɛ́ɛ́ Jesu Krist. A̧ toka de yoŋgo ha̧ nɛ̀ demɔ ko Sa̧a̧ Ɔmi lɛŋ nɛ̀ yiwese h’ɛ́ɛ́ tɛ duka-a k’ɛ́ɛ́ kpɔk in Krist.

⁴Nɛti ká a̧ tɛ́ de nù na, a̧ hoka ɛ́ɛ́ wen h’ɛ́ɛ́ mɛ́ duk nɛ́ kɔ̧-a̧ tɛ́ Krist, wen h’ɛ́ɛ́ mɛ́ ya nɛ̀ sa̧a̧-a̧ sɛn ti a̧, nɛ̀ ŋma wen bo zu yɛ na, ɓɛɛ h’ɛ́ɛ́ mɛ́ ya in a̧ tɛ kɔ̧ɔ̧mɔ.

⁵Sɔ̧ ɗafa so mɔ lɛŋ mɛ́ ba yɛ e nɛ̀ bem kɔ̧-a̧ nɛ̀ ɗoŋ Jesu Krist; demɔ n'aa kɔ̧ɔ̧ so mɛ́ de'i nɛ́ mɔ‘i,

⁶wen h’ɛ́ɛ́ mɛ́ zɔn a̧ wen gasamɔ kɔ̧-a̧ in demɔ n'aa dee nɛ̀ ta-tɛ h’ɛ́ɛ́ batɛ nɛ̀ ɗoŋ wi n'aa kɔ̧ɔ̧ nyɛmna.

⁷Sɔ̧ gboo yɛ nɛ̀ ɗoŋ tɔk-tɛ Krist, ɓɛɛ a̧ e ɗaŋmɔ k’ɛ́ɛ́ h’ɛ́ɛ́ wen zu Krist nyɛm nɛ̀ ɗoŋ dɔka deemɔ nɛ ta-tɛ kɔ̧-a̧.

⁸Sɔ̧ dee mɔ‘i h’ɛ́ɛ́ nɛ̀ dɔka-a ha̧ nɛ̀ iŋa-mgbara-mɔ in iŋamɔ lɛŋ h’ɛ́ɛ́.

⁹A̧ dee h’ɛ́ɛ́ mɛ́ iŋ mgbara ɗukamɔ n'aa kɔ̧ɔ̧ so mɛ́ de; nɛ́ dee demɔ a̧ a̧ ee so zu-a nɛ̀ tɛ-a nɛti ɓeemɛ,

¹⁰ha̧ mɛ́ hɔ gba̧a̧ kà ŋgimbi bé tɛ̀ɛ́ nyɛm kaɗi: mɛ̀ nɛ́ mɔi̧a o mɔ lɛŋ nɛ̀ a̧a̧ sɛn yiwese in sɛn zaŋnu e ɗɔɔ ŋma wan kpɔk, ɓɛɛ wi’ɛi nɛ́ Krist.

¹¹Tɛ́ Krist ɛ́ɛ́ kpaa war mɔ k’ɛ́ɛ́, nyɛm nɛ̀ ɗoŋ ɗafamɔ ko Sɔ̧ nɛ̀ de mɔ lɛŋ hee mɔ'ɔ n'aa kɔ̧ɔ̧ ga.

¹²A̧ hoka so ɛ́ɛ́ mɛ́ zɔn gasamɔ kɔ̧-a̧, ɛ́ɛ́ n’ɛ̀ɛ̀ duka so nɛ́ o kuti wi nɛ̀ e ta nɛ̀ Krist!

¹³Tɛ́ Krist, ɛ́nɛ́ zia kpasawen, ɓɛɛ wen'i nɛ́ De Mbe Wen kpasi'nɛ́; ɛ́nɛ́ kɔ̧ɔ̧ ɗɔaa ha̧ a̧, ɓɛɛ Sɔ̧ e Sa̧a̧ Ɔmi n'aa ha̧a̧ so nú mɛ́ ha̧ h’ɛ́nɛ́‘i nɛ̀ tumbal tɛ‘nɛ́.

¹⁴Ɓɛɛ Sa̧a̧ Ɔmi‘i nɛ́ kpasamɔ nɛ̀ usi'e ndé, ɛ́ɛ́ tɛ́ kpa mɔɔ-oi tɛ kpasa-a k’ɛ́ɛ́ nɛ̀ sɔŋkur-aa, wen h’ɛ́ɛ́ mɛ́ zɔn gasamɔ kɔ̧-a̧.

¹⁵Mɛ̀ nɛ́ wen hegɔ, hee mɔ'ɔ n'am zia nyɛrɛ kɔ̧ɔ̧ ɗɔaa n’ɛnɛ kɔ̧ɔ̧ ha̧ Gasa Wan Jesu in nyɛrɛ kɔ̧ɔ̧mɔ k’ɛ́nɛ́ sitɛ o sa̧a̧-bíí lɛŋ ga,

¹⁶mi mbɔi tɛ dee osoko ha̧ Sɔ̧ wen zu'nɛ́ na. Ŋgimbi lɛŋ n'am kɔfi Sɔ̧ tɛ‘m bí ɗoŋ‘nɛ́ na.

¹⁷Hegɔ mi ak ha̧ Sɔ̧ ko Gasa Wan k’ɛ́ɛ́ Jesu Krist, Dáà nɛ̀ gasamɔ duk nɛ́ kɔ̧-a̧ mɛ́ ha̧ iŋa-mgbara-mɔ nɛ̀ tɛ́ usi a̧ h’ɛ́nɛ́ wen h’ɛ́nɛ́ mɛ́ iŋ a̧ nɛ̀ de-a.

¹⁸À̧ a̧ hú̧í̧ yí‘nɛ́ mɛ́ zɔk sa̧a̧mɔ kɔ̧-a̧ h’ɛ́nɛ́ mɛ́ iŋ gasa mɔɔ-e-nɛ-ta n’ɛnɛ tɛ́ kpa tɛ́ sara n'aa saa nɛ̀ ɛ́nɛ́, in o gba zɔm demɔ n'aa e ha̧ o bíí nɛ dúk nɛ́ kɔ̧-a̧,

¹⁹ká bá nɛ̀ zɔm ŋgayamɔ kɔ̧-a̧ nɛ̀ dúk wen ɛ́ɛ́ o wi nɛ̀ kɔ̧ɔ̧ ɗɔaa. Ŋgai in ŋgayamɔ kɔ̧-a̧ lɛŋ,

²⁰a̧ dee nɛ̀ tom tɛ́ Krist de nɛnɛ ha̧ a̧ mɛ kur ŋgɔn tɛ fio, ɓɛɛ e a̧ mɛ́ duk nù nɛ̀ war wii-er-a yiwese mɛ.

²¹Sɔ̧ ee a̧ zu o wan, o ŋgai, o ŋgayamɔ in o wannu lɛŋ. Ŋma nin nɛ̀‘i tɛ́ sa zaŋnu kinii’ɛ, kóó wan mɛ́ mbe nù nɛ̀ tɛ́ tɛ, nɛ̀ duk ɗɔɔ ŋgai kɔ̧-a̧ na, bó na.

²²Sɔ̧ ee mɔ lɛŋ ɗɔɔ ŋgai kɔ̧-a̧, ɓɛɛ ba a̧ e zu zuduk bíí kɔ‘i hee mɔ'ɔ nɛ̀ zu-wi dúk nɛnɛ zu kiitɛ-wi’ɛ ga.

²³Zuduk bíí ko Krist nɛ́ kiitɛ Krist, ɓɛɛ mɛ̀ nɛ́ sɛn tɛ zuduk'i a̧ mɔ ko Krist lɛŋ dúk, ɓɛɛ mɔ nɛ̀ a̧a̧ tɛ Sɔ̧ lɛŋ duk tɛ Krist.