Read Northwest Gbaya EFƐZIƐN 4 Bible Online

EFƐZIƐN 4 - Northwest Gbaya bible

EFƐZIƐN 4

¹Mi, wi nɛ̀ duk nɛ́ wi-zɔɓɔ wen zu Gasa Wan, ai nú h’ɛ́nɛ́ wen ha̧ duka-a k’ɛ́nɛ́ mɛ́ nyɛm ŋmaa in sara nɛ̀ Sɔ̧ saa nɛ̀ ɛ́nɛ́.

²Ɛ̀nɛ̀ yá nɛ̀ mɔka-see, nɛ̀ ga̧a̧-see in nɛ̀ nɔɔ-ŋgiɗi zɔk nɛ̀ ŋmaa nɛ̀ kɔ̧ɔ̧mɔ.

³Ɛ̀nɛ̀ kíí há̧ duka-a k’ɛ́nɛ́ kpɔk in o ŋmaa nɛ̀ Sa̧a̧ Ɔmi ha̧ tɛ ga̧a̧mɔ mɛ́ ɓɔn.

⁴Kiitɛ kpɔk in Sa̧a̧ Ɔmi kpɔk; nɛ́ kalemɔ‘i a̧ Sɔ̧ saa nɛ̀ ɛ́nɛ́ mɛ́ duk nɛ̀ kpɔk ee-ta mbɛt.

⁵Gasa Wan nɛ́ kpɔk, kɔ̧ɔ̧ɗɔɔwen kpɔk in zuia-bíí nɛ́ kpɔk mbɛt.

⁶Sɔ̧ nɛ́ kpɔk, ɓɛɛ a̧ nɛ́ Dáà ko bíí lɛŋ. A̧ ɔ wan zu bíí lɛŋ; a̧ de tom tɛ bíí lɛŋ, ɓɛɛ a̧ duk tɛ bíí lɛŋ mbɛt.

⁷Sɔ̧ dee mɔ nɛ ta-tɛ h’ɛ́ɛ́ kpɔk kpɔk nyɛm nɛ̀ ɗoŋ ha̧a̧mɔ ko Krist.

⁸Nɛ́ mɔ‘i sa Yɔramɔ‘e: «Ŋgimbi n'aa daŋa nɛnɛ si ŋgɔn mɛ, a̧ kaia o bara, ɓɛɛ a̧ ha̧ mɔ ha̧ o bíí.»

⁹Ɓɛɛ mɔ nɛ tɔ̧a̧‘e: «a̧ daŋa» wó‘i, kɔ̧ɔ̧ mɛ́ tɔ̧ hee ge? Mɔ‘i kɔ̧ɔ̧ mɛ́ tɔ̧‘e a̧ zira hɔ ɗɔɔ nù mɛ mbɛt.

¹⁰Wi nɛ̀ zira'i nɛ́ kpɔk wi nɛ̀ daŋa so yak si yiwese ŋgɔn mɛ dun nɛnɛ tɛ mɔ lɛŋ.

¹¹Nɛ́ a̧ á̧ dee ha̧ o ŋma bíí mɛ́ ya nɛ́ o betom ko Krist, in ha̧ o ŋma mɛ́ ya kɔ‘i nɛ́ o wi-tɔ̧-wen oi nú Sɔ̧, ha̧ o ŋma mɛ́ ya nɛ́ o wi-tɔ̧ De Mbe Wen nɛnɛ, ha̧ o ŋma mɛ́ ya kɔ‘i nɛ́ o wi-dai-bíí in o wi-usi-mɔ.

¹²A̧ dee hegɔ ɗafi nɛ̀ war-mɔ ko o sa̧a̧-bíí mɛ́ de tom kɔ̧-a̧ wen mboo tua nɛ̀ duk nɛ́ kiitɛ Krist.

¹³Hegɔ, ɛ́ɛ́ lɛŋ tɛ́ ye zaŋ duka-a kpɔk in o ŋmaa tɛ kɔ̧ɔ̧ɗɔɔwen in tɛ iŋa Bem ko Sɔ̧, hɔ ŋgimbi n’ɛ́ɛ́ tɛ́ gasi de bíí nyɛm ŋmaa in Krist nɛ̀ oi mɔ nɛ̀ a̧a̧ tɛ-a lɛŋ.

¹⁴Ɛ́ɛ́ beka duk nɛ́ obem ha̧ o usamɔ nɛtɛ nɛtɛ mɛ́ ba yɛ hee yì a̧ ir yɛ yaknɛ, kóó hee búk a̧ fo yɛ si hɛ̧ɛ̧ si hi̧i̧ ga ɓɔna, ɓɛɛ o bíí in o mɔɔ-gɔn-ta kɔ‘i beka ɔr yɛ h’ɛ́ɛ́ mɛ́ yɔ kaya na mbɛt.

¹⁵K’ɛ̀ɛ̀ nɛ́ duka tɛ tɔ̧ɔ̧ kpasawen nɛ̀ kɔ̧ɔ̧mɔ, ɛ́ɛ́ tɛ́ gasi tɛ́ mɔ k’ɛ́ɛ́ lɛŋ sitɛ wi nɛ̀ duk zu kiitɛ-wi; wi’ɛi nɛ́ Krist.

¹⁶Mɛ̀ nɛ́ tɛ-a a̧ kiitɛ nɛ̀ oi-aa yee ŋmaa ndaɗi nɛ̀ de-a wen zu o dokoɗo-tɛ, nɛ̀ ya sɛnɛ de nɛ̀ tom a tɛ ŋmaa nyɛm nɛ̀ ɗoŋ tom kɔ-wa kpɔk kpɔk. Nɛ́ hegɔ a̧ kiitɛ gasi nɛnɛ kpa nɛ̀ ŋgai zaŋ kɔ̧ɔ̧mɔ.

¹⁷Mɔ n'am yor zu-a nɛ̀ nin Gasa Wan tɔ̧ nɛnɛ h’ɛ́nɛ́ nɛ́ mɔ'ɔ: duka-a k’ɛ́nɛ́ a̧ ká hɔ ŋmaa in ko o gɔni-dùk nɛ̀ taamɔ kɔ-wa mgbɔ wa sitɛ geemɔ ga ɓɔna.

¹⁸Taamɔ kɔ-wa duk ti-tum, wa bo zaŋ duka-kpasa nɛ̀ Sɔ̧ ha̧ na wen wa iŋ mɔ na kóó tikiɗi, ɓɛɛ see-wa ɔ ŋgaya nyɛmna mbɛt.

¹⁹Wa iŋ kɔ-wa foe na; wa ha̧a̧ tɛ-wa tɛ dee o dàlà, ye nɛnɛ tɛ dee o ndiŋmɔ nɛtɛ nɛtɛ lɛŋ.

²⁰Ɓɛɛ k’ɛ́nɛ́, bó nɛ́ hegɔ ɛ́nɛ́ iŋa nɛ̀ Krist na.

²¹Kà bó nɛ́ a̧ á̧ wa tɔ̧ɔ̧ wen kɔ̧-a̧ h’ɛ́nɛ́ nɛ̀ mbetɛ, in kà bó nɛ́ a̧ á̧ wa usa mɔ kɔ̧-a̧ h’ɛ́nɛ́ nyɛm nɛ̀ ɗoŋ kpasawen nɛ̀ duk tɛ-a,

²²ɛ̀nɛ̀ é kuti duka-a k’ɛ́nɛ́ duk; ɛ̀nɛ̀ kpɔ̧́í̧ gba̧‘a̧ bíí nɛ̀ dee wɔ-mɔ duk tɛ-a ɔr nɛ̀ a̧ mɛ yɔ, yinɛ tɛ‘nɛ́.

²³Ɓɛɛ ɛ̀nɛ̀ é ha̧ Sɔ̧ mɛ́ kpai taamɔ in iŋamɔ k’ɛ́nɛ́ nɛ̀ mbe-a.

²⁴Ɛ̀nɛ̀ pí̧ nɛ́ mbe bíí tɛ‘nɛ́; wi’ɛi nɛ́ wan nɛ̀ Sɔ̧ dee hɔ ŋmaa in a̧ tɛ deemɔ nɛ̀ sa̧a̧-a̧ in nɛ̀ yuwar-a nɛ̀ tɛ́ kpasawen.

²⁵Hegɔ ndela bo tɛ‘nɛ́ ɓɔna. Kóó o ndé a̧ tɔ̧́ nɛ́ kpasawen ha̧ ŋmá-a, wen ɛ́ɛ́ lɛŋ nɛ́ dokoɗo-tɛ tɛ́ kiitɛ kpɔk.

²⁶Kà see'nɛ́ nɛ́ nyima, ɓɛɛ k’ɛ́nɛ́ de ɗaŋmɔ na; ká wese ye zu nyimsea k’ɛ́nɛ́ na.

²⁷K’ɛ́nɛ́ hu̧i̧ be war ha̧ wan-ɗaŋmɔ na.

²⁸Wi-zuzu a̧ é zu̧u̧ mɔ duk. A̧ a̧ dé nɛ́ tom nɛ̀ er-a nɛ̀ yuwar-a, wen ha̧ a̧ mɛ́ kpa mɔ n'aa tɛ́ gbak nɛ̀ wisan.

²⁹Ká ndàrá-nú‘nɛ́ tɔ̧ ŋma ɗaŋ ndiŋ wen nɛ̀ de na, na, ɓɛɛ ɛ̀nɛ̀ tɔ̧́ nɛ́ de wen nɛ̀ nyɛma mɛ́ gbak bíí in nɛ̀ tɛ́ ha̧ desee ha̧ o wi-zia-a.

³⁰K’ɛ́nɛ́ ha̧ tu̧u̧-see ha̧ Sa̧a̧ Ɔmi na, wen Sɔ̧ ea a̧ tɛ‘nɛ́ hee tumbal ga wen wese n'aa tɛ́ kpasi nɛ̀ ɛ́nɛ́.

³¹Ɗaŋsee, tu̧u̧-see, nyimsea, tuɓa-da̧ in da̧a̧ dara a̧ káɗí tɛ‘nɛ́ gu nɛ̀ o ɗaŋ nɛtɛ nɛtɛ lɛŋ.

³²Ɛ̀nɛ̀ yá nɛ̀ de-a in o ŋmaa, ɛ̀nɛ̀ kɔ̧́ ŋmaa, é nɛ̀ ɗaŋmɔ ha̧ o ŋmaa, hee mɔ'ɔ nɛ Sɔ̧ ee nɛ̀ ɗaŋmɔ h’ɛ́nɛ́ nɛ̀ ɗoŋ Krist ga.