Read Northwest Gbaya EFƐZIƐN 5 Bible Online

EFƐZIƐN 5 - Northwest Gbaya bible

EFƐZIƐN 5

¹Ɛ̀nɛ̀ zɔ́k ɗoŋ deemɔ ko Sɔ̧ wen ɛ́nɛ́ nɛ́ o bem n'aa kɔ̧a̧.

²Ɛ̀nɛ̀ dúk zaŋ kɔ̧ɔ̧mɔ hee mɔ'ɔ nɛ̀ Krist kɔ̧ɔ̧ nɛ̀ yɛ, ɓɛɛ ha̧ tɛ-wi wen zu yɛ hee ha̧a̧mɔ in mɔɔ-ɗafi-sɔ̧ nɛ̀ pɛ̀r-aa ɔ dee tɛ́ Sɔ̧ ga.

³Dee dàlà, dee ndiŋmɔ in dee wɔ-mɔ nɛtɛ nɛtɛ à̧ ká de mgbara'nɛ́ na, wen bó nɛ́ yuwar deemɔ ko o sa̧a̧-bíí a̧‘i na.

⁴K’ɛ́nɛ́ tɔ̧ wen foe, kóó wen nɛ̀‘i iŋ zu-a na, kóó ndiŋ wen na mbɛt, wen mɔɔ nɔ‘i nyɛm wen'nɛ́ na; ɓɛɛ ɛ̀nɛ̀ dé nɛ́ osoko ha̧ Sɔ̧ ɛ̧.

⁵Ɛ̀nɛ̀ íŋ nɛ̀ de-a'e, o wi-de-dàlà, o wi-de-ndiŋmɔ in o wi-de-wɔ-mɔ nɛtɛ nɛtɛ beka kpa mɔɔ-oi tɛ Wan ko Krist in Sɔ̧ na.

⁶K’ɛ́nɛ́ e ha̧ bíí mɛ́ ɔr'nɛ́ tɔ̧ nɛ̀ wen-gɔn-ta h’ɛ́nɛ́ na. Nɛ́ pɛrti mɔɔ nɔ‘i lɛŋ a̧ dak nyimsea ko Sɔ̧ pi̧ zu o wi-de-ŋgazu.

⁷K’ɛ́nɛ́ gbam in o pɛrti wi nɔ‘i na.

⁸Nɛti ɛ́nɛ́ so nɛ́ tum, ɓɛɛ kinii ɛ́nɛ́ nɛ́ sa̧a̧mɔ nɛ̀ ɗoŋ Gasa Wan, ɓɛɛ ɛ̀nɛ̀ dé mɔ hee o bem ko sa̧a̧mɔ ga.

⁹Wen waya-mɔ ko sa̧a̧mɔ nɛ́ dee demɔ, deemɔ nɛ̀ yuwar-a, in kpasawen.

¹⁰Ɛ̀nɛ̀ kɛ̧́ mgbara mɔ nɛ̀ dee tɛ Gasa Wan.

¹¹K’ɛ́nɛ́ ye tɛ dee o géé tom ko tum nɛ̀ gba̧a̧-a̧ bo na, na; ɓɛɛ ɛ̀nɛ̀ bá nɛ́ wa e kpɛ̧ɛ̧mɔ ɛ̧.

¹²Tɔ̧ɔ̧ ndaa mɔ nɛ̀ o wi nɔ‘i de nɛ̀ hu̧sa̧-a̧‘i nɛ́ mɔɔ-búù,

¹³ɓɛɛ mɔ nɛ̀‘i ba e kpɛ̧ɛ̧mɔ, sa̧a̧mɔ hɔɔ sɛnɛ kaɗi;

¹⁴wen mɔ lɛŋ nɛ̀ duk kpɛ̧ɛ̧mɔ kifa duk nɛ́ sa̧a̧mɔ kaɗi. Nɛ́ hegɔ sa'i tɔ̧‘e ndé: «Mɛ̀ kúr, mɛ́ wi-ɔ-ya’ɛ, mɛ̀ kúr mgbara o fio, ɓɛɛ Krist tɛ́ nyɛk zu-mɛ.»

¹⁵Ɛ̀nɛ̀ kásí zu tɛ duka-a k’ɛ́nɛ́; k’ɛ́nɛ́ de mɔ hee mgbelewi ga na, ɓɛɛ ɛ̀nɛ̀ dé mɔ hee o wi nɛ̀ a̧a̧ nɛ̀ kpasa taamɔ ga.

¹⁶Ɛ̀nɛ̀ dé mɔ tɛ ŋgimbi-a, wen wese n’ɛɛ ya sɛnɛ kinii’ɛ nɛ́ ɗaŋ wese.

¹⁷K’ɛ́nɛ́ duk o wi-iŋ-mɔ-na, na, ɓɛɛ ɛ̀nɛ̀ kíí mɛ iŋ mgbara mɔ nɛ̀ Gasa Wan kɔ̧a̧.

¹⁸K’ɛ́nɛ́ gbɛ dɔ̧ɔ̧ na wen mɔ‘i tɛ́ ɗaŋ‘nɛ́, ɓɛɛ ɛ̀nɛ̀ dúk nɛ̀ Sa̧a̧ Ɔmi.

¹⁹K’ɛ̀nɛ̀ nɛ́ mɔi̧a ŋmaa, ɓɛɛ ɛ̀nɛ̀ bíí o gima-wor-sɔ̧, o gima-zɔn-sɔ̧ in o gima nɛ̀ Sa̧a̧ Ɔmi usi h’ɛ́nɛ́. Ɛ̀nɛ̀ bíí gima gasi nɛ̀ Gasa Wan nɛ̀ see'nɛ́ lɛŋ.

²⁰Ɛ̀nɛ̀ dé osoko ha̧ Sɔ̧ Dáà nɛ̀ nin Gasa Wan k’ɛ́ɛ́ Jesu Krist ŋgimbi lɛŋ in zu mɔ lɛŋ.

²¹Ɛ́nɛ́ o wi-yu-kíí Krist, ɛ̀nɛ̀ mbó zu ha̧ o ŋmaa.

²²O okoo, ɛ̀nɛ̀ mbó zu ha̧ wii k’ɛ́nɛ́ hee ha̧ Gasa Wan ga.

²³Wen nɛ́ wíì a̧ ɔ wan zu kóò, hee mɔ'ɔ nɛ Krist ɔ nɛ̀ wan zu zuduk bíí kɔ‘i’ɛ ga, ɓɛɛ Krist nɛ́ Wan-kpasi zuduk bíí kɔ‘i nɛ̀ duk nɛ́ kiitɛ-a.

²⁴Mɛ̀ nɛ́ wen hegɔ, okoo a̧ mbó zu ha̧ wíì tɛ mɔ lɛŋ, hee mɔ'ɔ nɛ̀ zuduk bíí ko Krist mbo nɛ̀ zu ha̧ Krist’ɛ ga.

²⁵O wiwii, ɛ̀nɛ̀ kɔ̧́ kóò k’ɛ́nɛ́ hee mɔ'ɔ nɛ̀ Krist kɔ̧ɔ̧ nɛ̀ zuduk bíí kɔ‘i ɓɛɛ ká ha̧ tɛ-wi wen-aa’ɛ ga.

²⁶Mɔ n'aa dea'i mɛ̀ nɛ́ wen ha̧ war-tɛ-wa mɛ́ sa̧ tɛ zuia wa nɛ̀ yì nɛ̀ fɔr mɔ, in sɛn tɛ wen.

²⁷A̧ kɔ̧ɔ̧ so ha̧ zuduk bíí kɔ̧-a̧ mɛ́ duk yí-a nɛ̀ de-a, nɛ̀ ŋma ndiŋmɔ kóó kaia-guru-mɔ bo sɛnɛ na in nɛ̀ ŋma mɔ ɗaŋ tɛ-a na mbɛt, ha̧ zuduk bíí‘i mɛ́ duk nɛ̀ sa̧a̧-a̧ nɛ̀ ŋma wen bo zu wa na.

²⁸Nɛ́ hegɔ a̧ wíì tɛ́ kɔ̧ nɛ̀ kóò hee mɔ'ɔ n'aa kɔ̧ nɛ̀ kiitɛ-a ga. Wi nɛ kɔ̧ kóò kɔ̧ nɛ́ kiitɛ woyo.

²⁹Ŋma bíí nɛ̀ sɛn kiitɛ bo na. Wi dai nɛ́ kiitɛ-wi zɔk nɛnɛ nɛ̀ de-a, hee mɔ'ɔ nɛ̀ Krist de in zuduk bíí kɔ‘i’ɛ ga.

³⁰Bó nɛ́ ɛ́ɛ́ nɛ́ o dokoɗo-tɛ Krist na nde?

³¹Mɛ̀ nɛ́ wen hegɔ, wiwii tɛ e dáà in nàà kɔ‘i duk mɛ́ ndaɗi in kóò kɔ‘i, ɓɛɛ wa yiitoo tɛ́ duk nɛ́ kiitɛ kpɔk.

³²Ɗukamɔ‘i ɔ gasa: mi'e mɔ‘i zɔk nɛ́ Krist in zuduk bíí kɔ‘i.

³³Hegɔ, kóó o ndé mgbara'nɛ́ a̧ kɔ̧́ kóò hee kiitɛ ga, ɓɛɛ kóò a̧ tú̧ tɛ wíì.