Read Northwest Gbaya FILIPIƐN 1 Bible Online

FILIPIƐN 1 - Northwest Gbaya bible

FILIPIƐN 1

¹Nɛ́ mi Paul in Timotee, o wi-de-tom ko Jesu Krist a̧ tom kalata’ɛ ha̧ o sa̧a̧-bíí lɛŋ nɛ̀ ɗoŋ Jesu Krist, ha̧ o gasa wi-duk-zu zuduk bíí ko Krist in o wi-gbak-wi nɛ̀ ya sɛn Filipii.

²Deemɔ nɛ̀ ta-tɛ in ga̧a̧mɔ ko Sɔ̧ Dáà k’ɛ́ɛ́ in ko Gasa Wan Jesu Krist à̧ dúk in'nɛ̀ɛ́.

³Mi de osoko ha̧ Sɔ̧ kɔ‘m ɓɔnsɛnɛ ŋgimbi n'am ta mɔ wen'nɛ́.

⁴Ɓɔnsɛnɛ sɛn tɛ kɔfa-sɔ̧ kɔ‘m wen'nɛ́ lɛŋ, mi kɔfi Sɔ̧ nɛ̀ desee,

⁵wen gbaka'm n’ɛ̀nɛ̀ gbaka tɛ tɔ̧ɔ̧ De Mbe Wen nɛ̀ ku̧u̧naŋ-a mɛ[1] hɔ nɛnɛ kinii.

⁶Mi iŋa nɛ̀ mbetɛ: wi nɛ̀ ku̧u̧ naŋ dee de tom mgbara'nɛ́ tɛ́ yor ɗoŋ-aa hɔ wese nɛ̀ Jesu Krist tɛ́ pii ɗoŋ.

⁷Taamɔ kɔ‘m a̧a̧ zu'nɛ́ lɛŋ, ɓɛɛ yuwar-a nɛ́ mɔ‘i; wen ŋgimbi n'am duka so géè, tɔ̧ nɛ̀ De Mbe Wen, yor nɛnɛ ɗoŋ-aa in ŋgimbi n'am a̧a̧ kɔ̧ zɔɓɔ kinii’ɛ mbɛt, ɛ́nɛ́ lɛŋ gbaka so'm tɛ́ tom nɛ̀ Sɔ̧ ha̧a̧ nɛ̀ ta-tɛ ha̧‘m.

⁸Sɔ̧ nɛ́ sedaako'e mi kɔ̧ɔ̧‘nɛ́ nɛ̀ kpasa kɔ̧ɔ̧mɔ ko Jesu Krist.

⁹Kɔfa-sɔ̧ kɔ‘m wen'nɛ́ nɛ́ mɔ'ɔ: kɔ̧ɔ̧mɔ k’ɛ́nɛ́ a̧ gásí gasi siti gan kuti-a nɛ̀ kpasa iŋa-mgbara-mɔ in ziamɔ

¹⁰wen h’ɛ́nɛ́ mɛ́ iŋ kɛ̧ɛ̧-mgbara-mɔ nɛ̀ ɔ dee. Hegɔ, yuwar deemɔ k’ɛ́nɛ́ tɛ́ sa̧, nɛ̀ ŋma wen beka bó zu'nɛ́ wese pia-ɗoŋ ko Krist na.

¹¹Deemɔ nɛ̀ yuwar-a tɛ́ dɔk tɛ duka-a k’ɛ́nɛ́ nɛ̀ ɗoŋ Jesu Krist, wen ha̧ gasamɔ in zɔnamɔ mbɛt mɛ́ duk nɛ́ ko Sɔ̧.

¹²O nya'm, mi kɔ̧ɔ̧ h’ɛ́nɛ́ mɛ́ iŋ‘e ndé, mɔ nɛ̀ hɔɔ zu'm'i, mɛ̀ nɛ́ wen ha̧ De Mbe Wen mɛ́ nɛ̀ siti.

¹³Wen sɛn mgbara o wi-pɛm-wannu in fara lɛŋ, o bíí iŋa nɛ̀ de-a'e, mi yee zɔɓɔ wen zu Krist.

¹⁴Ɓɛɛ o dɔka nya yɛ kpaa nɔɔ-ŋgiɗi nɛ̀ nin Gasa Wan tɛ yee zɔɓɔ kɔ‘m, kpa nɛ̀ ŋgai tɛ tɔ̧ɔ̧ De Mbe Wen siti gan kuti-a; kíì de wa na.

¹⁵Nɛ̀ mbetɛ, o ŋma usi wen ko Krist nɛ̀ aa-see-mɔ, we nɛ̀ zu nɛ̀‘m, ɓɛɛ o ŋma usi kɔ‘i nɛ̀ see kpɔk.

¹⁶O sɔŋkur wi nɔ'ɔ de mɔ nɛ̀ kɔ̧ɔ̧mɔ, wen nɛ̀ wa iŋa'e Sɔ̧ ea'm mɛ́ yor ɗoŋ De Mbe Wen.

¹⁷Ɓɛɛ o kuti wi nɔ‘i tɔ̧ De Mbe Wen ko Krist, we nɛ̀ zu nɛ̀‘m. Yuwar taamɔ kɔ-wa sa̧ na, wen wa kɔ̧ɔ̧ ha̧ zɔɓɔ kɔ‘m mɛ́ ŋgai ŋgai siti.

¹⁸Ɓɛɛ wen bo na! Kóó wa a̧a̧ nɛ̀ o ŋma ɗaŋ taamɔ kɔ̧ see-wa usi nɛ̀ wen ko Krist, kóó wa tɔ̧ nɛ̀ kpasawen, wen ko Krist nɛ́ nɛ̀ɛ́ siti. Mɔ‘i ha̧ nɛ́ desee ha̧‘m, ɓɛɛ mi tɛ́ kpa kànà desee tɛ́ mɔ‘i siti mbɛt.

¹⁹Mi iŋa'e mɔ‘i tɛ́ de ha̧‘m mɛ́ kpasi wen zu kɔfa-sɔ̧ k’ɛ́nɛ́ in wen gbakamɔ ko Sa̧a̧ Ɔmi ko Jesu Krist mbɛt.

²⁰Foe beka de'm tɛ kpasa pɛma-mɔ in ee-ta kɔ‘m na. Ɓɛɛ kinii hegɔ yaknɛ kpoo nɛ kpoo zaŋ ee-ta kɔ‘m, kóó mi duk kpasa, kóó mi fea mbɛt, kiitɛ‘m lɛŋ tɛ́ de ha̧ Krist mɛ́ kpa zɔnamɔ.

²¹War kɔ‘m, duka-kpasa nɛ́ Krist, ɓɛɛ fea-a nɛ́ de mɔ wen am.

²²Kà duka-kpasa kɔ‘m zu nù'ɛ nɛ́ dee ha̧ tom kɔ‘m mɛ́ pɛsi dam fara lɛŋ, ɓɛɛ mi iŋ mɔ n'am tɛ hok na.

²³Mi a̧a̧ mgbara mɔ yiitoo: mi kɔ̧ɔ̧ ha̧‘m mɛ́ nɛ̀ɛ́ duk in Krist, nɛ́ i̧i̧ a̧‘m kɔ̧ɔ̧ nyɛmna;

²⁴ɓɛɛ mɔ nɛ̀ gana kinii, mɛ̀ nɛ́ ha̧‘m mɛ́ duk zu nù'ɛ wen zu'nɛ́ sɛ.

²⁵Nɛ̀ mbetɛ, mi iŋa'e mi tɛ́ duk ɓɔn katɛ‘nɛ́ lɛŋ, wen ha̧ tom k’ɛ́nɛ́ mɛ́ nɛ̀ siti, in h’ɛ́nɛ́ mɛ́ kpa desee tɛ kɔ̧ɔ̧ɗɔɔwen k’ɛ́nɛ́,

²⁶wen ha̧ gasamɔ n’ɛ̀nɛ̀ a̧a̧ nɛnɛ tɛ Krist mɛ́ gasi wen zu'm tɛ pia-ɗoŋ kɔ‘m mgbara'nɛ́.

²⁷Mɔ kpɔk, duka-a k’ɛ́nɛ́ a̧ nyɛ́m nɛ̀ ɗoŋ De Mbe Wen ko Krist, wen kà‘m nɛ́ nɛ̀ɛ́ mɛ́ zɔk'nɛ́, kóó kà‘m nɛ́ nɛ̀ɛ́ na, ha̧‘m mɛ́ zii'e ɛ́nɛ́ yor nɛ̀ nɔa-a tɛ taamɔ kpɔk, h’ɛ́nɛ́ mɛ́ bi biro nɛ̀ see kpɔk nɛ̀ kɔ̧ɔ̧ɗɔɔwen ko De Mbe Wen.

²⁸K’ɛ́nɛ́ dé kíì o bíí nɛ̀ kur zu'nɛ́ na, wen mɔ‘i tɛ́ usi nɛ́ tika-a kɔ-wa ha̧ wa, ɓɛɛ k’ɛ́nɛ́, nɛ́ yuwar-kpasa-a; ɓɛɛ mɔ‘i tɛ́ nɛ̀ tɛ́ Sɔ̧.

²⁹Wen a̧ dee mɔ nɛ̀ ta-tɛ h’ɛ́nɛ́ wen zu Krist, bó nɛ́ h’ɛ́nɛ́ mɛ́ kɔ̧ ɗɔaa ha̧ Krist ɓɛɛ na, mɛ̀ nɛ́ wen h’ɛ́nɛ́ mɛ́ zɔk bɔnɛ wen zu a̧ mbɛt.

³⁰Ɛ́nɛ́ bí nɛ́ kpɔk biro n’ɛ̀nɛ̀ zɔka so'm fara bia-a; ɓɛɛ ɛ́nɛ́ iŋa'e, mi ɓɔna kànà tɛ bia-a nɛnɛ.