Read Northwest Gbaya FILIPIƐN 2 Bible Online

FILIPIƐN 2 - Northwest Gbaya bible

FILIPIƐN 2

¹Kà saa-sara nɛ̀ ɗoŋ Krist, kóó kpaa-nɔɔ-ŋgiɗi tɛ kɔ̧ɔ̧mɔ, kóó yaa-a kpɔk nɛ̀ ɗoŋ Sa̧a̧ Ɔmi, in deako nɛ̀ kɔ̧ɔ̧mɔ nɛ́ boa,

²ɓɛɛ ɛ̀nɛ̀ dé ha̧‘m mɛ́ kpa kpasa desee tɛ yaa-a k’ɛ́nɛ́ nɛ̀ de-a in o ŋmaa. Ɛ̀nɛ̀ dúk nɛ̀ kɔ̧ɔ̧mɔ, nɛ̀ see kpɔk, in ɛ̀nɛ̀ kíí mɛ́ ya kpɔk in o ŋmaa.

³K’ɛ́nɛ́ we zu nɛ̀ ŋmaa duk nɛ̀ tɛ‘nɛ́ na, ɓɛɛ ɛ̀nɛ̀ dé mɔ nɛ̀ mɔka-see in o ŋmaa. Ɛ̀nɛ̀ zɔ́k o dɔka bíí hee o gasawi k’ɛ́nɛ́ ga.

⁴Ká o ndé kii nɛ́ mɔ kɔ‘i ɓɛɛ na, ɓɛɛ a̧ a̧ kíí mɔ wen o dɔka bíí mbɛt.

⁵Ɛ̀nɛ̀ dúk nɛ̀ de taamɔ mgbara ŋmaa hee ko Krist ga:

⁶Kiitɛ-a kpɔk in ko Sɔ̧, ɓɛɛ taamɔ kɔ̧-a̧ bó nɛ́‘e, nyɛma ŋmaa in Sɔ̧ a̧ a̧ tɛ́ kii na.

⁷A̧ ee mɔ kɔ̧-a̧ lɛŋ duk ba nɛ̀ fara hee wi-de-tom ga, ɓɛɛ a̧ kifi duk hee bíí ga. Sɛn tɛ zɔka a̧ ɓɛɛ wi iŋa'e a̧ nɛ́ bíí.

⁸A̧ mɔka see-aa, mbo nɛ̀ zu hegɔ hɔ tɛ fio, fio wan mɛ́ zu te-diŋa.

⁹Mɛ̀ nɛ́ wen hegɔ sa Sɔ̧ ba a̧ e tɛ mgbák gasa fara, ɓɛɛ a nin nɛ̀ gana o dɔka nin lɛŋ ha̧ a̧,

¹⁰wen ha̧ kóó o ndé nɛ̀ duk yiwese, kóó zaŋnu’ɛ, in o wan mɛ́ ɗɔɔ nù mbɛt, mɛ́ gbɛ zugur nù nɛ̀ nin-a,

¹¹ɓɛɛ ha̧ ndàrá-nú bíí lɛŋ mɛ́ tɔ̧‘e, Gasa Wan nɛ́ Jesu Krist, zɔn nɛ̀ Sɔ̧ Dáà.

¹²Mɛ̀ nɛ́ wen hegɔ, o wi n'am kɔ̧ɔ̧ nyɛmna, ɛ́nɛ́ nɛ̀ mbo so zu ɓɔnsɛnɛ, ɛ̀nɛ̀ mbó zu, bó nɛ́ wen yí‘m ɓɛɛ na, ɓɛɛ kinii gan batɛ ŋgimbi n'am bo mgbara'nɛ́ na mbɛt. Ɛ̀nɛ̀ dé tom nɛ̀ kíì in naka-tɛ h’ɛ́nɛ́ mɛ́ kpasi;

¹³wen nɛ́ Sɔ̧'ɔ̧ de tom tɛ‘nɛ́ h’ɛ́nɛ́ mɛ́ kpɛk mɔ, ɓɛɛ ɛ́nɛ́ dee mbɛt nyɛm nɛ̀ ɗoŋ ee-zu-mɔ kɔ̧-a̧.

¹⁴K’ɛ́nɛ́ dé mɔ nɛ̀ ku̧i̧amɔ in sii-kafɛ na,

¹⁵wen h’ɛ́nɛ́ mɛ́ ya nɛ́ o bíí nɛ̀ wen bo zu wa na, nɛ̀ war-tɛ ɔ sa̧a̧, nɛ̀ ya nɛ́ o bem ko Sɔ̧ nɛ̀ ɗaŋmɔ bó tɛ-wa na sɛn mgbara ɗaŋ kpar-bíí-de-ndela. Gun sa̧a̧mɔ zu nù'ɛ a̧ tɛ́ nɛ̀ tɛ‘nɛ́,

¹⁶wen ɛ́nɛ́ a̧a̧ nɛ̀ wen-kpasi-bíí; ɓɛɛ tɛ wese ko Krist, gasamɔ kɔ‘m, nɛ́ ɛ́nɛ́, ha̧‘m mɛ́ iŋ‘e, bó nɛ́ mi maa yì zɔk nɛ̀ bɔnɛ sɔɔ géè na.

¹⁷Ɓɛɛ kóó nɛ́ tɔk-tɛ‘m a̧ tɛ́ a nù nɛ̀ aa-zɛzɛ mɛ́ gbak'nɛ́ tɛ́ yuwar ɗafa-sɔ̧, in tɛ́ tom kɔ̧ɔ̧ɗɔɔwen k’ɛ́nɛ́, mi tɛ́ kpa desee, ɓɛɛ mi tɛ́ de nyɛŋɛ in'nɛ̀ɛ́ lɛŋ.

¹⁸Ɛ́nɛ́ mbɛt, ɛ̀nɛ̀ kpá desee, ɓɛɛ ɛ̀nɛ̀ dé nyɛŋɛ in am.

¹⁹Mi taa mi tɛ́ tom Timotee nɛnɛ tɛ‘nɛ́, kà Gasa Wan Jesu nɛ́ kɔ̧a̧, wen ha̧‘m mɛ́ kpa nɔɔ-ŋgiɗi tɛ zia nyɛrɛmɔ k’ɛ́nɛ́.

²⁰Ŋma bíí nɛ̀ ta mɔ wen ɛ́nɛ́ hee a̧ ga bo na; taamɔ k’ɛ́ɛ́ in a̧ nyɛma ŋmaa.

²¹Oi bíí lɛŋ kíí nɛ́ mɔ wen tɛ-wa nɛ̀ tɛ-wa, nɛ̀ bó nɛ́ wen zu Jesu Krist na.

²²Ɓɛɛ ko Timotee, ɛ́nɛ́ iŋa hee mɔ'ɔ n'aa dee nɛ̀ tom usa De Mbe Wen in am, hee mɔ'ɔ nɛ bem de nɛ̀ tom in dáà'ɛ ga.

²³Kà‘m nɛ́ iŋa mɔ nɛ̀ tɛ́ hɔ zu'm nɛ̀ sa̧a̧-a̧ kaɗi, ɓɛɛ nɛ́ a̧ a̧‘m ta mɛ́ tom nɛnɛ h’ɛ́nɛ́.

²⁴Mi e ta nɛ̀ Gasa Wan'e, mi nɛ̀ tɛ‘m tɛ́ hɔ tɛ‘nɛ́ mbɛt.

²⁵Ɓɛɛ mi taa ɔ dee ha̧‘m mɛ́ tom Epafrodit siɗoŋ tɛ‘nɛ́. A̧ nɛ́ nya'm nɛ̀ duk nɛ́ gbama wi-de-tom in gbama wi-biro in am. Nɛ́ ɛ́nɛ́'ɛ toma so a̧ tɛnɛ mɛ́ gbak am tɛ́ tom wen mi kíí so nɛ́ ŋma bíí nɛ̀ tɛ́ gbak am.

²⁶A̧ kɔ̧ɔ̧ nyɛmna mɛ́ nɛ̀ɛ́ zɔk'nɛ́ lɛŋ woyo; ɓɛɛ zia nyɛrɛ ɔɔ-zɛɛ kɔ̧-a̧ n’ɛ̀nɛ̀ zia ha̧a̧ dita-see ha̧ a̧ batɛ.

²⁷Nɛ̀ mbetɛ, a̧ ɔɔ zɛɛ nyɛmna, oi-aa ŋgɛlɛk a̧ tɛ̀ɛ́ fe; nɛ́ mɔ'ɔ nɛ̀ Sɔ̧ dee ko ha̧ a̧, bó nɛ́ ha̧ a̧ ɓɛɛ na, ɓɛɛ ha̧‘m mbɛt wen ká‘m tɛ̀ɛ́ kpa mbe dita-see woyo.

²⁸Nɛ́ hegɔ sa tɛ‘m hai tɛ toma a̧ siɗoŋ h’ɛ́nɛ́ mɛ́ zɔk a̧ mɛ́ kpa desee woyo, ɓɛɛ ha̧ dita-see mɛ́ yu benaŋ tɛ‘m.

²⁹Ɛ̀nɛ̀ kpɛ́k a̧ nɛ̀ gasa desee nɛ̀ ɗoŋ Gasa Wan, ɓɛɛ ɛ̀nɛ̀ tú̧ tɛ o gasawi hee a̧ ga,

³⁰wen a̧ tɛ̀ɛ́ fe so wen zu tom ko Sɔ̧. A̧ tɛ̀ɛ́ fe so tɛ gbaka'm, wen bó nɛ́ ɛ́nɛ́ nɛ̀ tɛ‘nɛ́ kpaa so yuwar mɛ́ gbak am na.