Read Northwest Gbaya FILIPIƐN 4 Bible Online

FILIPIƐN 4 - Northwest Gbaya bible

FILIPIƐN 4

¹Wen hegɔ, o nya'm n'am kɔ̧ɔ̧ nyɛmna, n'am kɔ̧ɔ̧ mɛ́ zɔk woyo mbɛt, ɛ́nɛ́ nɛ́ desee in mɔɔ-duk-tɛ kɔ‘m. Ɛ̀nɛ̀ yór nɛ̀ nɔa-a tɛ duka-a k’ɛ́nɛ́ hegɔ in Gasa Wan.

²Mi ai nú h’ɛ́nɛ́ Evodii in Sintik h’ɛ́nɛ́ mɛ́ ya nɛ̀ see kpɔk in ŋmaa tɛ Gasa Wan.

³Ɓɛɛ kɔ-mɛ, mgbák gbama wí-de-tom[3] in am, mi ak ha̧ mɛ́ mɛ́ gbak wa, wen ɛ́ɛ́ in wa bìì so biro wen zu De Mbe Wen, in Klement ká bá nɛ̀ oi o gbama-tom kɔ‘m nɛ̀ nin-wa a̧a̧ zaŋ kalata duka-kpasa.

⁴Ɛ̀nɛ̀ dé nyɛŋɛ nɛ̀ ɗoŋ Gasa Wan ŋgimbi lɛŋ. Mi tɔ̧ h’ɛ́nɛ́ woyo, ɛ̀nɛ̀ dé nyɛŋɛ.

⁵Ɛ̀nɛ̀ é ha̧ o bíí lɛŋ mɛ́ iŋ dee demɔ k’ɛ́nɛ́. Gasa Wan hɛɗa pia ɗoŋ kaɗi.

⁶Ká ɗɛɗɛ‘nɛ́ gɔ́n tɛ́ ŋma mɔ na, tɛ́ mɔ lɛŋ, ɛ̀nɛ̀ kɔ́fí Sɔ̧, ai nɛ̀ nú, de nɛ̀ osoko, e nɛ̀ o akamɔ k’ɛ́nɛ́ lɛŋ ti a̧.

⁷Ɓɛɛ ga̧a̧mɔ ko Sɔ̧ nɛ̀ gana iŋamɔ ko bíí lɛŋ tɛ́ pɛm see'nɛ́ in taamɔ k’ɛ́nɛ́ nɛ̀ ɗoŋ Jesu Krist.

⁸O nya'm, mɔ lɛŋ nɛ̀ duk nɛ́ kpasamɔ, nɛ̀ duk nɛ́ tu̧u̧-tɛ-mɔ, nɛ̀ duk nɛ̀ yuwar-a, nɛ̀ war-a ɔ sa̧a̧, nɛ̀ bíí nyɛma mɛ́ kɔ̧ zɔn nɛnɛ mbɛt, in demɔ nɛ̀ bíí lɛŋ nyɛma mɛ́ zɔn, ɛ̀nɛ̀ bá o mɔɔ nɔ‘i lɛŋ de nɛ̀ tom.

⁹Mɔ n’ɛnɛ yamba, n’ɛnɛ iŋa, n’ɛnɛ zia nú‘m, n’ɛnɛ zɔka'm tɛ̀ dea-a, mɔɔ nɔ‘i lɛŋ ɛ̀nɛ̀ dé, ɓɛɛ Sɔ̧ Wan-ga̧a̧mɔ tɛ́ duk in'nɛ̀ɛ́.

¹⁰Mi kpaa desee batɛ nɛ̀ ɗoŋ Gasa Wan, wen taamɔ k’ɛ́nɛ́ pii tɛ‘m kpaa war mɛ́ hɔ gba̧a̧.

¹¹Bó nɛ́ mi tɔ̧ wen'i wen mɔ nɛ ɓan am na, wen mi iŋa duka-a nɛ̀ desee zu mɔ n'am a̧a̧ nɛnɛ.

¹²Mi iŋa duka-a tɛ san, in tɛ bɔtɛ mbɛt. Mi iŋa yuwar duka-a fara lɛŋ tɛ́ ŋgimbi lɛŋ, duka-a nɛ̀ sura-zaŋ, duka-a nɛ̀ wɔ, duka-a tɛ dɔka mɔ, kóó tɛ ŋgimbi n'am bó nɛ̀ mɔ na mbɛt.

¹³Mɔ lɛŋ mi nyɛma wen-aa wen zu wi nɛ̀ ha̧ ŋgai ha̧‘m.

¹⁴Kóó hegɔ mbɛt, ɛ́nɛ́ dee demɔ tɛ zɔka ŋma nú bɔnɛ in am mbɛt.

¹⁵Ɛ́nɛ́ o be Filipii, ɛ́nɛ́ iŋa ŋgimbi n'am kura nɛnɛ Masedoan tɛ ku̧u̧ naŋ tɔ̧ɔ̧ De Mbe Wen, ŋma zuduk bíí ko Krist gbak am na, kànà nɛ́ ɛ́nɛ́ kpɔk ɓɛɛ.

¹⁶Ŋgimbi n'am duka nɛnɛ Tesalonik, kànà nɛ́ ɛ́nɛ́'ɛ toma gbaka-mɔ ha̧‘m, ɓɛɛ bó nɛ́ war kpɔk ɓɛɛ na.

¹⁷Bó nɛ́ mi kii nɛ́ géé gbaka-mɔ na; mɔ n'am kii mɛ̀ nɛ́ wen ha̧ tom n’ɛnɛ de'i mɛ́ wai.

¹⁸Mɔ n’ɛnɛ toma ha̧‘m'i, mi kpaa, ɓɛɛ mɔ‘i ɔ kana dɔka mbɛt. Mɔ n’ɛnɛ toma nɛ̀ Epafrodit'i, mi kpaa nyɛm am gan gan. Gbaka-mɔ‘i nɛ́ de pɛr-nyama nɛ̀ duk nɛ́ ɗafa-sɔ̧ nɛ̀ Sɔ̧ kpɛka in nɛ̀ dee tɛ-a mbɛt.

¹⁹Ɓɛɛ Sɔ̧ kɔ‘m tɛ́ ha̧ mɔ n’ɛnɛ kɔ̧a̧ lɛŋ h’ɛ́nɛ́ nɛ̀ de-a nyɛm nɛ̀ ɗoŋ dɔka kpaamɔ kɔ̧-a̧ nɛ̀ ɗoŋ Jesu Krist.

²⁰Gasamɔ a̧ dúk nɛ́ ko Sɔ̧ Dáà k’ɛ́ɛ́ kpoo nɛ kpoo. Aamɛn.

²¹Ɛ̀nɛ̀ fán o sa̧a̧-bíí kpɔk kpɔk nɛ̀ ɗoŋ Jesu Krist. O nya-wi nɛ̀ ya in am hɛ̧ɛ̧ fana ɛ́nɛ́.

²²O sa̧a̧-bíí lɛŋ fana ɛ́nɛ́, gana gan o bíí nutua ko Sezar.

²³Deemɔ nɛ̀ ta-tɛ ko Gasa Wan Jesu Krist a̧ dúk in'nɛ̀ɛ́.