Read Northwest Gbaya KOLOSIƐN 2 Bible Online

KOLOSIƐN 2 - Northwest Gbaya bible

KOLOSIƐN 2

¹Mi kɔ̧ɔ̧ h’ɛ́nɛ́ mɛ́ iŋ ŋga biro n'am bí wen zu'nɛ́, in wen o bíí Laodisee, ká bá nɛ̀ o ŋma dɔka bíí nɛ̀ tɛ́ zɔk am hɔ̧ɔ̧ na mbɛt.

²Mi kpɛka ha̧‘m mɛ́ de biro wen ha̧ wa mɛ́ nɔ ŋgiɗi duk nɛnɛ kpɔk in o ŋmaa nɛ̀ kɔ̧ɔ̧mɔ, in ha̧ wa mɛ́ kpa dɔka iŋamɔ wen iŋa ɗukamɔ ko Sɔ̧: ɗukamɔ‘i nɛ́ Krist,

³nɛ̀ o dɔka iŋa-mgbara-mɔ in iŋamɔ lɛŋ hu̧sa̧ tɛ a̧.

⁴Mi tɔ̧ wen’ɛ h’ɛ́nɛ́ wen ká bíí tɛɛ ɔr'nɛ́ nɛ̀ tɔ̧ɔ̧ yɔka-wen.

⁵Nɛ̀ mbetɛ kiitɛ‘m ɔ nyɛi̧a nɛ̀ ɛ́nɛ́, ɓɛɛ mi a̧a̧ ká̧ tɛ‘nɛ́ tɛ taamɔ kɔ‘m. Mi dúk nɛ̀ desee nyɛmna tɛ duka-a n’ɛnɛ duk, yor nɛ̀nɛ́ nɛ̀ nɔa-a zu kɔ̧ɔ̧ɗɔɔwen k’ɛ́nɛ́ tɛ Krist.

⁶Hee mɔ'ɔ n’ɛnɛ kpɛka'e Krist Jesu nɛ́ Gasa Wan ga, ɛ̀nɛ̀ nɛ́ kànà nɛ́ ɗoŋ-aa.

⁷Ɛ̀nɛ̀ ndáɗí in a̧, ɓɛɛ gun'nɛ́ a̧ dúk tɛ-a. Ɛ̀nɛ̀ yór nɛ̀ nɔa-a zu kɔ̧ɔ̧ɗɔɔwen k’ɛ́nɛ́ nyɛm nɛ̀ ɗoŋ mɔ nɛ̀‘i usa h’ɛ́nɛ́, ɓɛɛ ɛ̀nɛ̀ dé osoko nɛ̀ dɔka-a mbɛt.

⁸Ɛ̀nɛ̀ zɔ́k tɛ‘nɛ́ nɛ̀ de-a wen ká taamɔ ko bíí tɛ́ɛ̀ ba'nɛ́ hee pɛ́r ga. Mɔ‘i nɛ́ o taamɔ-zik-zu-wi nɛ̀ we nɛ́ ɗoŋ mɔ ko o zɔmdáa, usi nɛ̀ mɔɔ-zaŋnu, nɛ̀ bó nɛ́ ko Krist na.

⁹Wen mɔ nɛ̀ a̧a̧ tɛ́ Sɔ̧ lɛŋ duk tɛ kiitɛ Krist;

¹⁰hegɔ, ɛ́nɛ́ kpaa mɔ lɛŋ tɛ wi nɛ̀ ɔ wan zu o ɔmi lɛŋ nɛ̀ a̧a̧ nɛ̀ ŋgai in nɛ̀ mɔ zíí nɛ̀ wa.

¹¹Wa gɔna bɔr'nɛ́ tɛ̀ duka-a k’ɛ́nɛ́ tɛ Krist,[1] nɛ̀ bó nɛ́ er bíí a̧ gɔna na. Gɔna-bɔr nɛ̀ tɛ́ nɛ̀ tɛ Krist'i fo nɛ́ ŋgai ko mur-tɛ yinɛ.

¹²Ŋgimbi nɛ̀ wa zuia nɛ̀ ɛ́nɛ́, wa guna'nɛ́ in Krist, ɓɛɛ ɛ́nɛ́ kur in a̧ woyo, wen ɛ́nɛ́ kɔ̧ɔ̧ ɗɔɔ ŋgai ko Sɔ̧ nɛ̀ dee ha̧ a̧ mɛ́ kur ŋgɔn tɛ́ fio.

¹³Ɛ́nɛ́ n’ɛnɛ fee so wen yɔɔ-kaya in wen gɔna-bɔr n’ɛnɛ gɔn na’ɛ, Sɔ̧ kpasa'nɛ́ in Krist kaɗi. A̧ ee yɔɔ-kaya k’ɛ́ɛ́ lɛŋ h’ɛ́ɛ́ mbɛt,

¹⁴a̧ baa kalata-gbina-heembea nɛ̀ kita tɛ̀ɛ́ ba ɛ́ɛ́ wen-aa'i yinɛ, a̧ baa kalata'i mgboi zu te-diŋa;

¹⁵A̧ gbina ŋgai ko o ɔmi nɛ̀ ɔɔ so wan nɛ̀ mɔ zíí nɛ̀ wa yinɛ, a̧ fɛŋa wa ti bíí, gbur nɛ̀ wa hee o bara-biro ga oi gbina-biro kɔ̧-a̧ zu te-diŋa.

¹⁶Kinii, k’ɛ́nɛ́ e ha̧ bíí mɛ́ ba wen zu'nɛ́ wen nyɔŋmɔ in dɔ̧ɔ̧ na mbɛt, kóó wen gbaŋa, kóó gbaŋa wan mɛ́ mbe yí-zɛ, kóó zu wese-ɔm-tɛ na mbɛt.

¹⁷Mɔ‘i lɛŋ nɛ́ gi̧ɔ̧ demɔ nɛ̀ tɛ́ hɔ mɛ́ ɗoŋ, ɓɛɛ kpasamɔ tɛ́ nɛ̀ tɛ́ Krist.

¹⁸K’ɛ́nɛ́ e ha̧ o bíí mɛ́ gbin gba̧a̧-tɛ‘nɛ́ nɛ̀ gɔn-ta, ɔr nɛ̀ ɛ́nɛ́ hee wa nɛ́ wi-mɔka-see ga na. O wi nɔ‘i gasi kɔ‘i nɛ́ o betom mɛ yiwese. Wa ndak nɛ́ ɗoŋ hɔɔ-zu kɔ-wa, ŋmaŋ nɛ̀ tɛ sɔɔ géè, wen taamɔ kɔ-wa nɛ́ ko bíí.

¹⁹Wa ndaɗi ɓɔn tɛ Krist nɛ̀ dúk nɛ́ zu, zu kiitɛ na. Nɛ́ Krist a̧ ha̧ nyɔŋmɔ ha̧ kiitɛ nɛ̀ oi-aa, de nɛnɛ ha̧ o ɗaɗi in o dokoɗo-tɛ mɛ́ ye ŋmaa, ɓɛɛ kiitɛ gasa hee mɔ'ɔ nɛ dee tɛ Sɔ̧ ga.

²⁰Ŋgimbi n’ɛnɛ fee in Krist, a̧ baa'nɛ́ yinɛ ɗɔɔ ŋgai ko o mɔ, wan mɛ́ mɔɔ-zaŋnu. Ɛ́nɛ́ mbo zu tɛ o pɛrti heembea nɔ'ɔ: «K’ɛ́nɛ́ ba ɛ̧ɛ̧ na, k’ɛ́nɛ́ we i̧i̧ na, k’ɛ́nɛ́ tam mɔ‘i na,» hee ɛ́nɛ́ dúk wen mɔɔ-zaŋnu ga, wen ge?

²²O mɔɔ nɔ‘i nɛ‘i dor'i, kà‘i dé wa nɛ̀ tom kaɗi, ɓɛɛ wa ɗaŋa yambali. O heembea in o usamɔ ko o bíí zaŋnu nɛ́ mɔɔ nɔ‘i.

²³Mɔ nɛ̀ wa de'i duk hee ŋma kpasa iŋa-mgbara-mɔ a̧a̧ sɛnɛ ga. Wa gasi Sɔ̧ nɛ war gasa Sɔ̧ kɔ-wa, mɔk nɛ̀ see-wa nɛ̀ gɔn-ta, usi nɛ̀ bɔnɛ ha̧ tɛ-wa. Ŋma gba̧a̧-mɔ bo tɛ mɔ‘i na; mɛ̀ nɛ́ géé mɔɔ-ha̧-desee ha̧ kiitɛ-wa ɓɛɛ.