Read Northwest Gbaya KOLOSIƐN 3 Bible Online

KOLOSIƐN 3 - Northwest Gbaya bible

KOLOSIƐN 3

¹Hee mɔ'ɔ n’ɛnɛ kpasa in Krist kaɗi ga, ɛ̀nɛ̀ kíí nɛ̀ mɔ wan mɛ́ si ŋgɔn, fara nɛ̀ Krist duk sɛnɛ nɛ̀ war wii-er Sɔ̧;

²wen mgbák mɔ k’ɛ́nɛ́ nɛ̀ mɔ wan mɛ́ ŋgɔn mɛ, nɛ̀ bó nɛ́ sɛn zaŋnu’ɛ na.

³Ɛ́nɛ́ nɛ́ o bíí nɛ̀ fea, ɓɛɛ duka-kpasa k’ɛ́nɛ́ duk nɛ̀ hu̧sa̧-a̧ in Krist tɛ Sɔ̧ mɛ.

⁴Duka-kpasa k’ɛ́nɛ́ nɛ́ Krist, ɓɛɛ ŋgimbi n'aa bé tɛ̀ɛ́ hɔ, ɛ́nɛ́ tɛ́ tɛ̀ in a̧ mbɛt zaŋ gasamɔ.

⁵Ɛ̀nɛ̀ gbɛ́ o mɔɔ-zaŋnu nɛ̀ a̧a̧ tɛ‘nɛ́ yinɛ: mɛ̀ nɛ́ dàlà, ndiŋmɔ, wɔ-tɛ-ŋmaa in wɔ-ɗaŋmɔ, ká bá nɛ̀ zɔm wɔ-mɔ nɛ̀ duk nɛ́ ŋma gasa géé-sɔ̧.

⁶Nɛ́ o mɔɔ nɔ‘i a̧ dak nyimsea ko Sɔ̧ pi̧ zu bíí.

⁷Deemɔ in duka-a k’ɛ́nɛ́ nɛti duka so hee mɔ‘i ga.

⁸Ɓɛɛ kinii, ɛ́nɛ́ mbɛt, ɛ̀nɛ̀ síŋ o pɛrti mɔɔ nɔ'ɔ lɛŋ a nù: nyimsea, kura-see in ɗaŋ, dara in ndiŋ-wen nɛ̀ gbo nɛ̀ kɔ̧ nú-wi.

⁹K’ɛ́nɛ́ de ndela mgbara ŋmaa ɓɔna, wen ɛ́nɛ́ kpɔ̧i̧a̧ gba̧‘a̧ bíí yinɛ tɛ‘nɛ́ hee laa ga in o deemɔ kɔ̧-a̧,

¹⁰ɓɛɛ ɛ́nɛ́ pi̧ nɛ́ mbe bíí tɛ‘nɛ́, wan nɛ̀ kaɗi kpaia tɛ nɛ̀ mbe-a mɛ́ hɔ ŋmaa in gi̧ɔ̧-tɛ wi nɛ̀ dee a̧ na, wen ha̧ a̧ mɛ́ kpa iŋamɔ.

¹¹Ɓɛɛ ha'i mɛ́ tɔ̧‘e, ɛ̧ɛ̧ wi’ɛ nɛ́ Grɛk, kóó Juif, wi-mbii, wi nɛ̀ gɔna bɔr, gɔni-dùk, wi-zaŋbɛɛ, o bara, o bíí nɛ̀ bó nɛ́ bara na, bo ɓɔna. Ɓɛɛ Krist duk nɛ́ mɔ lɛŋ in a̧ a̧a̧ tɛ bii lɛŋ.[2]

¹²Hee mɔ'ɔ nɛ̀ Sɔ̧ kɔ̧ɔ̧‘nɛ́ ɓɛɛ hok'nɛ́ ha̧ war-tɛ‘nɛ́ mɛ́ sa̧ ga, ɛ̀nɛ̀ pí̧ laa-deako, dee demɔ, mɔka-see, ga̧a̧-see in nɔɔ-ŋgiɗi.

¹³Ɛ̀nɛ̀ de munyal ha̧ ŋmaa in o ŋmaa; ɓɛɛ kà ŋma bíí mgbara'nɛ́ nɛ́ bòó nɛ̀ wen in sɛm kɔ‘i, ɓɛɛ wa a̧ é nɛ́ ɗaŋmɔ ha̧ ŋmaa. Hee mɔ'ɔ nɛ̀ Gasa Wan ee nɛ̀ ɗaŋmɔ k’ɛ́nɛ́ h’ɛ́nɛ́ ga, ɛ́nɛ́ mbɛt, ɛ̀nɛ̀ dé kale-a hegɔ.

¹⁴Ɓɛɛ zu-a'i lɛŋ, ɛ̀nɛ̀ dúk nɛ̀ kɔ̧ɔ̧mɔ nɛ̀ duk nɛ́ kpasa mɔɔ-mɔi̧-bíí mɛ́ duk ndaɗi kpɔk in o ŋmaa.

¹⁵Ga̧a̧mɔ ko Krist a̧ ɔ́ wan kɔ̧ see'nɛ́; mɛ̀ nɛ́ ga̧a̧mɔ‘i a̧ Sɔ̧ saa'nɛ́ lɛŋ si sɛnɛ sɛn tɛ kpɔk kiitɛ. Ɓɛɛ ɛ̀nɛ̀ dúk tɛ dee osoko.

¹⁶Wen ko Krist a̧ dúk mgbara'nɛ́ nɛ̀ oi demɔ kɔ‘i lɛŋ; ɛ̀nɛ̀ úsí mɔ, tɔ̧ nɛ̀ mbɔrɔ ha̧ ŋmaa nɛ̀ kpasa iŋa-mgbara-mɔ. Ɛ̀nɛ̀ bíí gima de nɛ̀ osoko ha̧ Sɔ̧ sɛn kɔ̧ see'nɛ́, ɛ̀nɛ̀ bíí gima-wor-sɔ̧, o gima-zɔn-sɔ̧, in o gima nɛ̀ Sa̧a̧ Ɔmi usi h’ɛ́nɛ́.

¹⁷Mɔ n’ɛnɛ tɛ́ tɔ̧ in mɔ n’ɛnɛ tɛ́ de lɛŋ, ɛ̀nɛ̀ dé mɔɔ nɔ‘i nɛ̀ nin Gasa Wan Jesu, de nɛ̀ osoko ha̧ Sɔ̧, Dáà, nɛ̀ ɗoŋ Jesu.

¹⁸Okoo, ɛ̀nɛ̀ mbó zu ha̧ o wíì k’ɛ́nɛ́, hee mɔ'ɔ nɛ̀ bíí ko Gasa Wan tɛ́ de ga.

¹⁹Wiwii, ɛ̀nɛ̀ kɔ̧́ o kóò k’ɛ́nɛ́, ɓɛɛ ká see'nɛ́ tú̧ zu wa na.

²⁰O bem, ɛ̀nɛ̀ mbó zu ha̧ o dáà in nàà k’ɛ́nɛ́ tɛ́ mɔ lɛŋ; nɛ́ mɔ‘i a̧ Gasa Wan kɔ̧ɔ̧ tɛ‘nɛ́.

²¹O dáà in o nàá, k’ɛ́nɛ́ ha̧ tu̧u̧-see ha̧ o bem k’ɛ́nɛ́ na, wen ká nɔɔ-ŋgiɗi kɔ-wa tɛɛ kaɗi.

²²Ɓɛɛ war k’ɛ́nɛ́ o bara, ɛ̀nɛ̀ mbó zu ha̧ dáa-bara k’ɛ́nɛ́ mɛ́ zaŋnu’ɛ tɛ mɔ lɛŋ; mboozu k’ɛ́nɛ́ ha̧ wa bó nɛ́ h’ɛ́nɛ́ mɛ́ de tɛ-wa wen nɛ̀ wa duk zu'nɛ́ na, ɓɛɛ ɛ̀nɛ̀ mbó zu ha̧ wa nɛ̀ kpasa mboozu tɛ yuu kíí Gasa Wan.

²³Kóó ɛ́nɛ́ de nɛ́ ge tom ge, ɛ̀nɛ̀ dé nɛ̀ desee hee ha̧ Gasa Wan ga, nɛ̀ bó nɛ́ hee ha̧ bíí ga na.

²⁴Ɛ̀nɛ̀ íŋ ndé, Gasa Wan tɛ́ ha̧ mɔɔ-oi n'aa ɗafa e ha̧ o bíí kɔ̧-a̧ h’ɛ́nɛ́, oi tom k’ɛ́nɛ́. Wan-tom nɛ́ Krist, ɓɛɛ ɛ́nɛ́ nɛ́ wi-de-tom kɔ̧-a̧.

²⁵Ɓɛɛ wi nɛ̀ de mɔ nɛ̀ yuwar-a na tɛ́ kpa mɔɔ-oi-tom kɔ‘i, ɓɛɛ kɛ̧ɛ̧-mgbara-mɔ beka bo na.