Read Northwest Gbaya KOLOSIƐN 4 Bible Online

KOLOSIƐN 4 - Northwest Gbaya bible

KOLOSIƐN 4

¹O dáa-bara, ɛ̀nɛ̀ dé mɔ nɛ̀ de-a, nɛ̀ yuwar-a in o bara k’ɛ́nɛ́, ɓɛɛ ɛ̀nɛ̀ íŋ ndé, ɛ́nɛ́ a̧a̧ nɛ̀ Wan nɛ̀ duk zu'nɛ́ yiwese mɛ mbɛt.

²Ɛ̀nɛ̀ é see'nɛ́ tɛ kɔfa-sɔ̧. Ɛ̀nɛ̀ dúk tɛ pɛma mɔ nyɛm nɛ̀ ɗoŋ kɔfa-sɔ̧ n’ɛnɛ kɔfi dé nɛ osoko'i.

³Ɛ̀nɛ̀ kɔ́fí Sɔ̧ wen ɛ́ɛ́ mbɛt wen ha̧ Sɔ̧ mɛ́ hú̧í̧ war h’ɛ́ɛ́ wen ha̧‘m mɛ́ tɔ̧ wen ɗukamɔ ko Krist n'am yee zɔɓɔ wen-aa’ɛ.

⁴Ɛ̀nɛ̀ kɔ́fí Sɔ̧ wen am ha̧‘m mɛ́ tɔ̧ mɔ‘i nɛ̀ sa̧a̧-a̧, hee mɔ'ɔ n'am tɛ̀ɛ́ tɔ̧ so ga.

⁵Ɛ̀nɛ̀ dúk nɛ̀ de taamɔ sitɛ ŋmaa in o bíí nɛ̀ bó nɛ́ bíí ko Krist na, ɓɛɛ ɛ̀nɛ̀ dé mɔ tɛ ŋgimbi-a.

⁶Wen k’ɛ́nɛ́ a̧ dé tɛ bíí hee tɔŋ ga, ɓɛɛ ɛ̀nɛ̀ kíí mɛ́ kifi nú ha̧ o ndé nɛ̀ de-a.

⁷Tikik nɛ́ nya'm n'am kɔ̧ɔ̧ nyɛmna. A̧ nɛ́ mgbák gbama wi-de-tom in am tɛ tom ko Gasa Wan, ɓɛɛ nɛ́ a̧ a̧ tɛ́ tɔ̧ nyɛrɛ kɔ‘m lɛŋ h’ɛ́nɛ́.

⁸Gba̧a̧-mɔ n'am tom a̧ nɛnɛ wen-aa nɛ́ wen tɔ̧ɔ̧ nyɛrɛ duka-a k’ɛ́ɛ́ h’ɛ́nɛ́ wen h’ɛ́nɛ́ mɛ́ kpa nɔɔ-ŋgiɗi.

⁹Onesim, kpasa de nya yɛ n’ɛ́ɛ́ kɔ̧ɔ̧ nyɛmna, tɛ́ nɛ̀ in a̧ mbɛt; a̧ nɛ́ bíí k’ɛ́nɛ́ mbɛt. Wa tɛ́ we ɗoŋ mɔ lɛŋ nɛ̀ yak hɛ̧ɛ̧ h’ɛ́nɛ́.

¹⁰Aristark nɛ̀ duk kɔ̧ zɔɓɔ in am fana'nɛ́, in Mark be-nɔkɔ ko Barnabas mbɛt. Bó nɛ́ ɛ́nɛ́ baa zii mɔ n’ɛnɛ tɛ́ de ha̧ Mark kaɗi na nde? Kà a̧ nɛ́ hɔɔ tɛ‘nɛ́, ɓɛɛ ɛ̀nɛ̀ kpɛ́k a̧ nɛ̀ de-a.

¹¹Jesu nɛ̀ wa sa'e Justus fana'nɛ́ mbɛt. O wi nɔ‘i taar'i, ɓaa o Juif nɛ̀ duk nɛ́ o gbama wi-de-tom wen Wan ko Sɔ̧ in am nɛ́ wa ɓɛɛ; mɛ̀ nɛ́ wa a̧ ha̧ ga̧a̧-see ha̧‘m.

¹²Epafras bíí tɛ̀ k’ɛ́nɛ́, wi-de-tom ko Jesu Krist, fana'nɛ́ mbɛt. A̧ kaɗi kɔfa Sɔ̧, bi nɛ̀ biro wen zu'nɛ́ na, wen h’ɛ́nɛ́ mɛ́ duk nɛ̀ nɔɔ-ŋgiɗi, nɛ̀ ŋma wen bo zu'nɛ́ na, in h’ɛ́nɛ́ mɛ́ kpɛk mɔ lɛŋ nɛ̀ Sɔ̧ kɔ̧ɔ̧ h’ɛ́nɛ́ mɛ́ de.

¹³Mi de nɛ́ sedaako wen-aa'e, a̧ zɔk nɛ́ bɔnɛ nyɛmna wen'nɛ́, in wen o wi Laodisee ká bá nɛ̀ o wi Hierapolis mbɛt.

¹⁴Sɛm k’ɛ́ɛ́ Luk, nɛ̀ duk nɛ́ dɔkta, in Demas fana ɛ́nɛ́ mbɛt.

¹⁵Ɛ̀nɛ̀ fán o nya yɛ nɛ̀ a̧a̧ sɛn Laodisee; ɛ̀nɛ̀ fán Nimfa in zuduk bíí ko Krist nɛ̀ mɔi̧ sɛn kɔ̧ tua kɔ̧-a̧.

¹⁶K’ɛ̀nɛ̀ nɛ́ tɔra kalata’ɛ kaɗi, ɓɛɛ ɛ́nɛ́ toma ha̧ zuduk bíí ko Krist sɛn Laodisee wen ha̧ wa mɛ tɔr mbɛt. Ɛ́nɛ́ mbɛt, ɛ̀nɛ̀ tɔ́r kalata nɛ̀ o bíí Laodisee tɛ́ tom h’ɛ́nɛ́.

¹⁷Ɛ̀nɛ̀ tɔ̧́ ha̧ Arkip mɛ́ zɔk tom ko Gasa Wan nɛ̀ a̧a̧ er-a'i nɛ̀ de-a. Ɓɛɛ a̧ a̧ dé nɛ̀ yuwar-a mbɛt.

¹⁸Mɛ̀ nɛ́ mi Paul a̧ yɔr kalata’ɛ nɛ̀ er-am fan nɛ̀ ɛ́nɛ́. Tɛ‘nɛ́'ɛ mbáŋ ɗoŋ-aa ndé, nyak-zɔɓɔ a̧a̧ tɛ‘m. Deemɔ nɛ̀ ta-tɛ ko Sɔ̧ a̧ dúk in'nɛ̀ɛ́.