Read Northwest Gbaya 1 TESALONIK 5 Bible Online

1 TESALONIK 5 - Northwest Gbaya bible

1 TESALONIK 5

¹O nya'm, tɛ́ mɔ ko wese in ŋgimbi-a, ɛ́ɛ́ beka yɔr mɔɔ nɔ‘i h’ɛ́nɛ́ na,

²wen ɛ́nɛ́ nɛ̀ tɛ‘nɛ́ iŋa nɛ̀ de-a'e, Wese ko Gasa Wan tɛ́ duk hee tɛa-a ko wi-zuzu mɛ́ zɛ ga.

³Ŋgimbi nɛ̀ o bíí tɛ́ tɔ̧‘e: «Mɔ lɛŋ duk nɛ̀ ga̧a̧-a̧ in nɛ̀ de-a,» ɓɛɛ bɔnɛ tɛ́ tik zu wa hee gɔma-yí ga, hee nyima-zaŋ ko nàá-zaŋ ga, ɓɛɛ bɔnɛ‘i beka hɔ yɔɔ zu wa na.

⁴Ɓɛɛ nɛ̀ k’ɛ́nɛ́, o nya'm, ɛ́nɛ́ bó ti-tum wen ha̧ ŋgimbi'i mɛ́ kpaŋi ɛ́nɛ́ hee mɔ'ɔ nɛ̀ wi-zuzu kpaŋi nɛ̀ bíí'ɛ ga na.

⁵Nɛ̀ mbetɛ, ɛ́nɛ́ lɛŋ nɛ́ o bem ko sa̧a̧mɔ in wese, ɓɛɛ ɛ́ɛ́ bó nɛ́ bem ko tum in zɛ na.

⁶Hegɔ, k’ɛ́ɛ́ ɔ ya hee o ŋma bíí ga na, ɓɛɛ ɛ̀ɛ̀ pɛ́m mɔ, kasi nɛ̀ zu.

⁷O wi-ɔ-ya ɔ ya mɛ́ zɛ, ɓɛɛ o wi-gbɛ-dɔ̧ɔ̧, nɛ́ zaŋzɛ a̧ wa gbɛ nɛ̀ dɔ̧ɔ̧;

⁸ɓɛɛ nɛ̀ war k’ɛ́ɛ́ n’ɛ̀ɛ̀ dúk nɛ́ ko wese’ɛ, k’ɛ́ɛ́ gbɛ dɔ̧ɔ̧ na. Ɛ̀ɛ̀ pí̧ laa-biro nɛ̀ dúk nɛ́ kɔ̧ɔ̧ɗɔɔwen in kɔ̧ɔ̧mɔ, ɓɛɛ ee-ta wen kpasa-a a̧ dúk nɛ́ laasɔ̧i-biro k’ɛ́ɛ́.

⁹Wen bó nɛ́ Sɔ̧ hoka so ɛ́ɛ́ wen ha̧ nyimsea kɔ̧-a̧ mɛ́ tik zu yɛ na, ɓɛɛ mɛ̀ nɛ́ wen h’ɛ́ɛ́ mɛ́ kpa yuwar-kpasa-a nɛ̀ ɗoŋ Gasa Wan k’ɛ́ɛ́ Jesu Krist.

¹⁰Krist fea wen zu yɛ wen h’ɛ́ɛ́ mɛ́ duk kpasa kpɔk in a̧, kóó ɛ́ɛ́ ɔɔ ya, kóó ɛ́ɛ́ ɔ ya na mbɛt.

¹¹Mɛ̀ nɛ́ wen hegɔ, ɛ̀nɛ̀ há̧ ŋgai ha̧ ŋmaa gbak nɛ̀ ŋmaa in o ŋmaa hee mɔ'ɔ n’ɛnɛ de'i ga.

¹²O nya-ɛɛ, ɛ́ɛ́ ak h’ɛ́nɛ́ mɛ́ mbo zu in o wi nɛ̀ e nɛ́ tɛ̀ tɛ́ bɔnɛ wen mgbɔɔ‘nɛ́ tɛ yuwar ko Gasa Wan, in wen gaia'nɛ́.

¹³Ɛ̀nɛ̀ tú̧ tɛ-wa ɓɔnsɛnɛ nɛ̀ kɔ̧ɔ̧mɔ wen tom nɛ̀ wa de'i. Ɛ̀nɛ̀ yá zaŋ ga̧a̧mɔ in o ŋmaa.

¹⁴O nya-ɛɛ, ɛ́ɛ́ ai nú h’ɛ́nɛ́, ɛ̀nɛ̀ gáí o wi-tɛɛri, ɛ̀nɛ̀ há̧ nɔɔ-ŋgiɗi ha̧ o wi nɛ̀ kpa mɔ dɔk na, ɛ̀nɛ̀ gbák o ziɓa-bíí, ɛ̀nɛ̀ dé munyal in o bíí lɛŋ.

¹⁵Ɛ̀nɛ̀ zɔ́k tɛ‘nɛ́ wen ká ŋma bíí tɛ́ɛ̀ kifi er ɗaŋmɔ ha̧ ŋma-a, ɓɛɛ ɛ̀nɛ̀ kíí mɛ́ de nɛ́ demɔ mgbara ŋmaa in sitɛ o bíí lɛŋ ɓɔnsɛnɛ.

¹⁶Ɛ̀nɛ̀ dúk nɛ̀ desee ɓɔnsɛnɛ,

¹⁷ɛ̀nɛ̀ kɔ́fí Sɔ̧ ɓɔnsɛnɛ;

¹⁸ɛ̀nɛ̀ dé osoko ha̧ Sɔ̧ tɛ́ mɔ lɛŋ, wen mɔ nɛ̀ Sɔ̧ kɔ̧ɔ̧ h’ɛ́nɛ́ mɛ́ de nɛ́ mɔ‘i nɛ̀ ɗoŋ Jesu Krist.

¹⁹K’ɛ́nɛ́ de ha̧ Sa̧a̧ Ɔmi mɛ́ bi na.

²⁰K’ɛ́nɛ́ zɔk ha̧a̧mɔ-tɔ̧ɔ̧-wen oi nú Sɔ̧ hee geemɔ ga na.

²¹Ɛ̀nɛ̀ kɛ̧́ mgbara mɔ lɛŋ, ɓɛɛ ɛ̀nɛ̀ kásí nɛ́ mɔ nɛ̀ ɔ dee.

²²Ɛ̀nɛ̀ zɔ́k tɛ‘nɛ́ tɛ yuwar ɗaŋmɔ lɛŋ.

²³Sɔ̧ Wan-ga̧a̧mɔ nɛ̀ tɛ-wi a̧ ɗáfí war-tɛ‘nɛ́ nɛ̀ sa̧a̧-a̧ war kpɔk, pɛm nɛ̀ taamɔ k’ɛ́nɛ́, in sɔ̧-tɛ‘nɛ́ gu nɛ̀ kiitɛ‘nɛ́ nɛ̀ de-a, nɛ̀ ŋma wen mɛ́ tɔ̧ zu'nɛ́ beka bó na, ŋgimbi nɛ̀ Gasa Wan k’ɛ́ɛ́ Jesu tɛ́ pii nɛ̀ ɗoŋ.

²⁴Wi nɛ̀ sa'nɛ́‘i nɛ́ wi-yor-ɗoŋ wen kɔ‘i, ɓɛɛ a̧ tɛ́ de mɔ‘i hɔ gba̧a̧.

²⁵O nya-ɛɛ, ɛ̀nɛ̀ kɔ́fí Sɔ̧ wen yɛ mbɛt.

²⁶Ɛ̀nɛ̀ fán o nya-ɛɛ lɛŋ nɛ̀ fanamɔ ko o bíí ko Sɔ̧.

²⁷Mi ai nú h’ɛ́nɛ́ nɛ̀ nin Gasa Wan, h’ɛ́nɛ́ mɛ́ tɔr kalata’ɛ ti o nya-ɛɛ lɛŋ.

²⁸Deemɔ nɛ̀ ta-tɛ ko Gasa Wan k’ɛ́ɛ́ Jesu Krist a̧ dúk in'nɛ̀ɛ́.