Read Northwest Gbaya JOSUE 1 Bible Online

JOSUE 1 - Northwest Gbaya bible

JOSUE 1

¹Moisɛ wi-de-tom ko GASA WAN fea, ɓɛɛ GASA WAN tɔ̧ ha̧ Josue bem ko Nun, wi-gbak Moisɛ:

²«Moisɛ, wi-de-tom kɔ‘m fea; kinii mɛ̀ kúr, mɛ́ in o dukbíí nɔ'ɔ lɛŋ, ɛ̀nɛ̀ kú Jurdɛn h’ɛ́nɛ́ mɛ ye nù n'am ha̧ ha̧ o be Israɛl.

³Fara lɛŋ nɛ naŋ‘nɛ́ tɛ yar sɛnɛ, mi ha̧a̧ h’ɛ́nɛ́ hee mi tɔ̧ɔ̧ so ha̧ Moisɛ ga.

⁴Nù k’ɛ́nɛ́ tɛ ku̧ naŋ-a tɛ ŋga-gbárà nɛ war ká̧-zan-mɛ́-ɗɔɔ hɔ Libaŋ nɛ war ŋgɔn hɔ sɛn tɛ gasa nana-yì nɛ‘i sa'e Efrat kpa nɛ̀ nù ko o be Hit hɔ nɛnɛ tɛ Gba-tɔp nɛ a̧a̧ nɛ war yee-wese.

⁵Tɛ ŋgimbi nɛ mɛ duk kpasa, ŋma bíí kpɔk beka yor ti mɛ na; mi tɛ duk in mɛɛ hee mɔ'ɔ n'am duka so nɛnɛ in Moisɛ ga. Mi beka e mɛ duk na, mi beka e gbaka mɛ duk na mbɛt.

⁶Mɛ̀ ŋgáí tɛ-mɛ in mɛ̀ nɔ́ ŋgiɗi wen nɛ́ mɛ'ɛ tɛ mgbɔ dukbíí'ɛ ye nɛ̀ nù nɛ tɛ duk nɛ mɔɔ-oi kɔ-wa; nɛ́ nù‘i a̧‘m kana so mɔ ha̧ dáà kɔ-wa ndé, mi tɛ ha̧ ha̧ wa.

⁷Ɓɛɛ kɔ-mɛ, mɛ̀ yór nɛ̀ nɔa-a, mɛ̀ nɔ́ ŋgiɗi; mɛ̀ dé mɔ nyɛm nɛ ɗoŋ Heembea lɛŋ nɛ Moisɛ wi-de-tom kɔ‘m yɔra ha̧ mɛ. Ká mɛ́ a̧r si war gale, kóó si war wiiko na, wen ha̧ mɛ mɛ kpa de sɔnti tɛ mɔ lɛŋ nɛ̀ mɛ tɛ de.

⁸Wen nɛ̀ yɔra zaŋ kalata Heembea'i beka yu nú-mɛ na; mɛ̀ yámbí a̧ nɛ ɗɔɔ nú-mɛ, mɛ zɛ in mɛ wese wen ha̧ mɛ mɛ de mɔ nɛ yɔra zaŋ-aa lɛŋ; mɛ tɛ kpa de sɔnti, ɓɛɛ hegɔ, mɛ tɛ kpa mɔ nɛ mɛ kii.

⁹Bó nɛ́ mi tɔ̧ɔ̧ ha̧ mɛ ndé, mɛ̀ yór nɛ̀ nɔa-a in mɛ̀ nɔ́ ŋgiɗi na nde? Ká tɛ-mɛ nak na, ká kíì dé mɛ na, wen GASA WAN Sɔ̧ kɔ-mɛ tɛ duk in mɛɛ fara lɛŋ nɛ mɛ tɛ nɛ.»

¹⁰Nɛ mɔ'ɔ nɛ Josue tɔ̧ɔ̧ ha̧ o gasawi nɛ duk zu o bíí hee mɔ'ɔ ga:

¹¹«Ɛ̀nɛ̀ nɛ́ɛ̀ yár dam kɔ̧ gbagari, ɓɛɛ ɛ̀nɛ̀ hé mbea ha̧ o bíí: ‹Ɛ̀nɛ̀ ɗáfí o nyɔŋmɔ-yuwar, wen zaŋ zɛ taar, ɛnɛ tɛ ku Jurdɛn’ɛ wen baa nù nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́, ha̧ nù‘i mɛ duk nɛ k’ɛ́nɛ́.› »

¹²Ɓɛɛ Josue tɔ̧ ha̧ o bezaŋ Rubɛn, o bezaŋ Gad ká bá nɛ̀ reeta zuduk ko Manase:

¹³«Tɛ‘nɛ́ a̧ mbaŋ ɗoŋ wen ko Moisɛ, wi-de-tom ko GASA WAN, nɛ̀ baa tɔ̧ so h’ɛ́nɛ́‘e GASA WAN Sɔ̧ k’ɛ́nɛ́ ha̧a̧ ɔma-tɛ h’ɛ́nɛ́; a̧ ha̧a̧ nù'ɛ h’ɛ́nɛ́.

¹⁴O okoo in o obem gu nɛ o mɔ-dai k’ɛ́nɛ́ tɛ ɓɔn tɛ nù nɛ Moisɛ ha̧a̧ so h’ɛ́nɛ́ nɛ kur Jurdɛn. Ɓɛɛ k’ɛ́nɛ́, o ŋga wi-biro lɛŋ, ɛ̀nɛ̀ yák ti ha̧ o nya'nɛ́ nɛ̀ o boi-biro k’ɛ́nɛ́ wen gbaka wa

¹⁵hɔ ŋgimbi nɛ GASA WAN tɛ ha̧ ɔma-tɛ ha̧ wa hee mɔ'ɔ n'aa ha̧a̧ so h’ɛ́nɛ́ ga, in ha̧ wa mɛ kpa nù nɛ̀ GASA WAN Sɔ̧ k’ɛ́nɛ́ ha̧a̧ ha̧ wa mbɛt, sɛk’ɛnɛ pia ɗoŋ tɛ nù nɛ̀ Moisɛ wi-de-tom ko GASA WAN ha̧a̧ h’ɛ́nɛ́ nɛ kur Jurdɛn nɛ war daŋa-wese.»

¹⁶Ɓɛɛ wa kifi nú ha̧ Josue hee mɔ'ɔ ga: «Mɔ n’ɛnɛ tɔ̧ɔ̧ h’ɛ́ɛ́ lɛŋ, ɛɛ tɛ de, in fara lɛŋ n’ɛnɛ tɛ tom yɛ si sɛnɛ, ɛɛ tɛ nɛ.

¹⁷Ɛɛ tɛ mbo zu h’ɛ́nɛ́ tɛ mɔ lɛŋ hee mɔ'ɔ n’ɛɛ mboo so nɛ̀ zu ha̧ Moisɛ ga; ɓɛɛ GASA WAN Sɔ̧ k’ɛ́nɛ́ tɛ duk in'nɛ̀ɛ́ hee mɔ'ɔ n'aa duka so nɛnɛ in Moisɛ ga.

¹⁸Ɓɛɛ wi nɛ̀ tɛ de ŋgazu, nɛ̀ beka zii wen k’ɛ́nɛ́, ɓɛɛ nɛ̀ beka mbo zu tɛ mɔ lɛŋ n’ɛnɛ tɛ tɔ̧ na, wi tɛ gbɛ a̧ yinɛ. Ɛ̀nɛ̀ yór nɛ̀ nɔa-a, ɛ̀nɛ̀ nɔ́ ŋgiɗi!»