Read Northwest Gbaya JOSUE 13 Bible Online

JOSUE 13 - Northwest Gbaya bible

JOSUE 13

¹Josue sɔka kaɗi in pɛ-a dɔka kaɗi mbɛt, ɓɛɛ GASA WAN tɔ̧ ha̧ a̧: «Mɛ sɔka kaɗi in pɛ-mɛ dɔka kaɗi mbɛt; ɓɛɛ oi nù nɛ ɓɔna wen baa-a ɔ gasa.

²O oi nù nɛ ɓɔna nɛ́ mɔɔ nɔ'ɔ: nù ko o be Filistii, nu ko o be Gɛsur,

³ká bá nɛ̀ nù ko o be Av. Nu'i ku̧u̧naŋ-a nɛ be yì nɛ‘i sa'e Sihɔr nɛ ndaɗa in Egiptɛ hɔ nɛnɛ tɛ gbisi Ekrɔŋ nɛ war ká̧-zan-mɛ́-ŋgɔn, nɛ wa zɔk hee nù ko Kanaŋ ga. O be-wan Filistii mɔɔrɔ: nɛ́ wannu Gaza, wannu Asdod, wannu Askelɔŋ, wannu Gat, in wannu Ekrɔŋ.

⁴Oi nù nɛ ɓɔna nɛ war ɗɔɔ wen baa-a mbɛt nɛ nù ko o be Kanaŋ lɛŋ in Meara nɛ duk nɛ́ ko o be Sidɔŋ hɔ Afɛka hɔ nɛnɛ tɛ gbisi ko o be Amɔr;

⁵sɛka nù ko o be Gebal gu nɛ Libaŋ nɛ oi-aa nɛ war daŋa-wese, ku̧u̧naŋ-a nɛ Bal-Gat ká̧ naŋ kaya Hɛrmɔŋ hɔ nɛnɛ tɛ nú Lebo-Hamat.

⁶Wi tɛ ba nù ko o wi-ɔ-mgbara kaya mbɛt, ku̧u̧naŋ-a nɛ Libaŋ hɔ Misrefot-Maim in nù ko o be Sidɔŋ lɛŋ; nɛ́ mi a̧ tɛ ndak wa yinɛ ti o be Israɛl. Kɔ-mɛ, mɛ̀ pí̧ tani kɛ̧ nɛ nù ha̧ o be Israɛl kànà hee mɔ'ɔ n'am tɔ̧ɔ̧ so ha̧ mɛ ga ɓɛɛ.

⁷Kinii, mɛ̀ kɛ̧́ nù'ɛ ha̧ duk nɛ̀ mɔɔ-oi ko o zuduk be Israɛl mɔɔrɔ-ɗoŋ-naar in reeta zuduk ko Manase.»

⁸Ɓɛɛ nɛ ko ɓii reeta zuduk ko Manase, wa in zuduk ko Rubɛn in ko Gad, wa a̧a̧ so kɔ-wa nɛ mɔɔ-oi nɛ Moisɛ wi-de-tom ko GASA WAN ha̧a̧ so ha̧ wa nɛ war kur Jurdɛn ɓi, si war daŋa-wese kaɗi.

⁹Nù‘i ku̧u̧ naŋ nɛ Arɔɛr nɛ duk sɛn ká̧ gboŋgo Arnɔŋ in ye nɛ a̧a̧ kɔ̧ gboŋgo'i tɛ tɔyɛɛ gɔn-see-nù lɛŋ ku̧u̧naŋ-a nɛ Madaba hɔ nɛnɛ Dibɔŋ.

¹⁰O ye ko Sihɔŋ, wannu ko o be Amɔr, nɛ ɔɔ so wan sɛn Hɛsbɔŋ, ɓir nɛ gbìsí-nù ko o be Amɔŋ,

¹¹hɔ nɛnɛ Galad tɛ nù ko o be Gɛsur in ko o be Maka, daŋ nɛnɛ si zu kaya Hɛrmɔŋ ká bá nɛ̀ Basaŋ lɛŋ nɛ oi-aa hɔ Salka.

¹²Sɛn Basaŋ nù ko Og nɛ ɔɔ so wan sɛn Astarot in sɛn Edrɛi nɛ́ kɔ-wa mbɛt. Og duka nɛ́ ŋma sɔŋkur wi nɛ ɓɔna kpasa sɛn mgbara o be Refaim. Moisɛ bìì so o wannu nɔ‘i yiitoo'i, ɓɛɛ a̧ ba wan er-wa yinɛ.

¹³Ɓɛɛ o be Israɛl ba so wan er o be Gɛsur in o be Maka yinɛ na. Hegɔ Gɛsur in Maka ɓɔna kɔ‘i see Israɛl hɔ sɔsɔɔ.

¹⁴Mɛ̀ nɛ́ zuduk ko Levii kpɔk a̧ kpa mɔɔ-oi na. O mɔ nɛ o bíí ha̧ ha̧ GASA WAN Sɔ̧ ko Israɛl duka nɛ́ mɔɔ-oi kɔ-wa hee mɔ'ɔ n'aa tɔ̧ɔ̧ so ha̧ wa ga.

¹⁵Moisɛ kɛ̧ɛ̧ so nù ha̧ zuduk ko Rubɛn nyɛm nɛ ɗoŋ nú-gara kɔ-wa.

¹⁶Nù kɔ-wa ku̧u̧ naŋ nɛ Arɔɛr nɛ duk sɛn ká̧ gboŋgo Arnɔŋ in ye nɛ a̧a̧ sɛn kɔ̧ gboŋgo mbɛt in tɔyɛɛ gɔn-see-nù ká̧ Madaba.

¹⁷Hɛsbɔŋ in o ye nɛ zii nɛ̀ a̧ nɛ a̧a̧ sɛn tɔyɛɛ gɔn-see-nu, Dibɔŋ, Bamɔt-Bal, Bɛt-Bal-Mɛɔŋ,

¹⁸Yahas, Kɛdɛmɔt, Mefat,

¹⁹Kiriataim in Sibna, nɛ́ kɔ-wa, ká bá nɛ̀ Sɛrɛt-Has-Sahar nɛ duk zu kaya kɔ̧ ɗɔŋgɔ mɛ,

²⁰in Bɛt-Pɛɔr, o ká̧ naŋ kaya Pisga, sɛka Bɛt-Ha-Yesimɔt mbɛt.

²¹O ye mɛ tɔyɛɛ gɔn-see-nù lɛŋ in nù ko Sihɔŋ, wannu ko o be Amɔr nɛ ɔɔ so wan sɛn Hɛsbɔŋ lɛŋ, duka nɛ́ kɔ-wa. Moisɛ bìì so wannu Sihɔŋ in o be-wan Madiaŋ: Evi, Rekɛm, Sur, Hur in Rɛba. O wi nɔ‘i nɛ́ o be-wan ko Sihɔŋ nɛ ɔɔ so tɛ nù‘i.

²²Ɓɛɛ nɛ ko Balam, wi-zɔk-mɔ, bem ko Beɔr, o be Israɛl gbɛɛ so a̧ nɛ gba-paa in o dɔka bíí.

²³Gbìsí-nù ko o bezaŋ Rubɛn duka nɛ́ Jurdɛn in ká̧ a̧. Mɔɔ-oi nɛ zuduk Rubɛn kpaa nyɛm nɛ ɗoŋ o nú-gara kɔ-wa nɛ́ o gasa ye in o geɗek-a nɔ‘i.

²⁴Moisɛ kɛ̧ɛ̧ so nù ha̧ zuduk ko Gad nyɛm nɛ ɗoŋ nú-gara kɔ-wa.

²⁵Nù nɛ wa kpaa nɛ Yazɛr, o ye Galad lɛŋ, reeta nù ko o be Amɔŋ hɔ sɛn Arɔɛr nɛ zɔk ŋmaa in Raba.

²⁶Hɔ-ɗoŋ-aa ku̧ naŋ nɛ Hɛsbɔŋ hɔ sɛn Ramat-Mispɛ in Betonim; sɛka ku̧u̧naŋ-a nɛ Mahanayim hɔ gbìsí Debir,

²⁷hɔ nɛnɛ ɗɔŋgɔ tɛ o ye Bɛt-Haram, Bɛt-Nimra, Sukot in Safɔŋ nɛ duka so nɛ oi nù ko Sihɔŋ, wannu Hɛsbɔŋ. Jurdɛn duk nɛ gbìsí hɔ nɛnɛ ndɔŋ nú Gba-tɔp Kinɛrɛt nɛ kur Jurdɛn si war daŋa-wese.

²⁸Mɔɔ-oi nɛ zuduk ko Gad kpaa nyɛm nɛ ɗoŋ nú-gara kɔ-wa nɛ́ o gasa ye in o geɗek-a nɔ‘i.

²⁹Moisɛ kɛ̧ɛ̧ nù ha̧ reeta zuduk ko Manase nyɛm nɛ ɗoŋ nú-gara kɔ-wa.

³⁰Nù kɔ-wa ku̧u̧naŋ nɛ Mahanayim; nɛ́ Basaŋ nɛ oi-aa nɛ Og ɔɔ so wan sɛnɛ, in o be ye ko Yair lɛŋ sɛn nú Basaŋ; nɛ́ ye ɓu-mɔɔrɔ-ɗoŋ-kpɔk.

³¹Reeta Galad in Astarot in Edrɛi, o ye nù ko Og sɛn Basaŋ, duka nɛ ko o bem ko Makir, bem ko Manase wen nɛ tɔ̧, ko reeta o bem ko Makir nyɛm nɛ ɗoŋ o nú-gara kɔ-wa.

³²Mɛ̀ nɛ́ hegɔ a̧ Moisɛ kɛ̧ɛ̧ nɛ nù nú gbárà Mɔab nɛ kur Jurdɛn mgbák ti Jeriko si war daŋa-wese.

³³Ɓɛɛ Moisɛ ha̧ so mɔɔ-oi ha̧ zuduk ko Levii na. Mɛ̀ nɛ́ GASA WAN Sɔ̧ a̧ duka nɛ́ mɔɔ-oi kɔ-wa hee mɔ'ɔ n'aa tɔ̧ɔ̧ so ha̧ wa ga.