Read Northwest Gbaya JOSUE 14 Bible Online

JOSUE 14 - Northwest Gbaya bible

JOSUE 14

¹Mɔɔ-oi nɛ o be Israɛl kpaa sɛn nú Kanaŋ, mɔ nɛ wi-ɗafi-sɔ̧ Eleazar in Josue bem ko Nun in o gasawi nutua ko o duk be Israɛl usa ha̧ wa nɛ́ mɔ'ɔ.

²Wa pi̧i̧ nɛ tani kɛ̧ nɛ nù ha̧ zuduk mɔɔrɔ-ɗoŋ-naar in ha̧ reeta zuduk ko Manase nyɛm nɛ ɗoŋ mɔ nɛ GASA WAN tɔ̧ɔ̧ so ha̧ Moisɛ.

³Moisɛ ha̧a̧ so mɔɔ-oi ha̧ zuduk yiitoo in ha̧ ŋma reeta zuduk nɛ war kur Jurdɛn, ɓɛɛ a̧ ha̧ ŋma ha̧ be Levii na.

⁴O bem ko Jozɛf duka so nɛ́ zuduk yiitoo: zuduk ko Manase in zuduk ko Efraim. Ɓɛɛ wa ha̧ ŋma mɔɔ-oi ha̧ o be Levii na. Wa ha̧a̧ nɛ ŋma ye ha̧ wa mɛ ya sɛnɛ, in o fara-nyɔŋ-mɔ ko mɔ-dai wen mɔ-dai kɔ-wa in o mbɔi kɔ-wa.

⁵O be Israɛl kɛ̧ɛ̧ nù hee mɔ'ɔ nɛ GASA WAN tɔ̧ɔ̧ so ha̧ wa nɛ nu Moisɛ ga.

⁶O bezaŋ Juda tɛɛ kpa Josue sɛn Gilgal, ɓɛɛ Kalɛb bem ko Yefunɛ be Keniz tɔ̧ ha̧ a̧: «Mɛ iŋa mɔ nɛ GASA WAN tɔ̧ɔ̧ ha̧ Moisɛ bíí ko Sɔ̧ wen zu'm in wen zu mɛ sɛn Kadɛs-Barnɛa.

⁷Mi a̧a̧ so nɛ pɛ ɓu-naar ŋgimbi nɛ Moisɛ wi-de-tom ko GASA WAN toma so nɛ‘m nɛ Kadɛs-Barnɛa mɛ nɛ̀ɛ́ kpe naŋ nù, ɓɛɛ mi pii ɗoŋ we ɗoŋ mɔ‘i ha̧ a̧ nɛ sa̧a̧-a̧.

⁸O bíí nɛ daŋa so in am gbina gba̧a̧-tɛ dukbíí, ɓɛɛ kɔ‘m, mi de so kànà nɛ́ mɔ nɛ GASA WAN Sɔ̧ kɔ‘m kɔ̧a̧.

⁹Wese'i, Moisɛ kana mɔ hee mɔ'ɔ ga: ‹Mi kana mɔ‘e nù nɛ naŋ-mɛ tɛ fo tɛ duk nɛ kɔ-mɛ ɓɔnsɛnɛ nɛ̀ mɔɔ-oi, mɛ in o bezaŋ-mɛ, wen mɛ dee mɔ nɛ GASA WAN Sɔ̧ kɔ‘m kɔ̧a̧.›

¹⁰Kinii, GASA WAN ee ha̧‘m mɛ duk kpasa nyɛm nɛ ɗoŋ ha̧a̧nú kɔ̧-a̧. Dee nɛ pɛ ɓu-naar-zua-mɔɔrɔ a̧ GASA WAN tɔ̧ɔ̧ nɛ wen’ɛ ha̧ Moisɛ. Ŋgimbi'i, Israɛl yambali so nɛ ŋga-gbárà nɛnɛ, ɓɛɛ kinii mi a̧a̧ nɛ pɛ ɓu-mɔɔrɔ-ɗoŋ-taar-zua-mɔɔrɔ.

¹¹Ŋgai a̧a̧ kànà tɛ‘m sɔsɔɔ hee wese nɛ Moisɛ toma so nɛ‘m ga. Mi a̧a̧ kànà nɛ ŋgai kɔ‘m hɔ sɔsɔɔ wen dee biro in wen yara-a nɛnɛ in pia ɗoŋ mbɛt.

¹²Ŋgimbi hɔa ha̧ mɛ mɛ ha̧ kaya nɛ GASA WAN ha̧a̧ so nú sɛnɛ wese'i ha̧‘m kaɗi. Mɛ zia so wese'i ndé, o be Anak a̧a̧ so hi̧i̧, ká bá nɛ̀ o gasa ŋga ye. Ŋmafara GASA WAN tɛ duk in am, ɓɛɛ mi baa nù‘i hee mɔ'ɔ nɛ GASA WAN tɔ̧ɔ̧ so ga.»

¹³Josue toka de yoŋgo zu Kalɛb bem ko Yefunɛ, ɓɛɛ a̧ ha̧ Hebrɔŋ ha̧ a̧ nɛ̀ mɔɔ-oi.

¹⁴Nɛ́ hegɔ sa wa ha̧ Hebrɔŋ ha̧ Kalɛb bem ko Yefunɛ be Keniz hɔ sɔsɔɔ; mɛ̀ nɛ́ wen n'aa dee kànà mɔ nɛ GASA WAN Sɔ̧ ko Israɛl kɔ̧ɔ̧ so.

¹⁵Nin Hebrɔŋ duka nɛti nɛ́ Kiriat-Arba wen Arba duka nɛ nin gasawi mgbara o be Anak. Ŋgimbi'i, nù duka tɛ ga̧a̧mɔ.